កាលពីថ្ងៃសុក្រ រដ្ឋសភាដែលគ្រប់គ្រងដោយគណបក្សប្រជាជនកម្ពុជា ដែលកំពុងកាន់អំណាច បានអនុម័តជាឯកច្ឆន្ទតែងតាំង លោក ឌិត ទីណា អតីតរដ្ឋលេខាធិការក្រសួងរ៉ែនិងថាមពល ជារដ្ឋមន្ត្រីក្រសួងកសិកម្មថ្មី ដែលការតែងតាំងនេះគឺធ្វើឡើងមិនដល់មួយសប្តាហ៍ផង បន្ទាប់ពីលោក វេង សាខុន ត្រូវបានដកចេញពីតំណែង។
សមាជិករដ្ឋសភាទាំង១១១រូប ដែលមានវត្តមាននៅព្រឹកថ្ងៃសុក្រនេះ បានបោះឆ្នោតគាំទ្រលោក ទីណា ក្លាយជារដ្ឋមន្ត្រីបន្ទាប់ នៃក្រសួងកសិកម្ម រុក្ខាប្រមាញ់ និងនេសាទ។
លោក វេង សាខុន ត្រូវបានបណ្តេញចេញពីតំណែងជារដ្ឋមន្ត្រីក្រសួងកសិកម្ម កាលពីថ្ងៃទី៨ ខែតុលា ហើយប៉ុន្មានថ្ងៃក្រោយមក លោកត្រូវបានតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី។ ហេតុផលនៃការបណ្តេញលោកចេញមិនត្រូវបានគេបង្ហាញទេ ទោះជាយ៉ាងណាលោកនាយករដ្ឋមន្ត្រី ហ៊ុន សែន ធ្លាប់បានរិះគន់ជាចំហចំពោះការងាររបស់លោក។
ក្នុងសម័យប្រជុំពេញអង្គកាលពីថ្ងៃសុក្រ លោក ហ៊ុន សែន បានស្នើឲ្យសមាជិករដ្ឋសភាបោះឆ្នោតគាំទ្រលោក ទីណា។ លោកនឹងឡើងកាន់តំណែងថ្មី បន្ទាប់ពីព្រះមហាក្សត្រចេញព្រះរាជក្រឹត្យតែងតាំងជាផ្លូវការ។
លោក ទីណា អាយុ៤៣ឆ្នាំ បានបដិសេធសំណើសម្ភាសន៍ពីខេមបូចានៅសប្តាហ៍នេះ។
កាលពីថ្ងៃព្រហស្បតិ៍ លោកបានមានប្រសាសន៍ថា លោកនឹងមិននិយាយជាមួយអ្នកសារព័ត៌មានរហូតទាល់តែព្រះមហាក្សត្របានចេញព្រះរាជក្រឹត្យបញ្ជាក់ជាផ្លូវការពីតួនាទីរបស់លោក។
លោកបានមានប្រសាសន៍ថា៖ «ខ្ញុំសុំឲ្យលោកមើលនីតិវិធីជាមុនសិន ហើយឥឡូវនេះ បំភ្លេចឈ្មោះខ្ញុំសិន» ។
នៅថ្ងៃសុក្រដដែល ព្រះហាក្សត្របានចេញព្រះរាជក្រឹត្យតែងតាំងលោក ទីណា ជារដ្ឋមន្ត្រីផ្លូវការ។
លោក ទីណា ជាមន្ត្រីដ៏ស្មោះស្ម័គ្រគណបក្សប្រជាជនកម្ពុជា និងជាកូនប្រុសរបស់ប្រធានតុលាការកំពូល លោក ឌិត មុន្ទី ធ្លាប់បម្រើការជាអនុរដ្ឋលេខាធិការក្រសួងពាណិជ្ជកម្មពីឆ្នាំ២០០៩ ដល់ឆ្នាំ២០១៣ ហើយបន្ទាប់មកត្រូវបានដំឡើងឋានៈជារដ្ឋលេខាធិការនៅក្រសួងដដែល។ លោកបានផ្លាស់ទៅក្រសួងរ៉ែនិងថាមពលក្នុងឆ្នាំ២០១៤។
លោក ទីណា ទទួលបានសញ្ញាបត្រវិស្វកម្មរ៉ែ និងផ្នែករូបវិទ្យាពីសាកលវិទ្យាល័យនៅក្នុងប្រទេសបារាំង។
ប្អូនស្រីរបស់លោកគឺលោកស្រី ឌិត នីតា ជាអនុប្រធានសមាគមមីក្រូហិរញ្ញវត្ថុកម្ពុជា។ លោកស្រីបានរៀបការជាមួយលោក សាយ សំអាល់ រដ្ឋមន្ត្រីក្រសួងបរិស្ថាន ជាកូនប្រុសរបស់លោក សាយ ឈុំ ប្រធានព្រឹទ្ធសភា។
បន្ទាប់ពីរដ្ឋសភាបោះឆ្នោតកាលពីថ្ងៃសុក្រ លោក ថេង សាវឿន ប្រធានសម្ព័ន្ធសហគមន៍កសិករកម្ពុជាបានមានប្រសាសន៍ថា ការអភិវឌ្ឍន៍វិធីសាស្រ្តការពារដំណាំរបស់កសិករ គឺជាមធ្យោបាយដោះស្រាយបញ្ហាប្រឈមជាច្រើនក្នុងវិស័យនេះ រួមមានហេដ្ឋារចនាសម្ព័ន្ធធារាសាស្ត្រ តម្លៃទីផ្សារ ការគាំទ្របច្ចេកទេស និងទទួលបានដើមទុន។
លោក សាវឿន មានប្រសាសន៍ថា៖ «កង្វះប្រព័ន្ធធារាសាស្ត្រនៅតែជាបញ្ហាសម្រាប់កសិករតូចតាចក្នុងប្រទេសកម្ពុជា» ដោយបន្ថែមថា រដ្ឋមន្ត្រីថ្មីគួរតែបើកចិត្តនិងធ្វើការជាមួយកសិករ ក្រុមសង្គមស៊ីវិល និងភាគីពាក់ព័ន្ធក្នុងវិស័យឯកជន ដើម្បីស្វែងរកដំណោះស្រាយចំពោះបញ្ហាឧស្សាហកម្ម។
លោកបានមានប្រសាសន៍ថា៖ «វាអាស្រ័យលើការប្តេជ្ញាចិត្តរបស់គាត់ ហើយយើងចង់ឃើញរដ្ឋមន្ត្រីថ្មីសកម្មជាងនេះ។ តាមពិត លោក វេង សាខុន ក៏ជារដ្ឋមន្ត្រីដែលបានអភិវឌ្ឍវិស័យកសិកម្មប្រសើរជាងរដ្ឋមន្ត្រីមុនៗដែរ»។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានមានប្រសាសន៍ថា បញ្ហាប្រឈមចម្បងសម្រាប់ឧស្សាហកម្មបសុសត្វ គឺតម្លៃទាប។
តម្លៃសាច់ជ្រូកក្នុងស្រុកជាមធ្យម គឺទាបជាង២១.០០០រៀល (ប្រហែល 5,25 ដុល្លារ) ក្នុងមួយគីឡូក្រាម និងទាបជាងតម្លៃមធ្យមកាលពីឆ្នាំមុន គិតចាប់ពីខែមករាដល់ខែសីហា នេះបើយោងតាមរបាយការណ៍តម្លៃម្ហូបអាហារខែសីហារបស់កម្មវិធីស្បៀងអាហារពិភពលោករបស់អង្គការសហប្រជាជាតិនិងក្រសួងកសិកម្ម។
លោក ស្រ៊ុន ពៅ បានមានប្រសាសន៍ថា ដោយសារការផ្គត់ផ្គង់ជ្រូកក្នុងស្រុកមានចំនួនច្រើនជាងតម្រូវការទីផ្សារ តម្លៃបានធ្លាក់ចុះ ខណៈពេលដែលទឹកជំនន់ថ្មីៗនេះបានបង្ខំឲ្យអ្នកចិញ្ចឹមជ្រូកលក់ក្នុងតម្លៃទាប។
លោកបានបន្ថែមថា៖ «យើងពឹងលើក្រសួងកសិកម្ម។ យើងសង្ឃឹមថា រដ្ឋមន្ត្រីថ្មីនឹងយកចិត្តទុកដាក់ខ្លាំងលើវិស័យបសុសត្វ ដូចរដ្ឋមន្ត្រីមុនៗដែរ»៕
ប្រែសម្រួលពីអត្ថបទភាសាអង់គ្លេស៖ Dith Tina Approved as New Agriculture Minister