ពលរដ្ឋជនជាតិដើមភាគតិចពូនងក្នុងឃុំសែនមនោរម្យ ស្រុកអូររាំង ខេត្តមណ្ឌលគិរី កំពុងប្រឈមការបាត់បង់ដីសមូហភាពដែលធ្លាប់អាស្រ័យផលរបស់ពួកគេ បន្ទាប់ពីរដ្ឋាភិបាលបានកាត់ដីនោះលក់ឱ្យឧកញ៉ាម្នាក់។
យោងតាមអនុក្រឹត្យមួយរបស់រដ្ឋាភិបាលចុះថ្ងៃទី២៤ ខែមីនា ឆ្នាំ២០២២ បានកាត់ដីរដ្ឋទំហំ២៥៥ហិកតា នៅភូមិពូរ៉ាង ឃុំសែនមនោរម្យ ស្រុកអូររាំង ខេត្តមណ្ឌលគិរី ដោយលក់ទៅឱ្យឧកញ៉ាម្នាក់ឈ្មោះ ជឹង ធាងសេង ដើម្បីអភិវឌ្ឍជាតំបន់ទេសចរណ៍ធម្មជាតិ។
អ្នកស្រី បើក រើប វ័យ៥៩ឆ្នាំ រស់នៅក្នុងភូមិពូរ៉ាងតាំងពីកំណើត បានប្រាប់ថា ដំឡូង ស្វាយចន្ទី ត្រប់ ម្ទេស និងស្រូវ របស់គាត់ជិត២ហិកតានឹងត្រូវខូចខាតទាំងស្រុង នៅពេលក្រុមហ៊ុនចាប់ផ្ដើមធ្វើការអភិវឌ្ឍ។
អ្នកស្រី រើប និយាយថា៖ «ពួកខ្ញុំកំណើតកើតជានៅទីនេះ ហើយលូវពួកគាត់(ក្រុមហ៊ុនឯកជន)យកម៉េច?។ ខ្ញុំអត់មានមុខរបរអ្វីទេ បើអក្សរអត់ចេះផងហ្នឹង ធ្វើតែស្រែចំការ»។
ដីអាស្រ័យផលរបស់ប្រជាពលរដ្ឋជនជាតិដើមភាគតិចពូនង១០០គ្រួសាររស់នៅភូមិពូរ៉ាង ត្រូវរងផលប៉ះពាល់ដោយអនុក្រឹត្យរបស់រដ្ឋ កត្តានេះនាំឱ្យមេឃុំសែនមនោរម្យ អ្នកស្រី ថ្វាន់ ត្រែល ស្នើរដ្ឋាភិបាលបង្វិលពីការកាត់ដីឱ្យក្រុមហ៊ុនឯកជនទៅកាន់ពលរដ្ឋវិញ។
អ្នកស្រី ត្រែល ប្រាប់ថា៖ «ស្នើសុំឱ្យរដ្ឋាភិបាលសម្បទានឱ្យពលរដ្ឋទៅ ប្រសិនបើពួកគាត់មានអាស្រ័យផលជាក់ស្ដែង មានដំណាំដាំដុះអាស្រ័យផលជាក់ស្ដែង»។
ក្រោយមិនទទួលបានដំណោះស្រាយពីអាជ្ញាធរ នៅចុងខែកក្កដា ឆ្នាំ២០២២នេះ ការប្រមូលផ្ដុំគ្នាដើម្បីតវ៉ាត្រូវបានធ្វើឡើងនៅលើដីដែលពលរដ្ឋចាត់ទុកថាជាកម្មសិទ្ធិសមូហភាព។
អ្នកភូមិម្នាក់ទៀត អ្នកស្រី លី សារឿន អាយុ៥៥ឆ្នាំ រស់នៅជាមួយកូនស្រី២នាក់ ដោយអាស្រ័យផលលើដីដែលរដ្ឋលក់នោះ បានប្រាប់ថា គ្រួសារអ្នកស្រីពុំទាន់ដឹងទេ ថាតើនឹង ត្រូវធ្វើអ្វី ក្រោយបាត់បង់ដីស្រែ។
អ្នកស្រី សារឿន និយាយថា៖ «ខ្ញុំមានតែដីចម្ការហ្នឹង បើអត់ពីដីចម្ការហ្នឹងមិនដឹងរស់នៅយ៉ាងម៉េចដែរ ចឹងបានខំមកតវ៉ា គ្រាន់បានដីដាំដំណាំរស់នៅបីនាក់កូន»។
លិខិតពលរដ្ឋសុំអន្តរាគមន៍ពីរដ្ឋមន្រ្តីក្រសួងមហាផ្ទៃលោក ស ខេង បានឱ្យដឹងថា តាំងពីឆ្នាំ១៩៨៦ ដល់បច្ចុប្បន្ន ដីទំហំ៧២៧ហិកតា ស្ថិតភូមិពូរ៉ាង ឃុំសែនមនោរម្យ ស្រុកអូររាំង ខេត្តមណ្ឌលគិរី ត្រូវបានប្រជាពលរដ្ឋដាំដំណាំចម្រុះគ្រប់ប្រភេទសម្រាប់ទ្រទ្រង់ជីវភាពរស់នៅ ដូចជាដំណាំស្រូវ ពោត ម្នាស់ ដំឡូង ដើមប័រ ដើមខ្នុរ ដើមស្វាយចន្ទី និងសម្រាប់ចិញ្ចឹមសត្វផងដែរ។
អ្នកស្រី ភ្លឹក ភារម្យ អ្នកសម្របសម្រួលបណ្ដាញជនជាតិដើមភាគតិចខេត្តមណ្ឌលគិរី មានប្រសាសន៍ថា ប្រជាពលរដ្ឋធ្លាប់ដាក់ពាក្យស្នើសុំចុះបញ្ជីដីសមូហភាពដើម្បីឱ្យមានឯកសារត្រឹមត្រូវ ប៉ុន្តែត្រូវអាជ្ញាធរបដិសេធ។
អ្នកស្រី ភារម្យ និយាយថា៖ «ប្រជាពលរដ្ឋសូមចុះបញ្ជីដីសមូហភាព មានឯកសារត្រឹមត្រូវ ក្រសួងមហាផ្ទៃគាំទ្រ តែក្រសួងអភិវឌ្ឍន៍ជនបទអត់គាំទ្រ»។
អ្នកស្រី ភារម្យ បន្តថា ដីសមូហភាពនោះចំពោះដីវាលត្រូវបានជនជាតិដើមភាគតិចពូនងទុកឃ្វាលគោ និងកប់សាកសព។ ដោយឡែកដីដែលមានដើមឈើ គឺសម្រាប់ធ្វើចំការ រកទឹកឃ្មុំ បរបាញ់សត្វព្រៃ និងរកត្រីនៅតាមព្រែក ស្ទឹង។ល។
លោក បូរ៉េត កំពី មន្រ្តីសមាគមឣាដហុដប្រចាំខេត្តមណ្ឌលគិរី បានឱ្យដឹងថា អាជ្ញាធរពុំទាន់មានការឆ្លើយតបណាមួយទៅកាន់ពលរដ្ឋ បន្ទាប់ពីពួកគេបានដាក់ញត្តិទៅកាន់សាលាខេត្ត។
យោងតាមលិខិតរបស់ពលរដ្ឋសុំអន្តរាគមន៍ពីអភិបាលខេត្តមណ្ឌលគិរី កាលពីថ្ងៃទី២ ខែឧសភា ឆ្នាំ២០២២ បានឱ្យដឹងថា ទីស្ដីការគណៈរដ្ឋមន្រ្តីបានធ្វើអនុបយោគដីនៅភូមិពូរ៉ាង ឃុំសែនមនោរម្យ ស្រុកអូររាំង ខេត្តមណ្ឌគិរី ចំនួន២៥៥ហិកតា ដើម្បីលក់ឱ្យឈ្មោះ ជឹង ធានសេង ជាមួយតម្លៃ១៥០០ដុល្លារក្នុងមួយហិកតា។ អនុក្រឹត្តនេះ ក៏ធ្វើអនុបយោគដីជាង៧៩ហិកតា នៅភូមិពូតាំង សង្កាត់រមនា ក្រុងសែនមនោរម្យ ខេត្តមណ្ឌលគិរី ដោយលក់ក្នុងតម្លៃ២០០០ដុល្លារ ក្នុងមួយហិកតាឱ្យឈ្មោះ ជឹង ធានសេង នេះដែរ។
លោក ជាក់ ម៉េងហ៊ាង អភិបាលរងខេត្តមណ្ឌលគិរី បានថ្លែងការពារចំពោះការលក់ដីឱ្យក្រុមហ៊ុនឯកជន ដោយសម្អាងថាដីនោះជាដីរបស់រដ្ឋ។
លោក ម៉េងហ៊ាង បញ្ជាក់ថា៖ «នេះជាសិទ្ធិរបស់រដ្ឋាភិបាល ព្រោះជាដីរបស់រដ្ឋ»។
អភិបាលរងរូបខេត្តនេះ បានច្រានចោលការអះអាងរបស់ពលរដ្ឋដែលថាដីនោះមានដាំដំណាំផ្សេងៗ និងស្នើឱ្យពលរដ្ឋបង្ហាញឯកសារនាៗដើម្បីបញ្ជាក់កម្មសិទ្ធិ។
លោក ម៉េងហ៊ាង ថ្លែងថា៖ «ដីនោះគឺពិតប្រាកដអត់មានដាំអីទេ គ្មានផ្ទះសម្បែងទេកន្លែងហ្នឹងនោះ មានតែដើមស្រល់។ សំខាន់ឱ្យខាងប្រជាពលរដ្ឋគាត់ដាក់ឯកសារមកសិន គាត់មានអីខ្លះ ដីគាត់ហ្នឹងក្បាលរបៀបម៉េច?»។
ទោះបីពុំមានឯកសារសម្រាប់បញ្ជាក់ជាដីសមូហភាពក្ដីតែអ្នកស្រី បើក រើប ទទូចឱ្យអាជ្ញាធរគ្រប់លំដាប់ថ្នាក់កុំលក់ដីឱ្យក្រុមហ៊ុនឯកជន។
អ្នកស្រី រើប បន្ថែមថា៖ «សំណូមពរឱ្យអាជ្ញាធរភូមិឃុំស្រុកខេត្ត និងរដ្ឋមន្រ្តីឱ្យជួយដោះស្រាយ និងឆ្វៀលដីឱ្យប្រជាពលរដ្ឋ ហើយកុំលក់ឱ្យក្រុមហ៊ុន បើលក់ឱ្យ[ក្រុមហ៊ុន] ប្រជាពលរដ្ឋដាំដំណាំនៅណា? ហើយគោក្របីឃ្វាលទុកនៅណា?»។
