ពីរសប្ដាហ៍បន្ទាប់ពីសហគមន៍ជនជាតិដើមភាគតិចក្រោល បានដុតបំផ្លាញទីស្នាក់ការមួយរបស់ក្រសួងបរិស្ថាននៅក្នុងខេត្តក្រចេះ ក្រសួងបានកោះហៅអាជ្ញាធរមូលដ្ឋាននិងជនជាតិដើមភាគតិចឱ្យមកប្រជុំកាលពីថ្ងៃពុធ និងបានស្នើឱ្យសហគមន៍ជនជាតិដើមភាគតិចសុំទោស ។ ជនជាតិដើមភាគតិចតែមួយរូបគត់ដែលបានចូលរួមកិច្ចប្រជុំនេះ ។
លោក ទី ខ្លូ ជនជាតិដើមភាគតិចក្រោលដែលត្រូវបានកោះហៅឱ្យទៅប្រជុំ ប៉ុន្តែមិនបានចូលរួមកិច្ចប្រជុំនោះ បាននិយាយថា៖«[ក្រសួង]វាយក្បាលប្រជាជននឹងញញួរហើយ ហើយឱ្យប្រជាជនចេញលុយថ្លៃញញួរទៀត។ មើលទៅជនជាតិដើមភាគតិចក្រោលមិនអាចសុំទោសបានទេ»។
អ្នកភូមិជាង ៣០០នាក់បានចូលរួមនៅក្នុងការដុតបំផ្លាញទីស្នាក់ការបរិស្ថានមួយកន្លែងនៅក្នុងឃុំស្រែជិះ បន្ទាប់ពីជម្លោះរ៉ាំរ៉ៃជាច្រើនឆ្នាំរវាងសហគមន៍មូលដ្ឋាននិងមន្ត្រីក្រសួង។ ពាក្យចចាមអារ៉ាមដែលក្រោយមកត្រូវបានបញ្ជាក់ថាជាការពិត ជុំវិញការពង្រីកផ្ទៃដីតំបន់ការពារសសរស្ដម្ភសត្វតោ ៤៥០០ហិកតា បាននាំឱ្យប្រជាជនជនជាតិដើមភាគតិចក្រោលនាំគ្នាទៅដុតបំផ្លាញទីស្នាក់ការបរិស្ថាននោះ ។
អភិបាលស្រុកអូរគ្រៀងសែនជ័យ លោក ឈៀ ផល្លី បាននិយាយថា៖«ពុំមានការចាប់ខ្លួននរណាម្នាក់ទេ។ យើងគ្រាន់តែចង់ឱ្យពួកគេទទួលស្គាល់កំហុសប៉ុណ្ណោះ»។
លោក ផល្លី បានប្រាប់ ខេមបូចា ថា គោលបំណងនៃកិច្ចប្រជុំរបស់ក្រសួងគឺផ្សះផ្សាទំនាស់ ឱ្យជនជាតិដើមភាគតិចក្រោលទទួលស្គាល់កំហុសដែលពួកគាត់បានប្រព្រឹត្ត និងឈានទៅរកការព្រមព្រៀងគ្នាមួយពាក់ព័ន្ធនឹងការកសាងទីស្នាក់ការនោះឡើងវិញ ។
អ្នកនាំពាក្យក្រសួងបរិស្ថាន លោក នេត្រ ភក្ត្រា ពុំបានឆ្លើយតបនឹងសំណើសុំអត្ថាធិប្បាយឡើយ ។
លោក ឆាយ ដួងសាវុធ ប្រធានមន្ទីរបរិស្ថានខេត្តក្រចេះ បាននិយាយថា បញ្ហានេះមិនទាន់ត្រូវបានដោះស្រាយនៅឯកិច្ចប្រជុំឡើយ ដោយសារមានសមាជិកសហគមន៍ជនជាតិដើមភាគតិចក្រោលតែមួយរូបគត់ដែលបានមកចូលរួមកិច្ចប្រជុំនោះ ។
លោកបាននិយាយយ៉ាងដូច្នេះថា៖«យើងសុំឱ្យពួកគាត់មកចូលរួមប្រជុំ និងជជែកគ្នាដើម្បីដោះស្រាយបញ្ហា ប៉ុន្តែ ពួកគាត់មិនមកប្រជុំទេ ។ ដូច្នេះ យើងមិនទាន់អាចបញ្ចប់[ទំនាស់]នៅឡើយទេ»។
លោកបានប្រាប់ ខេមបូចា ឱ្យសាកសួរព័ត៌មានបន្តទៀតពីលោក ពេជ្រ តូច ដែលជាមេឃុំ ។ នៅពេលអ្នកសារព័ត៌មាន ខេមបូចា ទាក់ទងទៅរូបលោកតាមទូរសព្ទ លោក ពេជ្រ តូច បាននិយាយថា លោកមិនបានដឹងពីកិច្ចប្រជុំនេះឡើយ ។
ប៉ុន្តែ លោក ខ្លូ បាននិយាយថា លោក ពេជ្រ តូច បានប្រាប់គាត់និងសមាជិកសហគមន៍ផ្សេងទៀត កាលពីសប្ដាហ៍មុន ដើម្បីពាំនាំព័ត៌មានអំពីការកោះអញ្ជើញរបស់ក្រសួងបរិស្ថានឱ្យពួកគាត់ទៅចូលរួមប្រជុំ ដោយនិយាយថា ក្រសួងគ្រោងនឹងពិភាក្សាអំពីមូលហេតុនៃការដុតបំផ្លាញទីស្នាក់ការនិងការតវ៉ាដែលបានកើតឡើង ។ លោកបាននិយាយថា សមាជិកសហគមន៍បានសុំឱ្យលោក ពេជ្រ តូច ពាំនាំសំណើរបស់ពួកគាត់ទៅកាន់ក្រសួងបរិស្ថាន ដោយស្នើសុំឱ្យមានកិច្ចប្រជុំនៅក្នុងឃុំស្រែជិះជំនួសវិញ ។
លោក ខ្លូ បាននិយាយថា៖ «យើងមិនបានទៅប្រជុំទេ ។ [បញ្ហា]នេះទាក់ទងនឹងប្រជាជននៅក្នុងឃុំនេះទាំងមូល ប៉ុន្តែ ហេតុអ្វីបានជាហៅតែមនុស្ស ៩នាក់ទៅប្រជុំ ? វាខុសពីធម្មតា ដូច្នេះហើយ ទើបយើងសម្រេចចិត្តថាមិនទៅចូលរួមប្រជុំនោះទេ»។
លោក ខ្លូ បានប្រាប់ ខេមបូចា ថា លោក តូច បានប្រាប់ឱ្យសហគមន៍សុំទោសក្រសួងភ្លាមៗនៅក្រោយហេតុការណ៍ដុតទីស្នាក់ការនោះ ។ សមាជិកសហគមន៍បានបដិសេធការអញ្ជើញទៅចូលរួមប្រជុំ ដោយសារតែពួកគេព្រួយបារម្ភថាពួកគេនឹងត្រូវចាប់ខ្លួន ។
លោក ខ្លូ បានបន្ថែមថា៖ «ពួកយើងបារម្ភពីសុវត្ថិភាពរបស់ពួកយើង ។ បញ្ហាបានកើតឡើងនៅទីនេះ [នៅខេត្តក្រចេះ] ។ ហេតុអ្វីបានជាពួកគេហៅយើងឱ្យឡើងទៅភ្នំពេញ? អ្នកណាទៅដឹងថាពួកគេគ្រាន់តែសាកសួរយើង ឬក៏ពួកគេមិនអនុញ្ញាតឱ្យយើងត្រឡប់មកផ្ទះវិញ»។
លោក យ៉ុន អ៊ាម មន្ត្រីសម្របសម្រួលនៃអង្គការអាដហុក ប្រចាំខេត្តក្រចេះ បានប្រាប់ ខេមបូចា ថា សមាជិកសហគមន៍ជនជាតិដើមភាគតិចមិនហ៊ានទៅជួបប្រជុំជាមួយក្រសួងនៅភ្នំពេញទេ។ លោកបាននិយាយយ៉ាងដូច្នេះថា៖«ពួកគេមិនទៅ[ភ្នំពេញ]ទេ ពីព្រោះពួកគេខ្លាចត្រូវគេចាប់ខ្លួន។ ពួកគេពិតជាភ័យខ្លាចមែនទែន»។
សមាជិកសហគមន៍មួយរូបទៀត ឈ្មោះ រ៉ុន គឹមសៀន ក៏ត្រូវបានអញ្ជើញឱ្យទៅប្រជុំដែរ ប៉ុន្តែ បានសម្រេចចិត្តមិនទៅចូលរួមទេ ។ ភរិយារបស់លោកដែលសុំមិនបញ្ចេញឈ្មោះដោយខ្លាចពីសុវត្ថិភាព បានចូលរួមនៅក្នុងការតវ៉ា និងបានចោទសួរថា ហេតុអ្វីបានជាក្រសួងអញ្ជើញមនុស្សតែ៩នាក់ទៅចូលរួមប្រជុំ ខណៈដែលសហគមន៍ជនជាតិដើមភាគតិចទាំងមូលនៅក្នុងឃុំស្រែជិះពាក់ព័ន្ធនៅក្នុងរឿងនេះ ។ អ្នកស្រីបាននិយាយយ៉ាងដូច្នេះថា៖«បើមានឡានសម្រាប់ប្រជាជនក្នុងភូមិទាំងមូល យើងទៅចូលរួម។ បើយើងទៅ យើងទៅទាំងអស់គ្នា»។
សមាជិកសហគមន៍ជនជាតិដើមភាគតិចក្រោល ឈ្មោះ ស្រេម ទៀន ត្រូវបានអញ្ជើញឱ្យទៅចូលរួមប្រជុំដែរ ប៉ុន្តែ លោកបាននិយាយថា លោកមិនបានទៅចូលរួមទេ ពីព្រោះលោកមិនហ៊ាននិយាយជាមួយក្រសួងទេ ។ លោកមិនធ្លាប់ត្រូវបានគេអញ្ជើញឱ្យទៅជួបជាមួយក្រសួងបែបនេះទេ ។ លោកនិយាយថា៖ «ខ្ញុំបារម្ភ ពីព្រោះយើងរស់នៅទីនេះ ភ័យ ហើយខ្លាច។ យើងមិនដែលទៅចូលរួមប្រជុំបែបនេះពីមុនមកទេ ។ បើយើងទៅ យើងទៅទាំងអស់គ្នា»៕
ប្រែសម្រួលពីអត្ថបទភាសាអង់គ្លេស៖ Environment Ministry Asks Kraol Indigenous People to Apologize For Burning Down Building
