នគរបាលជាតិកម្ពុជារំពឹងទុកថា សមត្ថកិច្ចនឹងមានកិច្ចសហប្រតិបត្តិការល្អជាមួយអ្នកសារព័ត៌មានស្ត្រីកំឡុងពេលមានការចុះយកព័ត៌មាននៅតាមទីកន្លែងដែលមានការធ្វើកូដកម្ម និងបាតុកម្ម ក្រោយសមត្ថកិច្ចនិងអ្នកសារព័ត៌មានស្រ្តី បានរៀនស្វែងយល់ពីតួនាទី និងកាតព្វកិច្ចរបស់គ្នាតាមរយៈសិក្ខាសាលាមួយនៅរាជធានីភ្នំពេញ។
កាលពីថ្ងៃទី១៥ ខែធ្នូ ឆ្នាំ២០២៣ អង្គការមណ្ឌលព័ត៌មានស្ត្រីកម្ពុជា (WMC) និងស្នងការដ្ឋាននគរបាលរាជធានីភ្នំពេញបានរៀបចំសិក្ខាសាលាស្ដីពី៖ «កិច្ចសហប្រតិបត្តិការរវាងនគរបាលជាតិ និងអ្នកសារព័ត៌មានស្ត្រី»។ គោលបំណងសំខាន់នៃសិក្ខាសាលានេះដើម្បីលើកកម្ពស់សុវត្ថិភាពអ្នកសារព័ត៌មានជាស្ត្រី ដោយការបង្កើនកិច្ចសហប្រតិបត្តិការ និងការយោគយល់គ្នារវាងមន្ត្រីអនុវត្តច្បាប់ និងអ្នកសារព័ត៌មានស្ត្រីនៅក្នុងប្រទេសកម្ពុជា។
លើសពីនេះ សិក្ខាសាលានឹងបញ្ជ្រាបឱ្យមន្រ្តីនគរបាលយល់អំពីតួនាទីរបស់អ្នកសារព័ត៌មានស្រ្តីនៅក្នុងសង្គមប្រជាធិបតេយ្យដែលកំពុងតែជួបប្រទះក្នុងអំឡុងពេលមានព្រឹត្តិការណ៍នានាដូចជា ការចុះរាយការណ៍ព័ត៌មាននៅតាមទីសាធារណៈ ការបៀតបៀន និងការគំរាមកំហែងជាដើម។
ស្នងការនគរបាលរាជធានីភ្នំពេញ លោកឧត្តមសេនីយ៍ទោ ជួន ណារិន្ទ មានប្រសាសន៍ថា មន្រ្តីនគរបាលកម្ពុជានឹងទទួលបានការយល់ដឹងកាន់តែច្រើនអំពីសារៈសំខាន់នៃវិជ្ជាជីវៈសារព័ត៌មាន បន្ទាប់ពីបានចូលរួមសិក្ខាសាលាមួយនេះ។
លោក សង្ឃឹមថា សិក្ខាសិលានេះនឹងលុបបំបាត់ភាពតានតឹងនិងបញ្ហាផ្សេងៗដែលកើតមានរវាងអ្នកសារព័ត៌មានស្រ្តីនិងមន្រ្តីអនុវត្តច្បាប់ តាមរយៈកិច្ចសន្ទនា ការបណ្ដុះបណ្ដាល និងការស្ដាប់គ្នាទៅវិញទៅមក ដើម្បីរកមធ្យោបាយក្នុងការបង្កើនទំនាក់ទំនងរវាងភាគីទាំងពីរឱ្យកាន់តែល្អប្រសើរជាងមុន។
លោក បន្តទៀតថា ការអប់រំអ្នកសារព័ត៌មានស្រ្តីអំពីបទបញ្ជា និងការអនុវត្តច្បាប់របស់មន្រ្តីក្នុងការរក្សាសណ្ដាប់ធ្នាប់សាធារណៈ ស្របពេលដែលមន្រ្តីនគរបាលក៏អាចស្វែងយល់ពីវិជ្ជាជីវៈសារព័ត៌មាន លោក រំពឹងថា បញ្ហាប្រឈមជាច្រើនដែលកើតមានរវាងភាគីទាំងពីរ នឹងអាចរកដំណោះស្រាយបាន។
លោក ណារិន្ទ ថ្លែងថា៖ «ខ្ញុំសង្ឃឹមថាវគ្គបណ្ដុះបណ្ដាលនេះ នឹងជួយកសាងទំនុកចិត្តនិងការគោរពរវាងភាគីទាំងពីរ ជាពិសេសកំណត់ឱ្យបាននូវមធ្យោបាយរួមមួយក្នុងការបង្កើនកិច្ចសហប្រតិបត្តិការដើម្បីផលប្រយោជន៍សាធារណៈ និងសង្គមប្រជាធិបតេយ្យ»។
លោក ទទួលស្គាល់ថា អ្នកសារព័ត៌មាន ជាពិសេសអ្នកសារព័ត៌មានស្រ្តី បានដើរតួនាទីយ៉ាងសំខាន់ក្នុងការកសាងសង្គមមួយបែបប្រជាធិបតេយ្យ ដោយមិនអាចមើលរំលងបាន។ លោក បានគូសបញ្ជាក់ថា វត្តមានរបស់អ្នកសារព័ត៌មានបានឈរនៅជួរមុខក្នុងការអនុវត្តការងាររបស់ខ្លួនប្រកបដោយវិជ្ជាជីវៈនិងទំនួលខុសត្រូវ ស្របពេលដែលមានការគំរាមកំហែងជុំវិញសុវត្ថិភាពនិងវិជ្ជាជីវៈរបស់របស់ពួកគេ ដែលទាមទារឱ្យភាគីពាក់ព័ន្ធយកចិត្តទុកដាក់ជុំវិញករណីនេះ។
អគ្គស្នងការរងនគរបាលជាតិរូបនេះ ក៏បានសម្ដែងការសោកស្ដាយចំពោះការបាត់បង់អាយុ ជីវិតរបស់អ្នកសារព័ត៌មាននៅលើពិភពលោក ដែលលោកបានអះអាងថា មានជាង១០០នាក់បានស្លាប់ក្នុងនោះស្រ្តីប្រមាណ១០នាក់ ពាក់ព័ន្ធនឹងការអនុវត្តការងាររបស់ខ្លួននៅឆ្នាំ២០២៣នេះ។
លោកបន្ថែមថា៖ «វាជាការងារដែលគួរឱ្យសោកស្ដាយ ពាក់ព័ន្ធនឹងសារព័ត៌មាន ជាអ្នកសារព័ត៌មានពិភពលោកផង ដែលរងគ្រោះកើតឡើងទៅលើពួកគាត់ សូមធ្វើការចូលរួមសោកស្ដាយ»។
តាមរបាយការណ៍ការសិក្សាថ្មីពីអង្គការយូណេស្កូនៅទូទាំងពិភពលោកបានសន្និដ្ឋានថា ៧៣%នៃអ្នកសារព័ត៌មានជាស្ត្រី និងបុគ្គលិកធ្វើការលើប្រព័ន្ធផ្សព្វផ្សាយ បានប្រឈមនឹងការវាយប្រហារ ការគំរាមកំហែងដោយផ្ទាល់ និងតាមប្រព័ន្ធអ៊ីនធឺណិត។ ម្យ៉ាងវិញទៀតក្រុមងាយរងគ្រោះមួយនេះកំពុងតែទទួលរងនូវអំពើហិង្សាផ្អែកលើយេនឌ័រ ការមាក់ងាយ ការបៀតបៀនផ្លូវភេទ ការបោកប្រាស់ អំពើហិង្សាលើរាងកាយ ការរំលោភបំពាន និងឃាតកម្មជាដើម ដែលតម្រូវឱ្យមានយន្តការក្នុងការដោះស្រាយបញ្ហានេះជាបន្ទាន់។
តំណាងអង្គការយូណេស្កូប្រចាំកម្ពុជា លោក Sardar Umar Alam បានកោតសរសើរចំពោះជំហានដ៏សំខាន់ឆ្ពោះទៅមុខដោយនគរបាលរាជធានីភ្នំពេញក្នុងការចូលរួមនិងសហការជាមួយអង្គការយូណេស្កូនិងអង្គការមណ្ឌលព័ត៌មានស្ត្រីដើម្បីរួមគ្នាពង្រឹងសេរីភាពនៃការបញ្ចេញមតិ និងសុវត្ថិភាពរបស់អ្នកសារព័ត៌មានស្ត្រី។
លោកបានសង្កត់ធ្ងន់ថា កិច្ចសហការរវាងអ្នកអនុវត្តច្បាប់ និងអ្នកជំនាញសារព័ត៌មាន មានសារៈសំខាន់ណាស់ក្នុងការបន្តជំរុញការទទួលបានព័ត៌មាននិងសេរីភាពនៃការបញ្ចេញមតិនៅកម្ពុជានិងធ្វើការរួមគ្នាលើការលើកកម្ពស់សុវត្ថិភាពអ្នកសារព័ត៌មានជាពិសេសអ្នកសារព័ត៌មានស្ត្រីស្របតាមផែនការសកម្មភាពរបស់អង្គការសហប្រជាជាតិស្តីពីសុវត្ថិភាពអ្នកសារព័ត៌មាន និងបញ្ហានិទណ្ឌភាព។
នាយកគម្រោងនៃអង្គការមណ្ឌលព័ត៌មានស្ត្រីកម្ពុជា (WMC) លោក ផាន ភ័ព្វបារមី សង្ឃឹមថា អាជ្ញាធរនឹងផ្ដល់ភាពងាយស្រួលដល់អ្នកសារព័ត៌មានស្រ្តីក្នុងការទទួលបានព័ត៌មានរួមទាំងការពារសុវត្ថិភាពឱ្យអ្នកសារព័ត៌មានអំឡុងពេលរាយការណ៍នៅកន្លែងកើតហេតុ ក្រោយបានសិក្សាក្នុងវគ្គសិក្ខាសិលានេះ។
លោក ភ័ព្វបារមី និយាយថា៖ «យើងសង្ឃឹមថាសមត្ថកិច្ចដែលទទួលបានព័ត៌មានពីសិក្ខាសាលារបស់យើងនឹងចូលរួមចំណែកនៅក្នុងការចូលរួមលើកកម្ពស់សុវត្ថិភាព ឬក៏ការជួយសម្រួលអ្នកសារព័ត៌មានស្រ្តីហ្នឹងឱ្យទទួលបានព័ត៌មាន និងជួយសម្រួលធ្វើយ៉ាងណាឱ្យពួកគាត់មានសុវត្ថិភាពក្នុងការទៅយកព័ត៌មានដើម្បីផ្ដល់ព័ត៌មានពិតជូនដល់ប្រជាពលរដ្ឋ»។
ក្នុងសិក្ខាសាលា វាគ្មិនបានចែករំលែកអំពីប្រភេទប្រព័ន្ធផ្សព្វផ្សាយ តួនាទីប្រព័ន្ធផ្សព្វផ្សាយក្នុងសង្គមប្រជាធិបតេយ្យ ទម្រង់នៃព័ត៌មានព្រឹត្តិការណ៍ពិតនិងការបញ្ចេញទស្សនៈ ការផ្ទៀងផ្ទាត់ព័ត៌មាន ព័ត៌មានមិនពិតនិងផលប៉ះពាល់ ជាពិសេសគឺសារៈសំខាន់នៃសារព័ត៌មាន។ ក្រៅពីនេះ មានការរួមបញ្ចូលទាំងក្របខណ្ឌច្បាប់កម្ពុជាទាក់ទងនឹងសេរីភាពនៃការបញ្ចេញមតិ សិទ្ធិអ្នកសារព័ត៌មាន និងប្រព័ន្ធផ្សព្វផ្សាយឯករាជ្យ។
ក្នុងសិក្ខាសិលានេះ ក៏មានការរៀបចំកិច្ចពិភាក្សាមួយដោយផ្ដល់ឱកាសឱ្យវាគ្មិនជាអ្នកសារព័ត៌មានស្ត្រី លើកយកបញ្ហាប្រឈមរបស់ខ្លួនអំឡុងពេលចុះរាយការណ៍ព័ត៌មាននៅតាមទីតាំងគោលដៅ។
អ្នកសារព័ត៌មានឯករាជ្យម្នាក់ កញ្ញា ទុយ អេងលី ថ្លែងថា នាងមានអារម្មអត់សុវត្ថិភាពបន្ទាប់ពីអាជ្ញាធរសាកសួររកបណ្ណសម្គាល់ខ្លួនរបស់នាង នៅពេលដែលដឹងថា នាងមកពីស្ថាប័នសារព័ត៌មានរាជ្យ វីអូឌី។
កញ្ញា និយាយថា៖ «ពាក់ព័ន្ធផ្លូវអារម្មរបស់ខ្ញុំនៅពេលណុងខ្ញុំមានអារម្មថា កាតរបស់ខ្ញុំឯកសារបស់ខ្ញុំ លេខទូរសព្ទរបស់ខ្ញុំត្រូវបានប្រគល់ឱ្យគាត់ [សមត្ថកិច្ច] អស់ហើយ។ រឿងដែលខ្ញុំសរសេរគ្រាន់តែជារឿងមួយធម្មតា អត់មានsensitive [រស៊ើប] អីទេ បើសិនជារឿង sensitive [រស៊ើប] ខ្ញុំគិតថាសុវត្ថិភាពខ្ញុំនៅពេលណុងប្រហែលជាពិបាកក្នុងការត្រលប់មកទីក្រុងវិញ»។
លោកស្រី អេង គីមហុង អ្នកសារព័ត៌មានវិទ្យុបារាំង (FRI) និយាយថា៖ «ខ្ញុំបានចុះយកព័ត៌មានពាក់ព័ន្ធនឹងជួបជុំសមាគមគ្រូបង្រៀន ខ្ញុំមានអារម្មថាអត់ស្រណុកចិត្ត [មានការឃ្លាំមើលពីអាជ្ញាធរ]»។
អ្នកសារព័ត៌មានរូបនេះ បន្ថែមថា អាជ្ញាធរបានមកសួរនាំនាង ហើយណែនាំឱ្យជូនដំណឹងជាមុនទៅកាន់អាជ្ញាធរ នៅពេលមួយដែលនាងចុះយកព័ត៌មាននៅផ្សារដើមគរ។
ឆ្លើយតបចំពោះការលើកឡើងបែបនេះ វរៈសេនីយ៍ទោមួយរូប លោកស្រី ឡេង មិនា បានអះអាងថា កាលពីពេលកន្លងទៅ ដោយសារមានអ្នកសារព័ត៌មានគ្មានវិជ្ជាជីវៈមួយចំនួនបានជំរិតទារប្រាក់ពីប្រជាពលរដ្ឋតាមមូលដ្ឋាន ទើបអាជ្ញាធរត្រូវមានការត្រួតពិនិត្យបណ្ណសម្គាល់ខ្លួនរបស់អ្នកសារព័ត៌មានឱ្យបានច្បាស់លាស់។
លោកស្រីបន្ថែមថា៖ «ចំណុចកន្លែងនេះ [ការពិនិត្យបណ្ណសម្គាល់ខ្លួន] ជាបញ្ហាប្រឈមរវាងអ្នកសារព័ត៌មាននិងសមត្ថកិច្ច»។
ក្នុងសិក្ខាសិលានេះផងដែរក៏មានការរួមបញ្ចូលកិច្ចពិភាក្សាជាក្រុម។ ការពិភាក្សានោះ អ្នកសម្របសម្រួលកម្មវិធីបានតម្រូវឱ្យមន្រ្តីសមត្ថកិច្ច ឆ្លើយតបទៅនឹងវិធីសាស្រ្តនៃការផ្ដល់ភាពងាយស្រួលដល់អ្នកយកព័ត៌មានអំឡុងពេលចុះរាយការណ៍ពីការធ្វើកូដកម្មឬបាតុកម្ម និងការការពារសុវត្ថិភាពរបស់អ្នកសារព័ត៌មានជាពិសេសអ្នកសារព័ត៌មានស្រ្តី រួមទាំងការជួយដល់អ្នកសារព័ត៌មានឱ្យទទួលបានព័ត៌មានទៀតផង។
ក្នុងកិច្ចពិភាក្សា មន្រ្តីសមត្ថកិច្ចមកពីក្រុមទី២មួយរូប បាននិយាយថា សមត្ថកិច្ចនឹងផ្ដល់ព័ត៌មានដល់អ្នកសារព័ត៌មានបន្ទាប់ពីឃើញកាតសម្គាល់ខ្លួន ថែមទាំងការពារសុវត្ថិភាពរបស់ពួកគេដែលជាអ្នកសារព័ត៌មានស្រ្តីប្រកបដោយក្រមសីលធម៌ទៀតផងនៅពេលចុះរាយការណ៍ព័ត៌មាននៅកន្លែងតវ៉ាផ្សេងៗ។
យោងតាមរបាយការណ៍របស់ក្រសួងព័ត៌មានឆ្នាំ២០២១ ឲ្យដឹងថា ក្នុងចំណោមអ្នកសារព័ត៌មានកម្ពុជាសរុបប្រមាណជាង៥ពាន់នាក់ មានស្ត្រីអ្នកសារព័ត៌មានចំនួនជាង ៤៧០ នាក់ ស្មើនឹង ៩,៤% ប៉ុណ្ណោះ។
ការសិក្សាថ្មីមួយរបស់អង្គការយូណេស្កូដែលចេញផ្សាយកាលពីដើមខែនេះ បានបង្ហាញថាស្ត្រីត្រូវបានតំណាងតិចតួចនៅក្នុងរឿងព័ត៌មានដែលផលិតដោយប្រព័ន្ធផ្សព្វផ្សាយនៅកម្ពុជា ដោយមានវត្តមានស្ត្រីត្រូវបានរកឃើញតែ៥%នៃរឿងទាំងអស់។
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា លោក ណុប វី ថ្លែងថា អ្នកសារព័ត៌មានស្រ្តីមានចំនួនតិចតួច ជាហេតុនាំឱ្យបញ្ហារបស់ស្រ្តីមិនត្រូវបានរំលេចឡើងក្នុងអត្ថបទសារព័ត៌មាន ស្របពេលដែលរឿងរ៉ាវដែលចុះផ្សាយក្នុងព័ត៌មានភាគច្រើនទទួលបានដំណោះស្រាយនិងការឆ្លើយបត។
លោកបញ្ជាក់ថា៖ «ចឹងនេះជាចំណុចមួយដែលសំខាន់ដែលពាក់ព័ន្ធជាមួយនឹងរឿងរ៉ាវប្រឈមរបស់ស្រ្តីរួមទាំងស្រ្តីអ្នកសារព័ត៌មាន បើសិនជាស្រ្តីអ្នកសារព័ត៌មានគាត់មានបញ្ហាប្រឈម ដោយស្វ័យប្រវត្តិស្រ្តីដែលមិនមែនអ្នកសារព័ត៌មានហ្នឹង គាត់ក៏ទទួលរងនូវបញ្ហាប្រឈម»។
លោកវរៈសេនីយ៍ឯក សំ វ៉ាន់ឌី នាយការិយាល័យប្រឆាំងភេរវកម្មនិងឧក្រិដ្ឋឆ្លងដែននៅស្នងការដ្ឋាននគរបាលរាជធានីភ្នំពេញ ថ្លែងអរគុណ តាំងនាមឱ្យតំណាងសិក្ខាកាមទាំងអស់ ចំពោះការ WMC ដែលបានរៀបចំសិក្ខាសិលានេះ។ លោកបន្តថា ក្រោយបញ្ចប់វគ្គ លោកមានការយល់ដឹងបន្ថែមមួយកម្រិតទៀតពាក់ព័ន្ធនឹងសិទ្ធិ សេរីភាព ការបញ្ចេញមតិ ជាពិសេសការសហការគ្នារវាងមន្រ្តីអនុវត្តច្បាប់ និងអ្នកសារព័ត៌មានដើម្បីអាចនាំយកព័ត៌មានផ្សព្វផ្សាយទៅកាន់មហាជនបាន។
ទីប្រឹក្សាប្រព័ន្ធផ្សព្វផ្សាយនៃអង្គការមណ្ឌលព័ត៌មានស្ត្រីកម្ពុជា (WMC) លោក Robin Eberhardt ថ្លែងថា សមត្ថកិច្ចនិងអ្នកសារព័ត៌មានគួរពិភាក្សាគ្នាក្នុងការរៀបចំផែនការទុកជាមុន នៅពេលមានហេតុការណ៍តវ៉ាឬបាតុកម្មកើតមានឡើង។ លោកបន្តថា អាជ្ញាធរអាចរៀបចំឱ្យអ្នកសារព័ត៌មានចុះរាយការណ៍បានទីតាំងណាខ្លះ និងតំបន់ណាខ្លះមានការហាមឃាត់ ហើយអាចការពារអ្នកសារព័ត៌មានបានកម្រិតណា និងអ្នកសារព័ត៌មានត្រូវនៅតំបន់ណា ប្រសិនបើស្ថានការណ៍មិនអាចគ្រប់គ្រងបាន។
លោកអះអាងថា ប្រសិនបើមានការរៀបចំសេណារីយ៉ូទុកជាមុន សមត្ថកិច្ចនិងអ្នកសារព័ត៌មាននឹងអាចបំពេញភារកិច្ចរបស់ខ្លួនបានល្អប្រសើរ។
លោកថ្លែងថា៖ «បើសិនជាបាតុកម្មហ្នឹងវាទៅហួសដែនកំណត់វាធ្វើហួសហេតុ ឈានដល់អំពើហិង្សាទៅលើប៉ូលិស ឬក៏ប៉ូលិសប្រើហិង្សា ចឹងយើងត្រូវនិយាយជាមួយអ្នកកាសែតឱ្យបានមុនថាតើត្រូវធ្វើយ៉ាងម៉េចឱ្យអ្នកកាសែតត្រូវគិតពីសុវត្ថិភាពខ្លួនឯង ថាអ្នកឯងឥលូវរឿងហ្នឹងវាបង្កឡើងហួសទៅជាបែបនេះ គួរតែលាក់ខ្លួននៅកន្លែងនេះ ពួននៅកន្លែងនេះដើម្បីការពារខ្លួនឱ្យមានសុវត្ថិភាព ចៀសវាងកុំឱ្យអ្នកកាសែតរងផលប៉ះពាល់ពីអំពើហិង្សាហ្នឹង។ យើងនិយាយគ្នាទុកមុនថាបើរឿងហ្នឹងទៅជាអាក្រក់យើងធ្វើយ៉ាងម៉េចៗ»។
បើតាម នាយកគម្រោងនៃអង្គការមណ្ឌលព័ត៌មានស្ត្រីកម្ពុជា (WMC) លោក ផាន ភ័ព្វបារមី បានឱ្យដឹងថា សិក្ខាសាលាស្ដីពីកិច្ចសហប្រតិបត្តិការរវាងនគរបាលនិងអ្នកសារព័ត៌មានស្ត្រីនេះ នឹងធ្វើឡើងមានរយៈពេល៣លើក ហើយនេះជាសិក្ខាសាលាលើកទី២។ លោកបន្តថា កាលពីសិក្ខាសាលាលើកទី១ បានប្រព្រឹត្តទៅនៅក្រុងតាខ្មៅ ខេត្តកណ្ដាលដោយមានសមត្ថកិច្ចនៃស្នងការដ្ឋាននគរបាលខេត្តកណ្ដាល បានចូលរួម៣០នាក់ ក្នុងនោះស្រ្តីមាន៨នាក់ ខណៈសិក្ខាសាលាធ្វើនៅរាជធានីភ្នំពេញនេះ មានសមត្ថកិច្ចនៃស្នងការដ្ឋាននគរបាលរាជធានីភ្នំពេញ បានចូលរួមចំនួន៣០នាក់ ក្នុងនោះសមត្ថកិច្ចជាស្រ្តីចំនួន២១នាក់។
លោកបានឱ្យដឹងទៀតថា នៅដើមខែមករា ឆ្នាំ២០២៤ ខាងមុខ WMC នឹងរៀបចំសិក្ខាសាលាលើកចុងក្រោយនៃគម្រោងនេះ ហើយធ្វើឡើងជាទម្រង់ធំជាងមុន ដោយគ្រោងមានការចូលរួមពីសមត្ថកិច្ចនៃស្នងការនគរបាលខេត្តកណ្ដាលនិងរាជធានីដែលធ្លាប់បានចូលរួមសិក្ខាសាលាកន្លងមក និងអ្នកសារព័ត៌មានស្រ្តីមកពីស្ថាប័នចម្រុះ រួមទាំងឯកជន រដ្ឋ និងអង្គការសង្គមស៊ីវិល។
ក្នុងនាមជាទីភ្នាក់ងារឈានមុខគេក្នុងការអនុវត្តផែនការសកម្មភាពរបស់អង្គការសហប្រជាជាតិស្តីពីសុវត្ថិភាពអ្នកសារព័ត៌មាន និងបញ្ហានិទណ្ឌភាព អង្គការយូណេស្កូ និងដៃគូរបស់ខ្លួនបានចូលរួមជាមួយកងកម្លាំងសន្តិសុខជាង ១ ១៥០០ នៅទូទាំងពិភពលោកដោយបំពាក់ឱ្យពួកគេនូវឧបករណ៍ជាក់ស្តែង និងទ្រឹស្តី ដើម្បីអនុវត្តបេសកកម្មរបស់ពួកគេក្នុងការថែរក្សាសណ្តាប់ធ្នាប់សាធារណៈ ខណៈពេលដែលគោរពតាមស្តង់ដារសិទ្ធិមនុស្សអន្តរជាតិស្តីពីសេរីភាពនៃការបញ្ចេញមតិ និងសុវត្ថិភាពរបស់អ្នកសារព័ត៌មាន។
នៅក្នុងប្រទេសកម្ពុជា អង្គការយូណេស្កូកំពុងធ្វើការដើម្បីលើកកម្ពស់សុវត្ថិភាពអ្នកសារព័ត៌មាន ដោយសហការជាមួយអង្គការជាតិ និងអាជ្ញាធរ ដោយមានការគាំទ្រពីប្រទេសស៊ុយអែត អូស្ត្រាលី និងមូលនិធិការពារប្រព័ន្ធផ្សព្វផ្សាយសកល។
សមាគមសម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា អះអាងថា ក្នុងឆ្នាំ២០២៣នេះ អ្នកសារព័ត៌មាន និងស្ថាប័នសារព័ត៌មានឯករាជ្យនៅតែប្រឈមមុខនឹងការយាយីគ្រប់ទម្រង់។ តាមរបាយការណ៍របស់ស្ថាប័ននេះ មានយ៉ាងហោចណាស់៣៣ករណី ដែលបានកើតឡើងមកលើអ្នកសារព័ត៌មានចំនួន៤៤នាក់ ជាពិសេសនៅអំឡុងពេលប៉ុន្មានខែមុនការបោះឆ្នោតសកល ក្នុងខែកក្កដា ឆ្នាំ២០២៣។ ខេមបូចា បានបញ្ជាក់ថា រាល់ករណីទាំងអស់នឹងត្រូវបានលម្អិតក្នុងរបាយការណ៍ប្រចាំឆ្នាំ២០២៣ របស់ខ្លួន ដែលនឹងចេញផ្សាយនៅដើមឆ្នាំក្រោយ៕