រដ្ឋាភិបាលកម្ពុជាបានអនុញ្ញាតឲ្យក្រុមហ៊ុនឯកជនមួយឈ្មោះថា Focus Trans Global Venture Co Ltd (FTGV) សិក្សាពីការសាងសង់អាកាសយានដ្ឋានថ្មីមួយក្នុងខេត្តមណ្ឌលគិរី ដែលជាការវិនិយោគតាមទម្រង់សាងសង់ ធ្វើអាជីវកម្ម និងផ្ទេរ ឬហៅកាត់ថា BOT នេះបើតាមសេចក្តីសម្រេចរបស់ទីស្ដីការគណៈរដ្ឋមន្ត្រីកាលពីថ្ងៃទី៩ ខែមករា ឆ្នាំ២០២៤។
អ្នកនាំពាក្យអាកាសចរណ៍ស៊ីវិល លោក ស៊ិន ចាន់សេរីវុត្ថា បានឲ្យដឹងថាអាកាសយានដ្ឋាននេះគ្រោងចំណាយថវិកាចំនួន៣០០លានដុល្លារ ប៉ុន្តែថវិកាអាចកើនឡើងដល់រាប់ពាន់លានដុល្លារដោយរួមបញ្ចូលទាំងការសាងសង់ទីក្រុងរណប និងមជ្ឈមណ្ឌលពាណិជ្ជកម្មពហុបំណង។
លោកមានប្រសាសន៍ថាក្រុមហ៊ុន គឺជាផ្នែកមួយរបស់សម្ព័ន្ធក្រុមហ៊ុនហ្វូខឹស (Focus Consortium) ដែលមិនមែនសាងសង់តែអាកាសយានដ្ឋានថ្មីទេ ប៉ុន្តែក៏សាងហេដ្ឋារចនាសម្ព័ន្ធផ្សេងៗ ដូចជាមណ្ឌលទំនិញ និងឧស្សាហកម្ម។
លោកពន្យល់ថា៖ «យើងផ្ដោតលើទំនិញតាមផ្លូវអាកាស និងអ្នកដំណើរ ពីព្រោះថាយើងមិនអាចសាងសង់អាកាសយានដ្ឋានដោយពឹងផ្អែកតែលើការដឹកជញ្ជូនអ្នកដំណើរនោះទេ។ យើងត្រូវតែពង្រីកវិសាលភាពរបស់វាទៅជាការដឹកជញ្ជូនទំនិញតាមផ្លូវអាកាស»។
លោកបន្តថា៖ «យើងនឹងពង្រឹងការប្រកួតប្រជែងរបស់កម្ពុជា នាំកសិឧស្សាហកម្មចេញ ក៏ដូចជាទាក់ទាញ [អ្នកទេសចរ] បែបអេកូទេសចរណ៍ បង្កើតការងារ និងបង្កើនការវិនិយោគ»។
អាកាសយានដ្ឋានថ្មីនេះមានទីតាំងនៅក្នុងភូមិពូហ្សាម ឃុំសែនមនោរម្យ ស្រុកអូររាំង ដែលគ្របដណ្ដប់លើផ្ទៃដីប្រហែល៣០០ហិកតា។
លោកបន្តថា៖ «យើងបានពិភាក្សាគ្នារួចហើយរវាងអន្តរក្រសួង អំពីផលប៉ះពាល់បរិស្ថាន។ វាមានផលប៉ះពាល់តិចតួច និងមិនពាក់ព័ន្ធច្រើនទៅនឹងការកាប់ព្រៃនោះទេ»។
លោកឲ្យដឹងទៀតថា៖ «យើងបានដោះស្រាយរួចហើយ [បញ្ហា] ជាមួយអ្នកភូមិលើដីស្រែចម្ការ។ មានដីឯកជនខ្លះដែរ ហើយពេលដែលពួកគេ [ក្រុមហ៊ុន] អភិវឌ្ឍន៍ ពួកគេនឹងពិភាក្សាជាមួយអ្នកទាំងនោះ»។
ក្រុមហ៊ុន FTGV មិនបានឆ្លើយតបសំណើសុំអត្ថាធិប្បាយរបស់អ្នកសារព័ត៌មាននោះទេ។
អភិបាលរងខេត្តមណ្ឌលគិរី លោក ជាក់ ម៉េងហ៊ាង មានប្រសាសន៍ថាអាកាសយានដ្ឋានថ្មីនេះនឹងជួយសម្រួលដល់ការដឹកជញ្ជូនទំនិញ និងទាក់ទាញអ្នកទេសចរ និងអ្នកវិនិយោគបន្ថែមទៀត។
លោកលើកឡើងថា៖ «ពេលមានអាកាសយានដ្ឋានថ្មី តំបន់នេះនឹងមានសក្ដានុពលសេដ្ឋកិច្ចកាន់តែខ្ពស់»។ លោកបន្ថែមថាមានប្រជាពលរដ្ឋប្រហែល៥០គ្រួសារបានរងផលប៉ះពាល់ពីគម្រោងអភិវឌ្ឍន៍នេះ ប៉ុន្តែថារាល់បញ្ហាបានដោះស្រាយរួចរាល់ហើយ។
លោកបន្តថា៖ «មានបងប្អូនជាជនជាតិដើមភាគតិចរបស់យើង ដែលអាស្រ័យផលនៅទីនោះ ប៉ុន្តែយើងបានដោះស្រាយបញ្ហានោះហើយ ដោយបានដោះដូរដី និងផ្ដល់ជាសំណង»។
អ្នកស្រី ផ្លឹក ភីរម្យ ប្រធានបណ្ដាញជនជាតិដើមភាគតិចពូនងក្នុងខេត្តមណ្ឌលគិរី បង្ហាញក្ដីបារម្ភអំពីការកាប់បំផ្លាញព្រៃឈើ និងការបាត់បង់ព្រៃឈើ ក៏ដូចជាដីព្រៃដូនតា ដែលអ្វីទាំងនោះបានផ្សារភ្ជាប់ទៅនឹងប្រពៃណី និងទំនៀមទម្លាប់របស់ជនជាតិដើមភាគតិច។
អ្នកស្រីលើកឡើងថា៖ «យើងបានឃើញផលប៉ះពាល់ [ការអភិវឌ្ឍ] លើដីកប់សព និងដីចម្ការ ក៏ដូចជាព្រៃ និងសត្វព្រៃ»។
អ្នកស្រីបន្ថែមថាសំណងមិនច្រើន គ្រប់គ្រាន់សម្រាប់បង្កើនជីវភាពជនជាតិដើមភាគតិចនោះទេ ដោយពួកគេនឹងជួបបញ្ហាខ្វះដីសម្រាប់ធ្វើស្រែចម្ការ។
ជាមួយគ្នានេះដែរ លោក ចាន់ សុផល នាយកមជ្ឈមណ្ឌលសិក្សាគោលនយោបាយ មានប្រសាសន៍ថាអាកាសយានដ្ឋានខេត្តមណ្ឌលគិរីមានសក្ដានុពលទាក់ទាញភ្ញៀវទេសចរជាតិ និងអន្តរជាតិ។
បច្ចុប្បន្នការធ្វើដំណើរពីទីក្រុងនានាត្រូវការពេលច្រើនម៉ោង ដោយថាមិនមានផ្លូវល្បឿនលឿន ដូចនេះចំនួនភ្ញៀវទេសចរក្នុងស្រុកក៏មានកម្រិត។
ពេលមានអាកាសយានដ្ឋានថ្មី វាមិនត្រឹមតែកាត់បន្ថយពេលវេលាធ្វើដំណើរ ប៉ុន្តែជាលទ្ធផលអាចធ្វើឲ្យមានការអភិវឌ្ឍកាន់តែច្រើន ដោយវិស័យរដ្ឋ និងឯកជនគាំទ្រការវិនិយោគអាកាសយានដ្ឋាននេះ។
លោកបន្តថា៖ «ការកសាងអាកាសយានដ្ឋាននេះក៏ផ្ដល់ឱកាសឲ្យខេត្តមានការវិនិយោគកាន់តែច្រើន និងបង្កើនសេវាទេសចរណ៍បផងដែរ»៕
ប្រែសម្រួលពីភាសាអង់គ្លេស៖ New M’kiri Airport To Boost Tourism, Economy But Deforestation Concerns Linger
