សមាគមសម្ព័ន្ធអ្នកសារព័ត៌មានកម្ពុជា

ពលករខែ្មរមកពីកូរ៉េ និងពលរដ្ឋតវ៉ាទាមទារឱ្យក្រុមហ៊ុន ប្រ៊ីលាន ស៊ីធី សងលុយវិញ

ពលរដ្ឋរាប់រយនាក់តវ៉ានៅទីតាំងក្រុមហ៊ុន ប្រ៊ីលាន ស៊ីធី ស្ថិតនៅភូមិតាវៀន សង្កាត់សាលាកំរើក ក្រុងសៀមរាប ខេត្ដសៀមរាប កាលពីថ្ងៃទី១២ ខែកុម្ភៈ ឆ្នាំ២០២៤។ (រូបភាពផ្ដល់ឱ្យ)
ពលរដ្ឋរាប់រយនាក់តវ៉ានៅទីតាំងក្រុមហ៊ុន ប្រ៊ីលាន ស៊ីធី ស្ថិតនៅភូមិតាវៀន សង្កាត់សាលាកំរើក ក្រុងសៀមរាប ខេត្ដសៀមរាប កាលពីថ្ងៃទី១២ ខែកុម្ភៈ ឆ្នាំ២០២៤។ (រូបភាពផ្ដល់ឱ្យ)

ពលរដ្ឋរាប់រយនាក់រួមទាំងពលករខ្មែរមកពីកូរ៉េបានធ្វើការតវ៉ាទាមទារលុយពីក្រុមហ៊ុន ប្រ៊ីលាន ស៊ីធី នៅខេត្តសៀមរាប កាលពីថ្ងៃចន្ទ និងថ្ងៃអង្គារ ទី១២ ខែកុម្ភៈ ដោយពួកគាត់អះអាងថា ក្រុមហ៊ុនបានបោកប្រាស់ពួកគាត់ ប៉ុន្ដែខាងក្រុមហ៊ុន​បែរជាចង់ដោះដូរជាដីជូនពួកគាត់​។

ពលករកូរ៉េម្នាក់លោក ផង់ វិបុល អាយុ២៩ឆ្នាំ បាន​ឱ្យ ខេមបូចា ដឹងថា គាត់បានចាញ់បោក​ក្រុម​ហ៊ុន​អស់ជិត​៦ម៉ឺន​ដុល្លារដំបូងឡើយលោកបានដាក់លុយមួយចំនួន​តាមរយៈមិត្ដភក្ដិ​លោក​ដើម្បីទទួលបានការប្រាក់ដោយក្នុង១ម៉ឺនដុល្លារ ទទួលបានការប្រាក់៤០០ដុល្លារ​ក្នុង​មួយខែ។

លោកបន្ដថា ក្រោយពីទទួលបានការប្រាក់គួរសម លោកក៏សម្រេចចិត្ដខ្ចី​លុយ​ធនាគារ​​ដើម្បី​ដាក់បន្ថែមរហូតអស់ជិត៦ម៉ឺនដុល្លារ។ លោកបន្តទៀតថា ក្រោយពីលោកបាន​ដាក់​លុយ​កាន់​តែ​​ច្រើន​ក្រុមហ៊ុនហាក់ចាប់ផ្ដើមមានបញ្ហាតែម្ដង ដោយមិនបានឱ្យការប្រាក់​មកកាន់លោក​នោះ​ទេ។

លោកបន្ដថា៖«ខ្ញុំចាប់ផ្ដើមដាក់លុយយកការប្រាក់ក្នុង១ម៉ឺនបានការប្រាក់៤០០ក្នុង១ខែ។ក្រុមហ៊ុនហ្នឹងជាក្រុមហ៊ុនរបស់អតីតពលករកូរ៉េឈ្មោះ ចាន់ ឃីន គាត់បានបបួល​ពលករកូរ៉េ​ឱ្យ​ដាក់​​លុយជាមួយគាត់ហើយគាត់នឹងឱ្យការប្រាក់៤០០ដុល្លារក្នុង១ម៉ឺនដុល្លារ និងឡេង ចាន់ណា»

លោកលើកឡើងថា តាមដែលលោកបានដឹងមានពលករប្រមាណ១០០០នាក់​បានចាញ់បោក​ក្រុមហ៊ុនប្រ៊ីលាន ស៊ីធី ដោយសារចង់ចំណេញការប្រាក់។ លោកបានឱ្យដឹងទៀតថា លោក​ចាប់​ដាក់​លុយតាំងពីឆ្នាំ២០២១មក ដោយលោករំពឹងថា លោកធ្វើការផង និងដាក់លុយយក​ការ​ប្រាក់​ផង​វាអាចជួយសម្រួលបន្ទុកគ្រួសារលោកដែរ ប៉ុន្ដែបែរជាមកត្រូវចាញ់បោក​ក្រុមហ៊ុន​នេះទៅវិញ។ លោកបន្ដ​ថា លោកនឹងប្រមូលពលករនៅកូរ៉េទាំងអស់​ ដើម្បីតវ៉ាឱ្យក្រុមហ៊ុន​សង​ប្រាក់មកកាន់​ពួកលោកវិញ។

លោក វិបុល សង្កត់ធ្ងន់ថា៖ «ពួកខ្ញុំនឹងរួមគ្នាតាមបណ្ដាញរងគ្រោះដូចគ្នាបងដើម្បីតវ៉ាបង។ សុទ្ធតែ​កើតទុក្ខមិនសុខចិត្ដដូចគ្នាបង​ លុយម្នាក់ៗច្រើនពេកបង ខ្លះជាង១០ម៉ឺនដុល្លារបង។ ខ្ញុំប្រមូលគ្នាសិនបង មិនទាន់ច្បាស់ថាតវ៉ានៅនេះ[កូរ៉េ]ពេលណាទេ ដឹងតែឆាប់ៗ»

ក្រោយពីផ្ទុះការតវ៉ារបស់ពលរដ្ឋជាច្រើននាក់ដែលទាមទារឱ្យក្រុមហ៊ុន ប្រ៊ីលាន ស៊ីធី ដែល​ជា​ក្រុមហ៊ុនផ្ដោតលើការវិនិយោគលើបុរី និងផ្ទះល្វែង និងដីឡូតិ៍ របស់​​អ្នកស្រី ឡេង ចាន់ណា និង​​លោក ចាន់ ឃីន សងលុយដែលពួកគេបាន​ដាក់ត្រឡប់មកវិញ។ កាលពីថ្ងៃទី១២ ខែកុម្ភៈ ឆ្នាំ២០២៤ អ្នកស្រី ឡេង ចាន់ណា បានចេញសេចក្ដី​ជូន​ដំណឹង​មួយ​សម្រាប់ដំណោះស្រាយ​ជូនពលរដ្ឋដោយយកដីរបស់ក្រុមហ៊ុនដែលមានស្រាប់មកកាត់បញ្ចប់បញ្ហាក្នុងការទូទាត់​បំណុលអតិថិជនទាំងអស់ដែលបានចងការប្រាក់ជាមួយថ្នាក់ដឹកនាំ​ក្រុមហ៊ុន។

ក្នុងសេចក្ដីជូនដំណឹងដែលបានបង្ហោះនៅផេកផ្លូវរបស់អ្នកស្រី ឡេង ចាន់ណាថា៖ «យោង​តាមសេចក្ដីប្រកាសចុះថ្ងៃទី៨ ខែកុម្ភៈឆ្នាំ២០២៣ដែលក្រុមហ៊ុនបានចេញមុខដោះស្រាយបញ្ហាជូនអតិថិជនដោយសម្រេចថា​ ក្រុមហ៊ុននឹងយកដីដែលមានស្រាប់ដំណោះស្រាយ​ជូនពលរដ្ឋ​ដោយកដីរបស់ក្រុមហ៊ុនដែលមានស្រាប់មកកាត់បញ្ចប់បញ្ហាក្នុងការទូទាត់បំណុលអតិថិជនទាំង​អស់ដែលបានចងការប្រាក់ជាមួយថ្នាក់ដឹកនាំ»

ពលករម្នាក់ទៀត លោក ចាន់ ពិសិដ្ឋ អាយុ៣២ឆ្នាំ ដែលបានដាក់លុយជាមួយក្រុមហ៊ុន ប្រ៊ីលាន ស៊ីធី អស់ជាង​២ម៉ឺនដុល្លារ បានឱ្យដឹងថា លោកបានដាក់តាមរយៈបងថ្លៃរបស់លោក ដែលជាអ្នកបានដើរមុនលោក ក្នុងការដាក់លុយដើម្បីបានការប្រាក់ពីក្រុមហ៊ុននេះ។ លោក​បានបង្ហាញពីការលើកឡើងរបស់ក្រុមហ៊ុនថានឹងយកដីក្រុមហ៊ុនមកដោះដូរជាថ្នូរនឹងលុយ​ដែលលោកបានចាញ់បោក។

លោកបន្តថា​ លោកមិនចង់បានដីនោះទេ លោកចង់បានតែលុយ​របស់លោកតែប៉ុណ្ណោះ។ យ៉ាង​ណាលោកលើកឡើងទៀតថា លោកស្នើឱ្យអាជ្ញាធរជួយអន្ដរាគមន៍​ឱ្យរូប​លោក និង​ពលរដ្ឋជាច្រើននាក់ទៀតដើម្បីបានលុយត្រឡប់មកវិញ។

លោកបន្ថែមថា៖ «ខ្ញុំដាក់ឱ្យជាង២ម៉ឺនដុល្លារបង ខ្ញុំដាក់តាំង២០២១មកបង។ ខ្ញុំតាមបងថ្លៃខ្ញុំ។ ខ្ញុំ​អត់ចង់បានដីទេ ខ្ញុំចង់បានតែលុយខ្ញុំមកវិញទេ។ ខ្ញុំស្នើដល់អាជ្ញាធរមេត្ដាជួយ​អន្ដរាគមន៍​ឱ្យពួកខ្ញុំផង»

តាមការអះអាងរបស់ពលរដ្ឋបានចូលរួមតវ៉ាកាលពីចន្ទ បាននិយាយថា ក្រុមហ៊ុននេះបាន​កៀគរ​​ប្រជាពលរដ្ឋ​រាប់ពាន់នាក់ដើម្បី​ឱ្យដាក់​លុយចងការប្រាក់​ជាមួយក្រុមហ៊ុនដោយក្នុង១ខែ​នឹងទទួលបាន​ការប្រាក់៤០០ដុល្លារក្នុង១ម៉ឺនដុល្លារ មានទាំងពលរដ្ឋក្នុងស្រុក និង​ពលករ​ខ្មែរ​នៅកូរ៉េ។

ការណ៍នេះធ្វើឱ្យពលរដ្ឋជាច្រើនបានសម្រេចចិត្ដខ្ចីលុយពីធនាគាររហូតធ្លាក់ខ្លួនជំពាក់​បំណុល​​។ ពលរដ្ឋតវ៉ានៅទីតាំង ក្រុមហ៊ុន ប្រ៊ីលាន ស៊ីធី ស្ថិតនៅភូមិតាវៀន សង្កាត់​សាលា​កំរើក ក្រុង​សៀមរាប ​ដោយ​បាន​បញ្ជាក់ថា ពួកគេនឹងមិនទទួលយកដំណោះស្រាយ​របស់​ក្រុមហ៊ុនឡើយ។

ពលរដ្ឋកំពុងលើកបដាតវ៉ាទាមទាឱ្យក្រុមហ៊ុន ប្រ៊ីលាន ស៊ីធី របស់អ្នកស្រី ឡេង ចាន់ណា សងលុយត្រឡប់មកពួកគាត់វិញ កាលពីថ្ងៃទី១២ ខែ កុម្ភៈ  ឆ្នាំ២០២៤ ខណៈ​ពួកគាត់ធ្លាក់ខ្លួន​ជំពាក់បំណុលធនាគារវណ្ឌក។ (រូបភាពផ្ដល់ឱ្យ)

លោក គង់ សៀរ (ជាឈ្មោះអ្នកសារព័ត៌មានដាក់ឱ្យ) អាយុ៣៨ឆ្នាំ​ និងមានមុខរបរ​ជាជាង​សំណង់ បានបញ្ជាក់ថា លោកបានដាក់​លុយ​អស់ជាង១ម៉ឺនដុល្លារ​ដោយរំពឹង​ពីការ​ប្រាក់ចាប់​តាំងពី២០២២មកដោយលោកខ្ចីពីធនាគារមួយ។ លោកបានឱ្យដឹងពីចំនួន​ពលរដ្ឋ​ដែលចាញ់​បោកក្រុមហ៊ុននេះស្រដៀងនឹងពលករខ្មែរធ្វើការនៅកូរ៉េដែរថា មានប្រជាពលរដ្ឋ​រាប់ពាន់នាក់​ដែល​បាន​សម្រេចចិត្ដដាក់លុយដូចលោក។

លោកបន្ដថា បញ្ហាជាមួយក្រុមហ៊ុនចាប់តាំងពីដើមឆ្នាំ២០២៣មក ប៉ុន្ដែលោក និងពលរដ្ឋ​ផ្សេង​​​ទៀតចេះតែរង់ចាំមើលដំណោះស្រាយ​ពីក្រុមហ៊ុន រហូតមកដល់ពេលនេះ​ទើបពួក​លោក​សម្រេចចិត្ដនាំគ្នាផ្ទុះការតវ៉ា។ លោកក៏បានបញ្ជាក់ពីជំហរបស់លោកថា លោកមិន​ព្រម​​ទទួល​យកការដោះស្រាយរបស់ក្រុមហ៊ុនដែលដោះដូរជាដីឡើយ។

លោកប្រកាសជំហថា៖ «ខ្ញុំចង់បានតែលុយខ្ញុំ រឿងដោះដូរដីខ្ញុំមិនព្រមឡើយ។ ខ្ញុំដេកអត់លក់​ទេ ធនាគារមកទារលុយរាល់ថ្ងៃ។ខ្ញុំខ្ចីគេជាង១ម៉ឺនដុល្លារ បង់៣០០ជាងបង»

ខេមបូចា បានព្យាយាមទាក់ទងទៅលោកស្រី ឡេង ចាន់ណា នាយិកាក្រុមហ៊ុន ប្រ៊ីលាន ស៊ីធី ជុំវិញ​រឿង​ដំណោះស្រាយជូនពលរដ្ឋក្រោយការតវ៉ា ប៉ុន្ដែអ្នកស្រីបានចុចបិទូរសព្ទភ្លាមៗ​ជា​ច្រើនដង​​ដោយ​មិនព្រមទទួលទូរសព្ទឡើយ។

ចំណែកឯលោក លី វណ្ណៈ នាយករដ្ឋបាល និងជាអ្នកនាំពាក្យសាលាខេត្ត​សៀមរាប បានថ្លែង​ប្រាប់ ខេមបូចា ថា កាលពីចន្ទក៏មានប្រជាពលរដ្ឋមួយចំនួន​បានតវ៉ា​នៅមុខសាលាខេត្ដ​សៀមរាប​ដែរ។ លោកបន្តថា ការតវ៉ាដើម្បីឱ្យអាជ្ញាធរជួយអន្ដរគមន៍ យ៉ាង​ណា​​លោកថា ចំពោះដំណោះស្រាយមានពលរដ្ឋខ្លះព្រមទទួលយក ហើយ​ពលរដ្ឋខ្លះមិន​ព្រម​។ លោកបានបញ្ជាក់ថា រដ្ឋបាលខេត្ដកំពុងធ្វើលិខិតអញ្ជើញខាងក្រុមហ៊ុនដើម្បីឱ្យចូលខ្លួនមក​ដោះស្រាយជាមួយពលរដ្ឋ។

លោកថ្លែងថា៖ «យើងកំពុងរៀបចំលិខិតផ្ញើទៅខាងក្រុមហ៊ុន ដើម្បីក្រុមហ៊ុនចូលខ្លួន​មក​ដោះ​ស្រាយនឹងបងប្អូនប្រជាពលរដ្ឋ។ យើងនឹងព្យាយាមសម្របសម្រួល ក្នុងករណី​ពួកគាត់​មិន​អាច​​សម្របសម្រួលបាន​ បើអត់ចេញទេ មានតែផ្លូវតុលាការទេ»

យោងតាមលិខិតកិច្ចសន្យាដែល ខេមបូចា ទទួលបានបង្ហាញថា ដើម្បីជាសក្ខីភាព និង​ជាការ​ទទួល​ខុសត្រូវខ្ពស់ក្នុងការទូទាត់ប្រាក់ដើម និងការប្រាក់ទៅម្ចាស់កម្ចីវិញ។ ក្នុង​លិខិត​កិច្ច​សន្យា​ដដែលបានបន្ដថា ភាគីក្រុមហ៊ុនផ្ដល់ការប្រាក់ចំនួន៤%​ក្នុងមួយខែ​ទៅតាមទឹកប្រាក់​ដែល​ពលករ និងពលរដ្ឋបានដាក់នៅក្រុមហ៊ុន ដោយភ្ជាប់ស្នាមមេដៃ និងឈ្មោះភាគី​សង​ខាង។ បើគិតជាទឹកប្រាក់សរុបទាំង៣ឯកសារ ប្រាក់ដើម និងការប្រាក់ដែលមិនទាន់ទូទាត់​ស្មើនឹង៤៧១៦០ដុល្លារក្នុងរយៈ១២ខែ និងតាមដំណាក់កាល។

ក្នុងលិខិតបញ្ជាក់ថា៖ «ក្នុងករណីភាគីណាមួយមិនអនុវត្ដតាមកិច្ចព្រមព្រៀង ដូចមានចែងខាងលើនេះ ត្រូវទទួលខុសត្រូវចំពោះមុខច្បាប់ជាធរមាន»

ខេមបូចា មិនអាចទាក់ទងលោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិតសភា បាន​ទេ​នៅថ្ងៃទី១៣ ខែកុម្ភៈ​នេះ។ ប៉ុន្ដែលោកធ្លាប់បានពន្យល់រឿងដែលស្រដៀងនឹងរឿង​នេះ​កន្លង​មក​​ថា សម្រាប់បញ្ហានេះ​គឺមិនទាក់ទង​នឹង​វិបត្ដិ​​សេដ្ឋកិច្ចសកលទេ គឺមកពីវិស័យ​អចលទ្រព្យ​ខ្លួនឯង​​ដែលគ្មានទុន​បម្រុង​សម្រាប់​អភិវឌ្ឍន៍ គឺពឹងផ្អែកលើលុយអតិថិជនសុទ្ធសាធ។ លោក​បន្ដ​ថា បើសិនជាដោយសារ​វិបត្ដិ​សេដ្ឋកិច្ចសកល នោះគឺពលរដ្ឋគ្មានលុយទិញ ឬក៏បង់​ឱ្យទៅ​ក្រុមហ៊ុន ប៉ុន្ដែនេះ គឺពលរដ្ឋ​មាន​លុយ​បង់ឱ្យទៅក្រុមហ៊ុន។

លោកបញ្ជាក់ថា៖ «វាជាវិបត្ដិវិស័យអចលនទ្រព្យខ្លួនឯងទេ មិនទាក់ទងនឹងវិបត្ដិសកល​ឡើយ​។ មក​ពីធ្វើលើសតម្រូវការ ឬក៏អាចនិយាយបានថាយកលុយពីអតិថិជន ប៉ុន្ដែគ្មានដីឱ្យ មាន​ន័យ​ថា រកស៊ីលក់ដីខ្យល់»

បើតាមលោក ស៊ាង មួយឡៃ ប្រធានគម្រោងអភិវឌ្ឍន៍ទីក្រុងនៃសមាគមធាងត្នោត បានថ្លែង​ថា រឿងនេះហាក់កើតឡើងដដែលៗ ដោយលោកថា អាជ្ញាធរគ្មានចេតនាក្នុងការពិនិត្យ និង​តាម​ដានឱ្យបានតឹងរឹងនោះទេ។ លោកលើកឡើងទៀតថា បើសិនជាអាជ្ញាធរនៅ​បណ្ដោយ​ឱ្យ​ក្រុមហ៊ុន​បន្ដ​ធ្វើ​អ្វី​តាមចិត្ដ អ្នករងគ្រោះគឺប្រជាពលរដ្ឋ។

លោកបន្ថែមថា៖ «ខ្ញុំយល់ថាអាជ្ញាធរដូចមិនបានគិតគូរលើរឿងហ្នឹងទេ។ អាជ្ញាធរមិនគួរ​បណ្ដោយ​ឱ្យ​ក្រុមហ៊ុនចេះតែធ្វើអ្វីតាមចិត្ដចឹង អ្នករងគ្រោះគឺពលរដ្ឋ»

កាលពីខែមិថុនាឆ្នាំ២០២៣កន្លងទៅពលរដ្ឋមួយចំនួនបានចាញ់បោកក្រុមហ៊ុន ពិភពដី​មាស​របស់លោក លោក ហ៊ី គឹមហុង ក្នុងការដាក់លុយដើម្បីទទួលបានការប្រាក់៣%​នៃការ​ដាក់​លុយ​នេះដែរ។ ក្រោយមកដោយសារទទួលបានពាក្យបណ្ដឹង​របស់ប្រជាពលរដ្ឋ​ជាច្រើន​ទៅ​ស្នងការខេត្ដកំពត នៅថ្ងៃទី៧ ខែសីហា ឆ្នាំ២០២៣ លោក ហ៊ី គឹមហុង អគ្គនាយកក្រុមហ៊ុន​ពិភពដីមាស និងភរិយា រួមជាមួយអង្គរក្ស១៣នាក់ផ្សេងទៀត​ត្រូវបានចាប់ខ្លួនភ្លាមៗ​នៅទី​តាំង​ក្រុមហ៊ុន ក្នុងសង្កាត់ពន្សាំង ខណ្ឌព្រែកព្នៅ រាជធានីភ្នំពេញ និងបានបញ្ជូនទៅសាលា​ដំបូង​រាជធានីភ្នំពេញ ដើម្បីសាកសួរ និង​ធ្វើការ​សម្រេច។

នៅថ្ងៃទី២៤ ខែមេសា ឆ្នាំ២០២៣ លោក ​ជា ​សារ៉ន​ និង​មនុស្ស​ជិត​១០​នាក់​ទៀត ​ត្រូវ​បាន​កង​កម្លាំង​សមត្ថ​កិច្ច​ខេត្ត​កំពត​ ធ្វើ​ការ​ឃាត់​ខ្លួនពាក់​ព័ន្ធ​ករណីឆបោកប្រជា​ពលរដ្ឋ ​ក្រោម​រូប​ភាព​វិនិយោគ​ដីឡូតិ៍ ​នៅស្រុក​ឈូក​ខេត្ត​កំពត​។​ ការ​ឃាត់​ខ្លួននេះ ​ធ្វើ​ឡើង​ ខណៈ​ដែល​ លោក ​ម៉ៅ ​ធនិន​ អភិបាល​ខេត្ត​កំពត ​បាន​បើក​វេទិកា​សា​ធារ​ណៈ​ជាមួយ​ពលរដ្ឋ​រាប់​ពាន់​គ្រួសារ​ដែល​អះ​អាង​ថា ​ចាញ់​បោក​ក្រុម​ហ៊ុន​អស់​ប្រាក់​សរុប​ជិត​៤០​លាន​ដុល្លារ​៕

382 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម