សមាគមសម្ព័ន្ធអ្នកសារព័ត៌មានកម្ពុជា

បក្សកម្លាំងជាតិស្នើទៅបក្សភ្លើងទៀន សុំដាក់បេក្ខជនឈរឈ្មោះបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រោមឈ្មោះបក្សខ្លួន

សន្តិសុខម្នាក់ឈរយាមនៅមុខច្រកចូល ខណៈមន្ត្រីបក្សភ្លើងទៀន និងបក្សកម្លាំងជាតិ បានជួបប្រជុំគ្នានៅទីស្នាក់ការរបស់បក្សភ្លើងទៀន នៅព្រឹកថ្ងៃទី៩ ខែកុម្ភៈ ឆ្នាំ២០២៤ រាជធានីភ្នំពេញ ជុំវិញការបែងចែកមណ្ឌលគ្នាកាន់កាប់ក្នុងការបោះឆ្នោតជ្រើសតាំងសមាជិកព្រឹទ្ធសភា។ (ខេមបូចា/ ព្រីង សំរាំង)
សន្តិសុខម្នាក់ឈរយាមនៅមុខច្រកចូល ខណៈមន្ត្រីបក្សភ្លើងទៀន និងបក្សកម្លាំងជាតិ បានជួបប្រជុំគ្នានៅទីស្នាក់ការរបស់បក្សភ្លើងទៀន នៅព្រឹកថ្ងៃទី៩ ខែកុម្ភៈ ឆ្នាំ២០២៤ រាជធានីភ្នំពេញ ជុំវិញការបែងចែកមណ្ឌលគ្នាកាន់កាប់ក្នុងការបោះឆ្នោតជ្រើសតាំងសមាជិកព្រឹទ្ធសភា។ (ខេមបូចា/ ព្រីង សំរាំង)

គណបក្សកម្លាំងជាតិបានស្នើទៅគណបក្សភ្លើងទៀន សុំដាក់បេក្ខជនឈរឈ្មោះទាំង​អស់​សម្រាប់​បោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ក្រោម​ឈ្មោះ​របស់​បក្សខ្លួន ជាថ្នូរនឹងការមិនចាំបាច់បែងចែកមណ្ឌលភូមិភាគគ្នា​ក្នុងការបោះឆ្នោត​ជ្រើស​តាំង​សមាជិកព្រឹទ្ធសភាខាងមុខ។

បក្សកម្លាំងជាតិ និងបក្សភ្លើងទៀន បានជួបចរចា​គ្នានៅឯស្នាក់ការ​បក្ស​ភ្លើងទៀន នៅ​រាជធានី​ភ្នំពេញ នៅព្រឹកថ្ងៃសុក្រ ទី៩ ខែកុម្ភៈ ឆ្នាំ២០២៤ ជុំវិញការបែងចែកមណ្ឌល​គ្នាកាន់កាប់​ក្នុង​ការ​បោះឆ្នោត​ជ្រើស​តាំង​សមាជិកព្រឹទ្ធសភា នីតិកាលទី៥ ដែលប្រព្រឹត្តទៅនៅថ្ងៃទី២៥ ខែ​កុម្ភៈ ឆ្នាំ២០២៤។ បក្សកម្លាំងជាតិ​មាន​វត្តមានចូលរួម៤រូប និងបក្សភ្លើងទៀន៣រូប ក្នុងនោះ​មាន លោក សុខ គឹមសេង ជាប្រធាន​ប្រតិបត្តិបក្សកម្លាំងជាតិ និង លោក លី សុធារ៉ាយុទ្ធ អគ្គលេខាធិការ​បក្ស​ភ្លើងទៀន។

បើតាម លោក គឹមសេង បានឱ្យដឹងថា កិច្ចពិភាក្សាគ្នានេះ នៅមិនទាន់មានចំណុចឯកភាពគ្នា​ជា​រួម​នោះទេ ដោយសារបក្សភ្លើងទៀនត្រូវការពេលវេលា​ក្នុងការសុំយោបល់ និងសេចក្ដី​សម្រេច​​ពីគណៈគ្រប់គ្រងបក្សជាមុនសិន។ 

ដើម្បីចៀសវាងការខាតបង់អសនៈនៅព្រឹទ្ធសភា លោក គឹមសេង ថា បក្សកម្លាំងជាតិ​បាន​ដាក់​​សំណើចំនួនពីរទៅកាន់បក្សភ្លើង​ទៀន​។ រួមមាន ការបែងចែកមណ្ឌលគ្នាកាន់កាប់​រវាង​បក្ស​ទាំង២ បើទោះបីជាបក្សភ្លើងទៀនកំណត់យ៉ាងដូចម្ដេចក៏ដោយ និងស្នើឱ្យបក្ស​កម្លាំងជាតិ​ជាអ្នកដាក់​បេក្ខជនឈរឈ្មោះបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុង-ស្រុក-ខណ្ឌ ​ដោយឡែកបក្ស​ភ្លើង​ទៀន​តាមរយៈបក្សឆន្ទៈខ្មែរគ្រប់គ្រងមណ្ឌលភូមិ​ភាគ​ទាំង៨ ក្នុងការបោះឆ្នោត​ព្រឹទ្ធសភា។

លោកបញ្ជាក់ថា៖ «គណបក្សកម្លាំងជាតិក៏បានស្នើដែរបើសិនជា​ល្អបំផុតយើង​ប្រគល់​ទាំង៨​ភូមិភាគឱ្យទៅខាងគណបក្សឆន្ទៈខ្មែរ ដើម្បីគាត់ធ្វើកិច្ចការងារនៅព្រឹទ្ធសភា។ ដោយឡែក​គណបក្សកម្លាំងជាតិ ស្នើសុំរៀបចំបេក្ខជនក្រុមប្រឹក្សាស្រុក ក្រុមប្រឹក្សាខេត្ត នៅក្នុង​​បញ្ជី​គណបក្សកម្លាំងជាតិ»។

លោកបានបញ្ជាក់ថា បើទោះបីជាបក្សកម្លាំងជាតិជាអ្នកដាក់បេក្ខជន​ឈរឈ្មោះបោះឆ្នោត​ក្រុមប្រឹក្សារាជធានី-ខេត្តក្ដី ប៉ុន្តែបក្សនេះ នឹងដាក់សកម្មជនដែលមានប្រវត្តិ​តស៊ូជាមួយ​បក្ស​ភ្លើងទៀនដដែល។ 

អ្នកជំនាញកិច្ចការបោះឆ្នោតកាលពីពេលកន្លងទៅបានអះអាងថា បក្សប្រឆាំងទាំង២នឹង​ប្រឈម​ការបាត់បង់អសនៈនៅព្រឹទ្ធសភា ប្រសិនបើអង្គបោះឆ្នោតរបស់បក្ស​ភ្លើងទៀន​នៅ​តែ​មានគំនិតខ្វែងគ្នា។

ឆ្លើយតបចំពោះក្ដីបារម្ភនេះ កាលពីថ្ងៃទី២២ ខែមករា ឆ្នាំ២០២៤ គណបក្សកម្លាំងជាតិបាន​ចេញ​សេចក្ដីប្រកាសជាសាធារណៈមួយដោយ ស្នើសុំជួបប្រធានបក្សភ្លើងទៀន លោក ទាវ វណ្ណុល ដើម្បីពិភាក្សាស្តីពីការបែងចែកមណ្ឌលភូមិភាគ សម្រាប់ការបោះឆ្នោត​ជ្រើសតាំង​សមាជិក​ព្រឹទ្ធសភា នីតិកាលទី៥ ឆ្នាំ២០២៤។

មួយថ្ងៃបន្ទាប់ គណបក្សភ្លើងទៀនបានប្រកាសគាំទ្រឱ្យមានកិច្ចពិភាក្សា​ជាមួយ​គណបក្ស​កម្លាំងជាតិ​នេះឡើង។ 

អគ្គលេខាធិការគណបក្សភ្លើងទៀន លោក លី សុធារ៉ាយុទ្ធ មានប្រសាសន៍ថា បក្សភ្លើងទៀន​យល់ព្រមទទួលយកសំណើរបស់បក្សកម្លាំងជាតិក្នុងការយកទៅពិភាក្សាជាមួយថ្នាក់ដឹកនាំ​បក្សភ្លើងទៀន និងបក្សឆន្ទៈខ្មែរដែលជាបក្សក្នុងសម្ព័ន្ធដោយបានជ្រើសរើសដាក់បេក្ខជន​បោះ​​ឆ្នោតជ្រើសតាំងសមាជិកព្រឹទ្ធសភានេះ។  

លោកថ្លែងថា៖ «យើងក៏ត្រូវពិភាក្សាជាមួយនឹងថ្នាក់ដឹកនាំគណបក្ស ឆន្ទៈខ្មែរ ដែលជាដៃគូ​ក្នុង​សម្ព័ន្ធ​របស់គណបក្សដែរ។ យើងនឹងឆ្លើយតបនាពេលខាងមុខក្នុងពេលសមរម្យមួយ» 

អ្នកនាំពាក្យ គជប លោក ហង្ស ពុទ្ធា មានប្រសាសន៍ថា ការរួបរួមគ្នារបស់អ្នកនយោបាយ ជាជ្រុងមួយនៃដំណើរការក្នុងសង្គមប្រជាធិបតេយ្យ។ លោកយល់ថា នេះក៏ជាយុទ្ធសាស្រ្ត​របស់បក្សប្រឆាំងដើម្បីប្រមូលកម្លាំងឱ្យគាំទ្រខ្លួនក្នុងការបោះឆ្នោត។ លោកក៏បានបញ្ជាក់ថា តាក់តិចទាំងនេះមិនបានប្រព្រឹត្តខុសទៅនឹងលក្ខខណ្ឌ គជប នោះទេ។

លោក និយាយថា៖ «យើងអាចនិយាយបានថានេះជាផ្នែកមួយនៃប្រជាធិបតេយ្យ​ផ្ទៃក្នុង​គណបក្ស»

លទ្ធផលបោះឆ្នោតរបស់បក្សប្រឆាំងនៅព្រឹទ្ធសភា លោក​ សំ គន្ធាមី នាយកប្រតិបត្តិ​នៃ​អង្គការ​និកហ្វិច(Nicfec) មានប្រសាសន៍ថា វាអាស្រ័យលើការចរចាគ្នារវាងបក្សទាំង២ ប៉ុន្តែ លោកថា ប្រសិនបើមិនចង់ឃើញការខាតបង់អសនៈណាមួយនោះទេ បក្សប្រឆាំង​គួរតែ​បែង​ចែក​ភូមិភាគគ្នាឬក៏ចងលក្ខខណ្ឌអ្វីខ្លះដើម្បីបង្កើតបាននូវកិច្ចសហការនេះ។ 

លោកលើកឡើងថា៖ «កុំឱ្យបាត់អសនៈ បាត់សំឡេង បើសិនជាយើងចែកភូមិភាគគ្នាទៅ ឬ​ក៏​មានលក្ខខណ្ឌអីមួយទៅ បោះឆ្នោតព្រឹទ្ធសភា ឱ្យគណបក្សណាមួយឈរទៅ ដល់បោះ​ឆ្នោត​ក្រុមប្រឹក្សាគាត់ (គណបក្សណាមួយ) ឈរដែរចឹង។ អាហ្នឹងវាអាស្រ័យលើការ​សម្រប​សម្រួល​របស់ពួកគាត់»។

ការបោះឆ្នោតជ្រើសតាំងសមាជិកព្រឹទ្ធសភានឹងធ្វើឡើងនៅថ្ងៃទី២៥ ខែកុម្ភៈ ឆ្នាំ២០២៤ ដោយ​​អង្គ​បោះ​ឆ្នោត​​ គឺតំណាងរាស្រ្ត និងក្រុមប្រឹក្សាឃុំ-សង្កាត់ទាំងអស់ក្នុងមុខតំណែង ដោយ​​បោះ​ឆ្នោត​ជ្រើស​​រើសសមាជិកព្រឹទ្ធសភាចំនួន៥៨រូប​ក្នុង​ចំណោមសមាជិកសរុប​៦២​នាក់។

ការបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ គ្រោងធ្វើនៅថ្ងៃទី២៦ ខែឧសភា ឆ្នាំ២០២៤៕

217 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម