សមាគមសម្ព័ន្ធអ្នកសារព័ត៌មានកម្ពុជា

មជ្ឈមណ្ឌលសិទ្ធិមនុស្សកម្ពុជា៖ សេរីភាពនៃការបញ្ចេញមតិ និងសេរីភាពសារព័ត៌មាននៅកម្ពុជាបន្តធ្លាក់ចុះ

សកម្មជនដីធ្លីអ្នកស្រី ផាវ ញ៉ើង និងអ្នកស្រី សេង លីន ត្រូវបានដោះលែងឲ្យនៅក្រៅឃុំបណ្តោះអាសន្នពីពន្ធនាគារខេត្តកោះកុង កាលពីថ្ងៃទី៦ ខែតុលា ឆ្នាំ២០២៣ ក្រោមការត្រួតពិនិត្យតាមផ្លូវតុលាការ ដោយជាប់ចោទពីបទញុះញង់ និងបរិហារកេរ្តិ៍។ (រូបភាពផ្តល់ឱ្យ)
សកម្មជនដីធ្លីអ្នកស្រី ផាវ ញ៉ើង និងអ្នកស្រី សេង លីន ត្រូវបានដោះលែងឲ្យនៅក្រៅឃុំបណ្តោះអាសន្នពីពន្ធនាគារខេត្តកោះកុង កាលពីថ្ងៃទី៦ ខែតុលា ឆ្នាំ២០២៣ ក្រោមការត្រួតពិនិត្យតាមផ្លូវតុលាការ ដោយជាប់ចោទពីបទញុះញង់ និងបរិហារកេរ្តិ៍។ (រូបភាពផ្តល់ឱ្យ)

សេរីភាព​សារព័ត៌មាន ​និង​សេរីភាព​នៃការ​បញ្ចេញ​មតិ​នៅកម្ពុជានៅតែ​បន្ត​ធ្លាក់ចុះ​ នេះបើ​តាម​ការ​លើក​ឡើង​របស់​មជ្ឈមណ្ឌលសិទ្ធិមនុស្សកម្ពុជា (CCHR) នៅក្នុងរបាយ​ការណ៍​ប្រ​​ចាំ​ឆ្នាំ​របស់​ខ្លួនស្តីពីស្ថានភាពសេរីភាពនៃការទទួលបានព័ត៌មាន ការបញ្ចេញមតិ និងសេរីភាព​សារព័ត៌មាន។ ការ​ចេញផ្សាយ​របាយការណ៍កាលពីថ្ងៃពុធបានបង្ហាញ​ពីសំឡេង​របស់​អ្នកសារព័ត៌មាន និងសកម្មជនដែលត្រូវបានធ្វើទុក្ខបុកម្នេញ។

លោក ប៉ែន នួន អ្នក​សារព័ត៌មានគេហទំព័រ​​ស្រទាប់យុវវ័យ​មកពី​ខេត្ត​ឧ​ត្ត​រ​មានជ័យ​បាន​​ឱ្យដឹង​ថា៖ «ប្រសិនបើគាត់​ [អាជ្ញាធរ] ចង់បានកាមេរ៉ា ឲ្យគាត់​ទៅ។ ប្រសិនបើគាត់​តម្រូវឱ្យយើង​លុប​រូបថត យើងត្រូវតែ​លុប។ ហើយ​បើ​គាត់​​សុំ​ឲ្យ​យើង​ចាកចេញ យើង​ត្រូវ​តែ​ចាកចេញ។ វា​ជូរ​ចត់​ណាស់នៅ​ក្នុង​វិស័យ​សារព័ត៌មាននេះ​»។​

ស្ថិតនៅលើ​ឆាក​តូចមួយនៅក្នុងពិធី​នេះ លោក ប៉ែន នួន បាននិយាយអំពីការគំ​រាម​កំហែង​ដែល​​គាត់​បានជួបក្នុងអាជីពជាអ្នកកាសែតក្នុងរយៈពេលប្រាំមួយឆ្នាំចុងក្រោយនេះ រួមទាំង​អាជ្ញាធរគំរាម​គាត់ថា គាត់នឹងត្រូវបញ្ជូនទៅពន្ធនាគារផងដែរ។ ទោះបីជាមាន​គ្រោះថ្នាក់​ក៏​ដោយ ក៏លោក ប៉ែន​ នួន ប្តេជ្ញាបន្តនៅក្នុងការងារនេះ ព្រោះលោក​ដឹងថា វាមានប្រយោជន៍​សម្រាប់​ប្រជា​ពលរដ្ឋ​នៅ​​ក្នុងសហគមន៍របស់​លោក​។

លោកបាននិយាយថា៖ «សេរីភាព​សព្វ​ថ្ងៃ​នេះ​មិន​ល្អ​ទេ។ ពី​មួយ​ឆ្នាំ​ទៅ​មួយ​ឆ្នាំ ពី​មួយ​អាណត្តិ​ទៅ​មួយអាណត្តិ​ ការ​រឹតត្បិត​សេរីភាព​សារព័ត៌មាន​កាន់​តែ​រឹត​ត្បិតទៅៗ»

បុគ្គលិក CCHR បានធ្វើការឃ្លាំមើល​ប្រព័ន្ធផ្សព្វផ្សាយប្រចាំថ្ងៃ ក៏ដូចជាកិច្ចសម្ភាសន៍​ជាមួយ​អ្នកសារព័ត៌មាន និងអ្នកការពារសិទ្ធិមនុស្ស ដោយពិនិត្យ​មើលរយៈពេលចាប់ពីខែកញ្ញា ឆ្នាំ​២០២២ ដល់ខែសីហា ឆ្នាំ២០២៣។ យ៉ាងហោចណាស់​អ្នកកាសែត១៦នាក់ និងអ្នកការពារ​សិទ្ធិ​មនុស្ស១០០នាក់ប្រឈមមុខនឹងវិធានការផ្លូវច្បាប់ក្នុងអំឡុងរយៈ​ពេលនោះ​។

របាយការណ៍បានលើក​ឡើង​ថា៖ «ប្រទេសកម្ពុជា​បន្តនិន្នាការនៃការ​ត្រួតត្រា​សេរីភាព​នៃការ​បញ្ចេញ​មតិ​និងការបំបិទសំឡេងរិះគន់គួរ​ឲ្យ​បារម្ភ​ ដែលជាការគាបសង្កត់​មួយកាន់​តែធ្ងន់ធ្ងរ​មុនការបោះឆ្នោតសកលខែកក្កដា ឆ្នាំ២០២៣។ ការបំ​ភិត​​បំភ័យ ​​ការឃ្លាំមើល ការគំរាម​កំហែង​ ឬការធ្វើ​ទុក្ខ​បុកម្នេញ​តាមផ្លូវ​តុលាការក៏ត្រូវបានប្រើប្រាស់ជាប្រចាំផងដែរ ដើម្បីផ្តោត​គោលដៅលើ​អ្នកដែលហ៊ានសម្តែង​មតិ​»

របាយការណ៍នេះក៏មាន​បញ្ចូល​​ការអភិវឌ្ឍផ្នែក​ច្បាប់​ពេញ​មួយ​ឆ្នាំកន្លង​ទៅ​ រួមទាំងការធ្វើ​វិសោធន​កម្មច្បាប់បោះឆ្នោតដែលបានធ្វើឡើងត្រឹមតែ​ប៉ុន្មានសប្តាហ៍​មុនការបោះឆ្នោត​ខែកក្កដា ដែលរឹតត្បិតបន្ថែម​ទៀត​លើ​សេរីភាពនៃការបញ្ចេញ​មតិនៅក្នុងប្រទេសកម្ពុជា​។

របាយការណ៍នេះក៏បាន​កត់​ត្រា​អំពីការ​លុប​អាជ្ញាបណ្ណប្រព័ន្ធផ្សព្វផ្សាយជា​បន្ត​បន្ទាប់​ដោយ​រដ្ឋាភិបាល រួមទាំងសំឡេងប្រជាធិបតេយ្យកាលពី​ខែកុម្ភៈ ដែលមាន​ការចាប់អារម្មណ៍​ពី​អន្តរជាតិ។ រដ្ឋាភិបាលបានបញ្ជាឱ្យក្រុម​ហ៊ុន​ផ្តល់​សេវា​អ៊ិនធើណិត​បិទការចូលប្រើគេហទំព័រ និងគណនីបណ្តាញ​ផ្សព្វផ្សាយសង្គមរបស់កាសែត​ ខេមបូឌា ដេលី វិទ្យុអាស៊ីសេរី និង​មូលដ្ឋាន​​ទិន្នន័យ​ Kamnotra កាល​ពី​ខែកក្កដា។

អ្នកចូលរួមមកពីអង្គការអន្តរជាតិ អង្គការក្រៅរដ្ឋាភិបាល ប្រព័ន្ធផ្សព្វផ្សាយ សកម្មជន និងនិស្សិតបានចូលរួមក្នុងពិ​ធី​ចេញ​ផ្សាយ​របាយការណ៍​ប្រចាំឆ្នាំរបស់អង្គការ​ CCHR ស្តីពី​ស្ថានភាពសេរីភាពនៃការបញ្ចេញមតិ សេរីភាពសារព័ត៌មាន និងសិទ្ធិទទួល​បាន​ព័ត៌មាននៅកម្ពុជា នៅថ្ងៃទី២២ ខែវិច្ឆិកា ឆ្នាំ២០២៣។ (ខេមបូចា/ ស៊ើង និមល់)

របាយការណ៍នេះក៏​កត់ត្រាផងដែរថា មាន​ការបង្ក​របួស​ស្នាម​លើអ្នកការពារសិទ្ធិមនុស្ស និង​អ្នកសារព័ត៌មាន​កាលពីឆ្នាំមុន។ ជនដៃដល់៣នាក់ជិះម៉ូតូមក​វាយ​សកម្មជនដីធ្លី​ម្នាក់​មក​ពី​ខេត្ត​ត្បូងឃ្មុំ បណ្តាលឲ្យលោកមាន​ស្នាម​ដាច់​លើ​ផ្ទៃមុខ​និងរបួសជាច្រើនកន្លែង​ផ្សេង​ទៀត។ អ្នក​យក​ព័ត៌មានម្នាក់​របស់​កាសែត​​ Mongabay ​​​ត្រូវ​បាន​ឃាត់​ខ្លួន​ និង​អូស​កាត់​ផ្លូវ​ ​ខណៈ​ពេល​កំពុង​ជជែក​​ជាមួយ​ទា​ហាន​​​នៅ​ខេត្ត​កំពង់ស្ពឺ។

លោក ហួន ផន អ្នកសម្របសម្រួលគម្រោងនៅ​អង្គការ​ CCHR មានប្រសាសន៍ថា អ្នកសារព័ត៌មានមួយចំនួនដែលក្រុមការងារបានសម្ភាសដាក់គំនាបលើខ្លួនឯង​នៅ​ក្នុងសេចក្តី​រាយការណ៍របស់ពួកគេ ដោយជៀសវាងប្រធានបទរសើបដូចជាអំពើពុករលួយ និងបញ្ហាដីធ្លី ដោយសារខ្លាចមានផលប៉ះពាល់។

លោកមានប្រសាសន៍ថា៖ «ក្នុង​សម័យ​បច្ចុប្បន្ន​នេះ ពលរដ្ឋ​ក៏​ខ្លាចដែរ។ ពួក​គាត់​​ដាក់​កំហិត​ខ្លួន​ឯង​មិន​ផ្តល់​ព័ត៌មាន​ដល់​អ្នក​សារព័ត៌មាន​ ដូច្នេះ​អ្នក​សារ​ព័ត៌មាន​មិន​អាច​ទទួល​បាន​ព័ត៌មាន​​​នោះ​ទេ។ ​ការ​រឹតត្បិត​សេរីភាព​សារព័ត៌​មាន​មិន​ត្រឹមតែ​ប៉ះពាល់​ដល់​ប្រព័ន្ធ​ផ្សព្វផ្សាយ​ប៉ុណ្ណោះ​ទេ ប៉ុន្តែ​គឺប៉ះពាល់​ប្រជា​ពលរដ្ឋ​​ទូទៅ​ទាំងអស់​»​​

អ្នកស្រី ផាវ ញ៉ើង​ ជា​សកម្មជនដីធ្លី ដែលធ្វើដំណើរមកពីខេត្តកោះកុង ដើម្បី​ថ្លែងក្នុងពិធី​នោះ​បាន​​​រំឭក​អំពីការត្រូវ​គេ​ចាប់​ដាក់​ពន្ធនាគារបន្ទាប់ពីរៀបចំការតវ៉ាគាំទ្រ​សិទ្ធិដីធ្លី​របស់​កសិករ​ក្នុង​សហគមន៍របស់អ្នកស្រី។

អ្នក​ស្រី​បាន​និយាយ​​ថា៖​ «​ខ្ញុំ​សម្តែង​មតិ​របស់ខ្ញុំ​​ ដើម្បី​​ជូន​ដំណឹង​ទៅ​រដ្ឋាភិបាល​ដើម្បី​ឲ្យ​មាន​ដំណោះស្រាយ​ដីធ្លី [សម្រាប់​ពលរដ្ឋ​មាន​ជម្លោះ] ប៉ុន្តែ​ខ្ញុំ​ត្រូវ​បាន​ចោទ​ប្រកាន់​ពី​បទ​បរិហារកេរ្តិ៍ និង​ត្រូវ​បាន​ផ្តន្ទា​ទោស​ឲ្យ​ជាប់​ពន្ធនាគារ៩៩ថ្ងៃ។ ខ្ញុំ​​​សប្បាយ​ចិត្ត ​ប្រសិន​បើ​ច្បាប់​និង​សន្ធិ​សញ្ញា​​សិទ្ធិ​មនុស្ស​ត្រូវ​បាន​អនុវត្ត​តាម​គោលការណ៍​របស់​វា បើដូច្នេះ​មែន​ ប្រហែល​ជា​ខ្ញុំ​មិន​ត្រូវ​បាន​ចាប់​ដាក់​គុក​ទេ»

អ្នកស្រីបាន​ប្រាប់​អ្នក​ចូលរួម​ថា សង្គម​កម្ពុជា​សព្វថ្ងៃ​មិន​ផ្តល់​កន្លែង​សុវត្ថិភាព​សម្រាប់​មនុស្ស​មាន​សិទ្ធិ​និយាយ​នោះ​ទេ។ អ្នកស្រី​បន្ត​ថា រដ្ឋាភិបាល​គួរ​ព្យាយាម​ដោះស្រាយ​បញ្ហា​ជា​ជាង​ចាប់​ពលរដ្ឋ​បញ្ជូន​ទៅ​ពន្ធនាគារ។

បន្ទាប់​ពី​​សុន្ទរកថាដ៏​​រំជួល​ចិត្ត​ពី​សមាជិក​នៃបណ្តាញសារព័ត៌មាន និង​សកម្មជន តំណាងមកពី​គណៈកម្មាធិការ​សិទ្ធិ​មនុស្ស​កម្ពុជា (CHRC) បាន​ចែករំលែក​ប្រតិកម្ម​របស់​លោក​​ចំពោះ​របាយការណ៍​​នេះ ​អំឡុង​ពេល​ចោទជាសំណួរ​​និងឆ្លើយ​តប​​​​។

លោក ស្រ៊ាង​ ចិន្តា មកពី​ CHRC បានសួរថា៖ «ប្រសិនបើ​យើង​គ្រាន់តែ​កត់ត្រា​​ករណី​ ហើយ​យើង​ធ្វើការ​សន្និដ្ឋាន តើ​វា​មាន​ភាពត្រឹមត្រូវ​​​ប៉ុណ្ណា​អំពី​សេរីភាព​នៃ​ការបញ្ចេញមតិ និង​សេរីភាព​សារព័ត៌មាន​?។ ​នៅ​កម្ពុជា​ មាន​ប្រព័ន្ធ​ផ្សព្វ​ផ្សាយ​មានប្រមាណ​២០០០​ស្ថាប័ន​ ហើយ​របាយការណ៍​នេះ​បាន​សម្ភាស​មនុស្ស​៤​-១០​នាក់​»​

របាយការណ៍​បញ្ជាក់​ថា CCHR បាន​ធ្វើ​បទសម្ភាសន៍​​ជាមួយ​អ្នក​សារព័ត៌មាន និង​អ្នក​ការពារ​សិទ្ធិ​​មនុស្សចំនួន​៣៣​នាក់​។

ជាការឆ្លើយតប លោក ហួន ផន បានមាន​ប្រសាសន៍​ថា អង្គការ​មិនរកប្រាក់ចំណេញ​បាន​ផ្ទៀង​ផ្ទាត់ភាពត្រឹមត្រូវនៃករណី ដែលបានរាយការណ៍ តាមរយៈ​ការប្រមូល​ព័ត៌មាន​ពី​ភាគី​ពាក់ព័ន្ធផ្សេងទៀត ដើម្បីកំណត់ថាតើ​ករណីទាំងនោះ​ ពិតជាបានរំលោភ​លើស្តង់ដារ​សិទ្ធិ​មនុស្ស​អន្តរជាតិមែន​ឬ​យ៉ាង​ណា​៕

ប្រែសម្រួលពីអត្ថបទភាសាអង់គ្លេស៖ CCHR: Freedom of Expression and Press Continue to Be Undermined in Cambodia

216 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម