សមាគមសម្ព័ន្ធអ្នកសារព័ត៌មានកម្ពុជា

កញ្ញា សេង ធារី បញ្ចប់កូដកម្មអត់អាហាររយៈពេល១០ថ្ងៃ នៅក្នុងពន្ធនាគារ

កញ្ញា សេង ធារី សកម្មជនសិទ្ធិមនុស្សស្រែកទាមទារយុត្តិធម៌ មុនពេលប៉ូលិសចាប់ខ្លួនកាលពីថ្ងៃទី១៤ ខែមិថុនា ឆ្នាំ២០២២។ (ខេមបូចា/ព្រីង សំរាំង)
កញ្ញា សេង ធារី សកម្មជនសិទ្ធិមនុស្សស្រែកទាមទារយុត្តិធម៌ មុនពេលប៉ូលិសចាប់ខ្លួនកាលពីថ្ងៃទី១៤ ខែមិថុនា ឆ្នាំ២០២២។ (ខេមបូចា/ព្រីង សំរាំង)

យោងតាមលោក Jared Genser ជា​មេធាវី​ការពារ​បាន​ឲ្យ​ដឹងថា ​កញ្ញា សេង ធារី  សកម្មជនសិទ្ធិ​មនុស្ស​ ដែលកំពុងជាប់ពន្ធនាគារបានបញ្ចប់ការធ្វើកូដកម្មអត់អាហាររយៈពេល១០​ថ្ងៃកាលពីថ្ងៃព្រហស្បតិ៍ បន្ទាប់ពីស្រកទម្ងន់ប្រហែល៥គីឡូក្រាម ដែល​កូដកម្មអត់​អាហារនេះធ្វើ​ឡើង​បន្ទាប់​​ពីមាន​របាយការណ៍កាល​ពី​ខែមិថុនាពីក្រុមការងារអង្គការសហប្រជាជាតិដែលបានអំពាវនាវឱ្យមានការដោះលែងកញ្ញា​ជាបន្ទាន់

កញ្ញា សេង ធារី បាន​លើកឡើង​តាមរយៈ​សេចក្តីថ្លែងការណ៍​មួយ​ចេញ​ដោយ មេធាវី Genser ថា៖​ «ខ្ញុំ​បាន​ធ្វើ​កូដកម្ម​អត់អាហារនេះ ​មិន​មែនដើម្បី​ទាមទារ​សេរីភាព​​សម្រាប់​ខ្លួន​ខ្ញុំតែ​ម្នាក់​នោះ​​ទេ ប៉ុន្តែ​ដើម្បី​សេរីភាព​របស់​ប្រជាជន​កម្ពុជា​ទាំងអស់​។ ទោះបីជារាងកាយរបស់ខ្ញុំចុះខ្សោយបំផុតក៏ដោយ ក៏ខ្ញុំនៅមាន​ការ​តាំងចិត្ត​ខ្ពស់​ ហើយឥឡូវនេះ មានអារម្មណ៍ថា ខ្លាំងជាងមុនជាង១.០០០ដង ដើម្បី​បុព្វ​ហេតុដ៏ត្រឹម​ត្រូវ​នេះ»។

កញ្ញា​ សេង ធារី ក៏បានអំពាវនាវឱ្យសហគមន៍អន្តរជាតិលើកឡើង​អំពីបញ្ហា​ «អ្នកទោស​នយោបាយ» និង «ការដួលរលំនៃលទ្ធិប្រជាធិបតេយ្យ» នៅក្នុងប្រទេសកម្ពុជា​។

កញ្ញា សេង ធារី ដែល​មាន​សញ្ជាតិ​ខ្មែរ​អាមេរិក ត្រូវបានកាត់ទោសឱ្យជាប់ពន្ធ​នា​គាររយៈពេលប្រាំមួយឆ្នាំកាលពីខែមិថុនាឆ្នាំមុន ពីបទរួម​គំនិតក្បត់។ កញ្ញា សេង ធារី ​គឺ​ជា​មនុស្ស​ម្នាក់ក្នុងចំណោមសមាជិក​ជាង១០០នាក់របស់គណបក្ស​ប្រឆាំងដែល​ត្រូវបាន​តុលាការរំលាយ​ ​គឺ​​គណបក្សសង្គ្រោះជាតិ​ ហើយ​ដែលពួកគាត់​​ត្រូវបានបញ្ជូន​មកជំនុំជម្រះ​ពីបទញុះ​ញង់ និងរួម​គំនិត​ក្បត់​។

កញ្ញា​បាន​ចាប់​ផ្តើម​កូដកម្ម​អត់​អាហារ​នៅ​ថ្ងៃ​ទី១៧ ខែ​កក្កដា ដើម្បី​ទាមទារ​ឲ្យ​មាន​​ការ​ដោះលែង​កញ្ញា​ និង​ដោះលែង​អ្នក​ទោស​នយោបាយ​ផ្សេង​ទៀត។

លោក នុត សាវនា អ្នក​នាំ​ពាក្យ​អគ្គនាយកដ្ឋាន​ពន្ធនាគារ ​នៃ​ក្រសួង​មហាផ្ទៃ បាន​​​មាន​ប្រសាសន៍​​ថា លោក​មិន​មាន​ការ​ភ្ញាក់​ផ្អើល​ទេ​ដែល​ថា «គាត់​មាន​សភាព​​ខ្សោយ ​ព្រោះ​គាត់​​ស្គម​តាំង​ពី​ដើម​មក»។

លោក​មាន​ប្រសាសន៍ថា មិនមានអ្វីដែលត្រូវព្រួយបារម្ភអំពីសុខភាពរបស់កញ្ញា​ សេង ធារី នោះទេ ដោយសារតែសម្ពាធឈាមរបស់គាត់​ត្រូវបានវាស់ជារៀងរាល់ថ្ងៃ ហើយលោក​ថែមទាំងបានកត់សម្គាល់ផងដែរថា ធារី បានផឹកទឹកដោះគោ អំឡុងពេលធ្វើកូដកម្មអត់អាហារ។

លោក ជិន ម៉ាលីន អ្នកនាំពាក្យក្រសួងយុត្តិធម៌មានប្រសាសន៍ថា៖ «កូដកម្មអត់អាហារនេះ មិនមានឥទ្ធិពលលើនីតិវិធីរបស់តុលាការទេ។ វា​ជា​សិទ្ធិ​របស់​គាត់​​ក្នុង​ការទទួល​ទាន​ឬក៏​អត់ ព្រោះ​គ្មាន​អ្នក​ណា​អាច​បង្ខំ​គាត់​​បាន​ទេ​»

លោក ស៊ឹង សែនករុណា មន្ត្រីស៊ើបអង្កេតជាន់ខ្ពស់នៃសមាគមសិទ្ធិមនុស្សអាដហុកមាន​ប្រសាសន៍ថា លោក សំ ទិត្យសីហា មេធាវីម្នាក់ក្នុងចំណោម​មេធាវី​របស់កញ្ញា ធារី បានទៅ​សួរសុខទុក្ខកញ្ញា​កាលពីថ្ងៃព្រហស្បតិ៍ ហើយបានរាយការណ៍ថា កញ្ញាធារី មានសភាពទន់ខ្សោយ ស្លេកស្លាំង និងស្គម។

លោក​មាន​ប្រសាសន៍ថា៖ «សកម្មភាពនេះ [កូដកម្មអត់អាហារ] គឺដើម្បីបង្ហាញពីការតស៊ូមតិរបស់គាត់​អំពីភាពអយុត្តិធម៌នៃការឃុំខ្លួន​គាត់​ក្នុង​ពន្ធនាគារ។ វាមិនមានប្រយោជន៍ដល់រដ្ឋាភិបាលក្នុងការឃុំខ្លួន សេង ធារី នោះទេ ព្រោះដូចដែលយើងដឹងហើយថា សហរដ្ឋអាមេរិកបានដាក់សម្ពាធ និងកាត់ជំនួយខ្លះ [ដល់កម្ពុជា]»។ 

បន្ទាប់ពីការបោះឆ្នោតជាតិកាលពីថ្ងៃអាទិត្យ ក្រសួងការបរទេសសហរដ្ឋអាមេរិកបានអះអាងថា ខ្លួននឹង​ចាត់វិធានការ ដើម្បីរឹតបន្តឹងទិដ្ឋាការលើ​បុគ្គលណា​ដែលធ្វើ​ឲ្យ​ខូច​ដំណើរ​លទ្ធិប្រជាធិបតេយ្យនៅ​ប្រទេសកម្ពុជា និងផ្អាកកម្មវិធីជំនួយមួយ​​ចំនួននៅក្នុងប្រទេសនេះផងដែរ​។

សមាជិកសភាសហរដ្ឋអាមេរិកបានប្រកាសកាលពីថ្ងៃទី១៤ ខែកក្កដានូវ​ច្បាប់ដែលបានស្នើ​ ហើយបានដាក់ឱ្យប្រើប្រាស់ជាលើកដំបូងក្នុងឆ្នាំ២០២០ ដែលនឹង «ដាក់​ឱ្យរដ្ឋាភិបាលកម្ពុជាទទួលខុសត្រូវចំពោះការរំលោភបំពាន និងអំពើពុករលួយ ដែលធ្វើ​ឲ្យ​ខូច​ដំណើរ​ការ​លទ្ធិប្រជាធិបតេយ្យ និងសិទ្ធិមនុស្ស»។ ច្បាប់​នេះ​បាន​លើក​ឡើង​ពីករណី​របស់​កញ្ញា សេង ​ធារី និង​ឥស្សរជន​បក្ស​ប្រឆាំង​ដែល​ត្រូវ​បាន​ផ្តន្ទាទោស​​ផ្សេង​ទៀតផងដែរ។ 

លោក Amparo Garcia អ្នកនាំពាក្យស្ថានទូតអាមេរិកមានប្រសាសន៍ថា៖ «សហរដ្ឋ​អាមេរិកអំពាវនាវឱ្យមានការដោះលែងជាបន្ទាន់នូវសកម្មជនបក្ស​ប្រឆាំង ដែល​​ត្រូវ​ឃុំខ្លួន​ដោយអយុត្តិធម៌ទាំងអស់ រួមទាំងកញ្ញា​ សេង ធារី ផងដែរ»។ លោកបានបន្ថែមថា៖ «ថ្មីៗនេះ មន្ត្រីស្ថានទូតអាមេរិក​បានទៅសួរសុខទុក្ខកញ្ញា​ សេង ធារី នៅក្នុងពន្ធ​នាគារ ដូចដែលយើងបាន​ធ្វើចំពោះពលរដ្ឋអាមេរិកទាំងអស់ ដែលកំពុងជាប់ពន្ធនា​គារ​នៅកម្ពុជា។ យើង​នឹង​បន្ត​ឃ្លាំ​មើល​ករណី និង​ស្ថានភាព​របស់​កញ្ញា​ សេង ធារី​ យ៉ាង​ដិតដល់ និង​ផ្តល់​សេវា​កុងស៊ុល​ដែល​សមរម្យ​ទាំងអស់»។ 

លោក សំ ទិត្យសីហា មិន​អាច​ទាក់​ទង​សុំ​ការ​អត្ថាធិប្បាយ​បាន​ទេ។ ការិយាល័យឧត្តមស្នងការសិទ្ធិមនុស្សរបស់អង្គការសហប្រជាជាតិ និងការិយាល័យរបស់ខ្លួននៅកម្ពុជា មិនបានឆ្លើយតបភ្លាមៗចំពោះសំណើសុំការអត្ថាធិប្បាយដែលបានផ្ញើកាលពីរសៀលថ្ងៃសុក្រនោះទេ​៕

 ប្រែសម្រួលពីអត្ថបទភាសាអង់គ្លេស៖ Imprisoned Activist Seng Theary Ends Ten-Day Hunger Strike

 
234 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម