សមាគមសម្ព័ន្ធអ្នកសារព័ត៌មានកម្ពុជា

រដ្ឋមន្ត្រីក្រសួងវប្បធម៌ និងឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា ចុះហត្ថលេខាលើអនុស្សរណៈ ដើម្បីរួមគ្នាអភិរក្សបេតិកភណ្ឌវប្បធម៌របស់កម្ពុជា

រដ្ឋមន្រ្តីក្រសួងវប្បធម៌ និងវិចិត្រសិល្ប: ភឿង សកុណា និងឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា Patrick Murphy នៅក្នុងពិធីចុះហត្ថលេខាលើអនុស្សរណៈនៃការយោគយល់គ្នា ដើម្បីអភិរក្ស និងស្តារឡើងវិញនូវបេតិកភណ្ឌវប្បធម៌ នៅសារមន្ទីជាតិ រាជធានីភ្នំពេញ។ រូបថតនៅថ្ងៃទី៣០ ខែសីហា ឆ្នាំ២០២៣។ (ខេមបូចា/ អ៊ួន ឈិន)
រដ្ឋមន្រ្តីក្រសួងវប្បធម៌ និងវិចិត្រសិល្ប: ភឿង សកុណា និងឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា Patrick Murphy នៅក្នុងពិធីចុះហត្ថលេខាលើអនុស្សរណៈនៃការយោគយល់គ្នា ដើម្បីអភិរក្ស និងស្តារឡើងវិញនូវបេតិកភណ្ឌវប្បធម៌ នៅសារមន្ទីជាតិ រាជធានីភ្នំពេញ។ រូបថតនៅថ្ងៃទី៣០ ខែសីហា ឆ្នាំ២០២៣។ (ខេមបូចា/ អ៊ួន ឈិន)

រដ្ឋមន្រ្តីក្រសួង​វប្ប​ធម៌​ និង​វិចិត្រ​សិល្ប: និងឯកអគ្គរដ្ឋទូត​សហរដ្ឋអាមេរិក​ប្រចាំ​នៅ​កម្ពុជា ​ បានចុះហត្ថលេខាលើអនុស្សរណៈ​នៃការយោគយល់​គ្នា ដើម្បីអភិរក្ស និងស្តារឡើងវិញ​នូវ​បេតិកភណ្ឌវប្បធម៌ ជាពិសេសកាត់បន្ថយការជួញដូរ​វត្ថុបុរាណខុសច្បាប់ក្នុង​ប្រទេសកម្ពុជា​នាំចេញទៅក្រៅប្រទេស។

នៅក្នុងពិធីចុះហត្ថលេខាលើកិច្ចព្រមព្រៀងលើកទី៥នេះ​បានធ្វើឡើងនៅសារមន្ទីរជាតិ ក្នុង​រាជធានីភ្នំពេញ ដែលមានការចូលរួមពីលោកស្រី ភឿង សកុណា ដែលជា រដ្ឋមន្រ្តីក្រសួង​​វប្បធម៌​ និង​វិចិត្រ​សិល្ប:​ និងលោក Patrick Murphy​ ជាឯកអគ្គរដ្ឋទូត​សហរដ្ឋអាមេរិក​ប្រចាំ​នៅ​កម្ពុជា កាលពីថ្ងៃទី៣០ ខែសីហា ឆ្នាំ២០២៣។

លោក Patrick Murphy​ ឯកអគ្គរដ្ឋទូត​សហរដ្ឋអាមេរិថ្លែងថា ពិធីចុះហត្ថលេខាលើ​អនុស្សរណៈ​យោគយល់​គ្នា រវាងសហរដ្ឋអាមេរិក និងកម្ពុជា គឺអាមេរិកចង់ចូលរួមចំណែក​ក្នុងការអភិរក្ស និងស្តារឡើងវិញនូវ​បេតិកភណ្ឌវប្បធម៌ដ៏សម្បូរបែបរបស់កម្ពុជា​ដែលបាន​បាត់បង់។ ហើយពិធីចុះហត្ថលេខារវាងសហរដ្ឋអាមេរិក និងក្រសួងវប្បធម៌ និងវិចិត្រសិល្បៈ ត្រូវបានចុះហត្ថលេខាកាលពី២០ឆ្នាំមុន គឺតាំងពីឆ្នាំ២០០៣។

លោក Murphy ថ្លែងថា៖ «កម្ពុជាជាប្រទេសតែមួយគត់នៅក្នុងតំបន់អាស៊ីអាគ្នេយ៍ដែលមាន​ពិធីចុះហត្ថលេខាលើអនុស្សរណៈ​នៃការយោគយល់​គ្នា(MOU) ហើយព្រះរាជាណាចក្រកម្ពុជា ជាគំរូសម្រាប់ប្រទេសក្នុងតំបន់ ឥណ្ឌូ ប៉ាស៊ីហ្វិក ផ្សេងទៀត»

លោកឯកអគ្គរដ្ឋទូត​សហរដ្ឋអាមេរិប្រចាំកម្ពុជា​ថ្លែងបន្ថែមពីបន្ទាប់ពីការចុះហត្ថលេខាលើ​កិច្ចព្រមព្រៀងថាសហរដ្ឋអាមេរិកកំពុងផ្តល់ជំនួយថ្មី និងបានបន្ថែមទឹកប្រាក់ចំនួន៤៥ម៉ឺន​ដុល្លារ ដើម្បីឱ្យបន្តការអភិរក្សប្រាសាទភ្នំបាខែង ដែលប្រាសាទនេះមានទីតាំងនៅក្រុងអង្គរ ក្នុងខេត្តសៀមរាប។​

លោក Patrick Murphy ថ្លែងថា៖ «នេះគឺជាមូលនិធិឯកអគ្គរដ្ឋទូតដ៏ធំបំផុតសម្រាប់ការ​អភិរក្ស​វប្បធម៌ដែលបានផ្តល់រង្វាន់នៅឆ្នាំនេះនៅក្នុងតំបន់អាស៊ីប៉ាស៊ីហ្វិកខាងកើត»។

លោក Patrick Murphy បានលើកឡើងបន្តថា ការចុះហត្ថលេខាអនុស្សរណៈ​យោគយល់គ្នា​នេះ គឺដើម្បីកាត់បន្ថយការជួញដូរខុសច្បាប់នូវវត្ថុបុរាណវិទ្យា និងជាតិពន្ធុវិទ្យាដែលមិនអាច​ជំនួស​បានដែលតំណាងឱ្យបេតិកភណ្ឌវប្បធម៌របស់កម្ពុជា។

លោក​ស្រី ភឿង សកុណា មានប្រសាសន៍ថា កម្ពុជានិងអាមេរិកបានចុះហត្ថលេខារួមគ្នា ក្នុង​ទប់ស្កាត់ និងការជួញដូរវត្ថុបុរាណខុសច្បាប់ ហើយកិច្ចសហប្រតិបត្តិការនេះ​អនុញ្ញាតឱ្យ​កម្ពុជាអាចស្វែងរកប្រលឹងដូនតាខ្មែរតាមរយៈវត្ថុបុរាណដែលបានបាត់បង់តាំងពីជំនាន់​សង្រ្គាមដើម្បីនាំយកមកកម្ពុជាវិញ។

លោកស្រីបន្តថា  ការបាត់បង់វត្ថុបុរាណខ្មែរគឺជាការរៀនសូត្រសម្រាប់យុវជនជំនាន់​ក្រោយឱ្យ​ដឹងថា សង្រ្គាមតែងតែនាំមកនូវការបែកបាក់គ្នា។

លោកស្រីថ្លែងថា៖ «ឥឡូវនេះដែលយើងបានសុខសន្តិភាព យើងមានការរីក​ចម្រើន មិន​ត្រឹមតែ​សម្រាប់ប្រជាជនទេ​ សូម្បីតែវត្ថុបុរាណខ្មែរក៏អាចជួបជុំគ្នាបានដែរ»។

លោកស្រី សកុណា បន្ថែមថា កិច្ចសហប្រតិបត្តិការនេះបានជួយសេដ្ឋកិច្ចកម្ពុជា​ឱ្យមានភាព​រីកចម្រើនតាមរយៈការទាក់ទាញភ្ញៀវទេសចរណ៍ឱ្យចូលមកកម្ពុជា និងអាចជួយ​ប្រជាជាតិ​កម្ពុជា​​ទាំងមូលផងដែរ។

លោកស្រីបន្តថា៖ «ហើយវា[កិច្ចសហប្រតិបត្តិការជាមួយអាមេរិក]ជួយទៅលើបញ្ហាសេដ្ឋកិច្ច ទាក់ទាញភ្ញៀវទេសចរណ៍ ដើម្បីការកសាងប្រទេសយើង»

លោកស្រី សកុណា លើកឡើងថា វត្ថុបុរាណខ្មែរដែលបានបាត់បង់គឺដោយសារតែមនុស្សលួចនាំឆ្លងដែនទៅលក់ក្រៅប្រទេស​តាំងតែពីជំនាន់កើតសង្រ្គាម ហើយប្រទេសភាគច្រើនដែលទទួលទិញវត្ថុបុរាណ គឺប៉ែក​ខាង​អឺរ៉ុប ​ជាពិសេសសហរដ្ឋអាមេរិក។

លោកស្រី សកុណា បានបន្ថែមទៀតថា៖ «មានប្រទេសអ្នកមានដែលមានលុយទិញ ដល់​ឥឡូវ​យើងមានសេចក្តីសុខ យើងឃើញថាជារបស់យើង យើងធ្វើការទាមទារ»

លោកស្រីបញ្ជាក់ថា អាមេរិកបានបញ្ជូនវត្ថុបុរាណជាង១០០មកកម្ពុជា ចាប់តាំងពី​កម្ពុជា​​បានបង្កើតកិច្ចសហប្រតិបត្តិការជាមួយអាមេរិក និងមានវត្ថុបុរាណមួយ​ចំនួនទៀត​ដែលកំពុងរក្សាទុកនៅអាមេរិក ហើយនឹងបញ្ជូនមកកម្ពុជាក្នុងពេលខាងមុខបន្តទៀត។

សូមរំលឹកថាកាលពីថ្ងៃទី​១៣ ខែ​កក្កដា ឆ្នាំ២០២២ សហរដ្ឋអាមេរិក​បានបញ្ជូនវត្ថុ​បុរាណ ចំនួន២៧​ដុំ មក​សារមន្ទីរ​ជាតិ​កម្ពុជា ហើយការប្រគល់វត្ថុបុរាណនេះក៏មាន​ការចូលរួម​ពី​លោក​ឧបការី​រដ្ឋមន្ត្រីក្រសួង​ការបរទេស​អាមេរិក​ទទួលបន្ទុក​កិច្ចការ​អាស៊ី​បូព៌ា និង​ប៉ាស៊ីហ្វិក លោក Daniel J. Kritenbrink និងឯកអគ្គរដ្ឋទូត​សហរដ្ឋអាមេរិក​ប្រចាំ​កម្ពុជាគឺលោក Patrick Murphy និងអ្នកស្រី ភឿង សកុណា ​ជារដ្ឋមន្ត្រី​ក្រសួង​វប្បធម៌ និង​វិចិត្រសិល្បៈ ក៏មានវត្តមាន​ក្នុងពិធីនោះដែរ៕

159 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម