សភាស៊ើបសួរសាលាឧទ្ធរណ៍ភ្នំពេញ កាលពីរសៀលថ្ងៃទី១៥ ខែកុម្ភៈ បានបង្គាប់ឱ្យបន្តការឃុំខ្លួនចៅសង្កាត់រងទី២ កូតាបក្សភ្លើងទៀន បណ្ដោះអាសន្ននៅពន្ធនាគារដដែល ដោយច្រានចោលបណ្ដឹងជំទាស់នឹងការឃុំខ្លួនរបស់តុលាការជាន់ទាប ពាក់ព័ន្ធនឹងបទចោទ«ក្លែងបន្លំ និងប្រើប្រាស់លិខិតក្លែង»។
លោក ឃុន លាងម៉េង ប្រធានក្រុមប្រឹក្សាជំនុំជម្រះ និងជាអ្នកនាំពាក្យសាលាឧទ្ធរណ៍ភ្នំពេញ មានប្រសាសន៍ថា ការតម្ដល់សាលក្រមឃុំខ្លួនលោក ចាន់វណ្ណៈ បណ្ដោះអាសន្ន ដោយសារតុលាការជាន់ទាបកំពុងស៊ើបអង្កេត ហើយលោកបានព្រលយថា ក្នុងសំណុំរឿងនេះមានអ្នកជាប់ពាក់ព័ន្ធផ្សេងទៀត។
លោកថ្លែងថា៖ «(មូលហេតុតម្កល់ការឃុំខ្លួន) ដោយសារចៅក្រម [តុលាការជាន់ទាប] គាត់កំពុងបន្តនីតិវិធីស៊ើបអង្កេត»។
បន្ទាប់ពីបញ្ចប់សវនាការអស់រយៈពេលប្រហែលកន្លះម៉ោង មេធាវីការពារចុងចម្លើយ លោក ជូង ជូងី ថ្លែងប្រាប់ ខេមបូចា ថា ប្រធានក្រុមប្រឹក្សាជំនុំជម្រះ លោក ឃុន លាងម៉េង បដិសេធក្នុងការដោះលែងឱ្យលោក ខឹម ចាន់វណ្ណៈ ឱ្យនៅក្រៅឃុំបណ្ដោះអាសន្ន។
លោក បញ្ជាក់៖ «សាលាឧទ្ធរណ៍សម្រេចមិនដោះលែងគាត់ទេ»។ យ៉ាងណាក៏ដោយ មេធាវីរូបនេះ មិនបានផ្ដល់អត្ថាធិប្បាយច្រើនអំពីកូនក្តីរបស់គាត់នោះទេ។
កាលពីមួយខែមុនអាជ្ញាធរបានឃាត់ខ្លួនលោក ខឹម ចាន់វណ្ណៈ ក្នុងផ្ទះរបស់លោកតាមដីកាបញ្ជាឱ្យចូលខ្លួនរបស់តំណាងអយ្យការ នៅភូមិប៉ប្រកខាងត្បូង សង្កាត់កាកាបទី១ ខណ្ឌពោធិ៍សែនជ័យ។
ប៉ុន្តែភ្លាមៗក្រោយការចាប់ខ្លួន គណបក្សភ្លើងទៀនបានចេញសេចក្ដីថ្លែងការណ៍ថ្កោលទោស អាជ្ញាធរក្រុងភ្នំពេញ ថា ចាប់ខ្លួន លោក ចាន់វណ្ណៈ ជាប្រធានស្ដីទីបក្សភ្លើងទៀនរាជធានីភ្នំពេញ និងជាចៅសង្កាត់រងទី២ នៅសង្កាត់កាកាបទី២ ដល់ផ្ទះដោយមិនមានដីកា។
ទោះជាបែបនេះក្ដី មួយថ្ងៃបន្ទាប់ ប៉ូលិសក្រុងភ្នំពេញក៏បានចេញលិខិតជំទាស់ទៅនឹងការចោទប្រកាន់នេះ។
លុះក្រោយមក លោក ចាន់វណ្ណៈ ត្រូវបានសាលាដំបូងរាជធានីភ្នំពេញ បង្គាប់ឱ្យឃុំខ្លួនបណ្ដោះអាសន្ន ក្រោមបទចោទ បន្លំ និងប្រើប្រាស់លិខិតក្លែង ដែលបានប្រព្រឹត្តកាលពីអំឡុងខែវិច្ឆិកា ឆ្នាំ២០២៣ នៅរាជធានីភ្នំពេញ តាមមាត្រា៦២៦, ៦២៧ និង៦២៨នៃក្រមព្រហ្មទណ្ឌ។
យោងតាមក្រមព្រហ្មទណ្ឌ ការក្លែងបន្លំ និងការប្រើប្រាស់លិខិតក្លែង ត្រូវផ្ដន្ទាទោសដាក់ពន្ធនាគារពី១ឆ្នាំទៅ៣ឆ្នាំ និងពិន័យជាប្រាក់ពី២លានរៀលទៅ៦លានរៀល តាមមាត្រា៦២៧ និង៦២៨។
ភរិយារបស់លោក ខឹម ចាន់វណ្ណៈ គឺអ្នកស្រី ឡង់ សូដានី ដែលត្រូវបានតុលាការអនុញ្ញាតឱ្យស្ដាប់តែពេលប្រកាសសាលដីកា បានចាត់ទុក ការតម្ដល់សាលក្រមឃុំខ្លួនបណ្ដោះអាសន្ននេះថា ជាភាពអយុត្តិធម៌លើស្វាមីរបស់អ្នកស្រី ដោយសារភស្តុតាងសម្រាប់ដាក់បន្ទុកក្នុងសំណុំរឿងនេះជាឯកសារមិនមានភាពច្បាស់លាស់។
ចំពោះការប្ដឹងជំទាស់ទៅតុលាការកំពូល អ្នកស្រី ថា រងចាំការពិភាក្សាជាមួយមេធាវីជាមុនសិន។ អ្នកស្រី សូដានី បានបន្តថា សព្វថ្ងៃនេះ ប្តីរបស់អ្នកស្រីកំពុងមានអាការៈឈឺបំពង់ក ដោយសារក្នុងពន្ធនាគារមានមនុស្សជក់បារីជាច្រើននាក់។
អ្នកស្រី ស្នើឱ្យតុលាការដោះលែងស្វាមីរបស់ខ្លួន ដើម្បីបានធ្វើការរកចំណូលចូលគ្រួសារ ដោយសារបច្ចុប្បន្ន អ្នកស្រីត្រូវរ៉ាប់រងកូនៗចំនួន២នាក់ដែលស្ថិតក្នុងការសិក្សា តែម្នាក់ឯង។
អ្នកស្រី បញ្ជាក់ថា៖ «ខ្ញុំយល់ថាអយុត្តិធម៌ចំពោះគាត់ ព្រោះឯកសារហ្នឹងមិនដឹងជាម៉េចអីម៉េចផង តុលាការសម្រេចឃុំខ្លួន»។
លោក អំ សំអាត នាយកចាត់ការទូទៅនៃអង្គការសិទ្ធិមនុស្ស លីកាដូ មានប្រសាសន៍ថា ប្រសិនបើជនត្រូវចោទ មានអ្នករស់នៅក្នុងបន្ទុក មន្រ្តីអនុវត្តច្បាប់គួរតែពិនិត្យមើលឱ្យបានគ្រប់ជ្រុងជ្រោយ។
ស្របពេលជាមួយគ្នានេះ លោកក៏បានបង្ហាញការសោកស្ដាយចំពោះការតម្កល់ការឃុំខ្លួនបណ្ដោះអាសន្នលើលោក ចាន់វណ្ណៈ ផងដែរ។
លោកបន្ថែមថា៖ «មិនមែននៅក្រៅឃុំបណ្ដោះអាសន្នបញ្ចប់នីតិវិធីតុលាការទេ បានន័យថាតុលាការនៅបន្តដំណើរការធម្មតា ប៉ុន្តែមនុស្សអាចនៅក្រៅឃុំបណ្ដោះអាសន្ន អាចប្រកបមុខរបរ រស់នៅជួបជុំគ្រួសារ»។
អជ្ញាធរក្រុងភ្នំពេញបញ្ជាក់ថា លោក ចាន់វណ្ណៈ បានក្លែងបន្លំស្នាមមេដៃ និងហត្ថលេខាពលរដ្ឋចំនួន៣រូប ដើម្បីយកទៅចុះបញ្ជីបេក្ខជនបម្រុងក្រុមប្រឹក្សាសង្កាត់ផ្សារថ្មីទី៣របស់បក្សភ្លើងទៀន ដែលធ្វើឡើងកាលពីថ្ងៃទី៧ ខែវិច្ឆិកា ឆ្នាំ២០២៣៕
