សមាគមសម្ព័ន្ធអ្នកសារព័ត៌មានកម្ពុជា

ជ្រូកក្នុងស្រុកឡើងថ្លៃបន្តិចក្រោយស្ថាប័នពាក់ព័ន្ធស្វះស្វែងរកដំណោះស្រាយ

បំណែកសាច់ជ្រូករបស់អាជីវករដាក់លក់នៅក្នុងផ្សារអូរឫស្សី រាជធានីភ្នំពេញ នៅថ្ងៃទី១៧ ខែមករា ឆ្នាំ២០២៤។ (ខេមបូចា/ អាន វិចិត្រ)
បំណែកសាច់ជ្រូករបស់អាជីវករដាក់លក់នៅក្នុងផ្សារអូរឫស្សី រាជធានីភ្នំពេញ នៅថ្ងៃទី១៧ ខែមករា ឆ្នាំ២០២៤។ (ខេមបូចា/ អាន វិចិត្រ)

សមាគមអ្នកចិញ្ចឹមសត្វកម្ពុជាឱ្យដឹងថា តម្លៃជ្រូកនៅក្នុងប្រទេសចាប់ផ្តើមឡើងថ្លៃជាបន្តបន្ទាប់ ក្រោយមានការស្វះស្វែងចរចារវាងស្ថាប័នរដ្ឋ និងវិស័យឯកជន ទោះយ៉ាងណាកសិករមួយចំនួន អះអាងថា ពួកគេនៅតែត្រៀម​ខ្លួន​បិទទ្រុងឈប់ចិញ្ចឹម ព្រោះមិនអាចទប់ទល់ចំពោះការខាតបង់រួច។

កាលពីចុងឆ្នាំ២០២៣សមាគមអ្នកចិញ្ចឹមសត្វកម្ពុជាបានស្វះស្វែងរកកិច្ចអន្តរាគមន៍ពីស្ថាប័នចំនួន៥រួមមាន ក្រសួងកសិកម្ម ស្ថាប័នគយ ក្រសួងពាណិជ្ជកម្ម សភាពពាណិជ្ជកម្ម និងក្រសួងសេដ្ឋកិច្ច។ គោល​បំណងនៃការជួបនេះសមាគមតំណាងឱ្យអ្នកចិញ្ចឹមសត្វនៅក្នុងស្រុកស្នើឱ្យផ្អាក នាំចូល​សាច់​បង្កក ដើម្បីជួយសុខភាពអ្នកបរិភោគ និងលើកកម្ពស់ជីវភាព អ្នកចិញ្ចឹមសត្វ នៅក្នុងស្រុក។  

រហូតដល់ថ្ងៃទី១២ខែមករា ឆ្នាំ២០២៤ ក្រសួងកសិកម្ម និងក្រសួងពាណិជ្ជ បានធ្វើសេចក្តីជូន​ដំណឹង​រួមគ្នាអំពីការផ្អាកនាំចូលគ្រឿងក្នុង និងបំណែកសាច់បង្កកចំនួន៨ប្រភេទ។ សេចក្តីជូនដំណឹងនេះ ចាប់អនុវត្តន៍រយៈពេល៦ខែគឺចាប់ពីថ្ងៃទី១២ខែមីនា ដល់ថ្ងៃទី១២ ខែកញ្ញា ឆ្នាំ២០៤។

ទន្ទឹមនឹងការសម្រេចរបស់ក្រសួងពាក់ព័ន្ធនេះ ប្រធានសមាគមអ្នកចិញ្ចឹមសត្វកម្ពុជា លោក ស្រ៊ុន ពៅ ក៏បានអំពាវនាវដល់អ្នកចិញ្ចឹមនៅក្នុងប្រទេសមានការអត់ធ្មត់ និងរក្សាជំហរចរចាដំឡើងថ្លៃ​សត្វ​ចិញ្ចឹមជាមួយឈ្មួញ។​

លោកស្រ៊ុន ពៅ ឱ្យដឹងថា គិតមកត្រឹមថ្ងៃទី១៦ ខែមករា តម្លៃជ្រូកនៅតាមតំបន់មួយចំនួនបន្ត​ឡើង​ម្តងបន្តិចៗជាប្រចាំ។

លោក ស្រ៊ុន ពៅ ថ្លែងឱ្យដឹងថា៖«ឡើងដល់ម៉ង វាអត់ទៅរួច។ ហ្នឹងហើយអ៊ីចឹង! បានសេចក្តីថា​យើងដឹង​ហើយថាសាច់បង្កកក្នុងឃ្លាំងក៏នៅមាននៅឡើយ ហើយយើងចេះតែឡើង​១០សេនៗ ចឹង ទៅ​ណា។ បាទ! មិនដឹងជាឡើងដល់មាឃចិន-វៀតណាមនឹងបានដល់ថ្លៃដើមឬទេ? វានៅមិនទាន់​ដឹង! បានឡើង១០សេនអ៊ីចឹងទៅ វារាងត្រឹងបន្តិចទៅ ឡើង១០សេនទៀតទៅ។ អ៊ីចឹង! តាំងពីឡើង​មក​យើង​​បានជាង២០សេនដែរហើយណា៎។ អ៊ីចឹង! បានសេចក្តីថាក្នុង ១គីឡូយើងបាន១ពាន់រៀល​ហើយ។ អ៊ីចឹង! ឥឡូវ វាឡើងដល់​៧ពាន់រៀលក្នុង១គីឡូហើយ»

អ្នកឯកទេសចិញ្ចឹមសត្វកម្ពុជា លោក រស់ ឆាំងគី កត់សម្គាល់ថា ថ្លៃជ្រូកនៅតំបន់ខ្លះនៅថេរ និងតំបន់ខ្លះទៀតបានកើនឡើងបន្តិចបន្តួចនៅក្នុងអំឡុងពេលមុនចូលឆ្នាំចិននេះ។

លោក រស់ ឆាំងគី បញ្ជាក់ថា៖«ខាងកោះធំ នៅវិសួគ៌អីឡើងមក៧០[៧ពាន់] កាលអាទិត្យមុនគេ​ឱ្យគាត់៦៥[៦ពាន់៥រយរៀល]អត់មកចាប់ទេ។ ដល់ឥឡូវឱ្យតម្លៃ៧០ ហើយគេឧស្សាហ៍​តេមកសួរ​ជ្រូក​នេះលក់អត់ៗ? ចឹង! គាត់ក៏ផ្អាកលក់សិនទៅ។ គាត់រង់ចាំមើលប្រហែល​ជាកន្លះខែអីទៀត​បាន​គាត់លក់អ៊ីចឹងហា៎។ អ្វីដែលយើងអាចនឹងជាក់លាក់ពិតប្រាកដលុះត្រាតែផុតចូលឆ្នាំចិន ព្រោះជា​ទូទៅវាអាចនឹងទំនោរឡើងនេះ វាអាចស្របពេលជាមួយនឹងកៀកចូលឆ្នាំចិនដែរ។ អ៊ីចឹង! ឈ្មួញគេអាចដើរកក់ជ្រូកទុក»

បើតាមលោក រស់ ឆាំងគី និងលោក ស្រ៊ុន ពៅ តម្លៃជ្រូករស់ប្រែប្រួលនេះ គឺស្ថិតនៅចន្លោះ ១គីឡូ៦ពាន់​ទៅ៧ពាន់រៀល។ តម្លៃនេះអ្នកចិញ្ចឹមសត្វនៅតែខាតច្រើនគឺ អ្នកចិញ្ចឹមជ្រូកអាច ចំណេញបានលុះត្រាជ្រូករស់ថ្លៃមួយគីឡូក្រាមលក់បានចន្លោះ​​​ពី៩ពាន់ទៅ១ម៉ឺន​១ពាន់រៀល។

កសិករមួយចំនួនបានសាទរចំពោះវិធានការរបស់រដ្ឋាភិបាល និងការឡើងថ្លៃជ្រូករស់ឡើងវិញនេះ ប៉ុន្តែកសិករមួយចំនួនទៀតថា មិនមានសង្ឃឹមហើយត្រៀមបិទទ្រុងឈប់ ចិញ្ចឹមព្រោះខាតបង់ ច្រើនពេក។

កសិករនៅខេត្តកណ្តាលម្នាក់គឺ លោក ណូន ដើង ឱ្យដឹងថា លោកនៅសល់ជ្រូកសាច់​ប្រមាណ​៣០ក្បាល​នៅក្នុងទ្រុង។ លោកបានសាទរ ហើយបង្ហាញក្តីសង្ឃឹមថា បើរដ្ឋាភិបាលអនុវត្តន៍​វិធានការ​​ទប់ស្កាត់ការនាំចូល សាច់បង្កកមានប្រសិទ្ធភាពនោះជីវភាពលោក​និងកសិករ​ផ្សេង​ទៀត​នឹងបានប្រសើរ។

លោក ណូន ដើង ថ្លែងបង្ហាញពីអារម្មណ៍ថា៖«ខ្ញុំបើសិនថា រដ្ឋាភិបាលគាត់បិទ អាហ្នឹងខ្ញុំអាចនឹង​សង្ឃឹមថា ជ្រូកអាចនឹងឡើងបាន ប្រជាពលរដ្ឋយើងបានរស់ខ្លះ ហើយបើសិននៅ​បង្ហៀរចូល​ប្រជាពលរដ្ឋ​ដឹងតែសូន្យម៉ង។ ខ្ញុំសង្ឃឹមថាសូន្យម៉ង»

កសិករចិញ្ចឹមជ្រូកនៅខេត្តកំពង់ធំ អ្នកស្រី អែម ណុំ ឱ្យដឹងដែរថា គាត់ជួបបញ្ហាជ្រូកថ្លៃទាប​នេះ​២ឆ្នាំ​មក​ហើយ ដូច្នេះមិនទាន់ហ៊ានសង្ឃឹមថា យ៉ាងណាចំពោះចំណាត់ការរបស់រដ្ឋាភិបាលនេះទេ។

អ្នកស្រី អែម ណុំ ឱ្យដឹងបន្ថែមថា៖«អ្នកយកលុយរដ្ឋ[គ្រឹះស្ថានមីក្រូហិរញ្ញវត្ថុ និងធនាគារ]ចិញ្ចឹម​ជ្រូក ពេលលក់ជ្រូកវាថោក។ វាថោកចឹងម៉េចបានលុយសងគេគ្រប់។ ហ្នឹងហើយបានថាអ្នកចិញ្ចឹម​យកលុយរដ្ឋ​[គ្រឹះស្ថានមីក្រូហិរញ្ញវត្ថុ និងធនាគារ] បាត់ខ្លួនអស់។ លក់ជ្រូកអត់បានបង់ធនាគារគ្រប់ [ហើយ]មិនបាត់! គោក៏ថោក ជ្រូកក៏ថោក មិនដឹងរកស៊ីអី? ទំនិញចិនឡើង។ មិនដឹងសង្ឃឹមមិន​សង្ឃឹម បើ២ឆ្នាំទៅហើយ មិនឃើញមានឡើង»

កសិករចិញ្ចឹមជ្រូកម្នាក់ទៀតនៅខេត្តកំពតអ្នកស្រី តី អ៊ីវ ឱ្យដឹងថា រូបគាត់ចិញ្ចឹមជ្រូកជាង១០ឆ្នាំ ហើយ​​ធ្លាប់ស្រម៉ៃថា នឹងពង្រីកមុខរបរនេះឱ្យធំ។ ប៉ុន្តែអ្នកស្រីថា ប៉ុន្មានឆ្នាំចុងក្រោយនេះ ខាតបង់​ច្រើនធ្វើឱ្យអ្នកស្រីជំពាក់បំណុល និងបាក់ទឹកចិត្ត។

អ្នកស្រី តី អ៊ីវ បញ្ជាក់ថា៖«ឥឡូវគ្រូឯងគិតមើល បើសិនគាត់លើកស្ទួយតែខាងរបស់គេ ហើយខាង​ខ្មែរ​យើងមួយៗចិញ្ចឹមខាត មួយៗចិញ្ចឹមខាត លោកគ្រូឯងមានចំណាប់អារម្មណ៍ណាចិញ្ចឹម? សូម្បី​តែ​ខ្ញុំក៏អស់ទឹកចិត្តដែរ បាក់ទឹកចិត្តហើយជំពាក់គេរាប់ពាន់ ហើយមិនបាក់ទឹកចិត្ត?  ឃើញអត់? ហើយ​​បើសិន​ជាយើងលើកស្ទួខាងហ្នឹងបាន[សាច់ក្រៅស្រុក] បានតែនាំ[សាច់]ស្រុកគេមក​ហើយចុះ​[សាច់]​ស្រុកយើង បានអី? អ្នកចិញ្ចឹមគ្នាបានអីលោកគ្រូ?»

ប្រជាពលរដ្ឋម្នាក់កំពុងធ្វើចរាចរណ៍តាមផ្លូវកាត់មុខអគ្គនាយកដ្ឋានសុខភាពសត្វ និងផលិតកម្មសត្វ ក្នុងរាជធានីភ្នំពេញ ថ្ងៃទី៥ ខែមករា ឆ្នាំ២០២៤។ (ខេមបូចា/ អាន វិចិត្រ)

ជាមួយគ្នានេះអ្នកចិញ្ចឹមជ្រូកនៅខេត្តកំពង់ឆ្នាំង លោក សុខ សុវណ្ណ ឱ្យដឹងថា បច្ចុប្បន្នលោក​បន្ថយ​ជ្រូក មេពី៤០ក្បាលមកត្រឹម១០​ក្បាល ចំណែកជ្រូកសាច់សល់ ជាង ១០០ក្បាល។ លោកបន្តថា លោក​មាន​រោងម៉ាស៊ីនកិនស្រូវ មានកន្ទក់ និងចុងអង្ករខ្លួនឯងខ្លះសម្រាប់​ជាចំណីជ្រូកនៅតែ​ទប់​ទល់​នឹងការខាតបង់មិនបាន។

លោក សុខ សុវណ្ណ ឱ្យដឹងថា តម្លៃជ្រូកនៅតំបន់លោកស្ថិតនៅក្នុងរង្វង់១គីឡូជាង៦ពាន់រៀល បន្តិច។ លោកបារម្ភថា តម្លៃជ្រូកនឹងធ្លាក់ចុះកាន់តែខ្លាំងក្រោយបុណ្យចូលឆ្នាំចិនរួច។

លោក សុខ សុវណ្ណ លើកឡើងពីក្តីបារម្ភថា៖«ឥឡូវនេះអ្នកដែលទ្រុងធំៗគេចិញ្ចឹមធំហ្នឹង ដល់ពេល​លក់​បិទសាប៊ូគូទម៉ង។ បិទឈប់ចិញ្ចឹមបណ្តោយ។ បិទរោង។ បាទ! បើសិនជាក្រោយ​ពីផុតសែន​ចិន​ខែ២នេះទៅ បើជ្រូកនៅតែមិនឡើងទៀត [នឹង]បិទអស់ហើយអ្នកចិញ្ចឹមជ្រូកនោះ»

ពេទ្យសត្វ និងជាអ្នកចិញ្ចឹមជ្រូកនៅខេត្តតាកែវលោក  សឿ ម៉ៅ ឱ្យដឹងថា លោកមានសមត្ថភាព បន្ថយ​ការ​ចំណាយតាមរយៈធ្វើចំណីខ្លួនឯង និងមានបច្ចេកទេសបន្ថយថ្នាំព្យាបាល។ ប៉ុន្តែលោកថា នៅតែមិនអាចទប់ទល់បានដែលបច្ចុប្បន្នលោកបន្ថយជ្រូកពីជិត៣រយក្បាលមកត្រឹមជាង១រយ​ក្បាល​តែប៉ុណ្ណោះ។

លោក សឿ ម៉ៅ បន្តថា តម្លៃជ្រូកនៅក្រោម៧ពាន់ក្នុងគីឡូក្រាមហើយ នៅមិនមានអ្នក ទៅទិញ ទៀត​។  កសិករនៅខេត្តតាកែវរូបនេះលោក មានគម្រោងលក់ជ្រូកដែលនៅសេសសល់ ហើយ​បិទ​ទ្រុង ឈប់បន្តរបរដែលលោកធ្លាប់ធ្វើជិត១០ឆ្នាំមកនេះ។

លោក សឿ ម៉ៅ បន្ថែមថា៖«កាលខ្ញុំនៅខាងគ្រួសារខ្ញុំម្តាយខ្ញុំបង្កើតនោះ ខ្ញុំចិញ្ចឹម៣ឆ្នាំ ខ្ញុំមាន​ប្រពន្ធ​នេះខ្ញុំចិញ្ចឹម៤ឆ្នាំជាង។ ខ្ញុំចិញ្ចឹមមានមេ មានកន្លែងសម្រាប់មេបំបៅដោះកូន ខ្ញុំចិញ្ចឹម​មិន​មែន​ដូច​កសិករឯណា។ ខ្ញុំចំណាយអស់ហ្នឹងអស់ច្រើនណាស់ បើយើងស្ថានភាព​អ៊ីចេះយើងតស៊ូ​ទៅ​ណា​ទៀត​មានតែបោះបង់។ ហើយកាត់រោងយកលក់អេតចាយ»

របាយការណ៍សមាគមអ្នកចិញ្ចឹមសត្វកម្ពុជាឱ្យដឹងថា កសិករទូទៅបិទទ្រុងឈប់ចិញ្ចឹមស្ទើរ១០០​ភាគរយ​ហើយ នៅសល់តែអ្នកចិញ្ចឹមកម្រិតកសិដ្ឋានធំៗ។  អ្នកចិញ្ចឹមជ្រូកលើកឡើងពីបញ្ហាតម្លៃ ចំណីនៅខ្ពស់ដដែល ប៉ុន្តែជ្រូករស់ធ្លាក់ថ្លៃបន្តបន្ទាប់២ឆ្នាំចុងក្រោយនេះ គឺតាំងពីជ្រូក១គីឡូ១ម៉ឺន ២ពាន់រៀលធ្លាក់មកត្រឹម១គីឡូ៦ពាន់រៀល។

ចំណីជ្រូកនៅលើទីផ្សារនៅតែរក្សាថ្លៃដដែលចន្លោះពី៧ម៉ឺនរៀលដល់១៤ម៉ឺនរៀលក្នុង១បេ ដែល​តម្លៃចំណីប្រែប្រួលទៅតាមអាយុជ្រូក។

បើតាមកសិករឱ្យដឹងថា ជ្រូកដែលពួកគាត់ចិញ្ចឹម គឺប្រើពេលប្រមាណ៤ទៅ៥ខែ ទើបអាចលក់ បានទម្ងន់ប្រមាណ១រយគីឡូក្រាមល្មម​លក់។  ជ្រូកបើទម្ងន់ឡើងដល់១៥០គីឡូនោះឈ្មួញហៅថា បែកខ្មាញ់ សាច់មិនល្អ ឈ្មួញមិនទិញ ឬទិញក្នុងតម្លៃថោកដោយ​ម៉ៅ​១ក្បាលឱ្យតែប្រមាណ៣០ម៉ឺន រៀលតែប៉ុណ្ណោះ។ កត្តានេះធ្វើឱ្យកសិករបង្ខំចិត្តលក់ពេលដែលជ្រូកគ្រប់អាយុ ទោះក្នុងតម្លៃ​ទាបក៏​ដោយ។

អ្នកនាំពាក្យក្រសួងកសិកម្ម លោក ឃឹម ហ្វីណង់ ថ្លែងថា វិធានការផ្អាកនាំចូលសាច់បង្កកនេះ គឺមានការសិក្សាច្បាស់លាស់ទាំងកម្រិតប្រកួតប្រជែងក្នុងស្រុក ច្បាប់ជាតិ អន្តរជាតិ​ និងសុខភាព អ្នកប្រើប្រាស់។ លោករំពឹងថា វិធានការផ្អាកនេះ នឹងជួយធ្វើឱ្យអ្នកចិញ្ចឹមសត្វនៅក្នុងស្រុកអាច​បង្កើនសមត្ថភាពប្រកួតប្រជែងជាងមុន។

លោក ឃឹម ហ្វីណង់ លើកឡើងថា៖ «ក្រសួងក៏បានជំរុញលើកទឹកចិត្តឱ្យអ្នកធ្លាប់នាំចូល បំណែក​សាច់​បង្កកពីមុនមក ងាកមកជួយគាំទ្រអ្នកផលិតក្នុងស្រុកវិញ ក្នុងស្មារតីខ្មែរជួយខ្មែរផងដែរ។ សង្ឃឹម​​ថានៅពេលដែលអ្វីមានប្រក្រតីភាពឡើងវិញ វិស័យចិញ្ចឹមសត្វនៅកម្ពុជានឹង មាន​សមត្ថភាព​ប្រកួតប្រជែងជាងពេលមុន»។ ​

អនុរដ្ឋលេខាធិការក្រសួងពាណិជ្ជកម្មលោក គឹម មាសសុខសីហា មានប្រសាសន៍ថា វិធានការផ្អាក​នាំចូលសាច់បង្កកនេះ សមត្ថកិច្ចពាក់ព័ន្ធពង្រឹងការត្រួតពិនិត្យទាំងនៅច្រកព្រំ ដែននាំចូល និង​ការ​ចែកចាយសាច់នៅតាមទីផ្សារ។​

លោក មាសសុខសីហា ថ្លែងថា៖«យើងមានវិធានការណ៍ទាំងការត្រួតពិនិត្យនៅមាត់ច្រក ទាំង​ការ​ត្រួតពិនិត្យនៅលើទីផ្សារ ក៏ដូចជាឃ្លាំងស្តុកអីហ្នឹង ហើយនៅមាត់ច្រកយើងមានសមត្ថកិច្ចត្រួត​ពិនិត្យ​គយដែលគាត់ឈរជើងនៅទីនោះ គាត់ចាំបាច់ត្រូវមានឯកសារនាំចូលត្រឹមត្រូវ មានឯកសារ​បញ្ជាក់ពីសុខាភាព បញ្ជាក់អី ពីប្រទេសដែលនាំចេញមក»

លោក ស្រ៊ុន ពៅ ឱ្យដឹងថា នៅកម្ពុជាមានតម្រូវការសាច់ជ្រូកប្រមាណ១ម៉ឺនក្បាលក្នុង១ថ្ងៃ ស្មើ​នឹង​១ពាន់តោនក្នុង១ថ្ងៃ។ លោកអំពាវនាវអ្នកចិញ្ចឹមទាំងកសិករចិញ្ចឹមលក្ខណៈគ្រួសារ និង​អ្នកចិញ្ចឹម​តាម​​ក្រុមហ៊ុនធំៗមានការអត់ធ្មត់បន្តិចទៀត ព្រោះក្រោយមានការបិទសាច់បង្កកនាំចូល ហើយ​តម្លៃ​ជ្រូកនឹងអាចប្រសើរឡើង។

អាជីវករលក់សាច់ជ្រូកនៅផ្សារអូរឫស្សីក្នុងរាជធានីភ្នំពេញ លោក វ៉ាត ប៊ុនធឿន ឱ្យដឹងថា គិតត្រឹម ថ្ងៃទី១៧ ខែមករានេះ តម្លៃសាច់លោកទិញចូលកើនឡើង១៥ភាគរយ ហើយលោកក៏លក់ចេញបន្ត​ឡើងថ្លៃដែរ។

លោកបន្តថា ការលក់ដូរបច្ចុប្បន្នចំណេញតិចតួចណាស់។ ទន្ទឹមនឹងវិធានការផ្អាកការនាំចូលសាច់បង្កកចាប់ពីថ្ងៃទី១២ ខែមីនា ខាងមុខនេះ ស្ថាប័នពាក់ព័ន្ធក៏​កំពុង​ពិនិត្យលើខ្លឹមសារអនុក្រឹត្យលេខ១៧ដែលនឹងមានការកែប្រែចំណុចមួយចំនួននៅក្នុងខែ​ឧសភា ស្តីពីការនាំចូលសាច់ ដើម្បីធានាដល់សុខភាពប្រជាពលរដ្ឋ​ និងជីវភាពអ្នកចិញ្ចឹមសត្វក្នុង​ស្រុក៕

445 views

ព័ត៌មានថ្មីៗ

អត្ថបទពេញនិយម