សមាគមសម្ព័ន្ធអ្នកសារព័ត៌មានកម្ពុជា

អតិថិជនបុរីពិភពថ្មីផ្ទុះការតវ៉ាជាថ្មីទាមទារឱ្យមានការគោរព​កិច្ចសន្យា​​ទិញលក់ផ្ទះ

ពលរដ្ឋដែលរស់នៅក្នុងបុរីពិភពថ្មីកំបូល៣ ប្រមូលផ្ដុំគ្នាតវ៉ានៅក្នុងបុរី ក្នុងខណ្ឌកំបូល រាជធានីភ្នំពេញ។ រូបថតថ្ងៃទី៣១ ខែមករា ឆ្នាំ២០២៤។ (ខេមបូចា/ ព្រីង សំរាំង)
ពលរដ្ឋដែលរស់នៅក្នុងបុរីពិភពថ្មីកំបូល៣ ប្រមូលផ្ដុំគ្នាតវ៉ានៅក្នុងបុរី ក្នុងខណ្ឌកំបូល រាជធានីភ្នំពេញ។ រូបថតថ្ងៃទី៣១ ខែមករា ឆ្នាំ២០២៤។ (ខេមបូចា/ ព្រីង សំរាំង)

អតិថិជនបុរីពិភពថ្មីកំបូលប្រមាណ១០០នាក់ផ្ទុះការតវ៉ាជាថ្មីនៅថ្ងៃទី៣១ ខែមករា ដើម្បីទាមទារឱ្យ​ក្រុមហ៊ុន បញ្ឈប់ការគំរាមកំហែងរឹបអូស និងព្រមទទួលទិញផ្ទះយកវិញក្នុងតម្លៃ៥០ភាគ​នៃទឹក​ប្រាក់ដែលបានបង់ករណីអតិថិជនអស់លទ្ធភាព។

នៅព្រឹកនេះ អតិថិជនបានជួបជុំគ្នានៅបុរីពិភពថ្មីកំបូល៣ ក្នុងខណ្ឌកំបូល រាជធានីភ្នំពេញ ដោយ​បាន លើកបដាទាមទារលក្ខខណ្ឌទៅក្រុមហ៊ុនព្រមទាំងលើករូបថតលោកនាយករដ្ឋមន្ត្រី ហ៊ុន ម៉ាណែត រូបថតអតីតលោកនាយករដ្ឋមន្ត្រី ហ៊ុន សែន និងរូបថតលោកស្រី ប៊ុន រ៉ានី ផងដែរ។

ក្រោយពីការជួបជុំថ្លែងសាររៀបរាប់ពីភាពអយុត្តិធម៌បង្កឡើងដោយម្ចាស់បុរី អតិថិជនទាំង​នោះ​នាំ​គ្នា​ដើរជាក្បួនគ្រោងធ្វើដំណើរទៅក្រសួងដែនដីដើម្បីស្នើកិច្ចអន្តរាគមន៍រកដំណោះស្រាយ ប៉ុន្តែ​ត្រូវ​កម្លាំងសមត្ថកិច្ចចម្រុះប្រមាណ៣០នាក់រារាំង ទើបពួកគេសម្រេច​ដូរ​ពីការហែក្បួន​មកធ្វើដំណើរ​រៀងៗ​ខ្លួនវិញ។

អ្នកស្រី កឹម ពិសិដ្ឋ មុខរបរជាអាជីវករលក់អីវ៉ាន់ឱ្យដឹងថា រូបគាត់បានទិញផ្ទះបុរីពិភពថ្មី​នៅ​ខណ្ឌ​កំបូល​​ដោយបង់រំលស់តាំងពីឆ្នាំ២០១៨ ក្រោយមកជួបការលំបាកខ្លាំងនៅឆ្នាំ២០២១ ក៏ស្នើ​លក់​ឱ្យ​បុរីវិញតាមកិច្ចសន្យា ប៉ុន្តែខាងបុរីបញ្ជាក់ថា គម្រោងទិញចូលវិញថ្លៃ៥០ ភាគរយ​នោះបាន​បញ្ចប់​ហើយ ទើបអ្នកស្រីបន្តបង់ទាំងលំបាករហូតដល់ឆ្នាំ២០២៣។ 

អតិថជនរូបនេះបន្តថា បុរីរំលោភកិច្ចសន្យាព្រោះពេលអ្នកទិញតំណាងផ្នែកលក់ប្រាប់ថា បើអស់​លទ្ធភាព ឬចង់លក់វិញខាងបុរី​ទិញ​យកក្នុងតម្លៃ៥០ភាគរយនៃចំនួនទឹកប្រាក់ដែលបានបង់ ប៉ុន្តែ​ក្រោយមកថា មិនទិញ ឬទិញឱ្យតែថ្លៃប្រាក់ដើមមិនមែនប្រាក់ដែលបង់សរុបនោះទេ។

អ្នកស្រី កឹម ពិសិដ្ឋ ថ្លែងថា៖«បុរីគាត់លុបគោលការណ៍ដោយមិនបានជូនដំណឹង​ដល់អតិថិជន​ជា​មុន ហើយអ៊ីចឹងយើងស្នើលក់ យើង​អត់មានលទ្ធភាពក្នុងការបង់[បន្តទៀតទេ]។ ដល់ពេលរួច​[តំណាង]​បុរីថាអត់មានទិញចូលទេ គេផ្អាកការទិញចូលហើយអត់មានគោលការណ៍ហ្នឹងទៀតទេ។ អ៊ីចឹងខ្ញុំផ្ទាល់ខំរកស៊ីលក់សព្វគ្រប់បែបយ៉ាងតាំងពីយានជំនិះម៉ូតូឡានមាសប្រាក់គ្រប់កន្លុកកន្លៀតទាំងអស់ដើម្បីមកបង់បន្តឱ្យបុរី»

អតិថិនជនបុរីថ្មីម្នាក់ទៀត លោក ម៉ង មាសា ឱ្យដឹងថា មូលហេតុដែលលោកចូលរួមតវ៉ាដោយ សារផ្ទះរបស់លោកទិញ៣ល្វែងនៅក្នុងពិភពថ្មីកួរស្រូវ៣ត្រូវក្រុមហ៊ុនរឹបអូសយក។ លោកបន្តថា ផ្ទះទាំង៣នោះលោកបង់ប្រាក់អស់ប្រមាណ១៣ម៉ឺនដុល្លារ ហើយលោកប្រកាស​ថា អស់លទ្ធភាព​តាំងពីខែមីនាឆ្នាំ២០២៣ ទើបស្នើឱ្យក្រុមហ៊ុនទិញយកវិញ។

 លោក ម៉ង មាសា បន្តថា ខាងបុរីមិនព្រមទិញក្នុងតម្លៃ៥០ភាគរយវិញតាមកិច្ចសន្យាទេ គឺប្រគល់​លុយឱ្យវិញតែទឹកប្រាក់ប្រមាណ​៣ពាន់ដុល្លារប៉ុណ្ណោះ។ លោកចាត់ទុកថា សកម្មភាពនេះ អយុត្តិធម៌​បំផុតសម្រាប់រូបលោក។

លោក ម៉ង មាសា លើកឡើងថា៖«បុរីហ្នឹងឱ្យដាក់ពាក្យស្នើសុំ ដល់ពេលខ្ញុំដាក់ទៅបុរីក៏ឆ្លើយមកវិញ​ថាមិនបានទេ គឺអត់មានការទិញចូលវិញទេ»។ លោកបន្តថា៖ «តាំងពីពេលនោះ​មកតាំងពីពេលខែ​ក្រោយ​​មក​សម្តេច​[ហ៊ុន សែន] កាលនៅជានាយករដ្ឋមន្ត្រី]លោកមានប្រសាសន៍រឿងហ្នឹង ហើយ​សម្តេច​លោក​មាន​ប្រសាសន៍​ហ្នឹង គឺវាស្របនឹងអ្វីដែលបុរីបានសន្យា​ដែលបុរីបានគោរព​គោលការណ៍​របស់ខ្លួនកន្លង​មក។ ត្បិតតែសម្តេចលោកមានប្រសាសន៍មែន ប៉ុន្តែបើពួកខ្ញុំអត់មាន​ពាក់​ព័ន្ធប៉ះនឹងរឿងទាំងអស់​នេះ​ទេក៏ពួកខ្ញុំមិនធ្វើការតវ៉ាដែរ ប៉ុន្តែវាពាក់ព័ន្ធនឹងរឿង​ហ្នឹងពិតប្រាដក​ហើយវាអយុត្តិធម៌បំផុត​សម្រាប់​ពួកខ្ញុំរឿងហ្នឹង»។

ពលរដ្ឋដែលរស់នៅក្នុងបុរីពិភពថ្មីកំបូល៣ ប្រមូលផ្ដុំគ្នាតវ៉ានៅក្នុងបុរី ក្នុងខណ្ឌកំបូល រាជធានីភ្នំពេញ។ រូបថតថ្ងៃទី៣១ ខែមករា ឆ្នាំ២០២៤។ (ខេមបូចា/ ព្រីង សំរាំង)

អ្នកស្រី យ៉េន ចាន់នីតា  ជាអតិថិជនម្នាក់ទៀតឱ្យដឹងថា អ្នកស្រីធ្វើការក្នុងវិស័យឯកជន រកចំណូល​ម្នាក់​ឯងជួបការលំបាកក្នុងការបង់ប្រាក់ទៅបុរីព្រោះប្តីមានជំងឺ។ អ្នកស្រីបង្ហាញក្តីបារម្ភថា រាល់ថ្ងៃ​ភ័យ​ខ្លាចពេលត្រឡប់ពីការងារវិញក្រុមហ៊ុនបិទសោរផ្ទះមិនឱ្យចូល បើក្រុមហ៊ុន​បន្ត​រឹបអូស​មិន​គោរពតាមគោលការណ៍ដូចបច្ចុប្បន្ន។

អ្នកស្រី ចាន់នីតា ថ្លែងថា៖«មកដល់ពេលនេះគឺដំណោះស្រាយនៅតែអត់មាន ហើយបុរីនៅតែ​គឃ្លើន​ណាបង គឃ្លើនបំពានប្រជាពលរដ្ឋយើងមិនឱ្យរស់នៅស្រួលទេបង។ ហើយដូចខ្ញុំ​ព្រលឹម​ឡើងបាត់ល្ងាចឡើងបានមកដល់ ស្រាប់តែមកដល់ផ្ទះ ប្រសិនបើថ្ងៃណាមួយមកដល់ផ្ទះទៅគេកិប​សោ​គេអីទៅធ្វើយ៉ាងម៉េចបង? ចាស! យើងបានកន្លែងណាដេក កន្លែងណាស្នាក់នៅសម្រាប់យើង? បើមនុស្សអត់ឈឺអត់អីទេ តែគ្រួសារខ្ញុំគាត់ឈឺ»។

អភិបាលខណ្ឌកំបូលលោក ឃឹម ស៊ុនសូដា ប្រាប់ខេមបូចាយ៉ាងខ្លីថា កំពុងជាប់រវល់ហើយក៏ដាក់ទូរសព្ទចុះទៅ។ ចំណែកអភិបាលរងសាលារាជធានីភ្នំពេញលោក សុខ ពេញវុធ ដែលជាអ្នកធ្លាប់ដឹកនាំកិច្ចប្រជុំរវាងអតិថិជនបុរីពិភពថ្មី និងក្រុមហ៊ុន បានបដិសេធមិនឆ្លើយតបតាមទូរសព្ទដោយឱ្យអ្នកសារព័ត៌មានទៅដល់កន្លែង។ 

លោក សុខ ពេញវុធ ថ្លែងថា៖ «សូមទោសលោកចង់សួរអីលោកអញ្ជើមមកដាក់សួរត្រឹមត្រូវ ខ្ញុំអត់អាចឆ្លើយតាមនេះបាន អរគុណច្រើន»។

ខេមបូចា ព្យាយាមទាក់ទងលោក ឡៅ ទិព្ធសីហា អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ ដើម្បីសាកសួរពីដំណោះ​ស្រាយលើករណីនេះ ប៉ុន្តែលោកប្រាប់ថា ជាប់រវល់។

ទោះយ៉ាងអតិថិជនដែលទៅស្វែងរកកិច្ចអន្តរាគមន៍ពីក្រសួងដែនដីនៅថ្ងៃនេះឱ្យដឹងនៅត្រឹមម៉ោង៥ល្ងាចថា ក្រសួងមិនបានសម្រេច​លើចំណុចណាមួយទេ គ្រាន់តែប្រាប់ថា នឹងអន្តរាគមន៍​ទៅ​ក្រុមហ៊ុន​ឱ្យបញ្ឈប់ការចេញលិខិតគំរាមរឹបអូសផ្ទះពីអតិថិជន។

មេធាវីតំណាងឱ្យក្រុមហ៊ុនបុរីពិភពថ្មី លោក វង្ស គឹមសាន្ត ថ្លែងថា លោកមិនមានសិទ្ធិផ្តល់យោបល់​អ្វី​លើដំណោះស្រាយនោះទេគឺបង្វែរឱ្យទៅសួរបុគ្គលិកក្រុមហ៊ុនផ្ទាល់។ ចំណែកលេខទូរសព្ទ​ប្រចាំការ​របស់ក្រុមហ៊ុនទាំង២ប្រព័ន្ធមិនអាចទាក់ទងបាន។

របាយការណ៍ផ្សព្វផ្សាយដោយក្រុមហ៊ុនពិភពថ្មីនៅចុងឆ្នាំ២០២៣ បង្ហាញថា ក្រុមហ៊ុនបានទទួល ទិញផ្ទះពីអតិថិជនវិញបានជាង១ពាន់៥រយផ្ទះគឺទិញទៅតាមលក្ខខណ្ឌនានារួមទាំងទិញគិតថ្លៃដើម​វិញ ដោយមិនអាចទិញក្នុងតម្លៃ៥០ភាគរយតាមការទាមទារនោះទេព្រោះ អាចធ្វើឱ្យក្រុមហ៊ុនក្ស័យ​ធន។

 នាយកទទួលបន្ទុកកិច្ចការទូទៅនៃអង្គការលីកាដូ លោក​ អំ សំអាត ជំរុញឱ្យអាជ្ញាធរពាក់ព័ន្ធមាន​វិធានការឱ្យភាគីក្រុមហ៊ុនគោរពតាមកិច្ចសន្យា កុំឱ្យបញ្ហារាលដាលកាន់តែធំ។

លោក អំ សំអាត ថ្លែងថា៖ «មើលទៅមានបុរីខ្លះដែលយើងមើលទៅកិច្ចសន្យា​វាហាក់​ដូច​មិន​ស្មើភាពគ្នា មានន័យថាប្រៀបបានទៅខាងក្រុមហ៊ុន ចឹងអតិថិជនហាក់ដូចជា​ចាញ់​ប្រៀប​ទៅ​ខាងក្រុមហ៊ុន។ អ៊ីចឹងនៅពេលមានវិបត្តិកើតឡើងគឺក្រុមហ៊ុនមានប្រៀបជាងជានិច្ច។ អាហ្នឹង​គឺត្រូវពិនិត្យឡើងវិញដែរទៅលើកិច្ចសន្យាព្រោះកិច្ចសន្យាវាត្រូវតែស្មើភាពគ្នា»

532 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម