រដ្ឋមន្ត្រីថ្មីនៃក្រសួងកសិកម្មអំពាវនាវដល់ប្រព័ន្ធផ្សព្វផ្សាយរួមទាំងអ្នកសារព័ត៌មានអាជីព និង អ្នកប្រើប្រាស់បណ្តាញសង្គមហ្វេសប៊ុក កុំផ្សព្វផ្សាយព័ត៌មានមិនពិតដែលបង្កឱ្យកសិករបាក់ទឹកចិត្តមានភាពច្របូកច្របល់ជុំវិញបញ្ហាតម្លៃកសិផល ធ្វើឱ្យក្រសួងមិនអាចដោះស្រាយបញ្ហាបាន។
នៅក្នុងពិធីសំណេះសំណាលជាមួយអ្នកសារព័ត៌មាននៅថ្ងៃទី៦ ខែធ្នូ រដ្ឋមន្ត្រីក្រសួងកសិកម្ម លោក ឌិត ទីណា បានលើកឡើងថា បញ្ហាតម្លៃស្រូវកើតឡើងថ្មីៗនេះ មានការផ្សព្វផ្សាយថា តម្លៃធ្លាក់ចុះខ្លាំងគឺក្រសួងបានចាត់មន្ត្រីជំនាញឱ្យដោះស្រាយបានទាន់ពេល ប៉ុន្តែលោកថា នៅពេលជាមួយគ្នានោះ មានការផ្សព្វផ្សាយរិះគន់ខុសការពិតនាំឱ្យប៉ះពាល់ផ្លូវចិត្តកសិករ។ លោកក៏អំពាវនាវដល់អ្នកប្រើប្រាស់បណ្តាញសង្គមកុំឱ្យមានការផ្សព្វផ្សាយរបៀបនេះបន្តទៀត។
លោក ទីណា បញ្ជាក់ថា៖ «សូមឱ្យអ្នកនៅបណ្តាញសង្គមកុំបន្តនិយាយថា អត់មានអ្នកណាទៅជួយមើល អត់មានអ្នកទៅជួយដោះស្រាយបញ្ហាហ្នឹង»។
ទន្ទឹមនឹងការអំពាវនាវដល់អ្នកប្រើប្រាស់បណ្តាញសង្គមកុំឱ្យផ្សព្វផ្សាយព័ត៌មានខុសការពិតទៀតនោះ លោកក៏បានចោទសួរពីវិជ្ជាជីវៈអ្នកសារព័ត៌មានវីអូឌីផ្នែកភាសាអង់គ្លេសផងដែរ ដែលលោកថា ផ្សព្វផ្សាយខុសការពិតបន្តបន្ទាប់ពីបញ្ហាស្រូវអង្ករ និងចំណាត់ការរបស់ក្រសួងលើបញ្ហានេះ។
លោក ទីណា ថ្លែងថា៖ «បើយកពាក្យរបស់ក្រសួងចេញទៅគេថា ក ហើយយកទៅនិយាយថា ខ ហើយថា ជាសិទ្ធិនៃការបញ្ចេញមតិ អាហ្នឹងក៏ខ្ញុំទុកឱ្យសាធារណៈមតិរបស់យើងវាយតម្លៃមើលដែរថា អ្វីដែលខុសអ្វីដែលត្រូវ? ក្នុងនេះពាក់ព័ន្ធវីអូឌីជាអង់គ្លេសខ្ញុំឆ្ងល់!»។
រដ្ឋមន្ត្រីរូបនេះ ក៏បារម្ភទៀតថា ការផ្សព្វផ្សាយព័ត៌មានមិនពិតធ្វើឱ្យកសិករបាក់ទឹកចិត្តបង្កជាភាពវឹកវរហើយ ក៏ធ្វើឱ្យប៉ះពាល់ដល់ការប្រឹងប្រែងរបស់ក្រសួង។
លោក ទីណា បន្តទៀតថា៖ «ការដែលយល់ខុសមួយចំនួនវាធ្វើឱ្យដំណោះស្រាយ មិនអាចធ្វើទៅបាន បើនាំគ្នាបំភ្លៃពាក្យបំភ្លៃនូវអ្វីដែលក្រសួងណែនាំចេញមក ធ្វើឱ្យប្រជាកសិករឬសាធារណៈមតិបាត់បង់នូវទំនុកចិត្តចំពោះដំណោះស្រាយដែលកំពុងធ្វើ។ តើនេះជាចេតនាអ្វី?»។
នាយកស្តីទីមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ជាស្ថាប័នគ្រប់គ្រងលើសារព័ត៌មានវីអូឌី លោក អ៊ិត សុធឿត ថ្លែងថា លោកបានពិនិត្យលើប្រតិកម្មរបស់ក្រសួងកសិកម្ម និងអត្ថបទសារព័ត៌មានរបស់លោកកន្លងមក។ លោកបន្តថា ក្រុមការងារសារព័ត៌មានរបស់លោកបានបំពេញការងារតាមវិជ្ជាជីវៈត្រឹមត្រូវមិនដូចការចោទប្រកាន់របស់លោក ឌិត ទីណានោះទេ។
លោក អ៊ិត សុធឿត ថ្លែងថា៖ «អាហ្នឹងជាការយល់ឃើញរបស់ក្រសួងសម្រាប់យើង គឺយើង តែងតែគោរពតាមក្រមសីលធម៌វិជ្ជាជីវៈសារព័ត៌មាន»។
លោក ណុប វី នាយកសម្ព័ន្ធអ្នកសារព័ត៌មាន ខេមបូចា ថ្លែងថា ករណីវីអូឌីនេះ គឺគ្រាន់តែក្រសួងកសិកម្មយល់ខុសគ្នាពីការសរសេររបស់អ្នកសារព័ត៌មានប៉ុណ្ណោះ មិនមានអ្វីខុសឆ្គងឬ ខុសវិជ្ជាជីវៈនោះទេ។ ទន្ទឹមនឹងនេះលោក ណុប វី លើកទឹកចិត្តឱ្យក្រសួងកសិកម្មក៏ដូចជា ក្រសួងស្ថាប័នផ្សេងៗទៀត ទទួលយកមតិយោបល់ពីសាធារណជន។
លោក ណុប វី លើកឡើងថា៖ «ប្រជាពលរដ្ឋទូទៅលោកមានសេរីភាពក្នុងបង្ហាញ ក្នុងការលើកពីកង្វល់របស់គាត់ ជុំ[វិញ]ការអនុវត្តន៍សកម្មភាពការងាររបស់ក្រសួង។ ហើយខ្ញុំយល់ថា ស្ថាប័នរដ្ឋគួរតែបើកចិត្តទូលាយក្នុងការទទួលយកយោបល់ឆ្លុះបញ្ចាំងក៏ដូចជាការដាក់ចេញសកម្មភាពផ្សេងៗធ្វើឱ្យកាន់តែប្រសើរ ជាជាងយើងស្នើទៅប្រជាពលរដ្ឋកុំឱ្យរិះគន់ខ្ញុំយល់ថា អាហ្នឹងដូចជា មិនទទួលបានផលទេ»។
អ្នកនាំពាក្យសមាគមការពារសិទ្ធិមនុស្សអាដហុក លោក សឹង សែនករុណា លើកឡើងថា ការបញ្ចេញមតិ ឬការរិះគន់មិនប៉ះពាល់ដល់ដំណើរការស្ថាប័ននោះទេផ្ទុយទៅវិញជាចំណែកសំខាន់ក្នុងការជួយឆ្លុះបញ្ចាំងសកម្មភាពការងារកន្លងមក។
លោក សែនករុណា ថ្លែងថា៖ «ការបញ្ចេញមតិម្នាក់ៗមានទស្សនៈមានការយល់ឃើញរៀងៗខ្លួន។ នៅក្នុងសង្គមប្រជាធិបតេយ្យការបញ្ចេញមតិនេះសំខាន់ណាស់ព្រោះវាជាកញ្ចក់មួយឆ្លុះបញ្ចាំងទៅដល់មន្ត្រីទាំងឡាយដែលអសកម្ម ដែលមិនបានបំពេញតួនាទីរបស់ខ្លួនបានល្អ ចឹងចៀសមិនផុតទេពីការរិះគន់ហើយគប្បីមានការពិនិត្យមើលកែលម្អទៅ។ បើសិនយើងល្អ យើងត្រឹមត្រូវយើងខ្លាចអីចំពោះមតិរិះគន់»។
នៅក្នុងពិធីសំណេះសំណាលជាមួយអ្នកសារព័ត៌មានកាលពីថ្ងៃទី៦ ខែធ្នូ នោះ លោក ឌិត ទីណា ក៏បានបញ្ជាក់ដែរថា លោកស្វាគមន៍មតិយោបល់បើសិនជាលោកមានកំហុស ប៉ុន្តែលោកថា កន្លងមកលោកមិនមានកំហុសតែការផ្សព្វផ្សាយខុសការពិត។
លោក ទីណា ឱ្យដឹងថា៖ «ជាទូទៅខ្ញុំធ្វើការងារក្នុងបណ្តាញសង្គមជាមួយគ្នា និងសារព័ត៌មានទាំងអស់ [អ៊ី]ចឹងការទទួលយកធាតុចូលត្រឡប់មកវិញក៏សំខាន់សម្រាប់ខ្ញុំដែរ។ ខ្ញុំអាននូវខំមិន ខ្ញុំទទួលនូវអ្វីដែលជាការផ្តល់ធាតុចូលមកវិញ ហើយខ្ញុំពិចារណាទាំងអស់ បើសិនជាមកដល់ថ្ងៃនេះមានអ្វីខ្ញុំធ្វើជាកំហុសខ្ញុំនឹងកែ។ ប៉ុន្តែមកដល់ថ្ងៃនេះខ្ញុំមិនទាន់ឃើញទេ ឃើញតែការចោទដោយផ្អែកលើព័ត៌មានគ្មានមូលដ្ឋាន»។
លោក ងៀប តៃសុង ជាកសិករដាំបន្លែនៅស្រុកស្អាងខេត្តកណ្តាល បានផ្សព្វផ្សាយលើបណ្តាញសង្គមហ្វេសប៊ុករបស់ខ្លួនកាលពីឆ្នាំ២០២១ ពីបញ្ហាបន្លែមិនមានទីផ្សារ ហើយត្រូវភ្ជួរចោល។ ពេលនោះ ត្រូវមន្ត្រីមន្ទីរកសិកម្មខេត្តកណ្តាល និងអាជ្ញាធរមូលដ្ឋាន បានចុះទៅសួរណែនាំដល់ផ្ទះ និងឱ្យធ្វើកិច្ចសន្យាឱ្យឈប់ផ្សព្វផ្សាយរបៀបនេះបន្តទៀត។
លោក តៃសុង បន្តថា ក្រោយការដែលមន្ត្រីចុះដល់ផ្ទះហើយឱ្យធ្វើកិច្ចសន្យាឈប់ផ្សព្វផ្សាយបញ្ហាបន្លែគ្មានទីផ្សារកាលពីពាក់កណ្តាលឆ្នាំ២០២១នោះ ធ្វើឱ្យអ្នកភូមិមានការភ័យខ្លាចខ្លាំង។
លោក តៃសុង បន្ថែមថា៖ «គាត់ធ្វើចឹងធ្វើឱ្យប្រជាពលរដ្ឋដែលគាត់អត់សូវយល់ដឹងគាត់ខ្លាច។ សូម្បីតែរឿងខ្ញុំដែលកើតឡើង តាំងពីមុនមកក៏ដោយ ហើយបច្ចុប្បន្នមានបន្លែជន់ច្រើនក៏គាត់អត់ហ៊ានផុសដែរគាត់ខ្លាចបាក់តែម្តង»។
កាលពីខែវិច្ឆិកាកន្លងទៅ នគរបាលនៃស្នងការដ្ឋាននគរបាលខេត្តបន្ទាយមានជ័យបានកោះហៅមន្ត្រីនៅសាលាស្រុកស្វាយចេកម្នាក់ឈ្មោះលោក អឿន ធី យកទៅសួរនាំហើយតម្រូវឱ្យចុះកិច្ចសន្យាឈប់ផ្សព្វផ្សាយរិះគន់តាមហ្វេសប៊ុកជុំវិញបញ្ហាតម្លៃស្រូវចុះថោក។ កាលពីខែសីហា ឆ្នាំ២០២១ តុលាការខេត្តបាត់ដំបងបានកាត់ទោសយុវជនម្នាក់ឈ្មោះ ងួន លី ឱ្យជាប់ពន្ធនាគារ១០ខែ ជុំវិញការផ្សព្វផ្សាយថា រដ្ឋាភិបាលឱ្យបេះមៀនពីចម្ការហើយបែរជាមិនទិញពីកសិករ៕
