ខណៈការអបអរឆ្នាំថ្មីនឹងត្រូវធ្វើឡើងនៅទូទាំងប្រទេស ប្រជាពលរដ្ឋកម្ពុជាបង្ហាញពីចេតនាចង់រៀបចំពិធីមួយនេះយ៉ាងខ្លាំងបន្ទាប់ពីខកខានអស់រយៈពេលពីរឆ្នាំដោយសារតែការរាតត្បាតជំងឺកូវីដ-១៩។
យ៉ាងណា ក៏មានប្រជាពលរដ្ឋមួយចំនួនបានប្រាប់ ខេមបូចា ថាពួកគេក៏មានកង្វល់ពីការឆ្លងរាលដាលជំងឺកូវីដ-១៩ អំឡុងពិធីចូលឆ្នាំនេះផងដែរ។ អ្នកខ្លះថាពួកគេមិនសូវហានចំណាយច្រើនទេ ដោយសារតែពេលផ្ទុះវិបត្តិកូវីដ-១៩ ពួកគេបានប្រឈមបញ្ហាថវិកាខ្លាំងមកហើយ។
អ្នកស្រី ពៅ ភក្ដី អ្នករស់នៅសង្កាត់ស្ទឹងមានជ័យ ក្នុងរាជធានីភ្នំពេញ ដែលកាលពីឆ្នាំ២០២១ គឺជាតំបន់ក្រហម និងត្រូវបិទខ្ទប់ផងនោះ លើកឡើងថា អ្នកស្រីសប្បាយចិត្តដែលរដ្ឋាភិបាលសម្រេចចិត្តឲ្យមានការរៀបចំពិធីបុណ្យចូលឆ្នាំឡើងវិញនៅឆ្នាំនេះ។
អ្នកស្រីឲ្យដឹងថា៖ «បើនិយាយពីអារម្មណ៍ ខ្ញុំរំភើបចិត្តណាស់ ពីព្រោះប្រជាពលរដ្ឋមានភាពធុញថប់ជាងពីរឆ្នាំមកហើយតាំងពីមានវិបត្តិកូវីដ–១៩ ពីព្រោះអ្នកទាំងនោះគិតច្រើន មុខរបររកស៊ីក៏ពិបាក ចំណូលក៏តិច ហើយការចំណាយវិញក៏ខ្ពស់»។ ដោយអ្នកស្រីបន្ថែមថា៖ «អ្នកខ្លះបាត់បង់ការងារ និងអ្នកខ្លះទៀតកាន់តែពិបាកខ្លាំងដោយសារជំពាក់ធនាគារ។ ពេលគាត់[នាយករដ្ឋមន្ត្រី] ប្រកាសបើកឡើងវិញ ប្រជាពលរដ្ឋអាចធ្វើដំណើរទៅស្រុកបានជួបសាច់ញាតិ និងកាត់បន្ថយភាពតានតឹងខ្លះ»។
ជាមួយគ្នានេះដែរអ្នកស្រីថា អ្នកស្រីក៏មានបញ្ហាផ្នែកហិរញ្ញវត្ថុដែរ។ ជាមួយនឹងតម្លៃប្រេងសាំងកើនឡើង និងតម្លៃទំនិញចាំបាច់ផ្សេងទៀត អ្នកស្រីថា គ្រួសារអ្នកស្រីត្រូវគិតគូរឲ្យបានហ្មត់ចត់លើការចំណាយក្នុងដំណើរកម្សាន្ត ដើម្បីកាត់បន្ថយភាពតានតឹងរយៈពេលពីរឆ្នាំកន្លងមកនេះ។
អ្នកស្រីក៏បារម្ភពីការឆ្លងជំងឺកូវីដ-១៩ ក្រោយពិធីបុណ្យចូលឆ្នាំនេះដែរ។
អ្នកស្រីបន្ថែមថា៖ «បញ្ហា(កូវីដ–១៩) គឺពិបាកចៀស ប៉ុន្តែប្រជាពលរដ្ឋត្រូវតែដឹងថាយើងបានរស់នៅជាមួយកូវីដពីរឆ្នាំមកហើយ។ យើងត្រូវតែការពារខ្លួនយើង»។ អ្នកស្រី ក៏បានជំរុញឲ្យប្រជាពលរដ្ឋផ្សេងទៀតបន្តអនុវត្តវិធានការសុខាភិបាលដូចជារក្សាគម្លាត និងពាក់ម៉ាសជាដើម។
ទោះបីជាអ្នកស្រី និងគ្រួសារមិនមានផែនការធំដុំអ្វីសម្រាប់ពិធីចូលឆ្នាំ តែថាខ្លួនបានត្រៀមខ្លួនរួចរាល់ហើយក្នុងការទទួលទេពតាឆ្នាំថ្មី។
ប្រជាពលរដ្ឋផ្សេងទៀតប្រាប់ខេមបូចា ថាពួកគេមានអារម្មណ៍រំភើបសម្រាប់ការរៀបចំបុណ្យចូលឆ្នាំថ្មីនេះ។
លោក ធូ វុន វ័យ ៥៥ឆ្នាំ ធ្វើការជាកម្មករសំណង់ជាងប្រាំពីរឆ្នាំមកហើយនោះ ឲ្យដឹងដែរថា លោកពេញចិត្ត និងត្រេកអរចំពោះពិធីបុណ្យចូលឆ្នាំថ្មី ដោយសារថាលោកមិនបានទៅលេងស្រុកជាងពីរឆ្នាំមកហើយ ដោយសារតែមានបញ្ហាកូវីដ-១៩។
លោកនិយាយដោយសំដៅដល់ឆ្នាំមុនថា៖ «ពួកគេ(រដ្ឋាភិបាល)មិនអនុញ្ញាតឲ្យខ្ញុំទៅស្រុកទេនៅពេលនោះ ដូចនេះខ្ញុំត្រូវនៅធ្វើការធម្មតា…ដោយសារពួកយើងមិនបានជួបគ្នាជាងពីរឆ្នាំមកហើយ ខ្ញុំពិតជារំភើបណាស់ដែលបានទៅជួបជុំសាច់ញាតិ ហើយខ្ញុំក៏អាចទៅវត្តយកចង្ហាន់ទៅប្រគេនព្រះសង្ឃបានដូចធម្មតា»។
ចំពោះបញ្ហាប្រាក់ទៅលេងស្រុក លោកថា មិនមែនជាបញ្ហាប្រឈមខ្លាំងរបស់លោកទេ។ លោកថា ក្នុងពេលវិបត្តិកូវីដ-១៩ ជាងពីរឆ្នាំមកនេះលោកនៅទទួលបានប្រាក់ខែជាប្រចាំ ដែលថាអាចឲ្យលោកចាត់ចែងទៅស្រុកជួបសាច់ញាតិបាន។ មិនខុសពីអ្នកស្រី ភក្ដី ដែរ លោក វុន ក៏បានជំរុញឲ្យប្រជាពលរដ្ឋទាំងអស់ចេះការពារខ្លួន បង្ការការឆ្លងជំងឺកូវីដ-១៩។
លោកបន្ថែមថា៖ «យើងត្រូវតែប្រុងប្រយ័ត្នការពារ[ខ្លួនយើង] ហើយគួរណែនាំកូនក្មួយឲ្យចេះការពារដែរ ដូចជាពាក់ម៉ាស ក៏ដូចជាលាងសម្អាតដៃឲ្យបានទៀងទាត់»។
លោកនាយករដ្ឋមន្ត្រី ហ៊ុន សែន បានប្រកាសកាលពីថ្ងៃទី៣១ ខែមីនា ឆ្នាំ២០២២ ក្នុងឱកាសសម្ពោធដាក់ឲ្យប្រើប្រាស់ស្ពានអាកាសចោមចៅថា ប្រជាពលរដ្ឋកម្ពុជានឹងប្រារព្ធពិធីបុណ្យចូលឆ្នាំខ្មែរក្នុងឆ្នាំ២០២២ នេះ។
ក្រសួងសុខាភិបាលក៏បានរំឭកជាថ្មីពីវិធានការសុខាភិបាលពេលដែលបើកប្រទេសឡើងវិញនេះ ដោយត្រូវបន្តអនុវត្តវិធានការ «បីកុំ និងបីការពារ»។
វិធានការរបស់ក្រសួងនេះក៏រួមមានទាំងការលើកទឹកចិត្តឲ្យមានការធ្វើតេស្តរហ័សពេលសង្ស័យថាឆ្លងកូវីដ-១៩ ពាក់ម៉ាស លាងសម្អាតដៃ និងរក្សាគម្លាតសុវត្ថិភាពជាដើម។ ក្រសួងសុខាភិបាល ក៏បានណែនាំឲ្យប្រជាពលរដ្ឋជ្រើសរើសមធ្យោបាយធ្វើដំណើរណាដែលមានសុវត្ថិភាព ដើម្បីកាត់បន្ថយហានិភ័យឆ្លងជំងឺកូវីដ-១៩ និងគ្រោះថ្នាក់ចរាចរណ៍។
ព្រះតេជគុណ ម៉ុក ពុទ្ធិកា ព្រះចៅអធិការវត្តកំពង់គរ ក្នុងឃុំកំពង់គរ ខេត្តក្រចេះ មានសង្ឃដីកាថា ព្រះអង្គមានចិត្តរីករាយដែលបានរៀបចំពិធីបុណ្យចូលឆ្នាំថ្មីនេះ។
ព្រះអង្គមានសង្ឃដីកាបន្តថា៖ «អាត្មាមានចិត្តសប្បាយរីករាយដែលនាយករដ្ឋមន្ត្រីបានបើកឲ្យប្រជាពលរដ្ឋរៀបចំបុណ្យចូលឆ្នាំថ្មី ពិសេសសាច់ញាតិបានជួបជុំគ្នា…ការសម្រេចនេះបានធ្វើឲ្យប្រជាពលរដ្ឋអាចប្រារព្ធពិធីតាមទំនៀមទម្លាប់ប្រពៃណីរបស់ខ្មែរយើង»។
ព្រះអង្គប្រាប់ខេមបូចាថា នៅវត្តរបស់ព្រះអង្គ ព្រះសង្ឃ និងពុទ្ធបរិស័ទបានរៀបចំតុបតែងវត្តសម្រាប់ទទួលឆ្នាំថ្មីតាំងពី២០ថ្ងៃមុនថ្ងៃចូលឆ្នាំមកដល់។ ព្រះអង្គក៏បានកត់សម្គាល់ដែរថា ប្រជាពលរដ្ឋសប្បាយរីករាយពេលឃើញព្រះសង្ឃរៀបចំតុបតែងវត្តសម្រាប់បុណ្យប្រពៃណីជាតិ និងបានចួលរួមបច្ច័យ និងអ្នកខ្លះស្ម័គ្រចិត្តជួយផងដែរ។
អ្នកនាំពាក្យក្រសួងទេសចរណ៍ លោក តុប សុភ័ក មានប្រសាសន៍ថា ក្រសួងបានប៉ាន់ស្មានថានឹងមានភ្ញៀវទេសចរច្រើនធ្វើដំណើរទៅកាន់គោលដៅនានាក្នុងប្រទេសកម្ពុជាអំឡុងថ្ងៃបុណ្យចូលឆ្នាំនេះ។
លោកប្រាប់ខេមបូចាថា ជាទូទៅក្នុងខេត្តនីមួយៗគឺបានត្រៀមរួចរាល់ក្នុងការទទួល និងរៀបចំពិធីបុណ្យចូលឆ្នាំខ្មែរ។ ថ្វីបើមិនមានរៀបចំអង្គរសង្ក្រាន្តនៅខេត្តសៀមរាបក្ដី លោកថា ក៏នៅមានការរៀបចំការលេងល្បែងប្រជាប្រិយ និងការរាំកម្សាន្តនៅទូទាំងប្រទេសដែរ។
លោកបន្ថែមថា៖ «ទោះបីស្ថិតនៅក្នុងស្ថានភាពកូវីដ–១៩ នៅក្នុងប្រទេស រាជរដ្ឋាភិបាលបានគ្រប់គ្រងស្ថានភាពល្អប្រសើរ។ ដូច្នេះ ភ្ញៀវទេសចរទាំងអស់ អាចចេញដើរលេងបានគ្រប់គោលដៅទេសចរណ៍ទាំងអស់ប្រកបដោយសុវត្ថិភាព…អ្វីដែលសំខាន់ គឺមិនត្រូវភ្លេចអនុវត្តវិធានការសុខាភិបាល»។
លោកបញ្ជាក់ដែរថា៖ «ក្រៅពីអនុវត្តវិធានការសុខាភិបាល និងវិធានការសុវត្ថិភាពទេសចរណ៍ យើងក៏ផ្ដោតសំខាន់ក្នុងការរក្សាចំនួនមនុស្សមិនឲ្យច្រើនពេកដែរ»។
លោកឲ្យដឹងថា ក្រសួងបានណែនាំដល់មន្ទីរទេសចរណ៍ឲ្យយកចិត្តចំពោះការណែនាំនេះ។
នៅថ្ងៃពុធ ក្រសួងសុខាភិបាលរកឃើញអ្នកឆ្លងកូវីដ-១៩ ថ្មីចំនួន ១៨ករណី បញ្ជាក់ដោយម៉ាស៊ីន CPR ហើយក៏មានអ្នកជាសះស្បើយចំនួន២៣នាក់ និងមិនមានអ្នកស្លាប់នោះទេ។ គិតមកដល់ថ្ងៃពុធនេះ កម្ពុជាមានចំនួនអ្នកឆ្លងសរុបចំនួន ១៣៥ ៩៩៨ករណី អ្នកស្លាប់មាន ៣ ០៥៥នាក់ និងអ្នកជាសះស្បើយពីកូវីដ-១៩ មានចំនួន ១៣២ ៦៨៩នាក់។
ព្រះតេជគុណព្រះគុណ ពុទ្ធិកា មានសង្ឃដីកាដែរថា ព្រះអង្គបានរៀបចំឲ្យព្រះសង្ឃរៀបចំវិធានការពារការឆ្លងកូវីដ-១៩ នេះដែរ ដោយអនុវត្តតាមវិធានការសុខាភិបាល។
ព្រះអង្គមានសង្ឃដីកាបន្ថែមថា៖ «អាត្មាបានរៀបចំក្រុមព្រះសង្ឃឲ្យចាំបាញ់អាល់កុល និងមានម៉ាស នៅចាំត្រង់ខ្លោងទ្វារ ដើម្បីចែកម៉ាស បើសិនជាពុទ្ធបរិស័ទមិនមានម៉ាសពេលចូលមកលេងក្នុងវត្ត»។ ព្រះអង្គបន្តថា ក្រុមព្រះសង្ឃក៏នឹងរៀបចំផ្សព្វផ្សាយពីការយល់ដឹងជំងឺកូវីដ-១៩ ក្នុងពិធីបុណ្យនេះផងដែរ។
ព្រះអង្គមានសង្ឃដីកាទៀតថា យុវជនគួរតែចៀសវាងលេងល្បែងដែលហាមឃាត់ នាំឲ្យប៉ះពាល់ដល់វប្បធម៌ជាតិ និងថាព្រះអង្គបានរៀបចំល្បែងប្រជាប្រិយខ្មែរសម្រាប់ប្រជាពលរដ្ឋផងដែរ។
ព្រះអង្គឲ្យដឹងថា៖ «ល្បែងប្រជាប្រិយដែលយើងគ្រោងនឹងរៀបចំលេង គឺមានលោតបាវ វាយក្អម ផ្លុំម្សៅ បូមទឹកដាក់ដប និងទាញព្រ័ត្រ»។
ប្រែសម្រួលពីអត្ថបទភាសាអង់គ្លេស៖ After two years without, Cambodians prepare Khmer New Year celebrations