ចំនួនអ្នកឆ្លងជំងឺកូវីដ១៩នៅតែមានច្រើន រដ្ឋាភិបាលអនុញ្ញាតពេទ្យឯកជនព្យាបាលអ្នកជំងឺដើម្បីសម្រាលបន្ទុក

មន្ទីរពហុព្យាបាលវិសាលសុខ ជាមន្ទីរពេទ្យឯកជនមួយក្នុងចំណោមបី ដែលទទួលបានការអនុញ្ញាតព្យាបាលអ្នកជំងឺកូវីដ១៩ ថ្ងៃទី៧ ខែឧសភា ឆ្នាំ២០២១។ ខេមបូចា/ ព្រីង សំរាំង
មន្ទីរពហុព្យាបាលវិសាលសុខ ជាមន្ទីរពេទ្យឯកជនមួយក្នុងចំណោមបី ដែលទទួលបានការអនុញ្ញាតព្យាបាលអ្នកជំងឺកូវីដ១៩ ថ្ងៃទី៧ ខែឧសភា ឆ្នាំ២០២១។ ខេមបូចា/ ព្រីង សំរាំង
Share on facebook
Share on twitter
Share on linkedin
Share on telegram
Share on whatsapp

ក្រសួងសុខាភិបាលអនុញ្ញាតឱ្យមន្ទីពេទ្យឯកជនចំនួនបី ទទួលព្យាបាលជំងឺកូវីដ១៩ ជាផ្នែកមួយ​ដើម្បី​សម្រាលបន្ទុកពេទ្យរដ្ឋ បន្ទាប់ពីរកឃើញអ្នក​ឆ្លងជំងឺ​កូវីដ​១៩ដែល​ត្រូវការកន្លែងសម្រាកព្យា​បា​ល​​​កាន់តែច្រើន​ឡើង។

អគ្គនាយកបច្ចេកទេសក្រសួងសុខាភិបាល លោកវេជ្ជបណ្ឌិត ហុក គឹមចេង បញ្ជាក់ថា ការ​សម្រេច​ផ្តល់សិទ្ធិព្យាបាលដល់ពេទ្យឯកជននេះ ដោយផ្អែកលើតម្រូវការជាក់ស្ដែងនៃស្ថានភាពវិវត្តន៍នៃការឆ្លងរីករាលជំងឺកូវីដ១៩។

វេជ្ជបណ្ឌិត ហុក គឹមចេង«មានបងប្អូនយើងមានលទ្ធភាពគាត់ចង់សម្រាកនៅមន្ទីរពេទ្យឯកជន អីចឹងហើយវាក៏ជួយសម្រាលបន្ទុក(មន្ទីរពេទ្យរដ្ឋ)ក្នុងការព្យាបាលជំងឺកូវីដ១៩ដែរ ដូច្នេះការអនុញ្ញាតនេះមានសារៈសំខាន់ណាស់នៅក្នុងស្ថានភាពនេះ»

សម្រាប់​រយៈពេល​បី​សប្ដាហ៍​​នេះ​ចំនួន​ឆ្លង​កូវីដ១៩​នៅ​កម្ពុជា គិត​ជាមធ្យម​មាន​ប្រហែល​៥០០​ទៅ៦០០ករណី​ក្នុង​មួយថ្ងៃៗ។ នៅ​ថ្ងៃសុក្រនេះ​ ក្រសួងសុខាភិបាល​ប្រកាស​រក​ឃើញ​៥៥៨ ករណី​បន្ថែម​ទៀត។

គិតត្រឹមថ្ងៃទី០៧ ខែឧសភា អ្នកឆ្លងជំងឺកូវីដ១៩មានកើនឡើងរហូតដល់ ១៨ ១៧៩នាក់  អ្នកជំងឺកំពុងសម្រាកព្យាបាលមានចំនួនជាង១ម៉ឺននាក់ និងអ្នកស្លាប់កើនដល់១១៤នាក់។

លោក ហុក គឹមចេង បន្ថែមថា អាជ្ញាធរនឹងអនុញ្ញាតឱ្យមន្ទីរពេទ្យឯកជនជាទូទៅអាច​ប្រើ​ប្រាស់​​តេស្តរហ័សដើម្បីញែកអ្នកជំងឺបង្ការកុំឱ្យជំងឺកូវីដឆ្លងរីករាលដាលនៅតាមមន្ទីរពេទ្យ។

កាលពីថ្ងៃទី០៤ខែឧសភា ក្រសួងសុខភិបាលចេញប្រកាសអនុញ្ញាតឱ្យមន្ទីរពេទ្យចំនួន៣ព្យាបាលកូវីដ១៩ រួមាន មន្ទីរពេទ្យសង់ត្រាល់ ​មន្ទីរពេទ្យរ៉ូយ៉ាល់ភ្នំពេញ មន្ទីរពហុព្យាបាលវិសាលសុខ។

ក្រសួងសុខាភិបាលបញ្ជាក់ក្នុងសេចក្ដីប្រកាសព័ត៌មានថា «មន្ទីរពេទ្យទាំងបីទីតាំងនោះមានសិទ្ធិពិនិត្យ ថែរទាំនិងព្យាបាល និង មានសិទ្ធិធ្វើតេស្តរហ័សរកមេរោគកូវីដ១៩»

ការអនុញ្ញាតឱ្យមន្ទីរពេទ្យឯកជនព្យាបាលជំងឺកូវីដ១៩ ធ្វើឡើងបន្ទាប់ពី ក្រសួងសុខាភិបាលបានចេញសេចក្ដីសម្រេចមួយដោយរៀបចំឱ្យមានការព្យាបាលជំងឺកូវីដ១៩នៅតាមផ្ទះ។លោក នាយករដ្ឋមន្ត្រី ហ៊ុន សែន ធ្លាប់ប្រកាស ការរៀបចំឱ្យអ្នកជំងឺ​ព្យាបាល​តាមផ្ទះ គឺ​ដើម្បីសម្រាលបន្ទុកមន្ទីរពេទ្យនានាដែល​ផ្ទុក​អ្នកជំងឺច្រើនលើស​សមត្ថភាព​ព្រោះមន្ទីរពេទ្យរដ្ឋ​ត្រូវព្យាបាលជំងឺផ្សេងទៀតក្រៅពីកូវីដ១៩។

កាលពីថ្ងៃទី២៥ខែមេសាក្រសួងសុខាភិបាលបានប្រកាសឱ្យមន្ទីរពេទ្យឯកជនដាក់ពាក្យ សុំផ្ដល់សេវាព្យាបាលជំងឺកូវីដ១៩ ប៉ុន្តែមន្ទីរពេទ្យត្រូវមានលក្ខណៈសម្បត្តិគ្រប់គ្រាន់ដើម្បីទទួលអ្នកជំងឺកូវីដ។ មន្ទីរពេទ្យទាំងនោះ ត្រូវមាន៖  ទីតាំងល្អ មានផ្លូវនិងចំណតរថយន្ដ រថយន្ដសង្គ្រោះបំពាក់ឧបករណ៍ បន្ទប់សម្រាក បន្ទប់សង្គ្រោះបន្ទាន់ គ្រូពេទ្យនិងបុគ្គលិក បន្ទប់ពិសោធន៍វេជ្ជសាស្ត្រទូទៅ ប្រព័ន្ធគ្រប់គ្រង់បង្ការការចម្លងមេរោគ ប្រព័ន្ធគ្រប់គ្រងកាកសំណល់វេជ្ជសាស្ត្រ និងត្រូវធ្វើរបាយការណ៍ជាចាំបាច់ផ្ដល់ទៅក្រសួងសុខាភិបាល។

ទោះជាយ៉ាងណាក្ដីមន្ទីរពេទ្យ២ក្នុងចំណោមមន្ទីរពេទ្យទាំងបី មិនទាន់រៀបចំរួចរាល់សម្រាប់ទទួលធ្វើតេស្តរកមេរោគ​ និងព្យាបាលជំងឺកូវីដ១៩នៅឡើយទេ គិតត្រឹមថ្ងៃទី០៧ខែឧសភា។

បុគ្គលិកផ្នែកផ្ដល់ព័ត៌មានអតិថិជន មន្ទីរពេទ្យសង់ត្រាល់ដែលមិនប្រាប់ឈ្មោះឱ្យដឹងថា មន្ទីរពេទ្យនេះមានទទួលធ្វើតេស្ដរកមេរោគប៉ុណ្ណោះក្នុងពេលបច្ចុប្បន្ន។

បុគ្គលិកផ្នែកផ្ដល់ព័ត៌មានមន្ទីរពេទ្យសង់ត្រាល់ និយាយថា៖«មន្ទីរពេទ្យសង់ត្រាល់កំពុងរៀបចំបន្ទប់សម្រាប់ព្យាបាល តែយើងមានផ្ដល់សេវាតេស្តរ៉ាប់ភីតតេស្តហើយ តម្លៃគឺ១៣០ដុល្លារក្នុង១លើក។ យើងនឹងជម្រាបព័ត៌មានលម្អិតតាមទំព័រហ្វេសប៊ុករបស់មន្ទីរពេទ្យបើសិនជារៀបចំរួចរាល់ »

បុគ្គលិកផ្នែកផ្ដល់ព័ត៌មានអតិថិជនមន្ទីរពហុព្យាបាលវិសាលសុខ ក៏មិនបានប្រាប់ឈ្មោះដែរដោយគ្រាន់តែបញ្ជាក់ថាមន្ទីរពេទ្យរបស់ខ្លួនមិនទាន់រៀបចំរួចរាល់ដើម្បីទទួលអ្នកជំងឺនៅឡើយនោះទេ។

បុគ្គលិកមន្ទីរពហុព្យាបាលវិសាលសុខ និយាយថា៖ « ខាងពេទ្យយើងកំពុងរៀបចំ យើងមិនទាន់ទទួល​ផ្ដល់សេវាកូវីដ១៩ហ្នឹងទេ ទាំងតេស្តទាំងព្យាបាល»

រដ្ឋាភិបាលបានទិញមន្ទីរពេទ្យនគរទេព និងបានប្តូរឈ្មោះទៅជាមន្ទីរពេទ្យហ្លួងម៉ែ សម្រាប់ព្យាបាលអ្នកជំងឺកូវីដ១៩ ថ្ងៃទី១៩ ខែមីនា ឆ្នាំ២០២១។ ខេមបូចា/ បញ្ញា ឆព័ណ្ណ

ការអនុញ្ញាតឱ្យមន្ទីរពេទ្យឯកជនព្យាបាលជំងឺកូវីដ១៩ បង្កក្ដីបារម្ភដល់អ្នកឃ្លាំមើលបញ្ហា​សង្គម​​នៅកម្ពុជាពីការធ្លាក់ចុះនៃគុណភាពសេវាព្យាបាលដែលទទួលបន្ទុកដោយរដ្ឋ។

នាយក​ប្រតិបត្តិ​នៃមជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍​និង​សន្តិភាព លោក យង់ គីមអេង មិន​គាំ​ទ្រចំពោះការសម្រេចរបស់ក្រសួងសុខាភិបាលឡើយ។​លោកស្នើឱ្យរដ្ឋាភិបាល​ពិចារ​ណា​ឡើងវិញដើម្បីលុបចោលការសម្រេចនេះ។

លោក​ យង់ គីមអេង មានប្រសាសន៍ថា«​ឱ្យឯកជនរកស៊ីបែបនេះមិនមែនជារូបភាពល្អទេ ជារូបភាពមិនគួរនិងមិនគួរឱ្យចង់ដឹងចង់លឺ។រដ្ឋាភិបាលត្រូវបញ្ឈប់សេចក្ដីសម្រេចនេះ  បើមិនអ៊ីចឹងទេលោតែមានជំងឺកូវីដ ហើយពេទ្យរដ្ឋរុញទៅឯកជន ឯកជនរុញទៅរដ្ឋហ្នឹងវីវរធំហើយ។ខ្ញុំនៅតែចង់ឃើញការព្យាបាលជំងឺកូវីដ១៩ដោយមិនគិតប្រាក់ » 

អ្នកស្រាវជ្រាវបញ្ហាសង្គម លោក មាស នី  មានប្រសាសន៍ថា ការអនុញ្ញាតឱ្យពេទ្យឯកជន​ព្យាបាលជំងឺកូវីដ១៩នេះអាចជាការដោះបន្ទុកមួយរបស់មន្ទីរពេទ្យរដ្ឋ ប៉ុន្តែត្រូវធានាថាអ្នក​​ជំងឺ​នឹងមិនត្រូវបានបង្ខំឱ្យទៅព្យាបាលដោយបង់ប្រាក់ឡើយ។

លោក មាស នី មានប្រសាសន៍ថា៖«បើអ្នកជំងឺស្ម័គ្រចិត្តសុំទៅព្យាបាលនៅពេទ្យឯកជនដោយខ្លួនឯងជារឿងមួយតែបើសិនជាមានការបញ្ជូនដោយបង្ខំណាមួយនោះ ជារឿងមួយដែលមិនអាចទទួលយកបាន»

លោក មាស នី បន្ថែម៖ «ជំងឺក្រៅពីកូវីដពេទ្យខ្លះបញ្ជូន​​​អ្នកជំងឺឱ្យគ្នា​ដោយ​ពេទ្យធ្វើការ​នៅ​រដ្ឋបំភ័យ​ថា អត់ឧបករណ៍អត់មានអីចឹងដល់ពេទ្យឯកជនទើបមាន​ ជាដើម ដូច្នេះរដ្ឋាភិបាល​ត្រូវពិនិត្យ​ការពារកុំឱ្យបញ្ហានេះកើតឡើងទៀត»។

បច្ចុប្បន្នមន្ទីរពេទ្យរបស់រដ្ឋដែលព្យាបាលជំងឺកូវីដ១៩ធ្ងន់ធ្ងររួមមាន មន្ទីរពេទ្យមិត្តភាពខ្មែរ​សូវៀត  មណ្ឌលសុខភាពចាក់អង្រែ មជ្ឈមណ្ឌលជាតិកំចាត់ជំងឺរបេងហង់ស៊ិន សណ្ឋាគារហ្គ្រេដ​ឌូកភ្នំពេញ មន្ទីរពេទ្យហ្លួងម៉ែ និងមន្ទីពេទ្យរដ្ឋជាច្រើនទៀតនៅតាមបណ្ដាខេត្តនានា។ នៅ​ភ្នំពេញអ្នកជំងឺស្រាល​​ត្រូវបានដាក់ឱ្យសម្រាកនៅតាមមណ្ឌលព្យាបាលមួយចំនួន រួមមាន​អគារ​កោះពេជ្រ ​ អគារសាលកីឡាក្នុងពហុកីឡដ្ឋានជាតិ និងសាលរៀបអាពាហ៌ពិពាហ៌ផ្សេងៗទៀត៕

375 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »