ប្រព័ន្ធផ្សព្វផ្សាយវីអូឌី នឹងបើកដំណើរការផ្សាយឡើងវិញនៅថ្ងៃទី២ ខែតុលា ឆ្នាំ២០២៣នេះតទៅ បន្ទាប់ពីប្រព័ន្ធផ្សព្វផ្សាយមួយនេះត្រូវបានរដ្ឋាភិបាលកម្ពុជាបិទកាលពីខែកុម្ភៈដើមឆ្នាំនេះ យោងតាមសេចក្តីប្រកាសព័ត៌មានដែលផុសនៅលើទំព័រហ្វេសប៊ុក វីអូឌី ខែ្មរ។
យោងតាមបណ្តាញសង្គមផ្លូវការវីអូឌី (VOD Khmer) បានចេញផ្សាយសេចក្តីប្រកាសព័ត៌មានកាលពីថ្ងៃអង្គារ ស្តីពីការចាប់ផ្តើមដំណើរការផ្សាយព័ត៌មានសំឡេងប្រជាធិបតេយ្យវីអូឌី ឡើងវិញ។ ដែលសេចក្តីប្រកាសបានបញ្ជាក់ថា កម្មវិធីផ្សាយព័ត៌មានសំឡេងប្រជាធិបតេយ្យវីអូឌី នឹងចាប់ផ្តើមផ្សាយចាប់ពីថ្ងៃច័ន្ទ ទី២ ខែតុលា ឆ្នាំ២០២៣នេះតទៅ។
សេចក្តីប្រកាសព័ត៌មានដដែល បានបញ្ជាក់ថា៖ «រាល់ប្រតិបត្តិការផ្សាយព័ត៌មានរបស់វីអូឌី នឹងធ្វើឡើង ពីទីស្នាក់កណ្តាលរបស់ខ្លួន នាទីក្រុងតាកូម៉ា នៃរដ្ឋវ៉ាស៊ិនតុន សហរដ្ឋអាមេរិក»។
បន្ទាប់ពីប្រព័ន្ធផ្សព្វផ្សាយមួយនេះ ត្រូវបានរដ្ឋាភិបាលបញ្ជាឱ្យបិទការផ្សាយ តាំងពីថ្ងៃទី១៣ ខែកុម្ភៈ ឆ្នាំ២០២៣ ដោយមូលហេតុចុះផ្សាយអត្ថបទអំពីលោកហ៊ុន ម៉ាណែត។
លោក ប៉ា ងួនទៀង អតីតនាយកប្រតិបត្តិនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) និងជាប្រធានប្រព័ន្ធផ្សព្វផ្សាយប្រជាធិបតេយ្យ (VOD)បើកឡើងវិញនៅសហរដ្ឋអាមេរិក ដែលបច្ចុប្បន្នកំពុងរស់នៅក្នុងទឹកដីសហរដ្ឋអាមេរិក ថ្លែងថា ទោះបីប្រព័ន្ធផ្សព្វផ្សាយវីអូឌី ផ្សាយចេញពីក្រៅប្រទេសក៏ដោយ ក៏វីអូឌី នៅតែប្រកាន់ភ្ជាប់នូវគោលជំហរឯករាជ្យ ពិតស្មោះត្រង់ និងមានបេសកកម្មផ្តល់ព័ត៌មានស៊ីជម្រៅដល់ប្រជាពលរដ្ឋគ្រប់រូប។ ការជ្រើសរើសផ្សាយចេញពីប្រទេសអាមេរិកនេះ លោកថា ព្រោះវាស្របនឹងស្ថានភាពដែលលោករស់នៅក្នុងទីនេះស្រាប់។
លោក ងួនទៀង លើកឡើងថា៖ «ទោះបីវីអូឌី មកនៅក្រៅក៏ដោយ ក៏ជំហរដើម ឥរិយាបថដើម គោលការណ៍ដើម គឺយើងអត់មានការផ្លាស់ប្តូរទេ»។
ចំពោះដំណើរការផ្សព្វផ្សាយវិញ លោកបន្តថា វីអូឌី នឹងបន្តផ្សាយដូចជាសារព័ត៌មាននៅក្រៅស្រុកផ្សេងទៀត ដែលផ្តោតជាអាទិភាពផ្សាយតាមរយៈបណ្តាញសង្គម និងថែរក្សាទម្រង់ផ្សេងៗរបស់ខ្លួន ដូចផ្សាយកាលនៅក្នុងស្រុកខ្មែរ។ ជាមួយគ្នានេះ ចំពោះបុគ្គលិក និងដំណើរប្រតិបត្តិផ្សេងៗ នឹងអនុវត្តទៅតាមគម្រោង និងលទ្ធភាពដែលវីអូឌីមាន។
លោក ងួនទៀង បន្តថា៖ «ខ្ញុំថាវាអត់មានអីពាក់ព័ន្ធជាមួយCCIMទេ ដោយសារខ្ញុំបានចេញពីCCIMផុតដាច់ហើយ។ ដូច្នេះខ្ញុំចង់ធ្វើអី ខ្ញុំមានលទ្ធភាពធ្វើអី អាហ្នឹងជារឿងរបស់ខ្ញុំ»។
ស្របពេលជាមួយគ្នានេះ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ក៏ចេញសេចក្តីថ្លែងការណ៍ ថាមិនមានជាប់ពាក់ព័ន្ធទៅនឹងដំណើរការផ្សាយឡើងវិញ របស់កម្មវិធីផ្សាយព័ត៌មានសំឡេងប្រជាធិបតេយ្យ (VOD)នោះទេ។ សេចក្តីថ្លែងការណ៍បានបញ្ជាក់ថា វីអូឌីដែលស្ថិតក្រោមការគ្រប់គ្រងរបស់ CCIM ត្រូវបានក្រសួងព័ត៌មានដកអាជ្ញាបណ្ណ កាលពីថ្ងៃទី១៣ ខែកុម្ភៈ ឆ្នាំ២០២៣ ហើយគេហទំព័ររបស់ វីអូឌី ទាំងភាសាខ្មែរ និងអង់គ្លេសត្រូវបានរាំងខ្ទប់ (Block)។
តែយ៉ាងណាលោកស្រី ឆន សុគន្ធា នាយិកាប្រតិបត្តិ នៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) បញ្ជាក់ថា លោក ប៉ា ងួនទៀង បានដាក់ពាក្យលាឈប់ពីស្ថាប័នCCIMហើយ ចំណែកខាងCCIMក៏បានដាក់ឯកសារទៅក្រសួងមហាផ្ទៃរួចរាល់ហើយដែរ ក្នុងការផ្លាស់ប្តូរតួនាទី និងថ្នាក់ដឹកនាំ។ ជាមួយគ្នានេះ លោកស្រីអះអាងថា ដំណើរការផ្សព្វផ្សាយរបស់វីអូឌីឡើងវិញនេះ ខាងមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យមិនបានពាក់ព័ន្ធអ្វីឡើយ។
លោកស្រីបញ្ជាក់ថា៖ «គឺជាសិទ្ធិរបស់លោក (ប៉ា ងួនទៀង) ហើយកន្លងមក គឺយើងអត់បានធ្វើការផ្សាយពាក់ព័ន្ធនឹងរឿងធ្វើអ្វី ដែលវាផ្ទុយជាមួយនឹងការប្រកាសរបស់ខាងក្រសួងនោះទេ»។
ជុំវិញការបើកដំណើរការសារព័ត៌មានវីអូឌីឡើងវិញនេះ កញ្ញា ឃ្លាំង គីមហួយ និស្សិតឆ្នាំទី៤ នៃសកលវិទ្យាល័យបញ្ញាសាស្ត្រកម្ពុជា(PUC) លើកឡើងថា កញ្ញាពិតជាសប្បាយចិត្តខ្លាំង ក្រោយទទួលបានដំណឹងថា វីអូឌី ប្រកាសដំណើរការឡើងវិញ ព្រោះ វីអូឌី ជាសារព័ត៌មានឯករាជ្យ និងមានវិជ្ជាជីវៈខ្ពស់។
ទន្ទឹងនឹងនេះកញ្ញា ជឿថាការបើក វីអូឌី ឡើងវិញនេះ ជាការបង្ហាញអំពីការវិវឌ្ឍវិជ្ជមានសម្រាប់សេរីភាពសារព័ត៌មាន និងសិទ្ធិទទួលបានព័ត៌មាន ព្រោះកន្លងមក វីអូឌី តែងដើរតួនាទីសំខាន់ក្នុងការផ្តល់នូវទស្សនវិស័យចម្រុះ ជាពិសេសគឺបញ្ហានយោបាយបែបស៊ីជម្រៅ និងបញ្ហាសង្គមដ៏ក្តៅគគុក។
ដោយឡែកកញ្ញាថា ការផ្សាយព័ត៌មានពីចម្ងាយអាចប្រឈមបញ្ហាបន្តិចបន្តួច ជាពិសេសការផ្តាច់ចេញពីបញ្ហាខ្លះដែលកើតមានឡើងក្នុងស្រុក ពោលគឺការពិតប្រចាំថ្ងៃ និងបញ្ហាដែលប្រជាពលរដ្ឋកម្ពុជាប្រឈមមុខ។ ជាក់ស្ដែងកន្លងមកការរាយការណ៍របស់ វីអូឌី ពិតជាមានភាពជិតស្និទ្ធទៅនឹងបរិបទផ្ទាល់។
កញ្ញាបញ្ជាក់ថា៖ «ការផ្លាស់ប្តូរទីតាំង វីអូឌី ទៅ Tacoma អាចផ្តល់នូវបរិយាកាសប្រតិបត្តិការប្រកបដោយសុវត្ថិភាព និងការចូលទៅកាន់ទស្សនិកជនកាន់តែទូលំទូលាយ តែក៏បង្ហាញពីបញ្ហាប្រឈមទាក់ទងនឹងការរក្សាទំនាក់ទំនងជាមួយបរិបទក្នុងស្រុកផងដែរ»។
លោក ម៉ុន សុកែវ ជាអតីតសិក្ខាកាម Newsroom Cambodia នៃCCIM បានលើកឡើងថា ជារឿងពិបាកសន្និដ្ឋានទុកមុនថា តើវីអូឌីនៅដើរតែដើរតួនាទីអព្យាក្រឹត និងរក្សាក្រមសីលធម៌វិជ្ជាជីវៈរបស់ខ្លួន ក្នុងការផ្តល់ព័ត៌មានជូនពលរដ្ឋដូចពីមុនឬយ៉ាងណា ព្រោះឥឡូវព័ត៌មានមួយនេះបានបើកដំណើរការឡើងវិញនៅក្រៅប្រទេស។
តែយ៉ាងណាលោកថា មានតែប្រជាពលរដ្ឋ និងអ្នកគាំទ្រវីអូឌី រង់ចាំមើលទាំងអស់គ្នាជាមួយគ្នានេះលោកថា រឹតតែលំបាកខ្លាំង គឺថាវីអូឌី មិនទាន់មានការទទួលស្គាល់ពីរដ្ឋាភិបាលបច្ចុប្បន្ននៅឡើយទេ។ នេះជាបញ្ហាប្រឈមមួយ ក្នុងការទទួលយកព៌ត័មាននៅក្នុងស្រុក ជាពិសេសអាចបាត់បង់ប្រភពពីរដ្ឋាភិបាលក្នុងការឆ្លើយតប។
លោកបន្ថែមថា៖ «វីអូឌី បានបិទការផ្សាយនៅក្នុងស្រុកខ្មែរ អ៊ីចឹងកាលណាដែលផ្សាយចេញពីខាងក្រៅមក ប្រាកដណាស់វាមិនសូវមានឥទ្ធិពលខ្លាំង នៅក្នុងការកែប្រែចំណុចណាមួយរបស់ពលរដ្ឋ ឬនៅក្នុងសង្គមទេ»។
លោក ទេព អស្នារិទ្ធ អ្នកនាំពាក្យក្រសួងព័ត៌មាន មិនអត្ថាធិប្យាយអ្វីច្រើនទេ ចំពោះដំណើរការសារព័ត៌មាន វីអូឌី ឡើងវិញ ដោយលោកថាឱ្យគោរព និងអនុវត្តតាមសេចក្តីសម្រេចរបស់ក្រសួងកន្លងមក។
លោកថ្លែងថា៖ «ក្រសួងព័ត៌មានមិនមានការអត្ថាធិប្យាយអ្វីផ្សេងទៅលើប្រធានបទមួយនេះ ក្រៅតែពីការសម្រេចកន្លងទៅ ពាក់ព័ន្ធនឹងវិទ្យុវីអូឌីហ្នឹង»។
លោក អំ សំអាត នាយកទទួលបន្ទុកកិច្ចការទូទៅនៃអង្គការឃ្លាំមើលសិទ្ធិមនុស្ស លីកាដូ (LICADHO) យល់ឃើញថា វាជាសញ្ញាល្អមួយ ព្រោះវីអូឌីអាចផ្តល់ឱកាសឱ្យពលរដ្ឋបញ្ចេញមតិ និងទុក្ខកង្វល់ផ្សេងៗ តាមរយៈបណ្តាញផ្សព្វផ្សាយនេះ។ ដោយឡែកលោកចាត់ទុកថា នេះវាជាសិទ្ធិរបស់បុគ្គលក្នុងការធ្វើអ្វីមួយ ជាមួយគ្នានេះលោកថាមិនអាចប៉ះពាល់អ្វីដល់ស្ថាប័នCCIMបច្ចុប្បន្ននោះទេ ព្រោះលោកលោក ប៉ា ងួនទៀង បានលាឈប់ពីស្ថាប័ននេះហើយ។
លោកបន្ថែមថា៖ «ខ្ញុំគិតថាវាសំខាន់ សារព័ត៌មានមួយៗ យើងមើលដូចVOD និងវិទ្យុច្រើនទៀត ដែលផ្សាយចេញក្រៅមក ប៉ុន្តែអ្វីដែលសំខាន់ គឺអ្នកសារព័ត៌មានប្រកាន់ភ្ជាប់ក្រមសីលធម៌វិជ្ជាជីវៈ អាហ្នឹងវាដូចគ្មានអ្វីប្រឈមទេ»៕
