រាជរដ្ឋាភិបាលកម្ពុជាបានប្រកាសដាក់បម្រាមក្នុងការធ្វើដំណើរចេញ-ចូលឆ្លងកាត់ព្រំដែនជាមួយប្រទេស វៀតណាមរយៈពេលមួយខែ ដើម្បីទប់ស្កាត់ការរាតត្បាតជំងឺកូវីដ១៩ ខណៈ រដ្ឋាភិបាលក៏បានពន្យារ រយៈពេលចាក់វ៉ាក់សាំងដូសទីមួយ និងទីពីរនៃវ៉ាក់សាំង ស៊ីណូវ៉ាក់ និង ស៊ីណូហ្វាម ផលិតនៅចិនចាប់ពីពីរទៅបីសប្តាហ៍ផងដែរ។
នៅក្នុងលិខិតមួយទៅកាន់អគ្គរាជទូតកម្ពុជាប្រចាំប្រទេសវៀតណាម ក្រសួងការបរទេសកម្ពុជា បានលើក ឡើងថា ដើម្បីការពារការរាតត្បាតជំងឺកូវីដ១៩ ឆ្លងចូលពីវៀតណាមមកកម្ពុជា រដ្ឋាភិបាលបានសម្រេចដាក់បម្រាមបណ្តោះអាសន្នលើការធ្វើដំណើររវាងប្រទេសទាំងពីរសម្រាប់គ្រប់បុគ្គលិក និងកម្មករជំនាញវៀតណាម ដែលមានសុពលភាពចាប់ពីថ្ងៃ១៨ ខែកក្កដា តទៅ។
លិខិតខាងលើបានសរសេរថា៖ «ចំពោះបុគ្គលិក និងកម្មករជំនាញរបស់ក្រុមហ៊ុនវៀតណាម ដែលបាន ចូល មកកម្ពុជារួចហើយ ទាំងអ្នកដែលធ្វើចត្តាឡីស័ករួច និងអ្នកដែលកំពុងធ្វើចត្តាឡីស័ក មិនត្រូវបានអនុញ្ញាត ឲ្យវិលត្រឡប់ទៅប្រទេសវៀតណាមវិញទេក្នុងអំឡុងពេលនៃការផ្អាកការចេញចូលបណ្តោះអាសន្ននោះ»។
ប៉ុន្តែរដ្ឋាភិបាលបានអនុញ្ញាតឲ្យមានការធ្វើដំណើរសម្រាប់អ្នកជំងឺ អ្នកការទូត មន្រ្តីរាជការ ដែលមានបេសកកម្មតាមការអញ្ជើញរបស់អាជ្ញាធរប្រទេសទាំងពីរ រួមទាំង និស្សិត សិក្ខាកាមដែលបានបញ្ចប់វគ្គសិក្សា ក៏ដូចជាដំណើរការដឹកជញ្ជូននាំទំនិញចេញចូលឆ្លងព្រំដែន។
លោក ម៉ម យ៉យ នាយប៉ុស្តិ៍នគរបាលច្រកទ្វារព្រំដែនអន្តរជាតិបាវិត បាននិយាយថា អាជ្ញាធរប្រចាំព្រំដែនត្រៀមលក្ខណៈជាស្រេចដើម្បីអនុវត្តវិធានការខាងលើនេះ។
លោកបានថ្លែងថា៖ «អាជ្ញាធរនឹងអនុវត្តការដាក់បម្រាមតឹងរ៉ឹងលើកម្មករ និងបុគ្គលិកវៀតណាមទាំងអស់ លើកលែងអ្នក[ដែលមានករណីលើកលែង]ក្នុងការចូលមកកម្ពុជាប៉ុណ្ណោះ»។
លោកបានបន្តថា ការបិទព្រំដែនបណ្តោះអាសន្ននឹងមិនប៉ះពាល់ដល់អាជីវកម្ម និងជំនួញរវាងប្រទេសទាំងពីរនោះទេ ដោយសារតែការដឹកជញ្ជូនទំនិញចេញ-ចូលត្រូវបានអនុញ្ញាតឲ្យដំណើរការធម្មតា។ កម្ពុជាបានដាក់ការរឹតត្បិតលើការចេញ-ចូលព្រំដែនជាមួយនឹងថៃ និងវៀតណាម រួចហើយចាប់តាំងពីការរាតត្បាតវីរុស ដោយអនុញ្ញាតត្រឹមការដឹកជញ្ជូនទំនិញចេញ-ចូលតែប៉ុណ្ណោះ។
គិតមកត្រឹមថ្ងៃទី១៣ ខែកក្កដា វៀតណាមមានកំណត់ត្រាករណីឆ្លងជំងឺកូវីដ១៩ថ្មីចំនួន ២.១៨៧ និងការស្លាប់ចំនួនពីរករណី ដោយធ្វើឲ្យចំនួនអ្នកឆ្លងសរុបកើនដល់ ៣២.៦៦៥ និងការស្លាប់ចំនួន១២៥។ ករណីថ្មីចំនួនរាប់រយត្រូវបានរកឃើញជារៀងរាល់ថ្ងៃនាពេលថ្មីៗនេះនៅវៀតណាម ដោយសារករណីឆ្លងថ្មីត្រូវបានកំណត់ឃើញតាមរយៈការធ្វើតេស្តនៅតាមមន្ទីរពេទ្យ។
ទីភ្នាក់ងារព័ត៌មានវៀតណាមបានរាយការណ៍ថា រដ្ឋាភិបាលក្រុងហូជីមិញបានដាក់ចេញវិធានការរក្សាគម្លាតរយៈពេល ១៥ថ្ងៃ ជាលើកទីពីរ ដោយចាប់ផ្តើមពីថ្ងៃសុក្រ ទី០៩ ខែកក្កដា ខណៈក្រុងហូជីមិញព្យាយាមរឹតត្បិតការឆ្លងជំងឺកូវីដ១៩ តាមរយៈការតម្រូវឲ្យពលរដ្ឋស្នាក់នៅផ្ទះ ហើយចេញក្រៅសម្រាប់ការសំខាន់តែប៉ុណ្ណោះដូចជា ទិញអាហារ ឬថ្នាំសង្កូវ ឬទៅធ្វើការនៅរោងចក្រ ឬតាមអាជីវកម្មផ្សេងៗ ដែលត្រូវបានអនុញ្ញាតឲ្យដំណើរការ។
លោក ញ៉ែម សំអឿន អភិបាលរងខេត្តរតនគិរី បានមានប្រសាសន៍ថា អាជ្ញាធរកម្ពុជាបានរាយការណ៍ទៅកាន់អាជ្ញាធរវៀតណាមតាមបណ្តោយព្រំដែនរួចរាល់ហើយ។
លោកមានប្រសាសន៍ថា៖ «ប្រទេសទាំងពីរ និងខេត្តជាប់ព្រំដែនគឺ មានការប្រុងប្រយ័ត្នខ្ពស់ ជុំវិញការការពារប្រឆាំង នឹងជំងឺកូវីដ១៩ ដូច្នេះហើយបានជាយើងធ្វើការត្រួតពិនិត្យតឹងរ៉ឹងតាមព្រំដែន។ ពីមុនមក អាជ្ញាធរបាន អនុញ្ញាតឲ្យតែអ្នកចាក់វ៉ាក់សាំងរួចប៉ុណ្ណោះដែលអាចឆ្លងព្រំដែន ប៉ុន្តែឥឡូវនេះនឹងមានការហាមឃាត់ ទាំងស្រុង»។
លោកសំអឿន បានលើកឡើងថា ទំនិញដែលត្រូវបាននាំចូល ពីវៀតណាមតាមខេត្តរតនគិរី រួមមាន អាហារ និងគ្រឿងសំណង់ប៉ុណ្ណោះ ដោយកត់សម្គាល់ថា មានក្រុមហ៊ុនកសិកម្មធំមួយឈ្មោះ Hoang Anh Andong Meas ដែលដាំដំណាំចេក និងកៅស៊ូ។ ក្រុមហ៊ុនទទួលបានសម្បទានដីកសិកម្មក្នុងខេត្តនេះ ប្រមាណ ១.០០០ហិចតា។
លោកបានបន្ថែមថា៖ «កម្មករ បុគ្គលិកវៀតណាម និងកម្មករខ្មែរ ពួកគេកំពុងនៅកម្ពុជាស្រាប់ហើយ ដូច្នេះនេះមិនមែនជាបញ្ហានោះទេ។ ក្រុមហ៊ុនមិនអនុញ្ញាតឲ្យពួកគេចាកចេញអំឡុងពេលនេះទេ ពីព្រោះនឹងប៉ះពាល់ដល់ដំណើរការអាជីវកម្មរបស់ពួកគេ»។
ទោះបីកម្ពុជាមានអត្រាចាក់វ៉ាក់សាំងខ្ពស់ជាងគេបំផុតមួយនៅអាស៊ានក៏ដោយ ចំនួនករណីឆ្លងជំងឺកូវីដ១៩ និងអត្រាការស្លាប់នៅតែមានខ្ពស់នៅឡើយ។ កម្ពុជាជាប់ចំណាត់ថ្នាក់ទី៦នៅអាស៊ានសម្រាប់អត្រាការឆ្លង និងការស្លាប់ដោយសារជំងឺកូវីដ១៩។
កម្ពុជាបានកត់ត្រាករណីឆ្លងជំងឺកូវីដ១៩ថ្មីចំនួន ៩១៥ កាលពីថ្ងៃពុធ និងការស្លាប់ចំនួន ៣៣ ដោយធ្វើឲ្យចំនួនការឆ្លងសរុបកើនដល់ ៦៣.៦១៥ករណី និងការស្លាប់ចំនួន ៩៨៦។
ដោយចំនួនករណីឆ្លងនៅមានខ្ពស់ ក្រសួងសុខាភិបាលបានសម្រេចពន្យារបន្ថែមរយៈ ពេលចាប់ការចាក់ដូសទីមួយ និងទីពីរសម្រាប់វ៉ាក់សាំង ស៊ីណូវ៉ាក់ (Sinovac) និង ស៊ីណូហ្វាម (Sinopharm) ពី១៤ថ្ងៃទៅ២១ថ្ងៃ។ ទោះបីជាក្រសួងមិនបានផ្តល់ការបកស្រាយពីការផ្លាស់ប្តូរនេះក៏ដោយ អង្គការសុខភាពពិភពលោក (WHO) ណែនាំឲ្យទុករយៈពេលពីពីរទៅបួនសប្តាហ៍សម្រាប់ដូសវ៉ាក់សាំង ស៊ីណូវ៉ាក់ និងបីទៅបួនសប្តាហ៍សម្រាប់ដូសវ៉ាក់សាំង ស៊ីណូហ្វាម។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល មិនអាចទាក់ទងសុំយោបល់បាននោះទេ។
លោកស្រីវេជ្ជបណ្ឌិត Li Ailan តំណាងអង្គការសុខភាពពិភពលោកប្រចាំប្រទេសកម្ពុជា បានប្រាប់ ខេមបូចា តាមរយៈអ៊ីម៉ែលថា សេចក្តីណែនាំរបស់ក្រសួងសុខាភិបាលគឺស្របតាមការណែនាំរបស់អង្គការសុខភាពពិភពលោក។ លោកស្រីបានបន្តថា វ៉ាកសាំង ស៊ីណូវ៉ាក់ និង ស៊ីណូហ្វាម ស្ថិតនៅលើបញ្ជីប្រើប្រាស់បន្ទាន់ របស់អង្គការ សុខភាពពិភពលោក។
លោកស្រីបានសរសេរថា៖ «គ្រប់វ៉ាក់សាំងដែលស្ថិតនៅលើបញ្ជីរបស់អង្គការសុខភាពពិភព លោកគឺមាន ប្រសិទ្ធភាពប្រឆាំងនឹងជំងឺធ្ងន់ធ្ងរ និងការស្លាប់។ វ៉ាក់សាំងទាំងនោះមានប្រសិទ្ធភាពក្នុង ការកាត់បន្ថយការតម្រូវឲ្យស្នាក់នៅមន្ទីរពេទ្យ ហើយគ្មានវ៉ាក់សាំងណាមានប្រសិទ្ធភាព១០០ភាគរយ ប្រឆាំងនឹងជំងឺ ការឆ្លងនោះទេ… ជារឿងមិនរំពឹងទុកមួយដែលនៅតែឆ្លងជំងឺ បន្ទាប់ពីអ្នកបានចាក់វ៉ាក់សាំងរួចហើយ។ នេះជាហេតុផលសំខាន់ដើម្បីបន្តអនុវត្តវិធានការសុខភាពសាធារណៈ និងសង្គម ដូចលោកអ្នកដឹងស្រាប់ហើយ» ។
មកទល់ពេលនេះ កម្ពុជាបានទទួលវ៉ាក់សាំងផលិតនៅចិនចំនួន ១៧លានដូស ដោយភាគច្រើនត្រូវ បានទិញដោយរដ្ឋាភិបាលកម្ពុជា ហើយត្រូវបានចាក់ជូនពលរដ្ឋជាង ៥លាននាក់។ រដ្ឋាភិបាលជប៉ុនបាន ប្រកាសកាលពីថ្ងៃអង្គារថា ខ្លួននឹងផ្តល់វ៉ាក់សាំង AstraZeneca ចំនួន ១លានដូសទៅឲ្យកម្ពុជា៕
ប្រែសម្រួលពីអត្ថបទភាសាអង់គ្លេស៖ Cambodia blocks Vietnam border amid growing COVID-19 outbreak
