Update: តំណាងអយ្យការអមសាលាដំបូងរាជធានីភ្នំពេញ បានបង្គាប់ឱ្យលោក រ៉ុង ឈុន ទីប្រឹក្សាគណបក្សកម្លាំងជាតិ បង់ប្រាក់ពិន័យចំនួន២លានរៀលពាក់ព័ន្ធនឹងបទញុះញង់ ហើយព្រមានថា ប្រសិនបើលោកមិនអនុវត្តតាមការបង្គាប់នេះតុលាការនឹងចេញដីកាឃុំខ្លួន។
យោងតាមលិខិតចុះថ្ងៃទី១៩ ខែកុម្ភៈ របស់ព្រះរាជអាជ្ញារង លោក ឆាយ ហុង បានបង្គាប់ឱ្យលោក រ៉ុង ឈុន បង់ប្រាក់ពិន័យចំនួន២លានរៀល នៅតុលាការក្រុងភ្នំពេញ ឱ្យបានមុនថ្ងៃទី៤ ខែមីនា ឆ្នាំ២០២៤។
តែទោះជាយ៉ាងណា លោក ឈុន អះអាងថា ការបញ្ជូនលិខិតបង្គាប់ឱ្យលោកបង់ប្រាក់នេះ មានការយឺតយ៉ាវ ពោលគឺលោកទើបតែទទួលបានកាលពីល្ងាចថ្ងៃម្សិលមិញ ដែលបានធ្វើឱ្យលោកសល់ពេលវេលាតិចតួចក្នុងពិភាក្សាជាមួយភាគីពាក់ព័ន្ធ។
ប៉ុន្តែតាមលិខិតខាងលើ បញ្ជាក់ថា ក្នុងករណី លោក ឈុន មិនអនុវត្តតាមការណែនាំនេះ ស្ថាប័នអយ្យការនឹងចេញដីកាបញ្ជាឱ្យបង្ខំនិងឃុំខ្លួនលោកតាមច្បាប់។
ការបង្គាប់ឱ្យបង់ប្រាក់នេះ ធ្វើឡើងតាមរយៈសាលដីការបស់តុលាការកំពូល ដែលបានផ្ដន្ទាទោសលោក រ៉ុង ឈុន ដាក់ពន្ធនាគាររយៈពេល១ឆ្នាំ ៣ខែ និង១១ថ្ងៃ កាលពីខែកក្កដា ឆ្នាំ២០២២ កន្លងទៅ។
ខេមបូចា មិនអាចសុំការអត្ថាធិប្បាយពីអ្នកនាំពាក្យអយ្យការអមសាលាដំបូងភ្នំពេញ លោក ឆាយ ហុង ដែលជាអ្នកចេញលិខិតបង្គាប់នេះបានទេ ដោយខលចូលប៉ុន្តែមិនមានអ្នកទទួល ខណៈផ្ញើសំណួរតាមតេឡេក្រាមលោកចូលមើលប៉ុន្តែមិនបានឆ្លើយតប។
ចំណែក អ្នកនាំពាក្យអយ្យការមួយរូបទៀត លោក ប្លង់ សុផល អះអាងថា លោកមិនមានព័ត៌មាននេះឡើយ ខណៈអ្នកនាំពាក្យ លោក វ៉ិត មឃៈ ថា លោកត្រូវការរកព័ត៌មាននេះជាមុនសិន មុននឹងធ្វើអត្ថាធិប្បាយ ប៉ុន្តែលោកមិនបានលើកទូរសព្ទរបស់អ្នកកាសែតខេមបូចា នាពេលបន្តបន្ទាប់ឡើយ។
ខណៈអ្នកនាំពាក្យស្ថាប័នអយ្យការមួយរូបផ្សេងទៀត លោក ប៉េង ម៉េងគ័ង បដិសេធក្នុងការធ្វើអត្ថាធិប្បាយ ដោយសារលោកមិនបានដឹងអំពីករណីនេះ។
អ្នកនាំពាក្យក្រសួងយុត្តិធម៌ លោក ជិន ម៉ាលីន និងលោក គឹម សន្តិភាព ខលចូលប៉ុន្តែគ្មានអ្នកទទួល ខណៈផ្ញើសំណួរតាមតេឡេក្រាម លោកចូលមើលប៉ុន្តែគ្មានការឆ្លើយតប។
ទីប្រឹក្សាគណបក្សកម្លាំងជាតិ លោក រ៉ុង ឈុន មានប្រសាសន៍ថា លោកត្រូវការពិភាក្សាជាមួយមេធាវីជាមុនសិន មុននឹងធ្វើការសម្រេចចិត្តថា នឹងបង់ប្រាប់តាមការបង្គាប់ពីតុលាការឬមិនបង់។
លោកនិយាយថា៖«ជុំវិញករណីនេះខ្ញុំមិនទាន់សម្រេចថាបង់ ឬមិនបង់នៅឡើយទេ ខ្ញុំនឹងពិគ្រោះយោបល់ជាមួយមេធាវីរបស់ខ្ញុំ»។
ជុំវិញការបង្គាប់ឱ្យបង់ប្រាក់ លោក បានបញ្ជាក់ថា លោកទើបតែទទួលបានលិខិត កាលពីល្ងាចថ្ងៃទី២៨ ខែកុម្ភៈនេះ ស្របពេលដែលថ្ងៃផុតកំណត់ជិតមកដល់។
លោកបានចាត់ទុកថា ការយឺតយ៉ាវក្នុងការប្រគល់លិខិតជូនដំណឹងអំពីការបង់ប្រាក់ពិន័យ ប្រៀបដូចជាការដាក់បន្ទុកលើកលោកបន្ថែមទៀត ដោយសារលោកមានពេលវេលាតិចតួចក្នុងការពិចារណា។
បើតាមលោក ឈុន ការបង់ប្រាក់ពិន័យនេះ ស្ថិតក្នុងសំណុំរឿងញុះញង់ពាក់ព័ន្ធនឹងសកម្មភាពរបស់លោក កាលពីខែកក្កដា ឆ្នាំ២០២០ ដែលបានចុះជួបពលរដ្ឋតាមបណ្ដោយព្រំដែនត្រពាំងផ្លុង ខេត្តត្បូងឃ្មុំ ដែលអះអាងថាបានបាត់បង់ដីធ្លី។
លោក អំ សំអាត នាយកទទួលបន្ទុកចាត់ការទូទៅប្រចាំអង្គការសិទ្ធិមនុស្សលីកាដូ មានប្រសាសន៍ថា លោក រ៉ុង ឈុន គួរមានពេលវេលាគ្រប់គ្រាន់ក្នុងការរកថវិកាមកបង់ប្រាក់ពិន័យ។
យ៉ាងណា លោកមានមន្ទិលថា តាមរយៈការបរិច្ឆេទក្នុងលិខិតបង្គាប់បង់ប្រាក់ ទំនងការបញ្ជូនលិខិតរបស់តុលាការនេះ មានការយឺតយ៉ាវដែលនាំឱ្យអ្នកជាប់កាព្វកិច្ចទើបតែទទួលបាន។ បន្ថែមពីលើនេះ លោក សំអាត បានផ្ដល់យោបល់ថា លោក ឈុន និងព្រះរាជអាជ្ញា គួរមានការជួបហើយជជែកគ្នាចំពោះនីតិវិធីក្នុងការបង់ប្រាក់ពិន័យនេះ។
លោកថ្លែងថា៖«វាបង្កើតឱកាសចូលទៅក៏មានការជជែកគ្នានៅក្នុងរឿងនីតិវិធីក្នុងការសង យ៉ាងម៉េចដែរ»។
អ្នកវិភាគនយោបាយ លោក ឯម សុវណ្ណរ៉ា មានប្រសាសន៍ថា ការកាត់ទោសលើលោក រ៉ុង ឈុន បែបនេះ ជាករណីមួយដែលរួមចំណែកក្នុងការបំបាក់ស្មារតីរបស់ពលរដ្ឋដែលឈឺឆ្អាលរឿងដែនអធិបតេយ្យជាតិ និងមានការខ្លបខ្លាច ហើយលែងខ្វល់ខ្វាយអំពីសង្គមជាតិបន្តទៀត។
លោកបញ្ជាក់ថា៖ «ជាករណីមួយដែលធ្វើឱ្យពលរដ្ឋកម្ពុជាបាក់ស្មារតីឈឺឆ្អាលរឿងជាតិ រឿងនយោបាយ»។
លោកយល់ថា ប្រព័ន្ធតុលាការបច្ចុប្បន្ន បានបាត់បង់ទំនុកចិត្តពីប្រជាពលរដ្ឋទូទៅក្នុងការកាត់ក្ដីប្រកបដោយយុត្តិធម៌។ លោកបន្ថែមទៀតថា រដ្ឋាភិបាលកម្ពុជា គួររកមធ្យោបាយក្នុងការពង្រឹងប្រព័ន្ធច្បាប់ដើម្បីបង្កើនទំនុកចិត្តដល់ប្រជាពលរដ្ឋ ដោយចៀសវាងការនាំសង្គមអនុវត្តច្បាប់ក្លាយជាសង្គមប្រើប្រាស់កម្លាំងវិញ។
សាលាដំបូងរាជធានីភ្នំពេញ កាលពីខែសីហា ឆ្នាំ២០២១ បានផ្តន្ទាទោស លោក រ៉ុង ឈុន ឲ្យជាប់ពន្ធនាគាររយៈពេល២ឆ្នាំពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម និងពិន័យជាប្រាក់២លានរៀល ចំពោះការអត្ថាធិប្បាយអំពីសហគមន៍មួយនៅតាមបណ្តោយព្រំដែនវៀតណាមបានបាត់បង់ដីអំឡុងពេលដំណើរការបោះបង្គោលព្រំដែន។
លុះក្រោយមក កាលពីថ្ងៃទី២៩ ខែកក្កដា ឆ្នាំ២០២២ លោកត្រូវបានតុលាការកំពូលបន្ថយទោសមកនៅត្រឹម ១ឆ្នាំ ៣ខែ និង១១ថ្ងៃ រួមទាំងការពិន័យជាប្រាក់ចំនួន២លានរៀលផង។
ការចាប់ខ្លួននិងការកាត់ទោស លោក ឈុន បានធ្វើឡើងបន្ទាប់ពីលោកបានសរសេរសារបង្ហោះលើបណ្តាញសង្គមហ្វេសប៊ុក និងធ្វើអត្ថាធិប្បាយផ្សេងទៀតតាមវិទ្យុអាស៊ីសេរី (RFA) ដែលក្នុងនោះលោកអះអាងថា កសិករនៅខេត្តត្បូងឃ្មុំជាប់ព្រំដែនបានបាត់បង់ដីធ្លីអំឡុងពេលបោះបង្គោលព្រំដែនជាមួយវៀតណាម៕
Update: នៅព្រឹកថ្ងៃសុក្រទី១ ខែមីនា ឆ្នាំ២០២៤ នេះ លោក រ៉ុង ឈុន និងថ្នាក់ដឹកនាំគណបក្សកម្លាំងជាតិ បានទៅបង់ប្រាក់ពិន័យចំនួន២លានរៀលនៅសាលាដំបូងរាជធានីភ្នំពេញ តាមការបង្គាប់ពីតំណាងអយ្យការ។
