សមាគមសម្ព័ន្ធអ្នកសារព័ត៌មានកម្ពុជា

អគ្គស្នងការដ្ឋាននគរបាលជាតិកំពុងប្រមូលភស្ថុតាងបន្ថែមលើលោក កឹម ជាតិ ដើម្បីបញ្ជូនទៅតុលាការ ក្រោយចូលបំភ្លឺ

អគ្គស្នងការដ្ឋាននគរបាលជាតិ ក្នុងរាជធានីភ្នំពេញ។ រូបថតនៅថ្ងៃទី២៩ ខែធ្នូ ឆ្នាំ២០២៣។ (ខេមបូចា/ ព្រីង សំរាំង)
អគ្គស្នងការដ្ឋាននគរបាលជាតិ ក្នុងរាជធានីភ្នំពេញ។ រូបថតនៅថ្ងៃទី២៩ ខែធ្នូ ឆ្នាំ២០២៣។ (ខេមបូចា/ ព្រីង សំរាំង)

មន្រ្ដីជំនាញនគរបាលយុត្ដិធម៌កំពុងប្រមូលភស្ថុតាងបន្ថែមទៀត ដើម្បីបញ្ជូនទៅតុលាការ​តាម​ផ្លូវច្បាប់លើសំណុំរឿងលោក កឹម ជាតិ អតីតអនុរដ្ឋលេខាធិការនៃក្រសួងមហាផ្ទៃ ក្រោយ​ចូល​បំភ្លឺនៅថ្ងៃទី២៨ ខែធ្នូនេះ តាមលិខិតកោះហៅពាក់ព័ន្ធនឹង​បទ​ល្មើស​ជំរិតទារប្រាក់ យោងតាមអ្នកនាំពាក្យ​អគ្គស្នង​​ការដ្ឋាន​​នគរបាល​ជាតិ។

បើតាមលោក ឆាយ គឹមខឿន ស្នងការរងនិងអ្នកនាំពាក្យនៃអគ្គស្នងការដ្ឋាននគរបាលជាតិ ប្រាប់ ខេមបូចា នៅថ្ងៃ២៨ ខែធ្នូនេះថា ករណីលោក កឹម ជាតិ នេះ ខាងអគ្គស្នងការដ្ឋាន​បាន​ឱ្យមន្រ្ដីជំនាញប្រមូលភស្ថុតាងបន្ថែមដើម្បីមានចំណាត់ការ ប៉ុន្ដែលោកថា មិនទាន់ដឹងថា នឹង​ត្រូវមានចំណាត់បែបណានោះទេ ខណៈលោកថា ក្រោយពីប្រមូលភស្ថុតាងបាន លោក​នឹង​សុំគោលការណ៍បន្ថែមពីថ្នាក់លើ។

លោកបន្តថា លោក កឹម ជាតិ ទើបតែចូលបំភ្លឺតាមការ​កោះហៅ​របស់អគ្គស្នងការដ្ឋាន​នគរបាល​​ជាតិ​ប៉ុណ្ណោះ ដូច្នេះហើយគឺមិនទាន់ដាក់ទោសណាមួយបានទេ រង់ចាំប្រមូល​ភស្ថុតាង​សិន។ លោកបញ្ជាក់បន្ថែមថា ក្រោយនគរបាលយុត្ដិធម៌ប្រមូលភស្ថុតាង​បាន​គ្រប់​គ្រាន់​នឹងបញ្ជូនទៅតុលាការ។

អ្នកនាំពាក្យរូបនេះថ្លែងថា៖ «ថ្ងៃនេះគាត់ទើបចូលបំភ្លឺ អឹចឹងចំណាត់ការតទៅទៀត អត់ទាន់​ឆ្លើយ​ប្រាប់​ជូនបានទេ។សំខាន់ការបំភ្លឺរបស់គាត់ សំខាន់ភស្ថុតាងប្រមូលបាន ប្រមូលធាតុផ្សំ​បទល្មើសត្រឹមត្រូវ​ហើយបានយើងសុំគោលការណ៍ ចាត់វិធានការរបៀបណាទៀត អាហ្នឹង​តាម​រឿងជាក់ស្ដែង។ ខាងជំនាញដែលជានគរបាលយុត្ដិធម៌កំពុងធ្វើការ គាត់អាចមាន​មូលដ្ឋាន​អីរាយការណ៍មកយើង​អូន…។ លោកបន្ថែមថា៖«តាមនីតិវិធីច្បាប់គេមិនទុកធ្វើអីទេ គេនឹងបញ្ជូនទៅតុលាការហើយ គេប្រមូលភស្ថុតាងសិន»

កាលពីថ្ងៃទី១៥ ខែធ្នូ ឆ្នាំ២០២៣កន្លងទៅ ព្រះមហាក្សត្របានចេញរាជក្រឹត្យមួយដោយត្រាស់​បង្គាប់​បញ្ចប់មុខតំណែង លោក កឹម ជាតិ ពីអនុរដ្ឋលេខាធិការក្រសួងមហាផ្ទៃ ចាប់ពីថ្ងៃឡាយ​ព្រះហត្ថលេខាតទៅ និងមានការយល់ព្រមពីលោក ហ៊ុន ម៉ាណែត នាយករដ្ឋមន្រ្ដីផងដែរ។

នៅថ្ងៃដដែល អគ្គស្នងការដ្ឋាននគរបាលជាតិបានចេញលិខិតកោះហៅ លោក កឹម ជាតិ ជា​អនុរដ្ឋ​លេខាធិការឱ្យចូលខ្លួនបំភ្លឺនៅថ្ងៃ​ទី២៨ខែធ្នូ ឆ្នាំ២០២៣វេលាម៉ោង៨និង៣០នាទីព្រឹក នៅអគ្គស្នងការដ្ឋាននគរបាលជាតិ តាមបណ្ដឹងរបស់ក្រុមហ៊ុន ឈីវ ទីម៉ីច គ្រុប ពាក់ព័ន្ធនឹង​ការជំរិតទារប្រាក់១០ម៉ឺនដុល្លារ និងស្រា៤៨ដបពីក្រុមហ៊ុន។

ក្រោយពីលោក កឹម ជាតិ ត្រូវបានដកតំណែង លោក តាន់ សុខវិជ្ជា ត្រូវបាន លោក​នាយក​រដ្ឋមន្ដ្រី ហ៊ុន ម៉ាណែត បានចេញអនុក្រឹត្យ​ផ្ទេរសម្រួលភារកិច្ច​ពី​ប្រធានលេខា​ធិការដ្ឋាន​នៃ​គណៈកម្មាធិការជាតិប្រយុទ្ធប្រឆាំងផលិតផលក្លែងក្លាយ និងតែងតាំងជាទីប្រឹក្សា​ក្រសួងមហាផ្ទៃ ឋានៈស្មើប្រធាននាយកដ្ឋាន នៅថ្ងៃទី២៦ ខែធ្នូ ឆ្នាំ២០២៣។ 

នៅថ្ងៃទី២២ ខែធ្នូ ឆ្នាំ២០២៣ ក្រសួងមហាផ្ទៃបានចេញសេចក្ដីប្រកាសស្ដីពីការផ្ទេរភារកិច្ច​មន្រ្ដី​នគរបាលជាតិ។ ក្នុងសេចក្ដីប្រកាសមានមន្រ្ដីចំនួន៥០នាក់ពីលេខាធិការដ្ឋាននៃ​គណៈកម្មា​ធិការប្រយុទ្ធប្រឆាំងផលិតផលក្លែងក្លាយ​ដែលបង្កគ្រោះថ្នាក់មាន​ហានិភ័យ​ខ្ពស់​ដល់សុខភាព និងសុវត្ថិភាពសង្គម ឱ្យទៅបម្រើការងារនៅនាយកដ្ឋាន អង្គភាពចំណុះ​អគ្គស្នង​ការដ្ឋាន​នគរបាល​​ជាតិ​ជំនួសវិញ ដោយមានបោះត្រា និងចុះហត្ថលេខាពីលោក ស សុខា រដ្ឋមន្រ្ដី​ក្រសួងមហាផ្ទៃ។

ខេមបូចា មិនអាចសុំការបំភ្លឺបន្ថែមពីលោក ទូច សុខៈ អ្នកនាំពាក្យក្រសួងមហាផ្ទៃបានទេ​ជុំ​វិញ​​ការ​ផ្ទេរភារកិច្ចដែលក្រសួងមហាផ្ទៃបានចេញទេ ដោយទូរសព្ទចូលគ្មានអ្នកលើក។​ តែ​យ៉ាង​ណាអ្នកនាំពាក្យរូបនេះ បានថ្លែងកន្លងមកថា លោក កឹម ជាតិ ពិតជាត្រូវបាន​ព្រះមហាក្សត្រ​​ចេញ​ព្រះរាជក្រឹត្យ​បញ្ចប់តំណែងពិតមែន ក្រោយពីលោក​ កឹម ជាតិ បាន​ប្រព្រឹត្ដ​​បញ្ហាជាមួយ ក្រុមហ៊ុន ឈីវ ទីម៉ីច និងបានទារលុយ១០ម៉ឺនដុល្លារ និងស្រាជាង​៤០ដប​។ លោកបានបញ្ជាក់បន្ថែមថា ក្នុងអាណត្ដិនេះទាំងរដ្ឋាភិបាល និងក្រសួងបាន​កែ​ទម្រង់ និង​មាន​វិធានការច្រើន ក្នុងការប្រឆាំងអំពើពុករលួយក្នុងស្ថាប័នរដ្ឋ​ក្រោម​ក្រសួង​មហាផ្ទៃ។

អ្នកនាំពាក្យរូបនេះថ្លែងថា៖ «ឥឡូវស្ថិតក្នុងដៃអគ្គស្នងការនគរបាលជាតិ។ ហើយនាយកដ្ឋាន​ព្រហ្មទណ្ឌបានចេញដីកាកោះហៅគាត់ឱ្យចូលបំភ្លឺចំពោះបណ្ដឹងរបស់ក្រុមហ៊ុនមួយ ពាក់ព័ន្ធ​ការយកលុយ១០ម៉ឺនដុល្លារជាថ្នូរនឹងដំណើរក្រុមហ៊ុនវិញ»។ លោកបន្តថា៖ «ក្រសួងនឹង​ព្យាយាម​លុបបំបាត់បាតុភាពមិនល្អឱ្យអស់ពីលទ្ធភាព ក្រសួងនឹងរឹតបន្ដឹងគ្រប់ផ្នែកដើម្បី​ធានា​បាននូវភាពស្អាតស្នំ»

រូបថតលោក កឹម ជាតិ អនុរដ្ឋលេខាធិការក្រសួងមហាផ្ទៃ ដែលលោកបានផុស​ក្នុងហ៊េសប៊ុកផ្ទាល់ខ្លួនរបស់លោកនៅថ្ងៃទី៨ ខែកញ្ញា ឆ្នាំ២០២៣។

ជុំវិញរឿងផ្ទេរតំណែងរបស់ក្រសួងមហាផ្ទៃនេះ លោក អំ សំអាត នាយកចាត់ការទូទៅ​នៃ​អង្គការ លីកាដូ មើលឃើញថា នាយកដ្ឋានបង្កើតមកបង្កតែបញ្ហា និងមិនបានជួយបម្រើផល​ប្រយោជន៍​ដល់ប្រជាជនទេ ផ្ទុយបែរជាក្លាយជាកន្លែងចាប់ជំរឹតទាប្រាក់ទៅវិញ។​​

លោកបន្ដថា ការផ្ទេរភារកិច្ចនេះបង្ហាញថា នាយកដ្ឋានប្រយុទ្ធប្រឆាំងផលិតផលក្លែងក្លាយ​នៃ​ក្រសួងមហាផ្ទៃអាចនឹងមិនមានទៀតឡើយ ព្រោះមន្រ្ដីបានផ្ទេរចេញអស់។ លោកបន្ថែមថា មុន​នឹងបង្កើតនាយកដ្ឋានមួយក្រសួងគួរតែពិនិត្យថាវាចាំបាច់ទេ ព្រោះស្ថាប័នផ្សេង​ក៏គេមាន​ដែរ។

លោកបន្ដទៀតថា៖ «ខ្ញុំយល់ថា អារឿងការត្រួតពិនិត្យផលិតផលក្លែងក្លាយវាមិនមែនមានតែ​ក្រសួង​មហាផ្ទៃមួយទេ ក្រសួងផ្សេងទៀតពាក់ព័ន្ធគេក៏មានការត្រួតពិនិត្យត្រឹមត្រូវដែរ។ អ្វី​ដែល​​​សំខាន់​ការបង្កើតនាយកដ្ឋានមួយវាប្រាកដបម្រើផលប្រយោជន៍សាធារណជន​ទេ អានេះ​​​បាន​សំខាន់។មិនមែនបង្កើតមកមានបញ្ហាចុះទៅជំរិតលុយ ជំរិតអី អាហ្នឹង​មិនគួរ​ឱ្យ​មានទេ»

កាលពីថ្ងៃទី៦ ខែតុលា ឆ្នាំ២០២៣ លោក កឹម ជាតិ ត្រូវបានក្រុមហ៊ុន ឈីវ ទីម៉ីច គ្រុប បាន​ដាក់​បណ្ដឹងមកក្រសួងមហាផ្ទៃ ដោយមានលោក អ៊ូច សុភត្រា មេធាវីជាអ្នកតំណាង។ ក្នុង​ពាក្យ​បណ្ដឹងនោះបានរៀបរាប់ថា កាលពីថ្ងៃទី៥ខែវិច្ឆិកា ឆ្នាំ២០២១កន្លងទៅ ក្រុមប្រតិបត្ដិការ​របស់គណៈកម្មាធិការប្រយុទ្ធប្រឆាំងផលិតផលក្លែងក្លាយដឹកនាំដោយ លោក កឹម ជាតិ អនុរដ្ឋ​លេខាធិការ​ក្រសួងមហាផ្ទៃបានចុះមកទីតាំងផ្ទាល់ និងបានចោទថា លក់ផលិតផល​ក្លែង​ក្លាយ​​និងតម្រូវឱ្យបិទទា្វរទីតាំង។

ក្នុងលិខិតដដែលបន្ដថា លោក កឹម ជាតិបានទារប្រាក់ពីក្រុមហ៊ុនចំនួន១០ម៉ឺនដុល្លារ និង​ស្រា​៤៨ដប ជាថ្នូរនឹងការឱ្យបើកដំណើរការអាជីវកម្មឡើងវិញ។​ ក្នុងពាក្យបណ្ដឹងបានស្នើឱ្យលោក កឹម ជាតិ ប្រគល់ស្រា៤៨ដប និងលុយចំនួន១០ម៉ឺនដុល្លារមកឱ្យកូនក្ដីលោកវិញ។

លោក សយ ច័ន្ទវិចិត្ដ អ្នកនាំពាក្យអង្គភាពប្រឆាំងអំពើពុករលួយ បានលើកឡើងយ៉ាងខ្លីថា  អង្គភាពប្រឆាំងអំពើពុករលួយរង់ចាំមើលករណីនេះពីអគ្គស្នងការសិន បើរកឃើញថា វា​អំពើ​ពុករលួយស្ថាប័ននឹងចាត់វិធានការបន្ដតាមនីតិវិធីច្បាប់។

លោកថ្លែងយ៉ាងខ្លីថា៖ «យើងរង់ចាំមើលខាងអគ្គស្នងការសិន បើវាជាការប្រព្រឹត្ដអំពើពុក​រលួយ អង្គភាពយើងនឹងចាត់វិធានការ»

តាមច្បាប់ក្រមព្រហ្មទណ្ឌ មាត្រា៣៨ចែងថា​ អំពើពុករលួយគឺជាបទល្មើសដែលដាក់​ទោស​ទណ្ឌ​ទៅ​លើអំពើពុករលួយ ឬប៉ុនប៉ងពុករលួយ ប្រព្រឹត្ដដោយមន្ដ្រីនយោបាយ អ្នក​រាជការ យោធា ឬភ្នាក់ងាររបស់គណបក្សនយោបាយ។ អំពើពុករលួយទោះធ្វើឡើង​ក្រោម​ទម្រង់​សកម្ម ឬអកម្ម ដូចជាការសូកប៉ាន់ ការរំលោភមុខងារ ដើម្បីប្រយោជន៍ផ្ទាល់ខ្លួន និង​ការជំរិត​ទារប្រាក់ ត្រូវបានកំណត់ថាជាបទល្មើសនៅក្រោមបទបញ្ញាតិ្ដរបស់ក្រមព្រហ្មទណ្ឌ។

ជុំវិញរឿងនេះត្រូវបានលោក ប៉ិច ពិសី នាយកប្រតិបត្ដិនៃអង្គការតម្លាភាពកម្ពុជា បានថ្លែងថា ដើម្បីស្ដារជំនឿចិត្ដទៅលើមន្រ្ដី​សាធារណៈ ទាល់តែរដ្ឋាភិបាលអនុវត្ដច្បាប់ មិនថាមន្ដ្រីនៅ​ក្នុង​ក្របខណ្ឌក្រសួងក្ដី និងការអនុវត្ដការងារផ្សេងក្ដីគឺត្រូវបានអនុវត្ដតាមច្បាប់គតិយុត្ដិ។ លោក​បន្ដ​ថា ករណីលោក កឹម ជាតិ ជំរិតទាប្រាក់នេះគឺលោកយល់ថា ត្រូវអនុវត្ដ មិនត្រូវលើក​លែង​នោះទេ។
លោក ពិសី ថ្លែងថា៖ «បើរដ្ឋាភិបាលចង់ស្ដារទំនុកចិត្ដពីពលរដ្ឋ ពីអ្នកវិនិយោគ ពីអ្នករកស៊ី​ហ្នឹង​​គួរអនុវត្ដច្បាប់ឱ្យត្រូវ។មន្រ្ដីណាត្រូវរកឃើញថាគាត់ពាក់ព័ន្ធនឹងបទល្មើសព្រហ្មទណ្ឌក្ដី បទល្មើសរដ្ឋប្បវេណីក្ដី ត្រូវដាក់ទោស»

ករណីដោយឡែកពាក់ព័ន្ធនឹងការផ្ទេរភារកិច្ចមន្រ្ដីរាជការនេះដែរ​កាលពីថ្ងៃទី២៦ ខែធ្នូ ឆ្នាំ​២០២៣ លោក អ៊ុង រតនា ប្រធាន​មន្ទីរពេទ្យ​បង្អែក​ខេត្ត​រតនគិរី ត្រូវបាន​បណ្តាញ​ចេញពី​តួនាទី ប្រធាន​មន្ទីរពេទ្យ​ខេត្ត ដោយ​មាន​កំហុស​មិន​អាច​លើកលែង​បាន​។​ យោងតាម​របាយការណ៍​​របស់​រដ្ឋបាល​ខេត្តរ​តន​គិរី ចេញ​សេចក្តីប្រកាស​ស្តីពីការអនុវត្ត​ទណ្ឌកម្ម​ខាង​វិន័យ​ចំពោះ​មន្ត្រី​រាជការ ដោយ​បញ្ជាក់​ត្រា​ទទួលស្គាល់​ដោយ មន្ទីរ​សុខាភិបាលខេត្ត​រតនគិរី ការិយាល័យ​រដ្ឋបាល​-​បុគ្គលិក ចុះ​នៅ​ថ្ងៃទី​២៨ ខែ​១២ ឆ្នាំ​២០២៣​នេះ​។​​ ក្រោយពី​ដកលោក អ៊ុង រតនា ប្រធាន​មន្ទីរ​សុខាភិបាល នៃ​រដ្ឋបាល​ខេត្ត​រតនគិរី ដោយប្ដូរឱ្យមក​បម្រើ​ការងារ​ជា​មន្ត្រី នៅ​មន្ទីរពេទ្យបង្អែក​ខេត្ត ចំណុះ​រចនាសម្ព័ន្ធ​មន្ទីរ​សុខាភិបាល នៃ​រដ្ឋបាល​ខេត្ត​រតនគិរី​។​

នៅថ្ងៃទី០៦ ខែធ្នូ ឆ្នាំ២០២៣នេះលោក ហ៊ុន ម៉ាណែត នាយករដ្ឋមន្ត្រីនៃកម្ពុជា បានចេញ​សារ​លិខិតអបអរសាទរដល់ទិវាជាតិ និងអន្តរជាតិប្រឆាំងអំពើពុករលួយ៩ធ្នូ។ លោកបានណែនាំ​ឱ្យបន្តពង្រឹង និងពង្រីកលើការងារអប់រំ បង្ការ និងទប់ស្កាត់ជាចម្បង ព្រមទាំងការពង្រឹងការ​អនុវត្ត​ច្បាប់យ៉ាងម៉ឹងម៉ាត់ ដើម្បីបង្ក្រាបបទល្មើសអំពើពុករលួយ ។ ពង្រឹងកិច្ចសហ​ប្រតិបត្តិការរវាងអង្គភាពប្រឆាំងអំពើ​ពុករលួយ និងស្ថាប័នសាធារណៈ ជាពិសេសតាមរយៈ​យន្ត​ការជនបង្គោល ទាំងការងារអប់រំ និងការងារបង្ការទប់ស្កាត់ ដើម្បីរៀបចំដាក់ឱ្យអនុវត្ត តាមដាន ត្រួតពិនិត្យ និងវាយតម្លៃ ការអនុវត្តផែនការយុទ្ធសាស្ត្រ និងលើកកម្ពស់ភាព​ស្អាត​ស្អំ នៅតាមសា្ថប័ន​សាធារណៈ៕

1,331 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម