អង្គការ Human Rights Watch បានឱ្យដឹងថា យុវជនដែលជាសកម្មជនគណបក្សភ្លើងទៀនបានភៀសខ្លួនទៅប្រទេសថៃដោយទំនងជាភ័យខ្លាចការធ្វើទុក្ខបុកម្នេញផ្នែកនយោបាយនៅកម្ពុជា ត្រូវបានអាជ្ញាធរថៃចាប់ខ្លួនក្នុងសប្ដាហ៍នេះ។
នាយករងអង្គការ Human Rights Watch ប្រចាំតំបន់អាស៊ី លោក Phil Robertson បានឱ្យដឹងថា សកម្មជនគណបក្សភ្លើងទៀត ថុល សំណាង វ័យ៣៤ឆ្នាំ បានទៅដល់ប្រទេសថៃនៅដើមសប្ដាហ៍នេះដើម្បី «ស្វែងរកសិទ្ធិជ្រកកោន»។ លោកថា សំណាង ត្រូវបានអាជ្ញាធរថៃចាប់ខ្លួនកាលពីថ្ងៃសុក្រ។
អគ្គលេខាធិការស្តីទីគណបក្សភ្លើងទៀនលោក គង់ ម៉ូនីកា មានប្រសាសន៍ថា៖ «ដើម្បីសុវត្ថិភាពផ្ទាល់ខ្លួនរបស់ ថុល សំណាង រដ្ឋាភិបាលថៃមិនត្រូវបញ្ជូន ថុល សំណាង មកឲ្យអាជ្ញាធរកម្ពុជាដាច់ខាត»។ លោកបញ្ជាក់ថា សំណាងគឺជាសមាជិកសកម្មរបស់ក្រុមយុវជនគណបក្សភ្លើងទៀន។
ប្រធានគណបក្សភ្លើងទៀនប្រចាំខេត្តកណ្ដាល លោក លី ម៉េងឃាង បានឱ្យដឹងថា កាលពីថ្ងៃទី៣០ ខែមិថុនា មេភូមិរបស់សំណាង បានព្រមានសំណាងថា ត្រូវតែចុះចូលជាមួយគណបក្សកាន់អំណាចបើចង់ឱ្យរួចពីការចាប់ខ្លួន។
លោក ម៉េងឃាង ឱ្យដឹងទៀតថា នគរបាលឃុំព្រែកកុយ និងនគរបាលស្រុក ក៏បានទៅផ្ទះសំណាង បន្តបន្ទាប់គ្នានៅក្នុងភូមិត្រពាំងឈូក កាលពីថ្ងៃទី៣ ខែកក្កដា។ លោកបន្តថា នគរបាលទាំងនោះទៅដោយមិនមានបញ្ជាពីតុលាការទេ។
លោកឱ្យដឹងថា៖ «ហេតុផលដែលគាត់ចាកចេញពីកម្ពុជាដោយសារតែនគរបាល និងអាជ្ញាធរឃុំបានទៅរករូបគាត់ដល់ផ្ទះ និងសួរនាំអំពីគាត់»។ លោកលើកឡើងទៀតថា «ហេតុផលដែលគេចង់ចាប់ខ្លួនគាត់ គឺទាក់ទងនឹងអ្វីដែលគាត់បានផុសលើហ្វេសប៊ុក»។
លោក ម៉េងឃាង បញ្ជាក់ថា សំណាងបានភៀសខ្លួនទៅប្រទេសថៃនៅថ្ងៃបន្ទាប់ពីមានរឿងនោះ។
លោក ម៉េងឃាង បន្ថែមថា សំណាង មានភាពសកម្មក្នុងការបង្ហោះព័ត៌មានផ្សេងៗក្នុងសប្ដាហ៍កន្លងទៅ។ សារមួយក្នុងសំណោមសារផ្សេងទៀតដែលលោកបានបង្ហោះលើហ្វេសប៊ុករបស់ខ្លួនដែលមានឈ្មោះថា «យុវជនស្រឡាញ់ប្រជាធិបតេយ្យ» បានបង្ហាញពីរូបភាពអ្នកគាំទ្រគណបក្សប្រជាជនកម្ពុជាដោយមានខ្វែងក្រហមលើមុខអ្នកទាំងនោះ ព្រមជាមួយនឹងខ្លឹមសារមិនសូវល្អមួយចំនួនផង។
អគ្គលេខាធិការស្តីទីគណកបក្សភ្លើងទៀន លោក គង់ ម៉ូនីកា មានប្រសាសន៍ថា៖ «គាត់បញ្ចេញទស្សនៈរបស់ខ្លួនលើបណ្ដាញសង្គមហ្វេសប៊ុក…ហើយវាមិនមែនជាអំពើខុសច្បាប់ទេក្នុងប្រទេសកម្ពុជា ឬប្រទេសថៃ»។
លោក ម៉េងឃាង បន្ថែមទៀតថា មេធាវី អង្គការសហប្រជាជាតិកំពុងព្យាយាមជួយដល់ សំណាង ក្រោយពីមានការចាប់ខ្លួនកាលពីព្រឹកថ្ងៃសុក្រ។
លោក Robertson លើកឡើងថា៖ «ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន ត្រូវតែបានការអនុញ្ញាតឱ្យចូលជួប ថុល សំណាង ដើម្បីឱ្យគាត់បានទទួលនូវអ្វីដែលជនភ្លៀងខ្លួនត្រូវការ»។ លោកបន្ថែមថា សម្រាប់ករណីនេះគឺ «ជាការគាបសង្កត់ឆ្លងដែនរបស់រដ្ឋាភិបាលកម្ពុជា ក្នុងន័យចង់នាំខ្លួនគាត់មកវិញ»។
ក្រុមការពារសិទ្ធិជនភៀសខ្លួនស្វែងរកការជ្រកកោននៅប្រទេសថៃ បានប្រាប់ខេមបូចា ថា ប្រទេសថៃមិនបានចុះហត្ថលេខាលើអនុសញ្ញាជនភៀសខ្លួនឆ្នាំ១៩៥១ នោះទេ ហើយ «មិនមានច្បាប់ដែលជួយផ្ដល់ផ្នែកច្បាប់ដល់ជនភៀសខ្លួនដែរ»។ ខេមបូចា ធ្លាប់បានរាយការណ៍ថា តាំងពីឆ្នាំ២០១៧ មកមានសកម្មជនគណបក្សប្រឆាំងជាង២០០នាក់បានភៀសខ្លូនទៅប្រទេសថៃ។ ក្នុងចំណោមនោះមានមនុស្សមួយចំនួនត្រូវបានចាប់ខ្លួនដោយអាជ្ញាធរថៃ និងបានបញ្ជូនមកកម្ពុជាវិញ បើទោះបីជាអ្នកទាំងនោះត្រូវបានអង្គការសហប្រជាជាតិទទួលស្គាល់ថាជាជនភៀសខ្លួនក៏ដោយ។
លោកនាយករដ្ឋមន្ត្រី ហ៊ុន សែន បានព្រមានក្រុមបក្សប្រឆាំងកាលពីខែមករាថា ពួកគេអាចប្រឈមនឹងវិធានការច្បាប់ ឬអំពើហិង្សា។ តាំងពីពេលនោះមក សកម្មជនគណបក្សភ្លើងទៀនជាច្រើននាក់ត្រូវបានគេវាយដំនៅតាមដងផ្លូវ។ នេះបើតាមរបាយការណ៍បរបស់អង្គការ Human Rights Watch។
អ្នកនាំពាក្យគណបក្សប្រជាជនកម្ពុជាលោក សុខ ឥសាន ពេលសួរទាក់ទងនឹងការចាប់ខ្លួនរបស់សំណាង និងការធ្វើទុក្ខបុកម្នេញផ្នែកនយោបាយ លោកមានប្រសាសន៍ថា៖ «ខ្ញុំមិនបានដឹងពីបញ្ហានេះទេ»។
អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន និងអ្នកនាំពាក្យរដ្ឋាភិបាល លោក ផៃ ស៊ីផាន មិនអាចទាក់ទងសុំការអត្ថាធិប្បាយបានទេ។ អ្នកនាំពាក្យឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនប្រចាំកម្ពុជា Hammad Ahmad មិនបានឆ្លើយតបនឹងសំណើសុំអត្ថាធិប្បាយនោះទេ៕
ប្រែសម្រួលពីអត្ថបទភាសាអង់គ្លេស៖ Candlelight Party Activist Who Fled Cambodia Reportedly Arrested in Thailand
