សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋភូមិព្រែកតាគង់បារម្ភអាជ្ញាធរមិនប្រគល់ដីដែលខ្ចីស្តារប្រឡាយ​រំដោះទឹកបណ្ដោះអាសន្ន

ប្រឡាយពង្វាងទឹកស្អុយ ស្ថិតក្នុងភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ ដែលកាយកាត់ដីកម្មសិទ្ធិប្រជាពលរដ្ឋ ខណៈពួកគេបារម្ភថាអាជ្ញាធរនឹងមិនគោរពសន្យាប្រគល់ដីឲ្យពួកគេវិញ។ រូបថតនៅថ្ងៃទី១៨ ខែមករា ឆ្នាំ២០២៤។ (ខេមបូចា/ សុវណ្ណ ស្រីពេជ្រ)
ប្រឡាយពង្វាងទឹកស្អុយ ស្ថិតក្នុងភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ ដែលកាយកាត់ដីកម្មសិទ្ធិប្រជាពលរដ្ឋ ខណៈពួកគេបារម្ភថាអាជ្ញាធរនឹងមិនគោរពសន្យាប្រគល់ដីឲ្យពួកគេវិញ។ រូបថតនៅថ្ងៃទី១៨ ខែមករា ឆ្នាំ២០២៤។ (ខេមបូចា/ សុវណ្ណ ស្រីពេជ្រ)

លើសរយៈពេល៦ខែហើយដែលជាកិច្ចសន្យាកំណត់ក្នុងការខ្ចីដីពលរដ្ឋនៅភូមិព្រែកតាគង់១ សម្រាប់​​បង្ហូរទឹកលូ ដើម្បីស្ដារប្រឡាយរំដោះទឹកក្រុងភ្នំពេញដែលហូរចាក់ចូលបឹងទំពន់។ ពលរដ្ឋបារម្ភថាអាជ្ញាធរនឹងមិនប្រគល់ដីឲ្យពួកគេវិញ ព្រោះអាជ្ញាធរធ្លាប់គំរាមថា​នឹងដក​យក​​ដី​វិញបើមិនព្រមសហការ ហើយរយៈពេលខ្ចីដីក៏អូសបន្លាយមិនមានភាពច្បាស់លាស់។ 

ធំដឹងក្ដី និងរស់នៅភូមិព្រែកតាគង់តាំងពីឆ្នាំ១៩៨០ លោក មុំ សាវុធ​ អាយុ៤០ឆ្នាំប្លាយ បាន​លើក​ឡើងថា អាជ្ញាធរខណ្ឌមានជ័យបានខ្ចីដីពីពលរដ្ឋបណ្ដោះអាសន្ន​ប្រមាណ២៥​គ្រួសារ​នៅដើមឆ្នាំ២០២៣ ដើម្បីបង្ហូរទឹកកង្វក់ចេញពីប្រឡាយរំដោះទឹក ខណៈទីតាំងនោះត្រូវការ​ស្ដារ​ឡើងវិញ ដូច្នេះទើបត្រូវជីកប្រឡាពង្វាងទឹកលូបណ្ដោះអាសន្នសិន។ ពលរដ្ឋរូបនេះ​បន្ថែម​​ថា ដីរបស់លោកមានកម្មសិទ្ធិស្របច្បាប់ ដែលរស់នៅ សង់ផ្ទះសម្បែងជាយូរ​ណាស់​មក​ហើយ​។ ដោយសារតែរដ្ឋត្រូវការខ្ចីដីបណ្ដោះអាសន្ន ទើបលោកយល់ព្រមសហការ​ដោះ​ដូរ ហើយរើទៅនៅផ្ទះជួល។

លោកសាវុធ បន្ថែមថា នៅក្នុងកិច្ចសន្យា គឺត្រូវការដីតែ៦ខែប៉ុណ្ណោះ ហើយក្នុងមួយខែ​លោក​ទទួល​បាន​ទឹកប្រាក់ពីការជួលដីចំនួន​៣០០ដុល្លារ ដែលការដោះដូរនេះមិនសមរម្យសម្រាប់​ចំណាយ​ប្រចាំខែឡើយ។ បច្ចុប្បន្នលោកនិងក្រុមគ្រួសាររស់នៅផ្ទះជួល និងប្រឈមការ​លំបាក​នានាព្រោះត្រូវបង់ថ្លៃផ្ទះជួល ទឹក ភ្លើង ជាពិសេសបារម្ភថាអាជ្ញាធរនឹងអូសបន្លាយការ​សាងសង់ ហើយមិនប្រគល់ដីជូនគាត់វិញ។

លោក សាវុធ និយាយថា៖ «ខ្ញុំជាប្រជាពលរដ្ឋគ្មានចង់បានអីច្រើនទេ ក្រៅពីប្រគល់ដីឲ្យ​ពួកខ្ញុំ​វិញ ហើយមានកិច្ចសន្យាច្បាស់លាស់​បើថា១ឆ្នាំឲ្យច្បាស់១ឆ្នាំ ២ឆ្នាំឲ្យច្បាស់ពីឆ្នាំ ព្រោះហួស​រយៈពេល៦ខែដែលសន្យាហើយ។​ ខ្ញុំមិនចង់ជួលផ្ទះគេនៅទេព្រោះវាពិបាករស់នៅណាស់ ខ្ញុំចង់បានដីខ្ញុំមកវិញដើម្បីសង់ផ្ទះនៅ»

ក្រៅតែពីកង្វល់ និងបញ្ហាប្រឈមនានា លោក សាវុធ អះអាងថា ប្រឡាយទឹកស្អុយដែលមាន​ជម្រៅជ្រៅមានទឹកហូរកាត់កណ្ដាលភូមិ បានជះក្លិនស្អុយ ហើយងាយធ្វើឲ្យកុមារ​ក្នុងភូមិងាយ​គ្រោះថ្នាក់ ស្របពេលថ្មីៗមានមនុស្សធំលង់ទឹកស្លាប់ផងដែរ។

លោកបន្ថែមថា៖ «ប្រឡាយហ្នឹងហូរកាត់កណ្ដាលភូមិ ជម្រៅជ្រៅណាស់វាប៉ះពាល់ដល់ក្មេងៗ ហើយថ្មីៗនេះមានមនុស្សលង់ទឹកស្លាប់ទៀត»

ទិដ្ឋភាពប្រឡាយទឹកស្អុយ ដែលកាយកាត់ដីផ្ទះប្រជាពលរដ្ឋ អមជាមួយកម្ទេចសំរាម ស្ថិត​នៅ​ពី​ក្រោយបុរីធំៗក្នុងសង្កាត់ចាក់អង្រែលើ។ រូបថតនៅថ្ងៃ​ទី១៨ ខែមករា ឆ្នាំ២០២៤។ (ខេមបូចា/ សុវណ្ណ ស្រីពេជ្រ)​

ពលរដ្ឋមួយរូបទៀត គឺអ្នកស្រី សូ រីនី បានឲ្យដឹងថា អាជ្ញាធរហាក់មិនបានឆ្លើយតប​ចំពោះក្ដី​បារម្ភ និងការចង់បានរបស់ពលរដ្ឋ ត្បិតការអូសបន្លាយពេលវេលាកាន់តែធ្វើឲ្យប៉ះពាល់​ដល់​ជីវភាព និងការរស់នៅរបស់ពលរដ្ឋ។ ហើយមិនត្រឹមតែប៉ុណ្ណោះ គឺអ្នកស្រីបារម្ភថា ​អាជ្ញាធរនឹង​មិន​ប្រគល់​ដី​ឲ្យអ្នកស្រីវិញ ត្បិតបច្ចុប្បន្ននេះ នៅតែមិនមានការសន្យាជាក់លាក់ ឬដំណោះ​ស្រាយ​គួរឲ្យទុកចិត្តបាន។

អ្នកស្រី រីនី និយាយថា៖ «ខ្ញុំខ្លាចបួន ប្រាំឆ្នាំទៅរដ្ឋយកដីខ្ញុំទៅបាត់។ ខ្ញុំខកចិត្តជាខ្លាំង​ ព្រោះ​រដ្ឋ​អំណាច​ធ្វើដូច្នេះមកលើពលរដ្ឋ ព្រោះខ្ញុំចង់បានតែដំណោះស្រាយសមស្រប បើមិនអ៊ីចឹងទេ​ខ្ញុំយកដីខ្ញុំមកវិញហើយ»

 អ្នកស្រី រីនី អះអាងថា អ្នកស្រីចូលរួមចំពោះការអភិវឌ្ឍ​ ប៉ុន្តែនៅពេលដែលប៉ះពាល់ដល់​ប្រជាពលរដ្ឋ អាជ្ញាធរគួរតែគិតគូរពីសុខទុក្ខ និងផលប្រយោជន៍រាស្រ្តផងដែរ។

អ្នកស្រីថ្លែងថា៖ «ក្រុមហ៊ុន និងរដ្ឋត្រូវតែធ្វើអ៊ីចឹង[គិតគូរសំណងសមរម្យ]ជូនពលរដ្ឋ​ ព្រោះខ្ញុំ​ចូល​រួមអភិវឌ្ឍន៍ប្រទេសជាតិហើយ ខ្ចីដីខ្ញុំ៦ខែពេលខ្ញុំសួរពេលណាសាងសងហើយ គេឆ្លើយ​ថាអត់ដឹង»។

អ្នកស្រី ស្វាយ សុគន្ធី ជាពលរដ្ឋមួយរូបទៀតលើកឡើងថា អ្នកស្រីត្រូវបានអាជ្ញាធរ​បង្ខំ​ឲ្យ​យល់​ព្រមប្រគល់ដីទទឹង១៦ម៉ែត្រ បណ្ដោយ​៥០ម៉ែត្រ កាយ​ប្រឡាយ​រំដោះទឹកបណ្ដោះ​អាសន្ន ដោយអាជ្ញាធរធ្លាប់គំរាមដាក់អ្នកស្រីថា «បើមិនព្រមក៏កាយដែរ ហើយនឹងរំលាយ​ប្លង់ដី​ចោល»។ ដោយហេតុថាខ្លាចបាត់បង់ដី អ្នកស្រីក៏យល់ព្រម តែរហូតមកដល់ពេលនេះ​នៅតែមិនមានកិច្ចសន្យាច្បាស់លាស់ថាពេលណាគម្រោងសាងសង់នឹងបញ្ចប់ ហើយប្រគល់​ដី​ឲ្យអ្នកស្រីវិញដើម្បីសង់ផ្ទះរស់នៅ។

អ្នកស្រី សុគន្ធី លើកឡើងថា៖ «ខ្ញុំចង់បានកិច្ចសន្យាច្បាស់លាស់ ហើយជួលដំបូងអត់មាន​សំណង​អ្វីទាំងអស់ យើងត្រូវតែចូលរួមបើយើងមិនព្រមក៏គេនៅតែកាយ គេដាក់អាអ៊ិចមក​កាយដីយើង អ្នកណានៅដេកយាមដី រកស៊ីបង់ផ្ទះជួល»

អ្នកស្រីមានក្ដីកង្វល់ជាខ្លាំងមិនខុសពីពលរដ្ឋដទៃនោះឡើយ ព្រោះខ្លាចអាជ្ញាធរ​មិន​គោរព​ពាក្យ​សន្យាពេលចប់គម្រោងនឹងលុបប្រលាយទឹកស្អុយសងដីឲ្យពលរដ្ឋវិញ អ្នកស្រី សុគន្ធី ថា៖ «ខ្ញុំខ្លាចតែទៅជាប្រឡាយអ៊ីចឹងរហូតណា៎ មានប្លង់កម្មសិទ្ធិបានត្រឹមតែកម្មសិទ្ធិ ចង់ខ្ចី​លុយធនាគារក៏មិនកើត»

បើតាមប្រជាពលរដ្ឋគម្រោងស្ដារប្រឡាយរំដោះទឹកនេះ គឺជាគម្រោងរបស់អង្គការចៃកា​របស់​ជប៉ុន ដែលបានផ្ដល់សិទ្ធិឲ្យទៅក្រុមហ៊ុនឯកជនអ្នកសាងសង់បន្ត ប៉ុន្តែពួកគេមិនដឹងថា​ជា​ក្រុមហ៊ុន​មួយណានោះទេ។ យ៉ាងណាមិញ អ្នកស្រីសង្ឃឹមថា អាជ្ញាធរខណ្ឌនឹងផ្ដល់ទំនុកចិត្ត​ឲ្យ​ពលរដ្ឋ ជឿជាក់ទៅលើអង្គការចៃកាទៅលើគម្រោងស្ដារប្រឡាយទឹកនេះ ព្រោះបច្ចុប្បន្ន​អ្នកស្រី​កំពុងមានក្ដីបារម្ភ ខណៈសំណង និងរងការគំរាមកំហែងពីអាជ្ញាធរខណ្ឌ​នាពេលកន្លង​ទៅ។

អ្នកស្រីបន្ថែមថា៖ «ច្បាស់បំផុតគឺកុងត្រា ដើម្បីឲ្យខ្ញុំមានទំនុកចិត្តលើចៃកាហ្នឹង ទីពីរខ្ញុំចង់បាន​ថ្លៃជួលដីក្នុងមួយខែ៣០០ ព្រោះក្នុងក្រដាសដាក់ថាខ្ចី ខ្ញុំជួលផ្ទះគេនៅវេទនាណាស់ ហើយ​អត់​មានដំណោះស្រាយឲ្យខ្ញុំ»

អង្គការចៃកា គឺជាអង្គការមួយរបស់រដ្ឋាភិបាលនៃប្រទេសជប៉ុន មានវត្តមាននៅប្រទេសកម្ពុជា​តាំង​ពីឆ្នាំ១៩៦៥  និងបានជួយកែលម្អប្រព័ន្ធលូប្រឡាយនៅរាជធានីភ្នំពេញ​ដើម្បីរំដោះទឹក​លិច​លង់​នៅភ្នំពេញតាំងពីឆ្នាំ២០០១រហូតមកដល់ពេលបច្ចុប្បន្ន។

ខេមបូចា មិនអាចសុំការបកស្រាយពីមន្រ្តីទំនាក់ទំនងរបស់អង្គការចៃកា បានទេ គិតមកត្រឹម​ថ្ងៃទី១៨ ខែមករា ឆ្នាំ២០២៤ ជុំវិញបញ្ហាខាងលើនេះ។

សកម្មភាពគ្រឿងចក្រកំពុងបំពេញការងារសាងសង់នៅក្បែរទីតាំង​ប្រឡាយ​ពង្វាង​ទឹកស្អុយ ស្ថិតក្នុងភូមិព្រែកតាគង់១ ខណ្ឌមានជ័យ ដែលប្រជាពលរដ្ឋស្នើ​ឲ្យអាជ្ញាធរ​ប្រគល់ដី​ជូនពលរដ្ឋវិញ ត្បិតថាហួសកិច្ចសន្យាជួល។ រូបថតនៅថ្ងៃទី១៨ ខែមករា ឆ្នាំ២០២៤។ (ខេមបូចា/ សុវណ្ណ ស្រីពេជ្រ)​

ចំណែកលោក ឡុង ង៉ែត អភិបាលរងខណ្ឌមានជ័យ ទូរសព្ទច្រើនដងតែមិនទទួល។ ប៉ុន្តែតាម​រយៈ​សេចក្ដីប្រកាសរដ្ឋបាលខណ្ឌមានជ័យ កាលពីថ្ងៃទី២៧ ខែធ្នូ ឆ្នាំ២០២៣ អះអាងថា អាជ្ញាធរ​​បាន​ដឹកនាំកិច្ចប្រជុំជាមួយពលរដ្ឋដែលរងផលប៉ះពាល់ និងស្វែងរកដំណោះស្រាយ​ក្នុង​គម្រោង​ប្រឡាយ​ពង្វាងទឹករួចរាល់ហើយ។

សេចក្ដីប្រកាសដដែលឲ្យដឹងទៀតថា ការពន្យាពេលនៃការសាងសង់ក៏ដោយសារតែ​បញ្ហា​អាកាសធាតុ ទើបធ្វើឲ្យគម្រោងមានការ​យឺតយ៉ាវ និងសន្យាដោះស្រាយ​សំណងបន្ថែម​ជូន​ពលរដ្ឋដែលរងផលប៉ះពាល់។

ខេមបូចា បានទូរសព្ទសាកសួរព័ត៌មានបន្ថែមជុំវិញបញ្ហាប្រឡាយពង្វាងទឹកខាងលើ ប៉ុន្តែ​ប្រធាន​មន្ទីរសាធារណការ និងដឹកជញ្ជូនរាជធានីភ្នំពេញ លោក សាំ ពិសិដ្ឋ ថ្លែងឲ្យ​ដឹងថា​គម្រោងស្ថានីយទឹកកង្វក់ គឺបានបញ្ចប់ការសាងសង់ទៅហើយ និងដាក់ឲ្យដំណើរ​នាពេលថ្មីៗ​នេះ ហើយក៏មិនបានប៉ះពាល់ផ្ទះប្រជាពលរដ្ឋនោះដែរ។

លោក ពិសិដ្ឋ មានប្រសាសន៍ថា៖ «ទេ! សូមពិនិត្យមើលម្ដងទៀត បើស្ថានីយប្រព្រឹត្តកម្ម​ទឹក​កង្វក់​ខាងខ្ញុំអត់មានពាក់ព័ន្ធ ប៉ះពាល់នឹងអ្វីផ្សេងទេអី ឆែក[ពិនិត្យ]មើលឲ្យច្បាស់ចាំសួរ»។

លោក មេត មាសភក្ដី អ្នកនាំពាក្យសាលារាជធានីភ្នំពេញ មិនអាចទាក់ទងសុំការអធិប្បាយ​បាន ដោយទូរសព្ទតែ​មិនលើក។

ជុំវិញបញ្ហានេះលោក ស៊ាង មួយឡៃ ប្រធានគម្រោងសិទ្ធិលំនៅឋាន និងស្រាវជ្រាវនៃ​អង្គការ​សង្គម​ធាងត្នោត យល់ឃើញថា អាជ្ញាធរគួរតែស្វែងរកដំណោះស្រាយ ដោយតម្កល់​ផល​ប្រយោជន៍​ប្រជាពលរដ្ឋជាធំ បើទោះបីជាការជួលដីក៏ពិតមែន តែដីនោះជាដីកម្មសិទ្ធិ​ស្រប​ច្បាប់​របស់ពលរដ្ឋ។

លោក មួយឡៃ ថ្លែងថា៖ «អាជ្ញាធរចូលចិត្តប្រើច្បាប់ បើជាគម្រោងអភិវឌ្ឍន៍​ដើម្បី​ប្រយោជន៍​សាធារណៈ​ក៏ដោយអ្នកដែលពាក់ព័ន្ធហ្នឹង និងអ្នកដែលរងផលប៉ះពាល់ហ្នឹង​ត្រូវ​ទទួល​បាន​សំណងសមរម្យ ហើយភាពចន្លោះប្រហោងត្រូវតែធ្វើឲ្យប្រសើរឡើង»

គួរបញ្ជាក់ថា ប្រឡាយពង្វាងទឹកនេះ ស្ថិតក្នុងភូមិព្រែកតាគង់១ សង្កាត់ចាក់អង្រែលើ ខណ្ឌ​មានជ័យ ត្រូវ​បាន​ស្ថាបនាឡើងដើម្បីជាមធ្យោបាយ ក្នុងការពង្វាងទឹកចេញ ងាយ​ស្រួល​ដល់​ការ​​អនុវត្ត​គម្រោងមេ ស្ដារប្រឡាយ និងស្ដារអាងស្ដុកទឹក​បឹងជើងឯកក្នុងឆ្នាំ២០២៣។

ស្ថានីយ​ប្រព្រឹត្តកម្ម​ទឹកកខ្វក់នេះ សាងសង់លើផ្ទៃដីទំហំ៣ហិកតា ស្ថិតនៅភូមិព្រែកតាគង់១ សង្កាត់​ចាក់អង្រែលើ ខណ្ឌមានជ័យ ក្រោមជំនួយឥតសំណងរបស់រដ្ឋាភិបាលជប៉ុន ដែល​មាន​​តម្លៃ​ប្រមាណ ២ ៣៤០លានយេន ស្មើនឹងប្រមាណ២០លានដុល្លារអាមេរិក៕

383 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម