សមាគមសម្ព័ន្ធអ្នកសារព័ត៌មានកម្ពុជា

អាជ្ញាធរខេត្តសៀមរាបរារាំងការធ្វើធម្មយាត្រារបស់ក្រុមអ្នកការពារសិទ្ធិមនុស្ស

អាជ្ញាធរខេត្តសៀមរាបមកសួរនាំ និងរារាំងពលរដ្ឋធ្វើធម្មយាត្រាត្រង់ចំណុចភូមិខ្នារ សង្កាត់ជ្រាវ ក្រុងសៀមរាប បន្ទាប់ពីបានធ្វើដំណើរជិត៦គីឡូពីទីតាំងព្រះអង្គចេក ព្រះអង្គចម រូបភាពថតចេញពីវីដេអូនៅថ្ងៃទី៦ ខែធ្នូ ឆ្នាំ២០២៣។
អាជ្ញាធរខេត្តសៀមរាបមកសួរនាំ និងរារាំងពលរដ្ឋធ្វើធម្មយាត្រាត្រង់ចំណុចភូមិខ្នារ សង្កាត់ជ្រាវ ក្រុងសៀមរាប បន្ទាប់ពីបានធ្វើដំណើរជិត៦គីឡូពីទីតាំងព្រះអង្គចេក ព្រះអង្គចម រូបភាពថតចេញពីវីដេអូនៅថ្ងៃទី៦ ខែធ្នូ ឆ្នាំ២០២៣។

អាជ្ញាធរខេត្តសៀមរាបបានរារាំងក្រុមអ្នកការពារសិទ្ធិមនុស្ស និង​ព្រះសង្ឃ​ជិត២០អង្គ/នាក់ ដែលធ្វើធម្មយាត្រាដើរដោយថ្មើរជើងដើម្បីលើកកម្ពស់សេរីភាព និង​​យុត្តិធម៌សង្គម ដោយថា គ្មានសណ្ដាប់ធ្នាប់និងពុំបានសុំសហការជាមុន នៅថ្ងៃទី៦ ខែធ្នូ នេះ។ ប៉ុន្តែ​ក្រុម​អ្នកការពារ​សិទ្ធិមនុស្សបានបដិសេធចំពោះការចោទប្រកាន់នេះ។

បន្ទាប់ពីសង្កេតឃើញពលរដ្ឋក្នុងសង្គមមិនសូវមានការយោគយល់អធ្យាស្រ័យគ្នា អង្គការ សង្គមស៊ីវិល និងយុវជន បានធ្វើធម្មយាត្រាផ្សាយមេត្តាចិត្តផ្សារភ្ជាប់នឹងសិទ្ធិមនុស្ស ចាប់ពី ថ្ងៃពុធនេះ ដោយធ្វើដំណើរពីខេត្តសៀមរាប ឆ្ពោះទៅកាន់រាជធានីភ្នំពេញ ដើម្បីចូលរួមទិវា​សិទ្ធិ​មនុស្ស១០ធ្នូ ក្រោម​មូលបទ «ធានាសេចក្តីថ្លៃថ្នូរ សេរីភាព និងយុត្តិធម៌ដល់​ពលរដ្ឋ​គ្រប់រូប»

ស្នងការនគរបាលខេត្តសៀមរាប លោក តេង ច័ន្ទណាត មានប្រសាសន៍ថា ការដើរតាមដងផ្លូវ​របស់ក្រុមធម្មយាត្រាពុំបានសុំការសហការជាមួយអាជ្ញាធរមូលដ្ឋាន ហើយអាជ្ញាធរ​គ្រាន់​តែ​រក្សាសណ្ដាប់ធ្នាប់ដើម្បីបញ្ចៀសគ្រោះថ្នាក់ដែលអាចកើតមានរវាងអ្នកដើរហែក្បួននិងពលរដ្ឋធ្វើដំណើរតាមផ្លូវ។

លោក ច័ន្ទណាត និយាយថា «ចំពោះខ្ញុំជាសមត្ថកិច្ចយើងអនុវត្តរបស់​គោលការណ៍​គណៈ​បញ្ជាការ​ខេត្ត ហើយអ្វីដែលសំខាន់គឺគាត់មិនមានការសហការណ៍ជាមួយអាជ្ញាធរមូលដ្ឋាន ដែលគាត់មិនបានធ្វើការស្នើសុំឱ្យមានការសហការណ៍»

មន្រ្តីការពារសិទ្ធិមនុស្សសមាគមអាដហុក លោក សឹង សែនករុណា ដែលចូលរួមក្នុងការដើរ​ហែក្បួន​ផងដែរ អះអាងថា ការដង្ហែធម្មយាត្រាគឺមានរបៀបរៀបរយ ហើយបាន​ដើរជិត​៦​គីឡូម៉ែត្រ ដោយមិនមានការបង្កឱ្យខូចសណ្ដាប់ធ្នាប់សាធារណៈដូចការលើកឡើង​របស់​អាជ្ញាធរ​ទេ។

លោក ករុណា ថ្លែងថា៖ «ខ្ញុំទទូចឱ្យមានការពិចារណាឡើងវិញ អំពីការរារាំងសកម្មភាព សេរីភាព បញ្ចេញមតិរបស់ប្រជាពលរដ្ឋ។ ចឹងវាគប្បីមានការជួយ ថែរក្សាការពារសុវត្ថិភាព​ឱ្យក្រុមធម្មយាត្រាធ្វើទៅដោយរលូន មិនគួរមានការបន្ទច់បង្អាក់បែបហ្នឹងទេ»។ 

អ្នកសម្របសម្រួលការធ្វើធម្មយាត្រា លោក កើត សារ៉ាយ ថា ក្រុមការងាររបស់លោកបាន​ព្យាយាម​ដាក់លិខិតស្ដីពីការដើរក្បួននេះទៅកាន់រដ្ឋបាលខេត្តសៀមរាប កាលពីព្រឹក​ម្សិលមិញ ប៉ុន្តែមន្រ្តីនៅទីនោះបានខលប្រាប់ឱ្យយកវិញនាពេលរសៀល។ យ៉ាងណា លោក ថា មិនមានអ្នកទៅយកលិខិតជូនដំណឹងពីការហែក្បួននេះមកវិញឡើយ។

លោកលើកឡើងថា៖ «ខ្ញុំយល់ថាជារឿងដដែលៗ ដែលនីតិទី៧ហើយ រដ្ឋាភិបាលថ្មីហើយ នៅតែអនុវត្តកម្មវិធីចាស់ នៅតែរឹតត្បិតសេរីភាព ការបញ្ចេញមតិនៅទីសារធារណៈ ការ​រឹត​ត្បិតសេរីភាពជួបជុំនៅទីសាធារណៈ វានៅតែរបៀបដដែល»។

អាជ្ញាធរខេត្តសៀមរាបមកសួរនាំ និងរារាំងពលរដ្ឋធ្វើធម្មយាត្រាត្រង់ចំណុចភូមិខ្នារ សង្កាត់ជ្រាវ ក្រុងសៀមរាប បន្ទាប់ពីបានធ្វើដំណើរជិត៦គីឡូម៉ែត្រ ពីទីតាំងព្រះអង្គចេក ព្រះអង្គចម។ រូបថតនៅថ្ងៃទី០៦ ខែធ្នូ ឆ្នាំ២០២៣។ (រូបថតផ្ដល់ឱ្យ)

កាលពីថ្ងៃទី៥ ខែធ្នូ ក្រុម​អង្គការ​សង្គម​ស៊ីវិល​ សមាគម​ សហជីព​ ជាង​១០០នាក់​ នាំ​គ្នា​ដុត​ធូប​មុខ​ប្រាសាទ​អង្គរវត្ត​ និង​ថ្លែងការណ៍ពី​កម្មវិធី​ធម្មយាត្រា​ ផ្សាយមេត្តាចិត្តផ្សារភ្ជាប់នឹង​សិទ្ធិ​មនុស្ស​ ក្រោម​មូលបទ «ធានាសេចក្តីថ្លៃថ្នូរ សេរីភាព និងយុត្តិធម៌ដល់ពលរដ្ឋគ្រប់រូប»​ ក្រោយ​មើល​ឃើញថា សីលធម៌សង្គមនៅកម្ពុជាមានការធ្លាក់ចុះ ដោយពលរដ្ឋចូលចិត្តប្រើហិង្សា​ដាក់​គ្នា និងការរំលោភបំពានសិទ្ធិមនុស្សនៅតែបន្តកើតមាន។

នាយករដ្ឋបាលខេត្តសៀមរាប លោក លី វណ្ណៈ មានប្រសាសន៍ថា ការដាក់លិខិតទៅកាន់​រដ្ឋបាលខេត្ត ពុំអាចកៀកពេលពេកនោះទេ ហើយលោកក៏មិនដឹងថា ក្រុមធម្មយាត្រា​ដាក់​លិខិតមកតាំងពីពេលណា និងមន្រ្តីខេត្តរូបណាទទួលឡើយ។

លោក វណ្ណៈ បញ្ជាក់ថា៖ «ខ្ញុំអត់ដឹងគាត់ដាក់លិខិតទៅពេលណាដែរ។ មូលហេតុអ្វីបានគេ​ហៅ​ទៅ​យកវិញ ខ្ញុំអត់ដឹង ព្រោះនេះជាការបកស្រាយរបស់គាត់។ ប៉ុន្តែ ធម្មតាលិខិតចូល​ទៅខេត្តលុះត្រាគ្រប់លក្ខខណ្ឌនីតិវិធីទាំងអស់បានគេទទួលដែរ។ ឧទាហរណ៍លិខិតរបស់​គាត់​មិនមានហត្ថលេខាអី ហើយទី២ គាត់ដាក់លិខិតហ្នឹង ហើយដាក់ល្ងាចឡើង ស្អែក​គាត់ធ្វើកម្មវិធីយើងធ្វើការអត់ទាន់ទេ»។

យោងតាមច្បាប់ស្ដីការធ្វើបាតុកម្មដោយសន្តិវិធី មាត្រា៣ បញ្ជាក់ថា ច្បាប់នេះមាន​វិសាលភាព​អនុវត្តលើរាល់ការប្រមូលផ្ដុំគ្នា ឬ ការដង្ហែក្បួនធ្វើបាតុកម្មដោយសន្តិវិធី ប៉ុន្តែ​មិន​អនុវត្តចំពោះ​ ការដើរហែក្បួនព្យុហយាត្រា ដើរហែសព និងការប្រមូលផ្ដុំគ្នា​ដទៃទៀតក្នុង​គោល​បំណងបម្រើសាសនា សិល្បៈ វប្បធម៌ ទំនៀមទម្លាប់ប្រពៃណីជាតិ និងសកម្មភាព​ផ្សព្វ​ផ្សាយ​អប់រំ ដើម្បីផលប្រយោជន៍សង្គម។

សម្រាប់ លោក សារ៉ាយ យល់ថា ការដាក់លិខិតនេះគ្រាន់តែជាការជូនដំណឹងទៅ​កាន់​អាជ្ញាធរ​ប៉ុណ្ណោះ ព្រោះធម្មយាត្រានេះមានមនុស្សតិចតួចក្នុងការចូលរួម។

លោក សារ៉ាយ បន្តថា ក្រុមការងាររបស់លោកបានសម្រេចចិត្ត​បញ្ឈប់ការធ្វើធម្មយាត្រា​នៅ​ខេត្តសៀមរាប ត្រង់ចំណុចភូមិខ្នារ សង្កាត់ជ្រាវ ក្រុងសៀមរាប តាមការស្នើសុំរបស់អាជ្ញាធរ ហើយនឹងចាប់ផ្ដើមបន្តនៅថ្ងៃស្អែក ក្នុងខេត្តកំពង់ធំ វេលាម៉ោង៨ព្រឹក។

បន្ថែមពីលើនេះ លោក ថា ការធ្វើធម្មយាត្រាមានការចូលរួមពីអង្គការ​សង្គម​ស៊ីវិល​ និង​​សមាគម​ចំនួន​២៨​នៅ​កម្ពុជា ហើយព្រះសង្ឃចំនួន១២អង្គ ព្រមទាំងក្រុមសិទ្ធិមនុស្ស និងយុវជនសរុបចំនួន៧នាក់ គ្រោងធ្វើដំណើរឆ្លងកាត់ខេត្តចំនួន៣  ហើយចុះដើរដោយថ្មើជើងរាល់ពេលទៅដល់ទីប្រជុំជន​ម្ដងៗ។

លោក បន្តថា នៅរសៀលនេះ ក្រុមការងារបានយកលិខិត​ស្ដីពីការដើរក្បួន​ទៅកាន់​រដ្ឋបាល​ខេត្តកំពង់ធំ។ បើតាមផែនការ លោក ថា ក្រុមធម្មយាត្រានឹងបញ្ចប់ត្រឹម​ខេត្ត​កំពង់ចាម​​នៅថ្ងៃ​ទី៨ ហើយធ្វើដំណើរតាមរថយន្តក្រុងមកកាន់រាជធានីភ្នំពេញ ដើម្បីចូលរួម​ទិវាសិទ្ធិមនុស្ស​១០ធ្នូ នៅទីលានប្រជាធិបតេយ្យ។

អភិបាលរងខេត្តកំពង់ធំ លោក សុក ហៃ ថ្លែងថា លោកមិនទាន់អាចបញ្ជាក់ថា ធម្មយាត្រា​របស់ក្រុមសិទ្ធិមនុស្សទាំងនោះ អាចដំណើរការទៅដោយរលូននោះទេ ដោយលោក​ត្រូវការ​សួរទៅកាន់រដ្ឋបាលខេត្ត ជុំវិញការដាក់លិខិតសុំដើរហែក្បួនសិន។ លោក បញ្ជាក់​ថា៖ «ចាំ​មើល​ខ្ញុំសួរទៅខាងរដ្ឋបាលសិន»

លោក សឹង សែនករុណា សង្ឃឹមថា អាជ្ញាធរខេត្តផ្សេងទៀតដែលធម្មយាត្រានឹង​ឆ្លងកាត់​នា​ពេល​​ខាងមុខ នឹងអនុញ្ញាតឱ្យមានការដើរក្បូនកើតឡើងដែលជាផ្នែកមួយ​នៃការលើកកម្ពស់​សិទ្ធិសេរីភាពបញ្ចេញមតិក្នុងសង្គមបែបប្រជាធិបតេយ្យ។

យុវតីមួយរូបដែលចូលរួមក្នុងធម្មយាត្រា កញ្ញា ញាម មុនីរស្មី វ័យ ២១ឆ្នាំ បញ្ជាក់ថា នាងចង់​ឃើញអាជ្ញាធរសម្របសម្រួលឱ្យយុវជនអាចបំពេញសេរីភាពរបស់ពួកគេក្នុងការធ្វើធម្មយាត្រា ហើយចាត់ទុកថា ការហាមប្រាមពីអាជ្ញាធរជារូបភាពមួយមិនគួរកើតមានឡើង។ 

កញ្ញាបន្តថា៖ «ខ្ញុំចង់ឃើញអាជ្ញាធរ​ គាត់ជួយសម្របសម្រួលនៅក្នុងការធ្វើ​ធម្មយាត្រារបស់​ពួកយើង​ឱ្យទៅមុខដោយរលូន។ មិនមែនសកម្មភាពរបស់ពួកគាត់ធ្វើមកដោយមានការរារាំង​ទៅលើយុវជនទេ»

នៅក្នុងរបាយ​ការណ៍​ប្រ​​ចាំ​ឆ្នាំ​របស់​ខ្លួន មជ្ឈមណ្ឌលសិទ្ធិមនុស្សកម្ពុជា (CCHR)  បាន​បង្ហាញ​ថា សេរីភាព​សារព័ត៌មាន ​និង​សេរីភាព​នៃការ​បញ្ចេញ​មតិ​នៅកម្ពុជានៅតែ​បន្ត​ធ្លាក់ចុះ​ ដោយ​ថា ​ទាំងអ្នកសារព័ត៌មាន និងសកម្មជនសិទ្ធិមនុស្សនៅតែរងការធ្វើទុក្ខបុកម្នេញពីអាជ្ញាធរ។

CCHR បន្តថា តាមរយៈការឃ្លាំមើល​ប្រព័ន្ធផ្សព្វផ្សាយប្រចាំថ្ងៃ ក៏ដូចជាកិច្ចសម្ភាសន៍​ជាមួយ​អ្នកសារព័ត៌មាន និងអ្នកការពារសិទ្ធិមនុស្ស ចាប់ពីខែកញ្ញា ឆ្នាំ​២០២២ ដល់ខែសីហា ឆ្នាំ​២០២៣​។ យ៉ាងហោចណាស់​អ្នកកាសែត១៦នាក់ និងអ្នកការពារ​សិទ្ធិ​មនុស្ស១០០នាក់​ប្រឈម​មុខនឹងវិធានការផ្លូវច្បាប់៕

969 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម