តុលាការខេត្តបាត់ដំបងបានសម្រេចចោទប្រកាន់និងឃុំខ្លួនអគ្គនាយកក្រុមហ៊ុននិងប្អូនបង្កើតរបស់ប្រធានក្រុមប្រឹក្សាភិបាលក្រុមហ៊ុនចិញ្ចឹមសត្វអានស៊ីន អាវី សែនជ័យ នៅដើមខែកញ្ញានេះ នៅពេលដែលពួកគេបានបោកប្រាស់ប្រាក់ប្រជាពលរដ្ឋជាង២លានដុល្លារ។
បុរសពីរនាក់ដែលតុលាការបានសម្រេចឃុំខ្លួនមានឈ្មោះ ឃុន ផាណូ អគ្គនាយកក្រុមហ៊ុនអានស៊ីន អាវី សែនជ័យ និងម្នាក់ទៀតឈ្មោះ ធី រ៉ាវ៉ាន់ មានតួនាទីជាអ្នកគ្រប់គ្រងការលក់ទិញ គោ ពពែ មាន់ និងចំណីក្រុមហ៊ុននេះក្នុងចំណោមមនុស្ស៦នាក់ដែលពលរដ្ឋរងគ្រោះបានប្តឹង។
លោក កែវ សុជាតិ ព្រះរាជអាជ្ញានៃអាយ្យការអមសាលាដំបូងខេត្តបាត់ដំបងមានប្រសាសន៍ថា បុរសពីរនាក់ខាងលើនេះត្រូវតំណាងអាយ្យការសម្រេចឃាត់ខ្លួនបញ្ជូនទៅចៅក្រមស៊ើបសួរអស់ហើយនិងកំពុងមានចំណាត់ការបន្តទៀតចំពោះអ្នកដែលគេចខ្លួន។
លោកព្រះរាជអាជ្ញាបន្ថែមថា បច្ចុប្បន្ននេះតុលាការកំពុងស្រាវជ្រាវលើពាក្យបណ្តឹងផ្សេងទៀតដែលទាក់ទងសំណុំរឿងនេះ ដែលបច្ចុប្បន្ននេះឃើញមានពីរពាក្យបណ្តឹងហើយ បើសិនជាជនល្មើស និងគូកនមានឈ្មោះតែមួយអាចនឹងសម្រចច្របាច់ចូលគ្នាដើម្បីពន្លឿន នីតិវិធី ។
លោក សុជាតិ មានប្រសាសន៍ថា៖ «ឥឡូវនេះយើងកំពុងស្រាវជ្រាវពាក្យបណ្តឹងពីរនេះរឺមានប៉ុន្មានផ្សេងៗទៀត តើត្រូវបញ្ចូលរឿងតែមួយរឺដាច់ដោយឡែកបើប្រជាពលរដ្ឋច្រើន ជនល្មើស និងគូរកនមនុស្សតែមួយ សំណុំរឿងទីមួយក៏មានមនុស្សទាំងអស់ហ្នឹង ទីពីរ និង ទីបី មានមនុស្សទាំងអស់ហ្នឹង យើងអាច ប្រើនីតិវិធីបញ្ចូលរឿងដើម្បីឱ្យដំណើរការនីតិវិធីបានលឿននិងឆាប់រហ័ស» ។
ក្រុមហ៊ុនអានស៊ីន អាវី សែនជ័យ ឯ.ក (ANSHIN RV SENCHEY CO.LTD)ជាក្រុមហ៊ុនឯកជនមួយបង្កើតឡើងនៅថ្ងៃទី០៥ខែមករាឆ្នាំ២០១៩មានទីតាំងក្រុមទី១ភូមិសាលាបាឡាត់ សង្កាត់អូម៉ាល់ ក្រុងបាត់ដំបង មុនដំបូងក្រុមហ៊ុននេះចុះបញ្ជីពាណិជ្ជកម្មនៅក្រសួងពាណិជ្ជកម្ម និងមានលិខិតអនុញ្ញាតង្កើតកសិដ្ឋានចិញ្ចឹមគោនិងមាន់ពូជក្នុងស្រុកដែលចេញដោយអគ្គនាយកដ្ឋានសុខភាពសត្វនិងផលិតកម្មសត្វផងដែរ។ ក្រុមហ៊ុនអានស៊ីននេះឃើញមានកសិដ្ឋានចិញ្ចឹមគោ ពពែ មាន់ធំៗពីរកន្លែង មួយកន្លែងជួលដីទំហំប្រហែលមួយហិកតា នៅភូមិបត់សាលានិងមួយកន្លែងទៀតនៅភូមិបាយដំរាំ ឃុំឈើទាល ស្រុកបាណន់ លើផ្ទៃដីបីហិកតា។
ជនរងគ្រោះបានឱ្យដឹងថា លោក ធី រ៉ាវុធ និងបក្សពួកបានធ្វើសកម្មភាពផ្សព្វផ្សាយតាមបណ្តាញទូរទស្សន៍និង បណ្តាញសង្គមនិងតាមរយៈអ្នកណែនាំស្គាល់គ្នាជាបន្តបន្ទាប់ស្តីពីការវិនិយោគបណ្តាក់ទុនរបស់ក្រុមហ៊ុនខ្លួនលើវិស័យចិញ្ចឹមសត្វគោមាន់ពពែនិងចែកចាយផលិតផលកសិកម្មគ្រប់ប្រភេទដោយមានភ្ជាប់រូបភាពថ្នាក់ដឹកនាំ កំពូលៗដែលចុះមកមើលក្រុមហ៊ុនខ្លួននិងឈ្មោះឧកញ្ញ៉ាមួយចំនួនជាធ្នាក់ទៀតផង។
ដោយក្រុមនេះបានអូសទាញប្រជាពលរដ្ឋឱ្យចូលលុយវិនិយោគនឹងទទួលបានមកវិញនូវប្រាក់ចំណេញជា ភាគលាភខ្ពស់ទៅតាមទំហំទឹកប្រាក់ដែលវិនិយោគដោយអត្រាការប្រាក់ចាប់ពីជាងបីភាគរយដល់៦ភាគរយ។ ក្រោយពីមានការជឿជាក់ប្រជាពលរដ្ឋជាច្រើនតាមបណ្តាខេត្តនានានិងក្រៅប្រទេសផងបានប្រមែប្រមូលលុយដាក់ទុនវិនិយោគជាមួយក្រុមហ៊ុននេះ ខ្លះអស់រាប់ពាន់និងរាប់ម៉ឺនដុល្លារដែលសរុបខ្ទង់លានដុល្លារដោយទទួលបាន ការប្រាក់(ភាគលាភ)ជាប្រចាំខែ ប្រចាំវគ្គរឺប្រចាំឆ្នាំបានមួយរយៈក្រុមហ៊ុនក៏បិទទ្វារ និងលែងមានការទទួលខុសត្រូវចំពោះអ្នកដាក់វិនិយោគ។
លោក អាង សុផាន់ណា អាយុ៣២ឆ្នាំ តំណាងប្រជាពលរដ្ឋម្នាក់ក្នុងចំណោម៤នាក់ដែលឈរឈ្មោះដាក់ ពាក្យបណ្តឹងបានឱ្យដឹងថា ក្នុងចំណោមប្រជាពលរដ្ឋរងគ្រោះដែលក្រុមលោកប្រមូលឈ្មោះ និងឯកសារបានជាង២០០នាក់ក្នុងចំណោមជនរងគ្រោះប្រហែល៣០០នាក់ដែលចាញ់បោកក្រុមហ៊ុនខាងលើនេះជាងពីរលាន៧សែនដុល្លារ។
លោកបន្ថែមថា ក្នុងចំនួននេះមានតែប្រជាពលរដ្ឋរងគ្រោះចំនួន១១០នាក់ប៉ុណ្ណោះដែលស្ម័គ្រចិត្តចូលរួមដាក់ពាក្យបណ្តឹងដោយពួកគាត់ចំណាយលុយ១ភាគរយនៃប្រាក់ទុនដាក់វិនិយោគដើម្បីរត់ការក្តី។
លោកបានបញ្ជាក់ថា ក្នុងពាក្យបណ្តឹងដាក់ចូលសាលាដំបូងខេត្តបាត់ដំបងកាលពីខែកក្កដា ឆ្នាំ២០២២ គឺប្តឹងមនុស្សសំខាន់ៗក្នុងក្រុមហ៊ុនអានស៊ីនអាវីសែនជ័យ៦នាក់ចោទប្រកាន់ពីបទរំលោភលើសេចក្តីទុកចិត្ត មេក្លោងផ្តើមគំនិតក្នុងអំពើឆបោកនិងផ្សំគំនិតក្នុងអំពើឆបោកអំឡុងឆ្នាំ២០១៩ ។
លោកបញ្ជាក់ថា ជនជាប់ចោទដែលពលរដ្ឋប្តឹងទាំង៦នាក់មានឈ្មោះ ធី រ៉ាវុធ ភេទប្រុសប្រធានក្រុមប្រឹក្សាភិបាល ជាអ្នកទទួលលុយពីពលរដ្ឋផ្ទាល់ ឈ្មោះ វ៉ុន រស្មី ជាប្រធានគណនេយ្យ និងជាភរិយារបស់លោក ធី រ៉ាវុធ ឈ្មោះ ធី រ៉ាវ៉ាន់ អ្នកគ្រប់គ្រងការទិញលក់គោ ពពែ មាន់ និងចំណីត្រូវជាប្អូនបង្កើតលោក ធី រ៉ាវុធ និងឈ្មោះ សុខ ចិន្ថា អ្នកគ្រប់គ្រងទូទៅត្រូវជាប្អូនថ្លៃលោក ធី រ៉ាវុធ និងឈ្មោះ ផាន់ ស៊ីណាត អ្នកគ្រប់គ្រងបច្ចេកទេសនិងឈ្មោះ ឃុន ផាណូ ជាអគ្គនាយកក្រុមហ៊ុន។
លោកបន្ថែមថា នៅថ្ងៃទី៧និងទី៨ ខែកញ្ញា ឆ្នាំ២០២២ អយ្យការអមសាលាដំបូងខេត្តបាត់ដំបងបានចេញដីកាកោះឱ្យចូលបំភ្លឺទាំងដើមចោទ និងចុងចោទដោយពេលនោះមានតែភាគីចុងចោទបួននាក់ប៉ុណ្ណោះចូល ខ្លួនបំភ្លឺដោយឈ្មោះ ធី រ៉ាវុធ ដែលជាអ្នកទទួលលុយវិនិយោគពីពលរដ្ឋផ្ទាល់និងប្រពន្ធឈ្មោះ វ៉ុន រស្មី ជាប្រធានគណនេយ្យបានរត់គេចខ្លួនបាត់ ។
លោកបន្ថែមថា៖ «ក្នុងការបំភ្លឺពីរថ្ងៃនេះលោកព្រះរាជអាជ្ញារបានសម្រេចឃុំខ្លួនលោក ឃុន ផាណូ និង ធី រ៉ាវ៉ាន់ ចំណែកពីរនាក់ទៀតបានសម្រេចឱ្យនៅក្រៅឃុំបណ្តោះអាសន្ន»។ លោកបន្ថែមថា៖ «ខ្ញុំលឺ ផ្ទាល់ត្រចៀកលោកព្រះរាជអាជ្ញារធំបានបញ្ជាឱ្យព្រះរាជអាជ្ញាររងចេញដីកាចាប់ខ្លួនអ្នករត់គេចខ្លួន គឺមិនអោយរួចខ្លួននោះទេដោយលោកថាស្អប់ណាស់អ្នកបោកយកប្រាក់ប្រជាពលរដ្ឋ»។
តាមមាត្រា៣៧៨នៃក្រុមព្រហ្មទណ្ឌ ទោសដែលត្រូវអនុវត្តនៃអំពើឆបោកត្រូវផ្តន្ទាទោសពីប្រាំមួយខែទៅបីឆ្នាំ និងពិន័យជាទឹកប្រាក់១លានរៀលដល់៦លានរៀល។ មាត្រា៣៩២នៃច្បាប់ដដែលនេះ អំពើរំលោភលើទំនុកចិត្តត្រូវផ្តន្ទាទោសដាក់ពន្ធនាគារពីប្រាំមួយខែទៅ៣ឆ្នាំ និងពិន័យជាប្រាក់១លានរៀលទៅ៦លានរៀល។
អ្នកសារព័ត៌មានខេមបូចា បានធ្វើដំណើរទៅកាន់កសិដ្ឋានចិញ្ចឹមគោ ពពែ និង មាន់ មួយកន្លែងរបស់ក្រុមហ៊ុន អានស៊ីន ខាងលើជួលអ្នកភូមិចំនួនពីរនាក់ដែលមានផ្ទៃដីទំហំប្រហែល១ហិកតាស្ថិតនៅភូមិបត់សាលា ឃុំឈើទាល ស្រុកបាណន់ ខេត្តបាត់ដំបង កាលពីចុងសប្តាហ៍នេះ។ ទីនេះប៉ុន្មានខែមុនធ្លាប់ឃើញមានពពែនៅសល់ប្រហែល៣០ក្បាលដែរ តែបច្ចុប្បន្ននេះពុំមានឃើញទៀតនោះទេ គឺសល់មាន់ប៉ុន្មានក្បាលនិងដុំចំបើងដែលមានដុះផ្សិតខ្លះដាក់គរក្នុងរោងចិញ្ចឹម គោ ពពែ ចំនួនបីក្នុងសភាពស្ងាត់ជ្រងំ។
ទីនេះឃើញមានស្រ្តីម្នាក់ឈ្មោះ ធឿន ថុល អាយុ៣៨ឆ្នាំ ជាកូនម្ចាស់ដីដែលមានផ្ទះក្នុងកសិដ្ឋាននេះបាននិយាយថា គេលែងចិញ្ចឹមសត្វគោ ពពែ យូរខែមកហើយ មិនដែលឃើញម្ចាស់ក្រុមហ៊ុនដែលជួលដីគាត់ចេញចូលទីនេះទៀតដែរ។
អ្នកស្រី ធឿន ថុល ឱ្យដឹងថា៖ «ខ្ញុំមិនដែលឃើញអ្នកណាមកទៀតទេ គេលែងចិញ្ចឹមសត្វហើយ ខ្ញុំកំពុងដាក់ដាំបន្លែ និងដំណាំក្នុងកសិដ្ឋាននេះវិញចំណែករោងចិញ្ចឹមសត្វនេះរង់ចាំមើលថ្ងៃណាគេមករើចេញ»។
លោក យិន ប៊ុននី នាយនគបាលប៉ុស្តិ៍អូរម៉ាល់បានបញ្ជាក់ថា លោកធ្លាប់បានទទួលដីកាកោះហៅលោក ធី រ៉ាវុធ និងប្រពន្ធរបស់គាត់ពីរដងដែរតែគាត់បានគេចខ្លួនបាត់ទៅហើយមិនឃើញនៅមូលដ្ឋាននេះនោះទេ។
លោក ប៊ុននី បន្តថា៖ «គាត់បើកស្នាក់ការក្រុមហ៊ុននៅផ្ទះម្តាយឳពុកក្មេករបស់គាត់នៅសង្កាត់អូរម៉ាល់គាត់បានគេចខ្លួនបាត់ហើយខ្ញុំបានប្រាប់ទៅមន្រ្តីតុលាការវិញហើយនិងមិនទាន់បានទទួលដីកាទៀតនោះទេពីរខែមកនេះ»។
លោក អាង សុផាន់ណា តំណាងជនរងគ្រោះបាននិយាយថាក្រៅពីដាក់ពាក្យបណ្តឹងព្រហ្មទណ្ឌក្រុមលោកកំពុងស្រាវជ្រាវប្រមូលឯកសារស្តីពីទ្រព្យសម្បត្តិរបស់ជនជាប់ចោទខាងលើដើម្បីដាក់ពាក្យស្នើសុំដីការក្សាការពារទ្រព្យសម្បត្តិទាំងនោះពីតុលាការប្រយោជន៍ដើម្បីបានទុនដែលវិនិយោគត្រឡប់មកវិញ។
លោកបញ្ជាក់ថា ក្រុមលោកបានរកឃើញលោក ធី រ៉ាវុធ ប្រធានក្រុមប្រឹក្សាភិបាលក្រុមហ៊ុននិងឈ្មោះ ធី រ៉ាវ៉ាន់ ជាប្អូនប្រុសមានឈ្មោះកាន់កាប់ដីច្រើនកន្លែងសរុបជាង៣០ហិកតានិងមានតម្រុយជាច្រើនកន្លែងទៀតដែលកំពុងស្រាវជ្រាវបន្ត។
លោក សុផាន់ណា លើកឡើងថា៖ «ក្រុមខ្ញុំក៏បានស្រាវជ្រាវទ្រព្យសម្បត្តិលោក ឃុន ផាណូ អគ្គនាយកក្រុមហ៊ុននេះរកឃើញមានដីពីរកន្លែងបូករួមទាំងហាងមួយនៅក្រុងបាត់ដំបងដែលអាចលក់បានជាង២០ម៉ឺនដុល្លារ និងមានដីបើកកសិដ្ឋាននៅស្រុកបវេលបីហិកតាផងដែរយើងកំពុងបន្តស្រាវជ្រាវទៀតដែរ»។
ដោយឡែកលោក ស៊ឹម វុទ្ធា ជាជនរងគ្រោះម្នាក់ដែលចាញ់បោកក្រុមហ៊ុនចិញ្ចឹមសត្វខាងលើប្រមាណជាង៥ម៉ឺនដុល្លារដែលបច្ចុប្បន្ននេះលោកក៏ជាតំណាងជនរងគ្រោះដែរ បាននិយាយថា បច្ចុប្បន្ននេះគ្រួសារលោកកំពុងជួបវិបត្តិសេដ្ឋកិច្ចយ៉ាងខ្លាំងព្រោះលុយទាំងនេះសុទ្ធសឹងតែខ្ចីបុលគេមកដាក់វិនិយោគស្ទើរទាំងអស់។
លោក វុទ្ធា បានបន្តថា លុយដែលដាក់វិនិយោគនេះលោកខ្ចីពីឯកជនគេយកការប្រាក់៣ភាគរយហើយយកមកដាក់វិនិយោគលើការចិញ្ចឹមមាន់បានការប្រាក់៦ភាគរយបានរយៈពេលតែមួយឆ្នាំក៏លែងបាន។ ប៉ុន្តែការប្រាក់ដែលបានមកគឺបង្វិលដាក់វិនិយោគទៅវិញអស់មិនមានសល់នោះទេ ហើយក៏មិនទាន់បានសងថ្លៃដើមដែលខ្ចីគេដែរ។
លោក វុទ្ធា ឱ្យដឹងថា៖ «ខ្ញុំកំពុងប្រឈមការលំបាកខ្លាំងបច្ចុប្បន្ននេះមានបណ្ណាគារលក់សៀវភៅតូចមួយគ្រាន់បង្វិលលុយឡើងការប្រាក់ឱ្យគេ តែវាជិតអស់សៀវភៅលក់ទៅហើយព្រោះបង្វិលមិនទាន់ ពេលខ្លះនឹកឃើញរឿងនេះមាត់ធំតូចជាមួយគ្រួសារទៀត»។
លោក សុទ្ធា សង្ឃឹមថា នៅពេលដែលប្រមូលឯកសារទាក់ទងទ្រព្យសម្បត្តិម្ចាស់ក្រុមហ៊ុនខាងលើរួចពួកលោកឱ្យមេធាវីរៀបចំពាក្យដើម្បីស្នើសុំដីកា រក្សាការពារពីតុលាការក្រែងបានដើមទុនខ្លះត្រឡប់មកវិញ។
លោក រស់ ស៊ី ថាមេធាវីដើមចោទតំណាងឱ្យជនរងគ្រោះបានឱ្យដឹងថាលោកព្រះរាជអាជ្ញារគាត់សម្រេចឃុំខ្លួនពីរនាក់ក្នុងពន្ធនាគារនិងអនុញ្ញាតឱ្យនៅក្រៅឃុំពីរនាក់បណ្តោះអាសន្ន។តាមការគិតផ្ទាល់ខ្លួនរបស់លោក ពីរនាក់ដែលអនុញ្ញាតឱ្យនៅក្រៅឃុំនោះក៏សុទ្ធតែមានការពាក់ព័ន្ធរឿងក្តីនេះដែរ។
ដោយឡែកទាក់ទងការស្នើសុំដីការក្សាការពារលើទ្រព្យសម្បត្តិជនជាប់ចោទនោះលោកនឹងរៀបចំដាក់ពាក្យសុំទៅតុលាការបើសិនជាកូនក្តីរបស់លោកសំណូមពរនិងឯកភាពឱ្យស្នើសុំ ។
លោកមេធាវី បញ្ជាក់ថា៖ «យើងនឹងពិចារណារៀបចំធ្វើពាក្យបណ្តឹងរដ្ឋប្បវេណីបន្ថែមដើម្បីឃាត់ទ្រព្យសម្បត្តិគាត់ ដាក់រក្សាការពារលើទ្រព្យសម្បត្តិទាំងនោះតាមការយល់ព្រមពីកូនក្តីរបស់ខ្ញុំបើគាត់ស្នើសុំ»។
ទាក់ទងបញ្ហានេះ លោក កែវ សុជាតិ ព្រះរាជអាជ្ញានៃអយ្យការអមសាលាដំបូងខេត្តបាត់ដំបងមានប្រសាសន៍ថា
បទល្មើសខាងលើនេះទាក់ទងនឹងបទឆបោកវាជាហានិភ័យមួយតម្រូវឱ្យមានការស្រាវជ្រាវបន្ថែមតើគាត់បោកប្រាស់ទ្រព្យសម្បត្តិប្រជាពលរដ្ឋយកទៅណា។
លោក កែវ សុជាតិ បញ្ជាក់ទៀតថា៖ «បើប្រជាពលរដ្ឋគាត់ចង់ដាក់ពាក្យស្នើសុំដាក់ដីការក្សាការពារវាជាសិទ្ធិរបស់គាត់ តែយើងបានដាក់លិខិតដល់អង្គភាពពាក់ព័ន្ធដើម្បីស្រាវជ្រាវទ្រព្យសម្បត្តិពួកគាត់រួចអស់ហើយ»។
លោក អ៊ិន គង់ជិត មន្រ្តីសម្របសម្រួលអង្គការលីកាដូប្រចាំខេត្តបាត់ដំបងនិងប៉ៃលិនបានកត់សម្គាល់ថា រយៈកាលកន្លងមកលោកសង្កេតឃើញមានបងប្អូនប្រជាពលរដ្ឋបានចូលរួមផ្តល់ទុនវិនិយោគជាមួយនឹងបណ្តាក្រុមហ៊ុនក្នុងស្រុកមួយចំនួនដើម្បីពង្រីកផលទុនផងនិងបង្កើនប្រាក់ចំណូលផង តែចុងក្រោយពួកគាត់ក្លាយជាជនរងគ្រោះ។
លោក គង់ជិត បញ្ជាក់ថា៖ «ដោយពួកគាត់នឹកឃើញថាជាក្រុមហ៊ុនប្រកបមុខរបរដោយសុចរិត ព្រោះឃើញមានភ្ជាប់ខ្លួនជាមួយឥស្សរជនថ្នាក់ដឹកនាំជាតិសំខាន់ និងមានអាជ្ញាបណ្ណត្រឹមត្រូវចេញដោយក្រសួងមានសមត្ថកិច្ចច្បាស់លាស់បន្ទាប់មកបានលង់ខ្លួនជឿទុកចិត្តលើក្រុមហ៊ុនទាំងនោះព្រោះបានបង្កើតកិច្ចសន្យាច្បាស់លាស់និងគោរពកាតព្វកិច្ចសន្យាដោយខ្ជាប់ខ្ជួនពីដំបូងៗ»។
មន្រ្តីសិទ្ធមនុស្សរូបនេះបានបន្តថានៅពេលដែលអតិថិជនបានផ្តល់មូលនិធិអស់ពីខ្លួន ក្រុមហ៊ុនទាំងនោះចាប់ផ្តើមមិនអនុវត្តកាតព្វកិច្ចនិងចាប់ផ្តើមគេចវេះពីកាតព្វកិច្ចឈានទៅរកការរំលោភលើទំនុកចិត្តរបស់អតិថិជនខ្លួន ដោយប្រើលេសមិនចេះអស់មិនចេះហើយ និងធ្វើឲ្យអតិថិជនខ្លួនខាតបង់ផលប្រយោជន៍។ បន្ទាប់មកពួកគេចាប់ផ្តើមសប្បាយ និងមិនខ្វល់ពីកង្វល់របស់អតិថិជនខ្លួនដោយគ្មានទំនួលខុសត្រូវដូចជាករណីរបស់ក្រុមហ៊ុនអានស៊ីន អាវី សែនជ័យ ជាដើម។
លោក គង់ជិត បន្ថែមថា៖ «ប្រសិនបើតំណាងអយ្យការមិនមានវិធានការផ្លូវច្បាប់លើជនបង្កឱ្យបានធ្ងន់ធ្ងរទេនោះជនរងគ្រោះនឹងទទួលការខាតបង់ផលប្រយោជន៍កាន់តែធ្ងន់ធ្ងរ»៕
