លោកនាយករដ្ឋមន្ត្រី ហ៊ុន សែន ស្នើឲ្យពលករចំណាកស្រុកកម្ពុជាបន្តស្នាក់នៅក្នុងប្រទេសថៃ ឬក៏ត្រូវត្រៀមខ្លួនធ្វើចត្តាឡីស័កចំនួន១៤ថ្ងៃ បើអ្នកទាំងនោះត្រឡប់មកកម្ពុជា ដែលការអំពាវនាវនេះធ្វើឡើងបន្ទាប់ពីមានការផ្ទុះឡើងជាថ្មីជំងឺកូវីដ១៩ នៅភាគខាងត្បូងនៃប្រទេសថៃ គឺខេត្តសាមុតសាខន។
ប្រទេសថៃបានរាយការណ៍ពីករណីឆ្លងកូវីដ១៩ថ្មីជាង៥០០ករណីនៅខេត្តសាមុតសាខន ដែលបន្ទាប់មកអាជ្ញាធរកម្ពុជាក៏ចាប់ផ្ដើមត្រួតពិនិត្យតាមព្រំដែនភាគខាងលិចលើការវិលត្រឡប់របស់ពលករចំណាកស្រុកខ្មែរ។
លោកនាយករដ្ឋមន្ត្រី ហ៊ុន សែន តាមរយៈសារជាសំឡេងដែលបង្ហោះលើហ្វេសប៊ុក របស់លោកកាលពីថ្ងៃអាទិត្យ បានស្នើឲ្យពលករចំណាកស្រុកកម្ពុជាគួរបន្តស្នាក់នៅប្រទេសថៃ និងថាត្រូវជឿទុកចិត្តលើសមត្ថភាពអាជ្ញាធរថៃលើការគ្រប់គ្រងការឆ្លងវីរុសកូវីដ១៩ និងថាបើអ្នកទាំងនោះមកកម្ពុជាវិញ នឹងត្រូវបញ្ជូនទៅធ្វើចត្តាឡីស័កចំនួន១៤ថ្ងៃ។
លោកនាយករដ្ឋមន្ត្រីមានប្រសាសន៍ថា៖ «ខ្ញុំសង្ឃឹមថាពលករយើងនៅក្នុងប្រទេសថៃជឿលើសមត្ថភាពអាជ្ញាធរ ហើយមិនគួរត្រឡប់ពីប្រទេសថៃនោះទេ ក្នុងពេលដែលប្រទេសថៃកំពុងជួបស្ថានភាពលំបាក»។
លោក ហ៊ុន សែន ឲ្យដឹងទៀតថារដ្ឋាភិបាលបានបញ្ជូនរថយន្តយោធាចំនួន៧០គ្រឿង ដើម្បីត្រៀមដឹកជញ្ជូនពលករដែលត្រឡប់មកពីថៃទៅកាន់បណ្ឌលធ្វើចត្តាឡីស័កផ្សេងៗទៀត ក្រែងថាមានចំនួនពលករត្រឡប់មកច្រើនភ្លាមៗនៅតាមច្រកអន្តរជាតិធំៗទាំងបីមានច្រកដូង ច្រកអូស្មាច់ និងច្រកប៉ោយប៉ែត។
លោកនាយករដ្ឋមន្ត្រីមានប្រសាសន៍ថា៖ «ដូចនេះ យោធាត្រូវតែឆ្លើយតប និងដឹកជញ្ជូនពលរដ្ឋ ហើយពួកគេត្រូវតែសហការជាមួយអាជ្ញាធរខេត្តនៅតាមព្រំដែន ជាមួយនគរបាល ជាមួយកងរាជអាវុធហត្ថ»។
លោកនាយករដ្ឋមន្ត្រីក៏បានព្រមានពីការវិលត្រឡប់របស់ពលករតាមច្ររបៀងផ្សេងៗ និងបានបញ្ជាទៅកាន់មន្ត្រីខេត្តជាប់ព្រំដែនឲ្យរឹតបន្តឹងសន្តិសុខនៅទីនោះ។ លោកមានប្រសាសន៍ទៀតថា រដ្ឋមន្ត្រីក្រសួងសុខាភិបាល លោក ម៉ម ប៊ុនហេង និងរដ្ឋមន្ត្រីក្រសួងមហាផ្ទៃ លោក ស ខេង បានត្រៀមរៀបចំមណ្ឌលចត្តាឡីស័ក និងថាបានផ្ដល់ថវិកា៥០លានរៀលទៅកាន់ខេត្តជាប់ព្រំដែនថៃរួចហើយផងដែរ។
សេចក្ដីប្រកាសព័ត៌មានរបស់ក្រសួងសុខាភិបាលចេញផ្សាយកាលថ្ងៃអាទិត្យ បានរំឭកដល់ពលរខ្មែរថាអាជ្ញាធរខេត្តសាមុតសាខនបានដាក់បំរាមគោចរពីម៉ោង១០យប់ដល់ម៉ោង៥ព្រឹកពីថ្ងៃទី២០ ខែធ្នូ ដល់ថ្ងៃទី៣ ខែមករា ឆ្នាំ២០២១។
លោកនាយករដ្ឋមន្ត្រីបន្ថែមថា៖ «ខ្ញុំបានបញ្ជាទៅរដ្ឋមន្ត្រីក្រសួងសុខាភិបាលថាក្រៅពីផ្ដល់ថវិកា ក្រសួងត្រូវបញ្ជូនម៉ាសទៅកាន់ខេត្តទាំងនោះផងដែរ»។
លោកនាយករដ្ឋមន្ត្រីថាកម្ពុជាធ្លាប់មានបទពិសោធន៍ការវិលត្រឡប់របស់ពលករប្រហែល១២ម៉ឺនាក់ពីប្រទេសថៃកាលពីផ្ទុះជំងឺកូវីដ១៩លើកទីមួយក្នុងតំបន់។ នៅពេលនោះ ពលករបានធ្វើចត្តាឡីស័កនៅតាមផ្ទះ ហើយមន្ត្រីតាមខេត្តបានតាមដានសុខភាពអ្នកទាំងនោះជាប្រចាំ។
តួលេខជំរឿននៅកម្ពុជាប៉ាន់ប្រមាណថាយ៉ាងហោចណាស់មានពលករចំណាកស្រុកធ្វើការនៅប្រទេសថៃចំនួន១,១លាននាក់ និងថាមាន១០ភាគរយបានវិលមកប្រទេសកំណើតវិញក្នុងខែមីនា និងមេសា។
លោក លី សុវណ្ណារិទ្ធ អភិបាលស្រុកអូជ្រៅ ខេត្តបន្ទាយមានជ័យមានប្រសាន៍ថាជាមធ្យមមានពលករកម្ពុជាប្រហែលជា២០០នាក់បានត្រឡប់មកវិញក្នុងមួយថ្ងៃៗតាមច្រកអន្តរជាតិអូបីជាន់។
លោកមានប្រសាសន៍ថា៖ «កាលពីថ្ងៃអាទិត្យមានពលករខ្មែរជិត២០០នាក់បានត្រលប់មកវិញ…ឥឡូវនេះ១០០ភាគរយនៃពលករត្រឡប់មកវិញទាំងអស់ត្រូវធ្វើចត្តាឡីស័ក១៤ថ្ងៃ»។
លោកបន្ថែមថាមានរថយន្តយោធាចំនួនប្រាំគ្រឿងបានមកដល់ច្រកព្រំដែននៅថ្ងៃចន្ទនេះ ដើម្បីត្រៀមដឹកពលករទៅធ្វើចត្តាឡីស័ក និងថាមន្ត្រីព្រំដែនបាណែនាំខ្លះៗពីនិតិវិធីធ្វើតេស្តកូវីដ១៩ដល់ពលករទាំងនោះផងដែរ។
អភិបាលរងខេត្តបាត់ដំបង លោក សឿម ប៊ុនរិទ្ធិ មានប្រសាសន៍ថាមណ្ឌលធ្វើចត្តាឡីស័កចំនួនបីកន្លែងបានរៀបចំរួចហើយ សម្រាប់ពលករត្រឡប់ពីប្រទេសថៃ ដែលលោកថាក្នុងមួយថ្ងៃមានពលករប្រហែល៥០នាក់ត្រឡប់មកវិញ។ លោកបន្ថែមថា រថយន្តយោធាចំនួន៣០គ្រឿបានមកដល់ច្រកទ្វារអន្តរជាតិដូងរួចហើយដែរ។
លោក ប៊ុនរិទ្ធិ ឲ្យដឹងថា៖ «យើងបានស្នើឲ្យអាជ្ញាធរស្រុកពិភាក្សាជាមួយអាជ្ញាធរថៃ និងជួយសម្របសម្រួលឲ្យពលករខ្មែរឆ្លងកាត់ព្រំដែនតែតាមច្រកដូងមួយប៉ុណ្ណោះ»។
លោក ឌី រ៉ាដូ អភិបាលរងខេត្តឧត្តរមានជ័យ ឲ្យដឹងដែរថាតាំងពីខែមីនាមក មានពលករខ្មែរចំនួន៤៧ ៦៨៣ នាក់បានឆ្លងកាត់ច្រកទ្វារអន្តរជាតិអូស្មាច់ចូលមកកម្ពុជាវិញ។
លោក ឌី ថេហូយ៉ា មន្ត្រីកម្មវិធីនៃអង្គការសង់ត្រាល់ មានប្រសាសន៍ថាពលករបរទេសភាគច្រើននៅខេត្តសាមុតសាខនជាជនជាតិភូមា និងថាមានតិចតួចប៉ុណ្ណោះជាពលករខ្មែរ ដែលធ្វើការនៅខេត្តភាគខាងត្បូងនេះ។
លោក ថេហូយ៉ា ថាពលករកម្ពុជាមិនគួរចាកចេញទេ ហើយថាគួរតែនៅផ្ទះ និងទៅធ្វើការរបស់ពួកគេបានហើយ។
លោកបន្ថែមថា៖ «ពេលពួកគេត្រឡប់មកកម្ពុជា ការដើរចុះឡើងធ្វើឲ្យមានឱកាសឆ្លងជំងឺ ហើយពេលពួកគាត់ត្រឡប់មកវិញ គឺមានឱកាសខ្ពស់ក្នុងការចម្លងទៅអ្នកផ្សេង»។
ប្រែសម្រួលពីអត្ថបទភាសាអង់គ្លេស៖ Cambodia recommends migrant workers remain in Thailand after COVID-19 outbreak
