សមាគមសម្ព័ន្ធអ្នកសារព័ត៌មានកម្ពុជា

ជនរងគ្រោះនៃអំពើឆបោកដីធ្លីរបស់សេដ្ឋីធ្លាក់ទៅក្នុងពលកម្មកុមារ និងការចំណាកស្រុកដើម្បីរកប្រាក់សងបំណុល

លោក ម៉ា សារីម កាន់ឯកសារកម្ចីដែលគាត់ធ្លាប់ដាក់វិនិយោគទៅក្នុងក្រុមហ៊ុនពិភពដីមាស នៅក្នុងរូបថតនេះដែលថតនៅថ្ងៃទី២៣ ខែសីហា ឆ្នាំ២០២៣ ។ (ខេមបូចា/សុវណ្ណ ស្រីពេជ្រ)
លោក ម៉ា សារីម កាន់ឯកសារកម្ចីដែលគាត់ធ្លាប់ដាក់វិនិយោគទៅក្នុងក្រុមហ៊ុនពិភពដីមាស នៅក្នុងរូបថតនេះដែលថតនៅថ្ងៃទី២៣ ខែសីហា ឆ្នាំ២០២៣ ។ (ខេមបូចា/សុវណ្ណ ស្រីពេជ្រ)

អ្នកស្រី ស៊ាង ស៊ីណាត ក៏ដូច​ជាអ្នកជិតខាង​ច្រើននាក់ទៀត​របស់​អ្នកស្រីដែរ បាន​ខ្ចីប្រាក់​រាប់​ម៉ឺនដុល្លារ​​ដើម្បីវិនិយោគក្នុង​គម្រោងដីធ្លីរបស់​មហាសេដ្ឋីមួយរូប ដែលនាំ​ឱ្យ​អ្នកស្រីធ្លាក់​ទៅ​ក្នុង​ការជំពាក់បំណុលវណ្ឌក នៅពេលដែល​ក្រុមហ៊ុន​នេះ​ឈប់​​សងប្រាក់​ឱ្យ​មក​អ្នកស្រីវិញ។ ​

អ្នកស្រី ស៊ីណាត ដែល​ពឹងផ្អែក​លើ​ប្រាក់កម្រៃ​ប្រចាំខែ​ពីការវិនិយោគ​ដើម្បី​សង​បំណុល​ចំនួន ៣០ ០០០​ដុល្លារ​ដែល​អ្នកស្រី​បានជំពាក់​ធនាគារ ស្ថាបនា បាន​​ឱ្យ​កូនស្រីអាយុ​១៦ឆ្នាំ​របស់​ខ្លួន​ឈប់​រៀន​ត្រឹមថ្នាក់ទី១០ រួចហើយធ្វើដំណើរមករាជធានីភ្នំពេញ​ដើម្បីធ្វើការងារ​​ជាអ្នក​លក់ដូរ​​អាហារ ដើម្បី​ជួយ​រកប្រាក់​យកមកបង់សង​ការប្រាក់​ប្រចាំខែ​ ៧៥០ដុល្លារក្នុង​មួយខែ ។

អ្នកស្រី ស៊ីណាត បានរៀបរាប់​យ៉ាងដូច្នេះ៖ «ខ្ញុំ​សោកស្ដាយចំពោះរឿងនេះ។ ខ្ញុំមិនចង់ឱ្យ​កូនស្រី​​​ខ្ញុំ​ឈប់​រៀនទេ ។» «ខ្ញុំ​លក់អ្វីៗដែលខ្ញុំ​មានអស់​ហើយ សូម្បីម៉ូតូ​ខ្ញុំ​ក៏លក់​អស់ដែរ»

ប្រជាជនរាប់រយនាក់​មកពីខេត្ត​ជាច្រើន​ ត្រូវបានគេរាយការណ៍ថា​ បាន​ខាតបង់ប្រាក់​រាប់​លាន​ដុល្លារ​អាមេរិក បន្ទាប់ពី​នាំគ្នាវិនិយោគទៅលើ​គម្រោង​ដីធ្លីដែលត្រូវបានចោទប្រកាន់ថា​ជា​គម្រោង​​ឆបោក​របស់​ក្រុមហ៊ុនវិនិយោគពិភពដីមាស​ របស់​ឧកញ៉ា ហ៊ី គីមហុង។ អ្នកដាក់ទុន​វិនិយោគ​ជាច្រើន ដែល​ភាគច្រើនមកពីគ្រួសារ​ដែលមានជីវភាពមធ្យម​និងគ្រួសារកសិករ​ដែល​មាន​ជីវភាពទាប បាន​ខ្ចី​ប្រាក់​ពីគ្រឹះស្ថានមីក្រូ​ហិរញ្ញវត្ថុនិងធនាគារ ដើម្បីដាក់វិនិយោគ​នៅក្នុង​ក្រុមហ៊ុន​នេះ ហើយ​ឥឡូវនេះ ត្រូវ​បាន​បង្ខំចិត្ត​រិះរកមធ្យោបាយទាំងអស់​សង្ឃឹម ដើម្បី​រកប្រាក់​មក​សង​បំណុលទាំងនេះ​វិញ ។ គម្រោង​ឆបោក​នេះ​ឆ្លុះបញ្ចាំងពី​ការឆបោកផ្សេងៗទៀត ដែល​នាំ​ឱ្យ​​​មហាសេដ្ឋី​អ្នករកស៊ីដទៃទៀត ដូចជា លោក ជា សារ៉ន ជាដើម ត្រូវបាន​អាជ្ញាធរ​ចាប់ខ្លួន​បញ្ជូនទៅពន្ធនាគារ កាលពីដើមឆ្នាំនេះ។

សារព័ត៌មាន ខេមបូចា បាន​ជួប​សម្ភាស​ប្រជាជន​១០រូបដែលបានដាក់ទុនវិនិយោគ​ក្នុង​ក្រុមហ៊ុន​​​ពិភព​ដីមាស​ ដែល​និយាយថា ពួកគេ​កំពុងរងសម្ពាធ​យ៉ាង​ខ្លាំងពី​មន្ត្រីឥណទាន – ជាផ្នែកនៃវិស័យ​មួយ​ដែល​កំពុង​ប្រឈមនឹងការស៊ើបអង្កេត​ស្រាប់​ហើយ​ចំពោះ​ការចោទ​ប្រកាន់​​ពី​ការអនុវត្ត​បែប​ជញ្ជក់​ឈាម​និង​បង្ខិតបង្ខំ – ដើម្បីសងបំណុល ដែលនាំ​ឱ្យករណី​ចំណាកស្រុក កូនបោះបង់ការសិក្សា ការចោទប្រកាន់ពីការធ្វើអត្តឃាត និង​ការលក់ទ្រព្យ​សម្បត្តិនិងដីស្រែចម្ការរបស់ពួកគេ។ នៅក្នុង​ខេត្ត​កំពត​តែមួយ មានបណ្ដឹងជាង ១ ១០០​ករណី​​ប្រឆាំងនឹង​ក្រុមហ៊ុននេះ ហើយ​គេប៉ាន់ស្មានថា ទឹកប្រាក់​ខាតបង់​គឺប្រហែល ២១លាន​ដុល្លារ។​ នេះបើ​តាម​ការឱ្យដឹង​ពីមន្ត្រីនគរបាល។ ​

អ្នកភូមិមកពីខេត្តកណ្ដាល កំពង់ឆ្នាំង និងកំពង់ចាម ធ្វើដំណើរមកដល់​សាលាដំបូង​រាជធានី​ភ្នំពេញ ដើម្បីដាក់ពាក្យបណ្ដឹង​ប្រឆាំងនឹង​ឧកញ៉ា ហ៊ី គីមហុង ដែល​ត្រូវបាន​ចោទ​ប្រកាន់ថា​បាន​ឆបោកពួកគេ​នៅក្នុង​គម្រោង​អភិវឌ្ឍន៍​អចលនទ្រព្យ​មួយ នាថ្ងៃទី៩ ខែសីហា ឆ្នាំ២០២៣ ។ (ខេមបូចា/ ព្រីង សំរាំង)

សមាគមីក្រូហិរញ្ញវត្ថុ​កម្ពុជា បាន​សម្ដែង​ការព្រួយបារម្ភអំពីស្ថានភាពនេះ​ ប៉ុន្តែ អះអាងថា អាជ្ញាធរ​និង​ក្រុមហ៊ុន​ត្រូវតែដោះស្រាយ​បញ្ហានេះ​ ។ លោក Raymond Sia ប្រធាន​សមាគម​ធនាគារ​កម្ពុជា បានបដិសេធ​ផ្ដល់អត្ថាធិប្បាយ ដោយ​និយាយថា លោក​«មិនបានទទួល​ដំណឹង»ពីបញ្ហានេះទេ។​

ស្របពេលជាមួយគ្នានេះ​ នៅក្រោយ​ត្រូវបានចាប់ខ្លួន ចោទប្រកាន់​ពី​បទឆបោក និង​បញ្ជូន​ទៅមន្ទីរឃុំឃាំង​នៅមុនការជំនុំជម្រះទោសកាលពីដើម​ខែសីហា ឧកញ៉ា​ គីមហុង ត្រូវបាន​គេរាយការណ៍ថា បាន​ព្យាយាម​សុំនៅក្រៅឃុំ ហើយ​ភរិយារបស់លោក​សុំទទូច​ឱ្យ​ជនរងគ្រោះ​ដកពាក្យបណ្ដឹង​វិញសិន ដោយ​សន្យាថា លោកអាចសងប្រាក់ពួកគេវិញបាន។

លោក សេង ហៀង ព្រះរាជអាជ្ញារង​អមសាលាដំបូងរាជធានីភ្នំពេញ បាន​និយាយថា លោក គីមហុង ស្ថិតនៅក្នុង​មន្ទីរឃុំឃាំង​នៅឡើយទេ រហូតមកទល់នឹងរសៀលថ្ងៃសុក្រ​នេះ។

លោក ម៉ា សារីម ដែលបានដាក់វិនិយោគជាមួយក្រុមហ៊ុននេះ​ដែរ បាន​ប្រាប់​ ខេមបូចា ថា លោក​បាន​រង់ចាំ​អស់រយៈពេល ៦ខែ ទើបដាក់ទុនវិនិយោគជាមួយក្រុមហ៊ុន ពិភព​ដីមាស បន្ទាប់ពី​តំណាង​ទីផ្សារ​របស់​ក្រុមហ៊ុន​បានមកផ្ទះគាត់ជាច្រើនលើកច្រើនសានៅក្នុង​ឃុំ​ថ្នង ខេត្តកំពត ដើម្បី​ផ្សព្វផ្សាយពី​ឱកាស​វិនិយោគ និង​បង្ហាញពី​កំណើន​និង​ប្រាក់ចំណេញ​ដ៏ឆាប់​រហ័ស​របស់​ក្រុមហ៊ុន ។

លោក សារីម បានបញ្ជាក់​ថា៖ «គោលការណ៍របស់​ក្រុមហ៊ុនពិភព​ដីមាស គឺថា យើង​យក​លុយទៅទិញដី ក្រុមហ៊ុន​ផ្ដល់​ការប្រាក់ ៣% រៀងរាល់ខែ ហើយរៀងរាល់ ២៤ខែ ក្រុមហ៊ុន​ទិញដីនោះ​មក​វិញ​ក្នុងតម្លៃ​ដើម»។ លោកបន្តថា៖ «បុគ្គលិក​ទីផ្សារ​បានប្រាប់ខ្ញុំថា… ខ្ញុំមិន​ចាំបាច់រកស៊ីអីទេ ហើយ​បាន​ទទួល​លុយ​រៀងរាល់ខែ ។ ពួកគេអះអាងថាជាក្រុមហ៊ុន​ស្រប​ច្បាប់រដ្ឋាភិបាល ហើយ​នឹង​ទទួលខុសត្រូវ​គ្រប់​បែបយ៉ាង ប្រសិនបើមានរឿងអ្វីកើតឡើង»

លោក ម៉ា សារីម បង្ហាញពីប្លង់ដី​ដែល​លោក​ជឿជាក់ថាលោកបានបោះទុន​វិនិយោគ​​ជាមួយ​ក្រុមហ៊ុន​ពិភព​ដីមាស ថ្ងៃទី២៣ ខែសីហា ឆ្នាំ២០២៣ ។ (ខេមបូចា/ សុវណ្ណ ស្រីពេជ្រ)

លោក សារីម រំឭកថា៖ «លោក [គីមហុង]ជា​ឧកញ៉ា ហើយ​ឧកញ៉ា​មិនធ្វើបាប​ប្រជាជនទេ» នៅគ្រា​នោះដែល​លោក​បាន​សម្រេចចិត្ត​ខ្ចី​ប្រាក់ ៤៥ ០០០ដុល្លារ​ពី​ធនាគារ អេស៊ីលីដា ខណៈ​ដែល​បងប្អូនជីដូនមួយរបស់​លោក​ និង​ប្រហែល​ ៥០គ្រួសារ​ផ្សេងទៀត​នៅ​ក្នុង​ភូមិ​ព្រៃធ្នង់ បាន​ខ្ចីប្រាក់ច្រើន​ដើម្បី​វិនិយោគ​ផងដែរ។

លោកឱ្យដឹងថា៖ «ការវិនិយោគជាមួយក្រុមហ៊ុនពិភព​ដីមាស ខ្ញុំអាចនិយាយបានថា ៩០% នៃ​[អ្នកវិនិយោគ]សុទ្ធតែខ្ចីប្រាក់ពីគ្រឹះស្ថានមីក្រូហិរញ្ញវត្ថុ​និង​ធនាគារ ។ គ្មានអ្នកណាម្នាក់​មាន​លុយ​ផ្ទាល់ខ្លួនទេ ហើយនេះហើយជាបញ្ហាដែល​ប៉ះពាល់ដល់​ជីវភាពរស់នៅរបស់​យើង ពីព្រោះ​យើង​អត់មានលុយ​សង​ការប្រាក់ប្រចាំខែវិញទេ»

ប៉ុន្តែ លោក សារីម បាន​ទទួលស្គាល់ថា លោកបានកុហកធនាគារ​ អេស៊ីលីដា អំពី​គោល​បំណង​​នៃ​កម្ចី​របស់​លោក ដោយអះអាងថា កម្ចីនោះគឺសម្រាប់​យកមកចាប់ផ្ដើម​អាជីវកម្ម ហើយ​លោក​បាន​ទទួល​ស្គាល់ថា អ្នកជិតខាង​របស់លោកជាច្រើន​ក៏ទំនងជា​កុហក​មន្ត្រី​ឥណទាន​អំពី​គោលបំណង​នៃការប្រើប្រាស់​កម្ចី​នោះ​ដូចគ្នាដែរ។ 

លោក សារីម បានរំពឹងថា ការវិនិយោគនេះ​នឹងនាំឱ្យលោក​មានចំណូលស្ថិតស្ថេរ និង​មាន​ជីវភាពរស់នៅប្រសើរឡើង ហើយ​ក្នុងអំឡុង ៨ខែដំបូងបន្ទាប់ពីបានដាក់វិនិយោគ លោក​រក​ចំណូលបានប្រហែល ១ ៣៨០ដុល្លាររៀងរាល់ខែ ពីក្រុមហ៊ុនពិភព​ដីមាស។ ប៉ុន្តែ ក្រោយមក​ទៀត ការបង់ប្រាក់​ក៏ត្រូវបាន​បញ្ឈប់​នៅខែ​មេសា ហើយចំណូលរបស់​លោក៏ធ្លាក់ចុះយ៉ាងខ្លាំង ។

លោក សារីម លើកឡើងថា លោក​និង​សាច់ញាតិ​បួននាក់ទៀត​បាន​ខាតបង់ប្រាក់​ជាង ២០០ ០០០ដុល្លារ​ទៅលើការវិនិយោគនេះ ហើយឥឡូវនេះ គ្រួសារលោកកំពុង​លក់ដី​ចម្ការ​ពីរកន្លែង​ដែលមួយកន្លែងៗ មានទំហំ ២,៥ហិកតា ក្នុងតម្លៃ​ ២០ ០០០ដុល្លារ និងបាន​ចំណូល ២៣ ០០០​ដុល្លារផ្សេងទៀតពី​ការ​លក់​រថយន្តគ្រួសារ​មួយគ្រឿង និង​ឡានដឹកទំនិញ​ពីរគ្រឿងដែល​លោក​បានប្រើប្រាស់​ក្នុង​របរ​កសិកម្ម–សម្រាប់តែគ្រប់​បង់​សង​ការប្រាក់​ប៉ុណ្ណោះ។ ​

លោក សារីម បានថ្លែងទៀតថា៖ «ចាប់តាំងពីខែមេសាមក ខ្ញុំលែងទទួល​បាន​​ប្រាក់ចំណេញ​ទៀត​ហើយ ហើយ​ក្រុមហ៊ុនសន្យាម្ដងហើយម្ដងទៀត រហូតដល់​យើង​មក​ជួបជុំគ្នាដើម្បី​ដាក់​ពាក្យបណ្ដឹង»។ លោកបន្តថា៖ «អ្វីដែល​យើងទាំងអស់​បារម្ភបំផុត គឺ​ការសងការប្រាក់​ត្រឡប់​ទៅឱ្យ​ធនាគារ​វិញ នៅពេល​ដល់ថ្ងៃកំណត់​ត្រូវបង់ យើងទាំងអស់គ្នា​ត្រូវបង់ការប្រាក់ ហើយ​វា​ហួសពីលទ្ធភាព​របស់​យើង»។​

លោក សារីម បានអះអាងថា យ៉ាងហោចណាស់ មានមនុស្សម្នាក់បានសម្លាប់ខ្លួន​ដោយសារ​តែបំណុល ប៉ុន្តែ មេភូមិ​ព្រៃថ្នង លោក គង់ សាន បានបដិសេធថា ពុំមានករណីស្លាប់​ ឬ​ការ​ចំណាក​ស្រុក​ដែល​ជំរុញដោយបំណុលនោះទេ។

លោកនិយាយថា ប្រជាជនជាច្រើននៅក្នុងភូមិរបស់​លោក​បាន​ធ្វើចំណាកស្រុកទៅកាន់​ប្រទេស​​ថៃ ដោយសារតែសម្ពាធ​នៃការត្រូវសងបំណុល ឬ​កំពុង​រៀបចំ​ឯកសារដើម្បីធ្វើដំណើរ​ទៅទីនោះ ហើយ​លោក​ផ្ទាល់ខ្លួន​ក៏កំពុង​គិតគូរពីការទៅរកការងារធ្វើនៅទីនោះផងដែរ។

លោក សារីម បានបន្ថែមថា៖ «លុយដែលខ្ញុំជំពាក់ធនាគារក្នុងជាតិនេះ មិនដឹង​ថា ជាតិក្រោយ ខ្ញុំអាចសងធនាគាររួច​ ឬអត់នោះទេ»

វិស័យ​ផ្ដល់កម្ចីខ្នាតតូច​បង្វែរ​ការបន្ទោស​ទៅ​លើ​បញ្ហា​របស់​«កូនបំណុល»

ការជំពាក់បំណុលវណ្ឌកដែលជាលទ្ធផលនៃការវិនិយោគខាងលើ ក៏​កំពុង​ជះឥទ្ធិពល​ប៉ះពាល់​ដល់​អ្នក​វិនិយោគ​នៅក្នុងខេត្ត​ផ្សេងទៀត​ផងដែរ ។ ប្រជាជន​មកពីខេត្តកំពង់ស្ពឺមួយរូប ឈ្មោះ អ៊ឹម ចាន់ អាយុ ៤០ឆ្នាំ បាន​ដាក់ទុនវិនិយោគ ១៥ ០០០ដុល្លារ ជាមួយក្រុមហ៊ុនពិភព​ដីមាស ។

អ្នកស្រី ចាន់ បាននិយាយថា៖ «ខ្ញុំសុំ​ឱ្យកូនប្រុស​ឈប់​រៀន និង​ជួយ​សងបំណុលគេ ប៉ុន្តែ គាត់និយាយថា គាត់ចង់រៀនបន្ត ប៉ុន្តែ ឥឡូវនេះ ខ្ញុំត្រូវ​បង់​ទៅ​ឱ្យ [គ្រឹះស្ថានមីក្រូហិរញ្ញវត្ថុ] អម្រឹត ៥០០ដុល្លារ​ក្នុង​មួយខែ ហើយខ្ញុំ​គ្មាន​សមត្ថភាពបង់​សង​ប្រាក់ចំនួននេះ​ទេ»។ អ្នកស្រី ចាន់ បន្តថា អ្នកស្រីកំពុង​ជំរុញ​កូនប្រុស​ឱ្យ​រក​ការងារធ្វើនៅរោងចក្រ។

គ្រឹះស្ថានមីក្រូហិរញ្ញវត្ថុ អម្រឹត និងធនាគារ ស្ថាបនា ពុំបានឆ្លើយតប​នឹង​សំណើ​សុំ​អត្ថាធិប្បាយ​​ជុំវិញ​ករណី​អ្នកខ្ចីប្រាក់​កំពុងអូសទាញ​កូនឱ្យឈប់រៀន​ដើម្បី​សងបំណុលនោះទេ ដែលជាការបន្ទរបន្ថែម​លើ​បាតុភាព​មួយ​ដែល​កត់ត្រា​ជា​ឯកសារ​នៅក្នុង​ការសិក្សា​បរិមាណ​វិស័យមួយ​ទៅលើ​កម្ចីខ្នាតតូច ដែល​ធ្វើ​ឡើង​ដោយ​អង្គការសិទ្ធិមនុស្ស​ចំនួន ២ និង​ចេញ​ផ្សាយ​​កាលពីខែសីហាកន្លងមក។ ស្ថាប័ន​ទាំងពីរ រួមទាំងធនាគារអេស៊ីលីដា និង​ស្ថាប័នផ្ដល់​កម្ចីខ្នាតតូច​ធំៗបីផ្សេងទៀតនៅក្នុង​ប្រទេស​កម្ពុជា កំពុង​ស្ថិតក្រោម​ការស៊ើបអង្កេត​របស់​សាជីវ​កម្ម​​ហិរញ្ញវត្ថុ​អន្តរជាតិនៃធនាគារពិភព​លោក ជុំវិញការចោទ​ប្រកាន់ពីការអនុវត្ត​ការផ្ដល់​កម្ចីនិងរបៀបទារបំណុល​បែប​ជញ្ជក់ឈាម។

នាយកផ្នែកប្រតិបត្តិការនៃអង្គការសិទ្ធិមនុស្ស លីកាដូ លោក អំ សំអាត បាន​និយាយថា នៅពេលដែល​មន្ត្រីឥណទាន​ដាក់សម្ពាធ និង​បង្ខិតបង្ខំ​ឱ្យ​អ្នកខ្ចី ឬកូនបំណុល​លក់ដីស្រែចម្ការ ផ្ទះ ឬអចលនទ្រព្យ​ដើម្បី​សងបំណុល វា​នឹង​ប៉ះពាល់​ដល់​ការរស់នៅ​របស់​ពួកគេ និង​ប៉ះពាល់ ដល់​លទ្ធភាព​រក​ប្រាក់​ចំណូលនាពេលអនាគត​របស់ពួកគេ។ លោកបានបន្ថែមថា អ្នកឱ្យខ្ចី​គួរតែធ្វើការបែប​​សកម្មមុន​ជាមួយ​អ្នកខ្ចី​ដើម្បីដោះស្រាយបញ្ហានេះ។

លោក សំអាត បាននិយាយថា៖ «ប្រជាជនពឹងផ្អែក​លើ​ដីធ្លីរបស់ពួកគេដើម្បីចិញ្ចឹមជីវិត ហើយ​ប្រសិនបើ​មានករណីដែល​[មន្ត្រីឥណទាន]បង្ខំ​ប្រជាជន​ឱ្យ​លក់ដី វានឹង​ប៉ះពាល់ធ្ងន់ធ្ងរទៅ​ដល់​សិទ្ធិរបស់ពួកគេ ។ ធនាគារ​គួរតែ​ទុកពេលវេលា​ឱ្យពួកគេ​សង​បំណុល និង​មិនមែនគ្រាន់​តែ​បង្ខំ​​ឱ្យពួកគេ​លក់ដី​នោះទេ ធ្វើ​បែបនេះ​មិនត្រឹមត្រូវទេ»។ 

អ្នកនាំពាក្យ​នៃ​សមាគម​មីក្រូហិរញ្ញវត្ថុ​កម្ពុជា (CMA) លោក កាំង តុងងី បាន​និយាយថា លោក​សោក​ស្ដាយចំពោះ​កាលៈទេសៈ​របស់​ជនរងគ្រោះ​ក្នុងករណីក្រុមហ៊ុនពិភពដីមាស និង​ថា វិស័យ​មី​ក្រូហិរញ្ញវត្ថុ​មិនមានចេតនាផ្ដល់​កម្ចី​ដល់​ប្រជាជន​ដើម្បី​ទៅ​វិនិយោគ​នៅក្នុង​ក្រុមហ៊ុន​ដែល​រកស៊ីបោកប្រាស់​នោះ​ទេ។ ប៉ុន្តែ លោកបាននិយាយថា ការទទួលខុសត្រូវ​ដើម្បី​ដោះ​ស្រាយ​បញ្ហានេះ​ស្ថិតនៅលើ​ដៃ​អាជ្ញាធរ​ និងថា កូនបំណុលនៅតែមានកាតព្វកិច្ច​បំពោះ​ម្ចាស់​បំណុលរបស់ខ្លួនដដែល។

លោក តុងងី បានថ្លែងថា៖ «យើងគួរដោះស្រាយ​ជាមួយ​ក្រុមហ៊ុនដែល​រកស៊ីបោកប្រាស់​ស្រប​ទៅ​​តាម​ច្បាប់ ហើយអ្វីដែល​ប្រជាជន​គួរធ្វើ​ គឺ​យកបញ្ហានេះ​ទៅពិភាក្សា​ជាមួយ​ធនាគារ​ និង​មើល​ទៅលើ​ថា​តើ​គេអាចធ្វើអ្វីបានខ្លះ​ស្របទៅតាម​លទ្ធភាពរបស់ពួកគេ»។ លោកបន្តថា៖ «ទាល់តែអតិថិជន​មានភាពស្មោះត្រង់ ទើបគេអាច​រក​ដំណោះស្រាយបាន និងជៀសវៀង​ការខ្ចីកម្ចី​តាមអនឡាញ​ ឬ​កម្ចី​ឯកជន​ក្នុងអំឡុង​ពេលនេះ»

លោក តុងងី បានបន្ថែមថា៖ «ក្នុងករណី​មានការបង្ខិតបង្ខំពី​មន្ត្រីឥណទាន សូម​ដាក់ពាក្យ​បណ្ដឹងទៅ​អាជ្ញាធរមូលដ្ឋាន ឬ​គ្រឹះស្ថានមីក្រូហិរញ្ញវត្ថុ ដើម្បីរាយការណ៍​ពីភាព​អសកម្ម​របស់​មន្ត្រីមួយចំនួន»

លោក អ៊ិន ចាន់នី ប្រធានអគ្គនាយក​ធនាគារ​ អេស៊ីលីដា ដែលផ្ដល់កម្ចីខ្នាតតូច​ក្នុង​ចំនួន​ដ៏ច្រើន​​ផង​ដែរ​នោះ មិនបាន​ឆ្លើយតបនឹងសំណួរ​របស់ ខេមបូចា ថាតើធនាគារ​នឹង​ផ្ដល់​ការ​ជួយសង្គ្រោះបំណុល ឬ​ដំណោះស្រាយបំណុលណាមួយទៅដល់អ្នកខ្ចី​ដែលបាន​ខាតបង់​ប្រាក់ និងចំណូល​ពី​ការ​ដួលរលំ​នៃ​ក្រុមហ៊ុន​ពិភព​ដីមាស​នោះទេ។ ប៉ុន្តែ ជំនួសវិញ លោក​បាន​អះអាងថា ធនាគារអេស៊ីលីដា​មិនដែល​អនុញ្ញាត​ឱ្យ​អតិថិជន​ខ្ចីប្រាក់​សម្រាប់ការទិញដី​ដើម្បី​ទុកចំណេញប្រាក់​នោះទេ បើទោះបី​ជា​មាន​ភ័ស្តុតាង​ដូចក្នុង​ករណី​លោក សារីម ក្ដី។

លោក ចាន់នី បានមានប្រសាសន៍ថា៖ «ធនាគារមិនដែល​ផ្ដល់​លុយទៅឱ្យអតិថិជន​ដើម្បី​ទិញ​ដី ឬ​វិនិយោគ​លើ​ដីធ្លី​ដូច្នោះនោះទេ មិនដែលទេ មិនដែលកើតឡើង​បែបនេះ​ទេ សូមទៅ​សួរ​ពួកគេ​ចុះ យើង​ពុំដែលមាន​គោលនយោបាយបែបនោះទេ»

លោក តុងងី បានបន្ទោសអាជ្ញាធរមូលដ្ឋាន​ដែលមិនបានចាត់វិធានការទាន់ពេលវេលា រហូត​បណ្ដោយ​ឱ្យ​ប្រជាជនរាប់ពាន់នាក់​ក្លាយជា​ជនរងគ្រោះ​ដោយជាប់បំណុលច្រើន និងបាន​និយាយ​ថា CMA កំពុង​ព្យាយាម​កោះប្រជុំ«ភាគីពាក់ព័ន្ធ»ដើម្បីដោះស្រាយវិបត្តិរបស់​អ្នកដាក់​ទុនវិនិយោគទៅលើក្រុមហ៊ុន​ខាងលើ ដែល​រឿងនេះបានកើតឡើង​ជាច្រើន​ខែ​រួចមកហើយ។

លោក តុងងី បានបន្ថែមថា៖ «កន្លងមក មាន​កិច្ចពិភាក្សា​ជាមួយធនាគារជាតិ​នៃកម្ពុជា និង​ភាគីពាក់ព័ន្ធ​ដទៃទៀត ដើម្បី​សម្រាល​បញ្ហា​នេះ ។ ប៉ុន្តែ នៅដំណាក់កាលនេះ មិនទាន់​មាន​ផ្លែផ្កា​អ្វីនៅឡើយទេ ពីព្រោះភាគីពាក់ព័ន្ធ​មិនទាន់បានធ្វើការ និង​មិនទាន់យល់ពីគ្នា​ទៅវិញទៅ​មកនៅឡើយ»

ស្នងការនគរបាលខេត្តកំពត លោក ចាន់មធុរិទ្ធ បាននិយាយថា លោក​«មិនអាចពាក់ព័ន្ធ​នៅ​ក្នុង​សំណុំរឿងនេះទេ ពីព្រោះវា​ផុតពីដៃខ្ញុំហើយ ដូច្នេះ​ពួកគេ​គួរតែរង់ចាំដំណោះស្រាយពី​តុលាការ ឬ​ចរចាជាមួយធនាគារ»

ភរិយារបស់ឧកញ៉ា​ព្យាយាម​បំបិទមាត់​អ្នកប្ដឹង

ភរិយារបស់ ហ៊ី គីមហុង លោកស្រី សាន សុធាវីន និង​លេខទូរសព្ទ​របស់​ជំនួយ​ការរបស់​ឧកញ៉ា មិនអាច​ទាក់ទងសុំអត្ថាធិប្បាយបានទេ ។ ខេមបូចា បានព្យាយាមទាក់ទង​ទៅ​ក្រុមហ៊ុន ពិភព​ដីមាស តាមរយៈ​លេខទំនាក់ទំនង​នៅលើ​ទំព័រហ្វេសប៊ុក និង​គេហ​ទំព័រ​របស់​ក្រុមហ៊ុន ប៉ុន្តែ ពុំទទួលបានការ​ឆ្លើយតបណាមួយនោះទេ ។

ខណៈដែល​ទទួលស្គាល់កាលពីខែសីហាថាខ្លួនមិនអាច​សងប្រាក់ទៅ​វិនិយោគិន​វិញបានទេ ក្រុមហ៊ុន​បាន​ទទូច​នៅក្នុង​សេចក្ដីថ្លែងការណ៍ជាសាធារណៈថា ខ្លួនជាក្រុមហ៊ុន​អាជីវកម្មស្របច្បាប់​ ហើយ​នឹង​បំពេញ​កាតព្វកិច្ច​ចំពោះ​អតិថិជនរបស់ខ្លួន ។

ស្លាកសញ្ញាក្រុមហ៊ុន ពិភព​ដីមាស នៅមុខ​ទីស្នាក់ការធំរបស់ខ្លួន ស្ថិតក្នុង​ខណ្ឌ​ព្រែកព្នៅ រាជធានីភ្នំពេញ​ ដែលថតនៅថ្ងៃទី៨ ខែសីហា ឆ្នាំ២០២៣។ (ខេមបូចា / ព្រីង សំរាំង)

លោក សារីម ដែលជាតំណាង​ឱ្យជនរងគ្រោះនៃករណីឆបោកនេះ​មកពីខេត្តកំពត បាន​និយាយ​​ថា លោកស្រី សុធាវីន បានព្យាយាម​បញ្ចុះបញ្ចូល​អ្នកតំណាងទាំងឡាយ​ឱ្យ​ដកពាក្យ​បណ្ដឹង​ប្រឆាំងនឹង​ស្វាមីរបស់​លោកស្រីវិញ និង​ថា ជនរងគ្រោះជាច្រើន​ជឿជាក់ថា ពួកគេ​ទំនង​ជា​នឹង​ទទួលបាន​សំណង​មកវិញ ប្រសិនបើ​លោក​ចេញពីពន្ធនាគារ ។

លោក សារីម និយាយ​យ៉ាងដូច្នេះថា៖ «ខ្ញុំអាចនិយាយបានថា យើង​ស្ម័គ្រចិត្តនៅស្ងៀមស្ងាត់ បន្ទាប់ពី​លោក[ឧកញ៉ា]ត្រូវបានដោះលែង​ឱ្យនៅក្រៅឃុំ ពីព្រោះយើង​ចង់​បានដំណោះស្រាយ តិច​ ឬច្រើន ប្រសើរជាង​អត់សោះ ប្រសិនបើ​គាត់ត្រូវបានដោះលែង​ឱ្យ​នៅក្រៅឃុំ ហើយ​នៅតែ​​មិន​ទទួលខុសត្រូវ​ទៀត នោះជាកម្មរបស់​យើង​ហើយ»

អ្នកភូមិ​ម្នាក់ទៀត​ដែល​មកពីខេត្តកណ្ដាលដែរ ឈ្មោះ ថុល សុខន អាយុ ៤២ឆ្នាំ បាននិយាយ​ថា អ្នកស្រីសង្ឃឹមថា ក្រុមហ៊ុននឹងទទួលខុសត្រូវចំពោះ​កម្ចី​ ២០ ០០០ដុល្លាររបស់អ្នក​ស្រី​ដែល​​ខ្ចីពី អម្រឹត និង​បាន​និយាយ​បន្ទរតាមការអះអាងរបស់​លោក សារីម ថា លោកស្រី សុធាវីន បានព្យាយាម​បញ្ចុះបញ្ចូល​អ្នកប្ដឹង​ឱ្យ​ស្ងាត់ស្ងៀម ។

អ្នកស្រី សុខន បានឱ្យដឹងថា៖ «តិច ឬច្រើន ខ្ញុំ​នៅតែសង្ឃឹមថា [គាត់​នឹង​ធ្វើបែបនេះ] បន្ទាប់ពី​គាត់​ត្រូវបានដោះលែង​ឱ្យនៅក្រៅឃុំ»។ អ្នកស្រីបន្តថា៖ «ភរិយារបស់​ ហ៊ី គីមហុង បានសុំ​ឱ្យ​អ្នកដែលមិនទាន់ប្ដឹង កុំ​ប្ដឹង​អី ហើយ​សុំ​ឱ្យអ្នកដែលបានប្ដឹងរួច ដកពាក្យបណ្ដឹងវិញ»

អ្នកភូមិម្នាក់ទៀតមកពីខេត្តកំពត ឈ្មោះ អ៊ា លី ដែលបានដាក់ពាក្យបណ្ដឹង​ប្រឆាំងនឹង​លោក គីមហុង ដែរ បាននិយាយថា លោក​មិនជឿថា ក្រុមហ៊ុនពិភព​ដីមាស​នឹងដោះស្រាយ​បញ្ហា​ពិត​ប្រាកដទេ ពីព្រោះ​មើលទៅមានជនរងគ្រោះដល់ទៅរាប់ពាន់នាក់ និង​លុយ​រាប់លាន​ដុល្លារ​ដែល​ត្រូវ​សងវិញ ។

លោក លី ដែល​បានខ្ចីប្រាក់ពីធនាគារ​ អេស៊ីលីដា ចំនួន ២០ ០០០ដុល្លារ ដើម្បី​វិនិយោគ​ជា​មួយ​​ក្រុមហ៊ុន​ខាងលើ ដោយបានការប្រាក់ប្រចាំខែត្រឡប់វិញ ៤០០ដុល្លារក្នុងមួយខែ បាន​និយាយថា លោក​មិនរំពឹងថាទទួលបានយុត្តិធម៌ពេញលេញទេ និង​រំពឹងថា លោក គីមហុង អាចនឹងត្រូវ​ដោះលែង​ឱ្យ​នៅក្រៅឃុំ​ក្នុងពេលឆាប់ៗខាងមុខ។

លោក លី បានថ្លែងថា៖ «ខ្ញុំជឿជាក់លើប្រព័ន្ធតុលាការតែ ៥០%ទេ ហើយ ៥០% [លទ្ធផល] ទៀត ខ្ញុំនៅរង់ចាំមើល​ការចាត់វិធានការរបស់​អាជ្ញាធរ​នៅក្នុងរឿងនេះ»។ លោកបន្ថែមថា៖ «ជន​រង​គ្រោះភាគច្រើន​បំផុត​ចង់ផ្ដល់​ឱកាស​ឱ្យ​លោកម្ដងទៀត ប្រសិនបើ​លោក​ចង់​ដោះ​ស្រាយ​បញ្ហានេះ​មែន ប្រសិនបើ​គាត់​មិន​ចង់​ធ្វើដូច្នេះ​ទេ យើង​នឹងប្ដឹងគាត់ជាថ្មីម្ដង​ទៀត»

ប្រែសម្រួលពីអត្ថបទភាសាអង់គ្លេស៖ Victims of Tycoon’s Alleged Land Fraud Turn to Child Labor and Migration To Repay Debt

396 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម