សមាគមសម្ព័ន្ធអ្នកសារព័ត៌មានកម្ពុជា

សាលាឧទ្ធរណ៍សួរដេញដោលលោក កឹម សុខា ជុំវិញភស្តុតាងដែលលោកបានថ្លែងនៅទីក្រុងម៉ែលប៊ន

សន្តិសុខរឹតបន្តឹងចូលទៅបរិវេណជុំវិញសាលាឧទ្ធរណ៍ ខណៈរថយន្តនគរបាលអមដំណើររបស់លោក កឹម សុខា មកចូលរួមសវនាការនៅថ្ងៃទី៨ ខែកុម្ភៈ ឆ្នាំ២០២៤។ (ខេមបូចា/ព្រីង សំរាំង)
សន្តិសុខរឹតបន្តឹងចូលទៅបរិវេណជុំវិញសាលាឧទ្ធរណ៍ ខណៈរថយន្តនគរបាលអមដំណើររបស់លោក កឹម សុខា មកចូលរួមសវនាការនៅថ្ងៃទី៨ ខែកុម្ភៈ ឆ្នាំ២០២៤។ (ខេមបូចា/ព្រីង សំរាំង)

សាលា​ឧទ្ធរណ៍ភ្នំពេញ​​បាន​បន្ត​សាកសួរ​លោក កឹម សុខា អតីត​ប្រធាន​គណបក្ស​ប្រឆាំង​កាលពី​ថ្ងៃ​ព្រហស្បតិ៍ ​នៅក្នុង​សវនាការលើកទី​ពីរ​​លើ​បណ្តឹង​ឧទ្ធរណ៍​ចំពោះការ​​​ផ្តន្ទា​ទោស​ពី​​បទ​ក្បត់​ជាតិ ដោយតុលាការ​សាក​សួរ​លោក​អំពី​ការ​បង្កើត​មជ្ឈ​មណ្ឌល​​សិទ្ធិ​មនុស្ស​កម្ពុជា (CCHR) និង​ការ​ថ្លែងរបស់​លោក​​កន្លង​មក​ នេះ​បើ​តាមការ​អះអាង​របស់​លោក អាង ឧត្តម​ ​មេធាវី​ការពារ​ក្តី​របស់​លោក កឹម សុខា។

លោក ឧត្តម បាន​មាន​ប្រសាសន៍​បន្ទាប់​ពី​សវនាការ​កាល​ពី​ថ្ងៃ​ព្រហស្បតិ៍​ថា៖ «[លោក សុខា] បាន​ឆ្លើយ​សំណួរ​អំពី​អ្វី​ដែល​លោក​បាន​ធ្វើ ​ដើម្បី​ពង្រឹង​លទ្ធិប្រជាធិបតេយ្យ និងការ​​គោរព​សិទ្ធិ​មនុស្ស»។

លោក អាង ឧត្តម មានប្រសាសន៍ថា មន្ត្រីតុលាការផ្តោតសំណួរលើអង្គការ​ CCHR ទី​ដែលលោក កឹម សុខា ធ្លាប់​ធ្វើ​ជាប្រធាន និង​កិច្ច​ប្រឹងប្រែង​រៀប​ចំពល​រដ្ឋ​​ថ្នាក់មូលដ្ឋានទាក់ទងនឹងសិទ្ធិមនុស្ស និងលទ្ធិប្រជាធិបតេយ្យ។

តុលាការក៏បានសាក​សួរអំពីវីដេអូនៃសុន្ទរកថាដែល​លោក កឹម សុខា បាន​ថ្លែង​នៅ​ទីក្រុងម៉ែលប៊ន (Melbourne) ក្នុងឆ្នាំ២០១៣ ដែលរដ្ឋាភិបាលបានប្រើប្រាស់ធ្វើ​ជាភស្តុតាង​ ដើម្បីចោទប្រកាន់ថា អ្នកនយោបាយ​រូបនេះ​បានសមគំនិតជាមួយរដ្ឋាភិបាលសហរដ្ឋអាមេរិក។

ការកត់ត្រារបស់​រដ្ឋាភិបាល​នូវ​ពាក្យពេចន៍​ចេញពីវីដេអូឃ្លីបនៃសុន្ទរកថាត្រូវបានបង្ហាញនៅក្នុងតុលាការអំឡុង​ការ​ជំនុំជម្រះ​ក្តី​ដំបូងរបស់លោក កឹម សុខា។ អតីត​មេ​បក្ស​ប្រឆាំង​រូប​នេះ​ហាក់ដូចជាបាន​និយាយ​ថា សហរដ្ឋ​អាមេរិក​បាន​គាំទ្រ​លោក​តាំង​ពី​លោក​ចូល​ធ្វើ​នយោបាយ​ក្នុង​ឆ្នាំ​១៩៩៣។ នៅ​ឯ​តុលាការ​កាលពី​ថ្ងៃ​ព្រហស្បតិ៍ លោក អាង ឧត្តម បាន​មាន​ប្រសាសន៍​​ថា លោក កឹម សុខា ត្រូវ​បាន​ចោទ​សួរ​អំពី​ផ្នែក​មួយ​នៃ​វីដេអូ​ ត្រង់​កន្លែង​ដែល​លោក​ហាក់ដូចជា​និយាយ​ថា​ «មុន​នឹង​ប្តូរ​ខាង​លើបាន យើង​ត្រូវ​គាស់ខាង​ក្រោម​សិន​»

លោក កឹម សុខា អតីត​ប្រធាន​គណបក្ស​សង្គ្រោះ​ជាតិ ត្រូវ​បាន​តុលាការ​រក​ឃើញ​ពិរុទ្ធភាព​ពី​បទ​ក្បត់​ជាតិ ហើយ​ត្រូវ​បាន​កាត់​ទោស​ឲ្យ​ជាប់​ពន្ធនាគាររយៈ​ពេល​ ២៧ឆ្នាំ កាល​ពី​ខែ​មីនា ឆ្នាំ​មុន។ លោក​ត្រូវបានចាប់ខ្លួននៅឆ្នាំ២០១៧ ដែល​​តាម​ចោទ​ពីប​ទ​សមគំនិតជាមួយសហរដ្ឋអាមេរិក ដើម្បីអនុវត្តអ្វីដែលគេហៅថា បដិវត្តន៍ពណ៌ ដើម្បីផ្តួលរំលំរដ្ឋាភិបាល។ ពីរខែក្រោយមក តុលាការកំពូលបានរំលាយគណបក្សសង្គ្រោះជាតិ។

ក្រៅ​ពីការផ្តន្ទា​​ទោស​ដាក់​​ពន្ធនាគារ សាលាដំបូងរាជធានីភ្នំពេញ​បាន​ហាមឃាត់​​លោក កឹម សុខា មិនឲ្យធ្វើ​នយោបាយ​អស់​មួយ​ជីវិត។ តុលាការក៏បានហាមឃាត់លោក​មិន​ឲ្យ​ប្រាស្រ័យទាក់ទងជាមួយអ្នក​ផ្សេងទៀតក្រៅពីសមាជិកគ្រួសារបើគ្មានការអនុញ្ញាតពីតុលាការឡើយ​។

មន្ត្រីនគរបាល កងរាជអាវុធហត្ថ និងបុគ្គលិកសន្តិសុខផ្សេងទៀត បានប្រចាំការនៅក្បែរ​សាលាឧទ្ធរណ៍កាលពីថ្ងៃព្រហស្បតិ៍ ដូច​ដែល​ពួកគេបាន​ធ្វើ​អំឡុង​សវនា​ការ​ថ្ងៃទី១ កាល​ពី​ថ្ងៃទី៣០ ខែមករាដែរ។

តុលាការបានកំណត់ចំនួនមនុស្សដែលត្រូវបានអនុញ្ញាតឱ្យចូលបន្ទប់សវនាការនៅត្រឹមប្រហែល៣០នាក់ប៉ុណ្ណោះ។ អ្នកយកព័ត៌មានខេមបូចាម្នាក់បានចុះឈ្មោះ​នៅតុលាការកាលពីថ្ងៃអង្គារ ដើម្បីចូលរួមសវនាការ ប៉ុន្តែកាលពីថ្ងៃពុធមន្ត្រីតុលាការបានជូនដំណឹងដល់អ្នកសារព័ត៌មានថា គាត់នឹងមិនអាចចូលរួមសវនាការ​បានទេ ដោយសារខ្វះ​កន្លែង​​អង្គុយ។ ករណី​ដូចគ្នានេះបានកើតឡើងអំ​ឡុង​​​សវនាការលើកទី​១​កាលពីសប្តាហ៍មុនផងដែរ ដោយអ្នកយកព័ត៌មានខេមបូចាដែលបានចុះឈ្មោះរួច​ត្រូវ​បាន​មន្ត្រីតុលាការ​ប្រាប់មួយថ្ងៃមុន នៃសវនាការថាបន្ទប់ពេញ។

លោក យី សុខសាន្ត មន្ត្រីជាន់ខ្ពស់នៃអង្គការសិទ្ធិមនុស្សអាដហុក ដែលបានចូល​រួមសវនាការមាន​ប្រសាសន៍ថា លោក កឹម សុខា បានបដិសេធឆ្លើយសំណួរមួយចំនួន របស់តុលាការដោយលោកបានបញ្ជាក់ថា សំណួរ​ទាំង​នោះបានឆ្លើយ​រួចហើយក្នុង​សវនាការនៅសាលាដំបូងរាជធានីភ្នំពេញ។ លោក យី សុខសាន្ត បាន​មាន​ប្រសាសន៍​ថា លោក កឹម សុខា បាន​ស្នើ​ឲ្យ​តុលាការ​ពន្លឿន​ដំណើរការ​ជំនុំ​ជម្រះ ព្រោះ​លោក​មានសុខភាពមិន​សូវ​ស្រួល​ខ្លួន​។

លោក យី សុខសាន្ត ​មាន​ប្រសាសន៍​ថា៖ «ខ្ញុំ​គិត​ថា អ្នក​នយោបាយ​គួរ​តែ​ចរចា នោះ​គឺ​ជា​វិធី​ល្អ​ ព្រោះ​ជន​ជាប់​ចោទ [សុខា] ក៏​បាន​លើក​ឡើង​ផងដែរ​ថា មាន​តែ​ការ​ចរចា [នយោបាយ] ទើប​អាច​ដោះស្រាយ​បញ្ហា​នេះ​បាន»។

លោក សុខ ឥសាន អ្នកនាំពាក្យគណបក្សប្រជា​ជន​កម្ពុជា​ដែល​កំពុង​កាន់អំ​ណាច​មានប្រសាសន៍ថា មិនអាចមានការចរចានយោបាយជាមួយជនជាប់ចោទ កឹម សុខា បានទេ ដោយសារគាត់​ត្រូវបានកាត់ទោសពីបទក្បត់ជាតិ។

លោក​បាន​មាន​ប្រសាសន៍​ថា៖ «មិន​អាច​ទៅ​រួច​ជា​ដាច់​ខាត​សម្រាប់​មេដឹកនាំ​កាន់​អំណាច​​ទៅ​​​ចរចា​ជាមួយ​នឹង​ជន​ក្បត់ជាតិ។ បើ​​​ជាប់​គុក​ហើយ​អាច​ចរចា​បាន នោះ​វានឹង​មិនធ្វើ​ឲ្យ​សង្គម​​មានសណ្តាប់​​ក្នុង​ការ​អនុវត្ត​ច្បាប់ និង​គោរព​ច្បាប់​ទេ»។

នៅឯសវនាការកាលពីសប្តាហ៍មុន សាលាឧទ្ធរណ៍បានច្រានចោលសំណើរបស់ក្រុមមេធាវីលោក កឹម សុខា ដើម្បី​អនុញ្ញាតឱ្យលោក​ទាក់ទងមេធាវីរបស់គាត់ដោយគ្មានការអនុញ្ញាតជាមុនពីតុលាការ។ អង្គការសិទ្ធិមនុស្សអន្តរជាតិរួមមានអង្គការលើក​លែងទោស​អន្តរជាតិ​និងអង្គការ​ឃ្លាំ​មើលសិទ្ធិ​មនុស្ស​ជាថ្មីម្តងទៀតបានអំពាវនាវឱ្យមានការដោះលែងលោក កឹម សុខា ជាបន្ទាន់នៅពេលចាប់ផ្តើមសវនាការលើ​បណ្តឹង​ឧទ្ធរណ៍របស់​លោក​កាលពីសប្តាហ៍មុន។

សវនាការបន្ទាប់ត្រូវបានកំណត់ពេលនៅថ្ងៃទី២២ ខែកុម្ភៈ ដែលជាសវនាការលើកទីបីក្នុង​ចំណោម​សវនាការ​ប្រាំបួនលើ​ក​៕

ប្រែសម្រួលពីអត្ថបទភាសាអង់គ្លេស៖​ Appeal Court Questions Kem Sokha on Alleged Evidence of Treason in Melbourne Speech

885 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម