សមាគមសម្ព័ន្ធអ្នកសារព័ត៌មានកម្ពុជា

គណបក្សដែលផ្តោតលើស្ត្រីទាក់ទាញការយកចិត្តទុកដាក់លើវត្តមានតិចតួចរបស់ស្ត្រីក្នុងឆាកនយោបាយ

លោកស្រី ស៊ឹង សុធី ប្រធានគណបក្សស្ត្រីដើម្បីស្ត្រី កាន់ខិត្តបណ្ណគោលនយោបាយគណបក្ស បង្ហាញពលរដ្ឋ ខណៈដែលលោកស្រីចុះទៅខណ្ឌមានជ័យ កាលពីថ្ងៃទី២៣ ខែមិថុនា ឆ្នាំ២០២៣។ (ខេមបូចា/ ព្រីង សំរាំង)
លោកស្រី ស៊ឹង សុធី ប្រធានគណបក្សស្ត្រីដើម្បីស្ត្រី កាន់ខិត្តបណ្ណគោលនយោបាយគណបក្ស បង្ហាញពលរដ្ឋ ខណៈដែលលោកស្រីចុះទៅខណ្ឌមានជ័យ កាលពីថ្ងៃទី២៣ ខែមិថុនា ឆ្នាំ២០២៣។ (ខេមបូចា/ ព្រីង សំរាំង)

លោកស្រី ស៊ឹង សុធី អង្គុយ​ក្នុង​បន្ទប់​តូច​មួយ​នៅ​ផ្ទះ​ស្ត្រី​ម្នាក់​ក្នុង​ខណ្ឌ​មានជ័យ រាជធានី​ភ្នំពេញ។ លោកស្រី សុធី មានប្រសាសន៍​ថា ស្ត្រី​ម្នាក់​នេះ​មាន​ជីវភាព​ក្រីក្រ និង​មើល​ថែ​កូន​ស្រី​ដែល​មាន​ជំងឺ។

លោកស្រី សុធី ប្រធាន​គណបក្ស​ស្ត្រី​ដើម្បី​ស្ត្រី ផ្តល់​ពាក្យ​លើក​ទឹកចិត្ត​ដល់​ស្ត្រីជា​ម្តាយ និង​ផ្តល់​​គ្រឿង​ឧបភោគ​បរិភោគ និង​ថវិកា​ជូន​ស្ត្រីរូបនោះ​​មុន​ពេល​ចាក​ចេញ​ទៅវិញ​។

លោកស្រី​មាន​ប្រសាសន៍​​ទៅ​កាន់ស្ត្រីជា​​ម្ដាយ​ថា៖​ «បន្ត​ទៅ​មុខ​កុំ​ចុះ​ចាញ់​»

លោកស្រី សុធី មានប្រសាសន៍ថា ការជួបជាមួយ​ពលរដ្ឋ​ដែលមានមធ្យោបាយសេដ្ឋកិច្ច​មាន​កម្រិត​បានជួយតម្រែតម្រង់​ទស្សនៈនយោបាយរបស់គាត់​ ជាពិសេសនៅក្នុង​ការ​ប្រាស្រ័យ​ទាក់ទងជាមួយស្ត្រីមកពីគ្រួសារនៅតំបន់​ជនបទ។

បន្ទាប់​ពី​ចាក​ចេញ​ពី​ផ្ទះ​ស្ត្រី​រូប​នោះ លោកស្រី សុធី មាន​ប្រសាសន៍​​ថា៖ «ខ្ញុំ​ចង់​ឱ្យស្ត្រី​ទាំង​អស់​ក្រោក​ឈរ ហើយ​កុំ​គិត​ថា ​ខ្លួន​ទន់​ខ្សោយ ត្រូវ​នៅចាំ​ផ្ទះ ហើយ​ពឹង​ផ្អែក​លើ​ប្ដី»។ លោកស្រីបន្ត​ថា៖ «​ដោយ​សារ​ទំនៀម​​ទម្លាប់​​ប្រពៃណី ស្ត្រី​គិត​ថា ​តួនាទី​របស់​ពួកគាត់​​គឺ​គ្រាន់តែ​ជា​ស្ត្រី​មេផ្ទះ​ប៉ុណ្ណោះ ដែល​ជា​ហេតុផល​មួយក្នុងចំណោម​ហេតុផល​ ​ដែល​​ធ្វើ​ឱ្យ​ពួកគេ​បាត់បង់​កម្លាំង​របស់ខ្លួន»

គណបក្សស្ត្រីដើម្បីស្ត្រីមានឈ្មោះថ្មី ប៉ុន្តែគណបក្ស​នេះ​ត្រូវបានបង្កើតឡើងក្នុងឆ្នាំ១៩៩៩ ដោយ​​មាន​ឈ្មោះ​ថា គណបក្សកួរស្រូវ ជាគណបក្សនយោបាយមួយដែល​ត្រូវបានបង្កើតឡើង ដើម្បីកែលម្អសិទ្ធិ​ទទួលបានការអប់រំ បញ្ចប់អំពើពុករលួយ និងជួយកុមារកំព្រា និង​មនុស្ស​ចាស់។

គណបក្សកួរស្រូវបានចូល​រួម​ប្រកួតប្រជែងការបោះឆ្នោតជាតិឆ្នាំ២០០៣ ហើយបានជាប់​ចំណាត់​​​ថ្នាក់​លេខ៥ ដោយទទួលបាន​សំឡេងតិចជាង៧ម៉ឺនសំឡេង គឺ​តិច​ជាងចំនួន​សន្លឹក​ឆ្នោត​សរុប​របស់គណបក្ស សម រង្ស៊ី ហ៊្វុនស៊ិនប៉ិច និងគណបក្សប្រជាជនកម្ពុជាឆ្ងាយ​ណាស់​។

លោកស្រី សុធី បាន​មាន​ប្រសាសន៍​ថា ប្រធាន​គណបក្សកួរ​ស្រូវ​មុន​មាន​វ័យ​ចំណាស់ហើយ​ ​ហើយ​​ត្រៀម​នឹងសម្រាកពីការងារ​នេះ ​​ដោយ​ជ្រើស​រើស​លោកស្រី​ជា​មេ​ដឹក​នាំ​ថ្មី។ លោកស្រី​បានសម្រេចចិត្តផ្លាស់ប្តូរឈ្មោះគណបក្សកាលពីពីរខែមុន ហើយបានបង្វែរ​ការ​យក​ចិត្ត​ទុក​ដាក់​របស់គណបក្សទៅលើ​ការ​ដោះស្រាយបញ្ហាដែលប៉ះពាល់ដល់ស្ត្រី។

លោកស្រី​ចង់ឱ្យស្ត្រីចូលរួមកាន់តែច្រើនក្នុងការដោះស្រាយបញ្ហាសង្គម ហើយមានអារម្មណ៍​ថា ស្ត្រី​ត្រូវ​បាន​ផ្តល់​តម្លៃទាប ខ្វះការអប់រំ និងឱកាសការងារ។ នៅពេល​សង្កត់​ធ្ងន់​ថា តើ​លោក​ស្រី​​​នឹង​ផ្តល់​​អំណាច​ដល់​ស្ត្រី និង​ដោះស្រាយ​បញ្ហា​ដែល​​ប៉ះ​ពាល់​ដល់​ពួក​គេដោយ​របៀប​ណា​ លោកស្រី សុធី បាន​មាន​ប្រសាសន៍​​ថា ប្រសិនបើ​លោកស្រី​ជា​នាយក​រដ្ឋមន្ត្រី លោកស្រី​​នឹង​កសាង​សហគមន៍​មួយ​ដែល​ងាយ​ចូល​ទៅកាន់​ទីផ្សារ​​ ដែល​ជួយ​​លើក​កម្ពស់​ស្ថានភាព​សេដ្ឋកិច្ច​របស់​ប្រជាពលរដ្ឋ។

គេ​​មិន​ច្បាស់​ថា ​តើ​ការ​ធ្វើ​បែប​នេះ​ជួយ​ស្ត្រី​កម្រិត​ណា​នោះទេ ប៉ុន្តែលោកស្រី ​សុធី ​បាន​បន្ថែម​ថា ​លោកស្រី​​ចង់​អប់រំ​ស្ត្រី​ឲ្យ​បាន​ច្រើន​បន្ថែម​ទៀត។

លោក​ស្រី ស៊ឹង សុធី ប្រធានគណបក្សស្ត្រីដើម្បីស្ត្រី កាន់ខិត្តបណ្ណគោល​នយោបាយ​គណបក្ស បង្ហាញពលរដ្ឋ ខណៈដែលលោកស្រីចុះទៅខណ្ឌមានជ័យ កាល​ពី​ថ្ងៃទី២៣ ខែមិថុនា ឆ្នាំ២០២៣។ (ខេមបូចា/ ព្រីង សំរាំង)

ទោះជាយ៉ាងណាក៏ដោយ គណបក្សនេះបានរក្សា​ពាក្យ​សន្យា​របស់ខ្លួននិង​បានតែងតាំង​ស្ត្រី​ភាគ​ច្រើន​បំផុតឱ្យឈរឈ្មោះជាបេក្ខជន ក្នុងចំណោមគណបក្សទាំង១៨ នៅក្នុងការ​បោះ​ឆ្នោត​ជាតិ​ខែកក្កដានេះ​។ គណបក្ស​នេះ​នឹង​ចូលរួម​ប្រកួតប្រជែង​ក្នុង​ខេត្ត​ចំនួន១៨ និង​ដាក់​បេក្ខជន​ចំនួន៦៨រូប ក្នុង​នោះ៨០% គឺ​ជា​ស្ត្រី​​ នេះ​បើ​យោង​តាម​ប្រភពទិន្នន័យកំណត់​ត្រា។

នយោបាយកម្ពុជារងការរិះគន់​ជាយូរណាស់មកហើយដោយសារមាន​​ការចូលរួម​ពីបេក្ខភាព​ជា​ស្ត្រីតិចតួច ហើយគណបក្សធំៗដែលប្រកួតប្រជែងក្នុងខែកក្កដានេះ បាន​បង្ហាញពីការ​កែ​ប្រែ​​តិចតួច។ គណបក្ស​ហ៊្វុនស៊ិនប៉ិច​នឹង​មាន​បេក្ខភាព​ជា​​ស្ត្រី​តែ​៥%​ប៉ុណ្ណោះ​ក្នុង​ខែ​កក្កដា ចំណែក​​គណបក្ស​ប្រជាជន​កម្ពុជាមាន​បេក្ខ​ភាព​ជា​​ស្ត្រី​១៣%  ហើយ​​គណបក្ស​ខ្មែរ​រួបរួម​ជាតិ​មាន​បេក្ខភាព​ជា​ស្ត្រី​​១៥%​ ។

លោក សុខ ឥសាន អ្នកនាំពាក្យគណបក្សប្រជាជនកម្ពុជា និងជាសមាជិកព្រឹទ្ធសភា បាន​ទទួល​ស្គាល់ថា គណបក្សមានបេក្ខភាពជាស្ត្រីតែប្រហែល​១៣% នៅឆ្នាំនេះ ប៉ុន្តែលោកមាន​ប្រសាសន៍ថា អំឡុង​ការបោះឆ្នោតឃុំសង្កាត់ឆ្នាំ២០២២ បេក្ខជនគណបក្សពី​២០% ទៅ៣០%​ ​គឺជាស្ត្រី។

លោក សុខ ឥសាន បានមានប្រសាសន៍ថា វាពិបាកក្នុងការស្វែងរកស្ត្រីដែលមាន​លក្ខណៈ​សម្បត្តិខ្ពស់​ ដើម្បីឈរឈ្មោះសម្រាប់​តំណែង។ លោក​ក៏​បាន​គូសបញ្ជាក់​​ថា ការ​ធ្វើ​ជា​តំណាងរាស្រ្ត​ គឺ​ជា​ការងារ​ឯកទេស ហើយ​ត្រូវ​ការ​មនុស្ស​​ដែល​មាន​គុណភាព​ខ្ពស់​សម្រាប់​ការងារនេះ​។

លោក​ សុខ ឥសាន បានបញ្ជាក់ថា៖ «​ក្នុងការអនុវត្តជាក់ស្តែងយើងឃើញហើយ ស្ត្រីមួយ ចំនួនគាត់មានកម្រិតវប្បធម៌វានៅទាប ការយល់ដឹងផ្នែកនយោបាយក៏មានកម្រិត ហើយ​កម្លាំង​ពលំមួយចំនួនក៏វាមានកម្រិតដែរ ចឹងការបម្រើសេវាសាធារណជូនប្រជាពលរដ្ឋហ្នឹង​ ក៏វានៅមានកម្រិតដែរ»

លោក សុខ ឥសាន មិន​បារម្ភ​ថា ​ចំនួន​បេក្ខភាព​​ស្ត្រី​​របស់​គណបក្សតិច​​នឹង​ធ្វើ​ឱ្យ​គណបក្ស​បាត់បង់ប្រជាប្រិយភាពនោះទេ ព្រោះលោកយល់ឃើញថាមានគណបក្សផ្សេងទៀត មាន​អាត្រាបេក្ខជនស្ត្រីតិចជាងគណបក្សប្រជាជនកម្ពុជាផង។

លោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិចបានអះអាងថា គណបក្ស​នេះមាន​បេក្ខភាព​​ជាស្ត្រីចំនួន២៩នាក់ ក្នុងចំណោមបេក្ខជនចំនួន១២៥រូប។ ប៉ុន្តែឯកសារ គ.ជ.ប បង្ហាញថា គណបក្សនេះ មានបេក្ខភាពស្ត្រី​តែ៨នាក់ប៉ុណ្ណោះក្នុងបញ្ជីបេក្ខជនពេញសិទ្ធិ​ និងស្ត្រី២១នាក់ផ្សេងទៀតក្នុងចំណោមបេក្ខជនបម្រុង១៥៣នាក់។

លោកបានថ្លែង​ថា គណបក្ស​បាន​អនុវត្ត​តាម​នីតិវិធី​របស់​ខ្លួន​ក្នុង​ការ​ជ្រើសរើស​បេក្ខជន និង​បាន​ចង្អុល​ទៅ​អនុប្រធាន​ជា​ស្ត្រី​ម្នាក់ គឺ​លោកស្រី រតនា ទេវី ក្នុង​គណបក្សនេះ​។ ជា​ថ្មី​ម្តង​ទៀត លោក​មិន​បារម្ភ​ថា ​កង្វះ​បេក្ខភាព​ស្ត្រី​នឹងប៉ះពាល់​ដល់​ក្តីសង្ឃឹម​របស់​គណបក្ស​ឡើយ។

លោក​មាន​ប្រសាសន៍ថា៖ «ទោះបី​គណបក្ស​នេះ​មាន​ស្ត្រី​តិច​តួច​ ​ក៏​វា​មិន​ប៉ះពាល់​ប្រជាប្រិយភាព​​គណបក្ស​ដែរ​»

លោកស្រី ចក់ សុភាព នាយិកាប្រតិបត្តិ នៃមជ្ឈមណ្ឌលសិទ្ធិមនុស្សកម្ពុជាមានប្រ​សាសន៍ថា គណបក្ស​ដែលនិយាយថា ខ្វះបេក្ខភាពស្ត្រីដែលមានសមត្ថភាពគឺគ្រាន់តែជាលេសប៉ុណ្ណោះ។

លោកស្រីបាន​មានប្រសាសន៍ថា៖ «នៅ​ត្រង់​ចំណុច​នេះ សមត្ថភាព​របស់​ស្ត្រី​មិន​មែន​ជា​កត្តា​កំណត់​នោះ​ទេ​។ ប្រសិនបើគាត់នៅតែនិយាយអំពីបញ្ហា​អសមត្ថភាព នោះវាអាចដោយសារ​តែបញ្ហាប្រព័ន្ធរបស់ពួកគាត់ច្រើន​ជាង»

ប្រែសម្រួលពីអត្ថបទភាសាអង់គ្លេស៖ A Party Focusing on Women Draws Attention to Their Low Levels of Political Participation

228 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម