បន្លែប្រមាណ៥០០០តោននៅស្រុកស្អាងប្រឈមភ្ជួរចោលបន្តបន្ទាប់

លោក តៃ សុង អ្នកដាំបន្លែនៅឃុំទឹកវិលស្រុកស្អាងខេត្តកណ្តាល កាន់សាឡាត់ដែលជិតខូច នឹងត្រៀមភ្ជួរចោលដោយសារគ្មានអ្នកទិញ នៅថ្ងៃទី២៦ ខែមេសាឆ្នាំ២០២១។ ខេមបូចា/ អាន វិចិត្រ
លោក តៃ សុង អ្នកដាំបន្លែនៅឃុំទឹកវិលស្រុកស្អាងខេត្តកណ្តាល កាន់សាឡាត់ដែលជិតខូច នឹងត្រៀមភ្ជួរចោលដោយសារគ្មានអ្នកទិញ នៅថ្ងៃទី២៦ ខែមេសាឆ្នាំ២០២១។ ខេមបូចា/ អាន វិចិត្រ
Share on facebook
Share on twitter
Share on linkedin
Share on telegram
Share on whatsapp

ប្រជាកសិករមួយចំនួននៅក្នុងឃុំទឹកវិល ស្រុកស្អាង ខេត្តកណ្តាល អះអាងថា បន្លែរបស់ពួកគាត់ប្រមាណ៥០០០តោន ដែលដាំដុះលើផ្ទៃដី៥០០ហិកតា ប្រឈមនឹងត្រូវភ្ជួរចោលក្នុងរយៈពេល១០ថ្ងៃទៀត បើសិនជានៅតែមិនមានទីផ្សារ។​

ម្ចាស់បន្លែដាំដុះលើផ្ទៃដី៣ហិកតា និងជាអ្នកលក់ជី និងថ្នាំកសិកម្មផងនោះ លោក តៃ សុង លើកឡើងថា សាឡាត់របស់លោកទើបតែភ្ជួរចោលអស់១០តោនកាលពីសប្តាហ៍មុន។ លោកបន្តថា ក្នុងរយៈពេលជាង១០ថ្ងៃខាងមុខ សាឡាត់របស់លោកចំនួន​២៥តោនទៀត នឹងត្រូវភ្ជួរចោលទៀត។​

លោក តៃ សុង អះអាងថា បន្លែដែលប្រឈមឈូសឆាយចោលពេលនេះគឺមិនមែនតែរបស់លោកនោះទេ គឺបើគិតទាំងបន្លែដែលប្រឈមឈូសឆាយចោលរបស់កសិករផ្សេងទៀតនៅក្នុងឃុំទឹកវិលនេះមានចំនួនប្រមាណ​៥០០០តោន។​

លោក តៃ សុង៖ «បើសិនជានៅតែរកច្រកចេញមិនរួចនៅតែបិទខ្ទប់ នៅតែមិនឱ្យចូលភ្នំពេញ មិនបើកដំណើរការវិញចឹង ប្រជាជនអត់មកទិញ អាជីវករអត់មកទិញគឺនៅតែឈូសឆាយចោលដដែលហ្នឹង មិនអាចមានជម្រើសអ្វីក្រៅពីឈូសឆាយចោល។ បើគិតជាសាឡាត់រាប់ពាន់តោន មិនក្រោមពី៤ទៅ៥ពាន់តោនទេ»។​

អ្នកយកព័ត៌មានខេមបូចា បានទៅដល់កន្លែងដាំដុះក្នុងឃុំទឹកវិលស្រុកស្អាងនេះ ឃើញមានចំការបន្លែផ្សេងៗទៀតក្រៅពីសាឡាត់ ក៏មានដូចជា ប្រភេទស្ពៃ ខ្ទឹមស្លឹក និងអំពៅជាដើម នៅក្នុងចំការដែលគ្រប់អាយុក្នុងការប្រមូលផលហើយ តែមិនមានអ្នកទិញ។​

កសិករម្នាក់ទៀត លោក ហ៊ី ប៊ុនលាភ ឱ្យដឹងថា លោកបានភ្ជួរសាឡាត់ចោលអស់១៥តោនកាលពី១៥ថ្ងៃមុន។ លោក ប៊ុនលាភ បញ្ជាក់ថា លោកខ្ចីលុយ ជាង៨លានរៀល ពីសាច់ញាតិមកដាំបន្លែនេះ ហើយថា បើត្រូវភ្ជួរចោលម្តងទៀត លោកអស់ដើមទុនធ្វើបន្តហើយ។

លោក ហ៊ី ប៊ុនលាភ៖ «ទៅលែងរួចហើយ ធ្វើតែមួយសារនេះទៀត បើអត់ទៀត ឈប់ធ្វើហើយ»។​

កសិករម្នាក់ទៀត លោក ស៊ុង ម៉េង ថ្លែងថា ខ្ទឹមស្លឹករបស់លោកចន្លោះពី៣៥ទៅ៤០តោនលើផ្ទៃដីជាង១ហិកតា ប្រឈមជ្រុលចាស់លក់លែងកើតក្នុងរយៈពេល១០ថ្ងៃទៀត។​ លោកថា ការចំណាយលើការដាំដុះនេះ អស់ជាង៩ពាន់ដុល្លារអាមេរិក។  

លោក ស៊ុង ម៉េង ត្រៀមហើយថា នឹងយកសម្ភារកសិកម្មទៅផ្ទះវិញ ដោយថា មិនអាចបន្តការដាំដុះទៀតបានទេព្រោះអស់ដើមទុនហើយ។

លោក ស៊ុង ម៉េង៖ «អស់ដើមហើយ មួយសារហ្នឹងតែខ្ទឹមចេញអត់រួច ទៅលែងរួចហើយអាហ្នឹង យកសម្ភារទៅផ្ទះហើយ។ ចប់ហើយ។ ឥឡូវនេះ អស់ពីរហើយគឺអស់ទុន អស់អារម្មណ៍ដាំហើយគឺនៅសល់តែជីវិតទេ»។​

ចំការខ្ទឹមស្លឹកជាង១ហិកតានៅឃុំទឹកវិលស្រុកស្អាងខេត្តកណ្តាល ដែលគ្រប់អាយុកាលប្រមូលផលតែមិនមានអ្នកទិញ ថ្ងៃទី២៦ខែមេសាឆ្នាំ២០២១។ ខេមបូចា/ អាន វិចិត្រ

តាមការអះអាងរបស់ក្រុមកសិករនៅក្នុងឃុំទឹកវិលគឺនេះជាលើកទី២ហើយ ដែលរងផលប៉ះពាល់ ដែលឆ្នាំមុនតម្លៃចុះថោកខ្លាំង ហើយឆ្នាំនេះមិនមានអ្នកទិញតែម្តង។​

ប្រធានមន្ទីរពាណិជ្ជកម្មខេត្តកណ្តាលលោក អោម ប៊ុនធឿន ថ្លែងថា លោកបានដោះស្រាយបញ្ហាជាមួយកសិករនៅស្រុកស្អាងនេះជាបន្តបន្ទាប់ប៉ុន្តែលោកថា កសិករទាំងនោះមិនធ្វើតាមការណែនាំទេ។​

លោក អោម ប៊ុនធឿន៖ «ខ្ញុំបានចុះដោះស្រាយជារឿយៗហើយជាមួយ តៃ សុង ហ្នឹងនុ៎ះ»។​ យើងណែនាំឱ្យធ្វើយ៉ាងម៉េចក៏អត់ធ្វើតាមដែរ។​ គំនិតគាត់គឺគាត់ធ្វើតែចឹងតាម៉ង។ ធ្លាប់ដោះស្រាយហើយ ធ្លាប់នាំអាជីវករទៅទិញរបស់គាត់ហើយ។ ហើយយើងណែនាំថា ដាំដុះអីរកទីផ្សារហើយចាំដាំ ហើយគាត់ដាំចោល ដាំម្តងៗបន្លែសុទ្ធតែ២ទៅ៣ហិកតាឯណោះ»។​

ប្រធានមន្ទីរកសិកម្មខេត្តកណ្តាល លោក ប៊ុនទួន ស៊ីមូណា មិនបកស្រាយករណីនេះទេ ដោយលោកប្រាប់ឱ្យសួរទៅខាងមន្ត្រីស្រុកស្អាងវិញ។

តាមរបាយករណ៍មន្ទីរកសិកម្ម ខេត្តកណ្ដាល បានឱ្យដឹងថា នៅស្រុកស្អាងមានផ្ទៃដីដាំដុះបន្លែសរុបចំនួន៨១៦៩ហិកតា មាន១២សហគមន៍ ដែលក្នុងមួយថ្ងៃអាចផលិតបន្លែជាមធ្យមបានចំនួន ១១៥តោន។

អភិបាលស្រុកស្អាង លោក ញឹម វណ្ណឌិន មិនបានដឹងករណីនេះទេ ហើយលោកសង្ស័យថា នោះគឺជារឿងកសិករប្រឌិតឡើង។​ ទោះយ៉ាងណាលោកថា នឹងចាត់មន្ត្រីឱ្យទៅពិនិត្យករណីនេះ។

លោក ញឹម វណ្ណឌិន៖ «ក្រុមណឹងស្អី កូនក្មួយឡៅម៉ុងហៃ។​ អាពួកហ្នឹងចូលចិត្តធ្វើតែចឹង។ អាក្រុមមុននោះណា! ប្រឌិតរឿងខាងកសិកម្មគេចុះមកស្រាវជ្រាវទៅវាអត់ពិតទេ រឿងអាពួកខូចហ្នឹងណា។ បាទអរគុណហើយ ចាំមើលម៉េចៗខ្ញុំឱ្យមន្ត្រីចុះទៅមើល»។​

លោក តៃ សុង អះអាងថា រូបលោក និងកសិករផ្សេងទៀតស្នើឱ្យមានដំណោះស្រាយបញ្ហាកសិផលនេះគឺជាបញ្ហាលក់បន្លែសុទ្ធសាធមិនពាក់រឿងអ្វីផ្សេងនោះទេ។​ លោកស្នើឱ្យមន្ត្រីកសិកម្មចុះទៅពិនិត្យករណីនេះ ដល់កន្លែងដាំនឹងដឹងការពិតហើយ។

លោក តៃ សុង បញ្ជាក់ថា ករណីដែលមន្ត្រីមន្ទីរពាណិជ្ជកម្មថា ជួយអន្តរាគមន៍កន្លងមកនោះគឺមន្ត្រីជួបកសិករបានតែម្តង ហើយនាំក្រុមហ៊ុនឱ្យជួយទិញបានតែក្នុងទំហំតិចតួចប៉ុណ្ណោះក៏ផ្អាកវិញ។​​

លោក តៃ សុង៖ «គាត់ឱ្យដាំតាំងពីថ្ងៃ១ខែ២ តាំងពីដើមខែចឹងទៅគាត់ថា ដាំបណ្តាក់ចឹងទៅ គាត់ថា ជួយយករហូត១ថ្ងៃ៥០០គីឡូ។ ដល់ពេលបានប្រមូលផលគាត់ថា កូវីដហើយ លក់មិនចេញទេ ចឹងឱ្យខ្ញុំរកទីផ្សារទៀតទៅ»។​

អ្នកជំនាញកសិកម្មលោក យ៉ង សាំងកុមារ លើកឡើងថា ក្នុងស្ថានភាពចំពោះមុខនេះ បើអាជ្ញាធររកឃើញថា ពិតជាមានការកកស្ទះបន្លែរបស់កសិករមែនគឺរដ្ឋអាចចេញមុខទិញដើម្បីយកទៅចែកដល់ពលរដ្ឋដែលកំពុងខ្វះខាតនៅក្នុងរាជធានីភ្នំពេញ។​

លោក យ៉ង សាំង កុមារ៖ «អាហ្នឹងបើស្រួលបំផុតគឺរដ្ឋជួយទិញតែម្តង យកទៅចែកដល់ប្រជាជននៅក្នុងទីក្រុងដែលកំពុងជួបការលំបាក ចំនួន៥០០០តោនវាមិនច្រើនប៉ុន្មានទេ»។

បើតាមលោក តៃ សុង គឺកសិកររាប់ពាន់គ្រួសារកំពុងតែដាំដុះបន្លែចម្រុះនៅលើផ្ទៃដីប្រមាណ៥០០ហិកតា នៅឃុំទឹកវិល ស្រុកស្អាង។​

លោក យ៉ង សាំងកុមារ មានប្រសាសន៍ថា នៅក្នុងរាជធានីភ្នំពេញត្រូវការបន្លែប្រមាណ១០០០តោនក្នុង១ថ្ងៃ។

រដ្ឋាភិបាលបានសម្រេចបិទខ្ទប់រាជធានីភ្នំពេញ និងក្រុងតាខ្មៅនៃខេត្តកណ្តាល ដើម្បីកាត់ផ្តាច់ការរីករាលដាលជំងឺកូវីដ១៩ ចាប់ពីថ្ងៃទី១៥ ខែមេសា និងបានបន្តមួយសប្តាហ៍ទៀត គឺចាប់ពីថ្ងៃទី២៩ ខែមេសា ដល់ថ្ងៃទី៥ ខែឧសភា។ កសិករដាំបន្លែនៅស្រុកស្អាងអះអាងថា ការបិទខ្ទប់នេះធ្វើឲ្យ បន្លែរបស់ពួកគាត់មិនមានអ្នកទិញ ហើយត្រូវបង្ខំចិត្តភ្ជួរចោល។​​

បើតាមក្រុមកសិករដែលផ្តល់បទសម្ភាសន៍ប្រាប់អ្នកសារព័ត៌មានខេមបូចា បានអះអាងថា ពួកគាត់នៅឃុំទឹកវិលស្រុងស្អាងនេះជាង៩០ភាគរយដែលខ្ចីលុយពីបុគ្គលឯកជន និងធនាគារដើម្បីដាំដុះ។ ពួកគាត់ថា ដោយសារករណីមិនមានទីផ្សារលក់ប​ន្លែនេះធ្វើឱ្យជីវភាពពួកគាត់កាន់តែលំបាកខ្លាំង មិនមានដើមទុនដាំបន្លែបន្ត និងក្លាយទៅជាអ្នកដែលជំពាក់បំណុលធ្ងន់ធ្ងររហូតមិនមានលទ្ធភាពសង។​

តាមលិខិតបំភ្លឺមួយរបស់ក្រសួងកសិកម្មនៅថ្ងៃទី២១ខែមេសាឆ្នាំ២០២១បានបញ្ជាក់ថា កម្ពុជាត្រូវការបន្លែ១លានតោនក្នុង១ឆ្នាំ ហើយការដាំក្នុងប្រទេសផ្គត់ផ្គង់បាន៧៥ភាគរយ និង២៥ភាគរយទៀតនាំចូលពីបរទេស។ ក្រសួងបញ្ជាក់ថា ក្នុងអំឡុងពេលបិទខ្ទប់ដើម្បីបង្ការមេរោគកូវីដនេះ ប៉ះពាល់ដល់ការលក់បន្លែរបស់កសិករនៅតំបន់ផ្សេងរួមទាំងនៅស្រុកស្អាង ខេត្តកណ្តាលផងដែរ៕

3,578 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានថ្មីៗ »
អត្ថបទពេញនិយម »