សមាគមសម្ព័ន្ធអ្នកសារព័ត៌មានកម្ពុជា

គណបក្សភ្លើងទៀននិងពលរដ្ឋលើកឡើងពីបញ្ហាក្នុងឃុំ-សង្កាត់មួយចំនួនដែលមានតែបក្សកាន់អំណាចឈរឈ្មោះ

មន្ត្រីសង្កាត់បឹងកុកឈរថតនៅសាលាសង្កាត់ ក្នុងក្រុងកំពង់ចាម ខេត្តកំពង់ចាម ។ រូបភាពផ្ដល់ឱ្យ
មន្ត្រីសង្កាត់បឹងកុកឈរថតនៅសាលាសង្កាត់ ក្នុងក្រុងកំពង់ចាម ខេត្តកំពង់ចាម ។ រូបភាពផ្ដល់ឱ្យ

សង្កាត់បឹងកុក ក្រុងកំពង់ចាម ជាទីតាំងដែលគណបក្សភ្លើងទៀនត្រូវបានគណៈកម្មាធិការ​ជាតិ​​​រៀប​ចំ​ការបោះឆ្នោត សម្រេចលុបឈ្មោះចេញ​ពីបញ្ជីបេក្ខភាពឈរឈ្មោះ បណ្ដាលឱ្យ​សង្កាត់​នេះ​ក្លាយជាសង្កាត់មួយក្នុងចំណោមឃុំ-សង្កាត់​ចំនួនជាង២០ដែល​មាន​តែគណបក្ស​ប្រជាជន​កម្ពុជាឈរឈ្មោះ។ ហើយសង្កាត់មួយនេះ អតីត​​គណបក្ស​សង្រ្គោះជាតិ​ធ្លាប់ឈ្នះ​ជាចៅ​សង្កាត់​​អំឡុងពេលបោះឆ្នោតជ្រើសរើស​ក្រុមប្រឹក្សាឃុំ-សង្កាត់​កាលពី​ឆ្នាំ២០១៧។

លោក មាន អូន បេក្ខជនចៅសង្កាត់បឹងកុក ក្រុងកំពង់ចាម មកពីគណបក្សភ្លើងទៀន ដែល​ត្រូវ​បានគណៈកម្មាធិការជាតិរៀបចំការបោះឆ្នោត សម្រេចលុបចេញពីបញ្ជីឈរឈ្មោះ បាន​ថ្លែង​ថា លោកមានការសោកស្ដាយ ដែលពុំបានឈរឈ្មោះដើម្បីប្រកួតប្រជែង​ជា​មួយ​គណបក្ស​ប្រជាជនកម្ពុជា ខណៈលោកបានរំពឹងទុកថា​ប្រហែល៧០%នឹងឈ្នះ​ការបោះឆ្នោត​ក្រុមប្រឹក្សា​ឃុំសង្កាត់ខាងមុខ។ 

លោកថ្លែងថា៖ «បើតាមខ្ញុំសង្កេតការណ៍រាល់ថ្ងៃ បើសិនជាមានឈ្មោះបោះឆ្នោត​ ខ្ញុំ​ជឿជាក់​៧០%ថា ឈ្នះ ព្រោះខ្ញុំតាមដានជាមួយប្រជាជន»។

លោក ខ្ចង អូន ដែលជាចៅសង្កាត់ និងជាបេក្ខជនចៅសង្កាត់បឹងកុក ក្រុងកំពង់ចាម មកពី​គណបក្សប្រជាជកម្ពុជា បានប្រាប់ថា ការណ៍ដែលពុំមានប្រជាពលរដ្ឋឈរឈ្មោះ​​តំណាង​ឱ្យ​គណបក្សផ្សេងក្នុងសង្កាត់របស់លោក ដោយសារតែពលរដ្ឋអត់ជំនឿលើ​គណបក្សដទៃ និង​ជឿទុកចិត្តតែគណបក្សប្រជាជនកម្ពុជាមួយប៉ុណ្ណោះ។

លោក អូន បានឱ្យដឹងថា៖ «យើងធ្វើការងារនេះបម្រើសេវាជូនប្រជាពលរដ្ឋតាំងពី​ហេដ្ឋា​រចនាសម្ព័ន្ធ មានផ្លូវមានថ្នល់ មានលូអីយើងបម្រើ។ បើនិយាយរួមទៅក្នុង​សង្កាត់​បឹងកុក​ គឺថា​ពេញអស់[ផ្លូវបេតុង ផ្លូវកៅស៊ូ]សល់តែផ្លូវតិចតួចដែលជាផ្លូវកង់ៗខ្លីៗទេ។ ចឹងពលរដ្ឋគាត់​មើលឃើញ​ជាក់ស្ដែង​អ្នកណាធ្វើអ្នកណាមិនធ្វើ»។

ចៅសង្កាត់រូបនេះ ឱ្យដឹងទៀតថា សម្រាប់អាណត្តិថ្មីនេះ លោកនឹងបង្កើនការ​ផ្ដល់សេវា​សាធារណៈ ឱ្យទាន់តម្រូវការប្រជាពលរដ្ឋ និងការបង្រាបគ្រឿងញៀនឱ្យទាន់ពេលវេលាផង​ដែរ។

លោក ហេង សុខ អាយុ៥៨ឆ្នាំ ជាពលរដ្ឋរស់នៅភូមិបឹងកុក សង្កាត់បឹងកុក ក្រុងកំពង់ចាម ខេត្តកំពង់ចាម បាននិយាយថា លោកពុំបានដឹងទេថាតើហេតុអ្វីបានជាពុំ​មានគណបក្ស​នយោបាយផ្សេងឈរឈ្មោះជាបេក្ខជនក្នុងសង្កាត់របស់លោក ហើយសម្រាប់លោកផ្ទាល់​គឺជាប់រវល់ប្រកបរបររកស៊ី ពុំចាប់អារម្មចំពោះការឈរឈ្មោះបេក្ខជន​ជាមួយគណបក្ស​នយោបាយ​ណាមួយឡើយ។

លោកបាននិយាយដូច្នេះថា៖ «មានបក្សតែមួយដូចវាឯកោពេក មានបក្សច្រើនទៅ​វាសប្បាយ​ភ្នែកសប្បាយចិត្តដែរ មើលទៅប្រកួតប្រជែងគ្នាសប្បាយ។ ចង់បានប្រជាធិបតេយ្យ​សប្បាយ​ទាំងអស់គ្នា មិនចង់បានអ្វីទេ»

អាជីវករកំពុងលក់បន្លែលើទឹកលូនៅផ្សារបឹងកុក សង្កាត់បឹងកុក ក្រុងកំពង់ចាម ខេត្តកំពង់ចាម។ រូបថតថ្ងៃទី២៩ ខែឧសភា ឆ្នាំ២០២២។ រូបថតផ្ដល់ឱ្យ

លោក អាង បូរ៉ា អាយុ៣៥ឆ្នាំ ពលរដ្ឋរស់នៅភូមិជ្រោយថ្ម សង្កាត់​បឹងកុក ក្រុងកំពង់ចាម ខេត្តកំពង់ចាម បានរៀបរាប់ថា លោកពុំបានចាប់អារម្មណ៍​ចំពោះការ​ឃោសនា​គោលនយោបាយរបស់គណបក្សដែលមានតែមួយឈរឈ្មោះនេះទេ។

លោកបន្តថា ភូមិឃុំរបស់លោក មានសន្តិសុខសុវត្ថិភាពល្អ ព្រមទាំងមានផ្លូវចាក់បេតុង​គ្រប់​ច្រកល្ហក ប៉ុន្តែមានបញ្ហាលូស្ទះនិងសំរាមបន្តិចដែលកើតឡើងនៅម្ដុំផ្សារបឹងកុក។ លោក បូរ៉ា រំពឹងថា ចៅសង្កាត់ដែលឈ្នះឆ្នោតខាងមុខ នឹងអាចដោះស្រាយរាល់បញ្ហាទាំងនេះបាន។

លោក បូរ៉ា បញ្ជាក់ថា៖ «លូវាល្អដែរប៉ុន្តែស្ទះបន្តិចពេលភ្លៀងខ្លាំង។ វាហូរដែរតែរាងយឺត នៅជិតផ្សារបឹងកុក កន្លែងហ្នឹងរាងដក់ជាងគេ ទឹកវាហូរដែរតែយឺត»។

លោក ឡេង សេងហាន មន្ត្រីឃ្លាំមើលនៃអង្គការអាដហុក ប្រចាំខេត្តត្បូងឃ្មុំ និងកំពង់ចាម បានមានប្រសាសន៍ថា សង្កាត់បឹងកុកស្ថិតនៅក្នុងទីប្រជុំជន ជាហេតុដែល​ប្រជាពលរដ្ឋ​រស់នៅទីនោះពោរពេញទៅដោយជីវភាពធូរធារ ប៉ុន្តែលោកសង្កេតឃើញថា ការទុកដាក់​សំរាមនៅផ្សារបឹងកុក ពុំសូវមានអនាម័យឡើយ។

លោកប្រាប់ថា៖ «សំរាមនៅផ្សារបឹងកុករាងពិបាកបន្តិច។ សំរាមទុកដាក់វាអត់សូវមាន​អនាម័យ ទុកដាក់កន្លែងលក់អ៊ីងចឹង វាធ្វើឱ្យប៉ះពាល់»។

ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណាត្តិទី៥ ដែលគ្រោងប្រព្រឹត្តទៅនៅ​ថ្ងៃអាទិត្យទី៥ ខែមិថុនា ឆ្នាំ២០២២។ក្នុងនោះមានគណបក្ស​នយោបាយ​ចំនួន១៧បាន​ចុះឈ្មោះដាក់បេក្ខជនចូលរួមប្រកួតប្រជែងជាមួយគណបក្សប្រជាជនកម្ពុជាដែលជា​គណបក្សទទួលបានការដឹកនាំ ឃុំ-សង្កាត់​ទាំងអស់នៅប្រទេសកម្ពុជា​បន្ទាប់​ពីការ​រំលាយ​គណបក្សសង្រ្គោះជាតិ។

ដោយឡែកក្នុងចំណោមគណបក្សទាំង១៧នេះ មានតែគណបក្សប្រជាជនកម្ពុជា​ដែលជា​បក្សកាន់អំណាចតាំងពីពន្លត់ភ្លើងសង្រ្គាមនៅកម្ពុជា ទើបមានលទ្ធភាពដាក់បេក្ខជន​ឈរ​ឈ្មោះ​បានទូទាំងប្រទេសដែលមានចំនួនសរុប១៦៥២ ឃុំ-សង្កាត់។ បន្ទាប់ពីគណបក្សកាន់​អំណាចមួយនេះ គឺគណបក្សភ្លើងទៀនដែលជា​បក្សស្នងមរតកនៃបេក្ខជនឈរឈ្មោះ​ក្រុមប្រឹក្សាឃុំសង្កាត់នៃគណបក្សសង្រ្គោះជាតិ បានដាក់បេក្ខជនឈរឈ្មោះចំនួន១៦២៣ ឃុំ-សង្កាត់ ខណៈគណបក្សខ្មែរអភិវឌ្ឍន៍សេដ្ឋកិច្ច បានដាក់បេក្ខជនឈរឈ្មោះ​តិចជាងគេ​គឺ​ត្រឹម​តែ៤ឃុំប៉ុណ្ណោះ។

ក្នុងយុទ្ធនាការឃោសនាបោះឆ្នោតដែលមានរយៈពេល១៤ថ្ងៃ បាននឹងកំពុងប្រព្រឹត្តទៅជិត​ដល់​ថ្ងៃបញ្ចប់ ប៉ុន្តែក៏មានការដាក់ពាក្យបណ្ដឹងយ៉ាងសន្ធឹកពីសំណាក់បក្សកាន់អំណាច​ទៅកាន់គណបក្សភ្លើងទៀន។

គណៈកម្មាធិការជាតិរៀបចំការបោះឆ្នោត បានឱ្យដឹងថា ការបោះឆ្នោតជ្រើសរើសក្រុមប្រឹក្សា​ឃុំសង្កាត់ខាងមុខនេះ មាន២៤ឃុំសង្កាត់មានតែគណបក្សប្រជាជនកម្ពុជា​មួយប៉ុណ្ណោះ​ដែល​ឈរឈ្មោះ។ ក្នុងនោះរួមមាន ភ្នំពេញមានចំនួន៨សង្កាត់ ខេត្តរតនៈគិរីមានចំនួន៧ឃុំ ខេត្ត​ពោធិ៍សាត់មានចំនួន៣ឃុំ ខេត្តកំពង់ចាមមានចំនួនពីរសង្កាត់គឺ សង្កាត់បឹងកុក​និងសង្កាត់​កំពង់ចាម ខេត្តមណ្ឌលគិរីមានមួយសង្កាត់ ខេត្តកោះកុងមានមួយឃុំ ខេត្តព្រះវិហារមាន​មួយ​សង្កាត់ និងខេត្តស្វាយរៀងមានមួយសង្កាត់។

គណបក្សភ្លើងទៀនដែលដើមឡើយបានចុះបញ្ជីបេក្ខជនរហូតដល់១៦៤៩ឃុំសង្កាត់ ប៉ុន្តែ​លទ្ធផលផ្លូវការធ្លាក់ត្រឹម១៦២៣ ដោយសារភាពមិនប្រក្រតីក្នុងការចុះបញ្ជីបេក្ខជន ព្រមទាំង​មានការប្ដឹងពីគណបក្សប្រជាជនកម្ពុជា។ ហេតុនេះបានបណ្ដាលឱ្យមានឃុំ-សង្កាត់មួយចំនួនមានតែគណបក្សប្រជាជន​កម្ពុជាមួយ​ប៉ុណ្ណោះដែលឈរឈ្មោះជាបេក្ខជនក្រុមប្រឹក្សាឃុំ​សង្កាត់។

ទីស្នាក់ការគណបក្សប្រជាជនកម្ពុជាសង្កាត់បឹងកុក ក្រុងកំពង់ចាម ខេត្តកំពង់ចាម។ រូបភាពផ្ដល់ឱ្យ

ដោយឡែក លោក ហួន រដ្ឋា អនុប្រធានគណបក្សខ្មែរអភិវឌ្ឍន៍សេដ្ឋកិច្ច បានលើកឡើងថា បន្ទាប់ពីការធ្វើ​ប្រជាមតិរួច មានតែឃុំចំនួន៤ប៉ុណ្ណោះ ដែលគណបក្សរបស់លោកទទួល​បាន​សំឡេងគាំទ្រ​ច្រើនពីប្រជាពលរដ្ឋ។

លោក រដ្ឋា បន្តថា ចំណុចពិសេសដែលប្រជាពលរដ្ឋគួរបោះឆ្នោតឱ្យបក្សរបស់លោក គឺគោលនយោបាយដែលបង្កើតឱ្យមានកម្មវិធីដាក់ស្រោមសំបុត្រអនាមិកនៅតាមភូមិឃុំ ដើម្បីឱ្យប្រជាពលរដ្ឋអាចបញ្ចេញមតិតាមរបៀបប្រជាធិបតេយ្យនៅតាមមូលដ្ឋាន និងការ​បង្កើតឱ្យមានវេទិការសាធារណៈដើម្បីឱ្យមានការជួបជុំរវាងប្រជាពលរដ្ឋនិងក្រុមប្រឹក្សា​ឃុំសង្កាត់ផងដែរ។ ការលុបបំបាត់ការរើសអើង ការប្រកាន់និន្នាការនយោបាយផ្សេងគ្នា និងការលុបបំបាត់អំពើពុករលួយ ព្រមទាំងភាពអសកម្មនានារបស់មន្ត្រីថ្នាក់មូលដ្ឋាន។

លោក រដ្ឋា បន្ថែម​ថា៖ «យើងបានធ្វើប្រជាមតិទៅឃុំទាំង៤នេះ យើងបានទទួលសំឡេងច្រើន​ជាង​គេទូទាំងប្រទេសដែលយើងមាន។ យើងអាចដាក់បានទូទាំងប្រទេសដែល ប៉ុន្តែយើងអត់​ដាក់​ទេ ដោយសារតែយើងយល់ថាការដកពិសោធន៍របស់យើងថាត្រូវជាមួយ​ប្រជាពលរដ្ឋ​អត់»។

រីឯលោក ប្លាង សីន ប្រធានគណបក្សជនជាតិដើមប្រជាធិតេយ្យកម្ពុជា មានប្រសាសន៍ថា គណបក្សរបស់លោកមានលទ្ធភាពដាក់បេក្ខជនឈរឈ្មោះត្រឹម១៩ឃុំ-សង្កាត់ ហើយ​ភាគ​ច្រើនគឺនៅក្នុងខេត្តមណ្ឌលគិរី។ លោកបន្តថា គណបក្សរបស់លោកពុំទាន់​អាចសន្និដ្ឋាន​អំពីលទ្ធផលថាអាចប្រជែងយកតំណែងមេឃុំនៅឡើយទេ។

លោក ស៊ីន ឱ្យដឹងថា៖ «យើងមិនអាចដឹងមុនទេ មនុស្សអត់ដូចសកម្មភាពទេ ថ្ងៃនេះ​ហែ​ជាមួយយើង ស្អែកហែបក្សផ្សេងទៅ»។

ក្នុងចំណោមការដាក់បេក្ខជនឈរឈ្មោះក្រុមប្រឹក្សាឃុំសង្កាត់ចំនួន១៦៥២នេះ មានតែឃុំ​ជើងព្រៃ ស្រុកបាធាយ ខេត្តកំពង់ចាមមួយប៉ុណ្ណោះ ដែលមានគណបក្សនយោបាយ​រហូត​ដល់ទៅ៨បក្សបានដាក់បេក្ខជនឱ្យឈរឈ្មោះ។

លោក ប៉ាវ ប៉ោហេង​ អាយុ៥៣ឆ្នាំ ជាបេក្ខជនមេឃុំជើងព្រៃ ស្រុកបាធាយ ខេត្តកំពង់ចាម កូតាគណបក្សប្រជាធិបតេយ្យមូលដ្ឋាន បានមានប្រសាសន៍ថា លោកបានសម្រេច​ចិត្ត​ឈរឈ្មោះជាបេក្ខភាពមេឃុំនេះ ដោយសារមើលឃើញពីជីវភាពរបស់ប្រជាពលរដ្ឋ​ក្នុង​ឃុំ​លោកមានការខ្សត់ខ្សោយ ហើយភាគច្រើនជំពាក់បំណុលធនាគារ។

លោកបន្តថា មេឃុំបច្ចុប្បន្នពុំបានអភិវឌ្ឍដែលនាំឱ្យប្រជាពលរដ្ឋ​ទទួលបានផលប្រយោជន៍​នោះទេ ខណៈការផ្ដល់សេវាសាធារណៈក៏ទាមទារលើសពីអ្វីដែលច្បាប់បានកំណត់ផងដែរ។

លោកបន្ថែមថា៖ «ខ្ញុំមិនសប្បាយក្នុងការធ្វើចឹង[ពុករលួយ]វាធ្វើឱ្យប្រជាពលរដ្ឋក្រីក្រ​នឹងជួប​ការលំបាក ត្អូញត្អែរពីរឿងសេវាសាធារណៈក្នុងឃុំសង្កាត់របស់យើងហ្នឹង ដោយឡែក​ការ​អភិវឌ្ឍដូចជាមិនចំគោលដៅ មិនដឹងថាអ្វីដែលជាអាទិភាព អ្វីមិនអាទិភាព»។

លោក លី សុធារ៉ាយុទ្ធ អគ្គលេខាធិការគណបក្សភ្លើងទៀន បានបង្ហាញការសោកស្ដាយ​ចំពោះការលុបឈ្មោះបេក្ខជនកូតាគណបក្សភ្លើងទៀនចេញពីបញ្ជីឈរឈ្មោះបណ្ដាល​​ឱ្យ​ឃុំសង្កាត់មួយចំនួនមានតែបក្សកាន់អំណាចប៉ុណ្ណោះដែលឈរឈ្មោះ។

ទន្ទឹមនឹងនេះដែរ លោក រ៉ាយុទ្ធ បានលើកឡើងថា ច្បាប់ស្ដីពីគណបក្សនយោបាយហាក់មាន​ភាព​ចន្លោះ​ប្រហោង ដែលពិបាកក្នុងការកំណត់និយមន័យណាមួយជាក់លាក់ ជាហេតុ​ដែល​អ្នក​នយោបាយ អ្នកច្បាប់ និងអ្នកបច្ចេកទេស បានបកស្រាយខុសៗគ្នា។ 

លោកឱ្យដឹងថា៖ «វាមានចំណុចខ្វះខាត ដែលទុកចន្លោះប្រហោង​ឱ្យ​កម្មាធិការជាតិ​រៀបចំការបោះឆ្នោត ឱ្យអ្នកប្ដឹងធ្វើការប្ដឹងតែផ្ដេសផ្ដាសចឹង។ អាណត្តិក្រោយយើងនឹងធ្វើការ​កែលម្អ ជាពិសេសគឺច្បាប់ ហើយនឹងការអនុវត្តរបស់គជប»។

លោក ឌឹម សុវណ្ណារុំ ប្រធានក្រុមប្រតិកម្មព័ត៌មាននៃគណៈកម្មាធិការជាតិរៀបចំការបោះឆ្នោត

បានមានប្រសាសន៍ថា ការដាក់បេក្ខជនឈរឈ្មោះរបស់គណបក្សនយោបាយតាមបណ្ដាឃុំ-សង្កាត់នេះ គឺអាស្រ័យលើលទ្ធភាពរបស់គណបក្សនយោបាយរៀងៗខ្លួន។

លោកមានប្រសាសន៍ថា៖ «វាអាស្រ័យលើលទ្ធភាពរបស់គណបក្សនយោបាយនីមួយៗ នៅតាមឃុំ-សង្កាត់នីមួយៗគឺគណបក្សនយោបាយឈរឈ្មោះមិនដូចគ្នា ឃុំសង្កាត់ខ្លះមាន១ ខ្លះ២ រហូតដល់ច្រើនជាងគេ៨គណបក្ស។ សន្លឹកឆ្នោតក៏យើងរៀបចំទៅតាម​ភូមិសង្កាត់ដែល​ឈរឈ្មោះនីមួយៗផងដែរ»៕

474 views

ព័ត៌មានទាក់ទង

ព័ត៌មានថ្មី

អត្ថបទពេញនិយម