សមាគមសម្ព័ន្ធអ្នកសារព័ត៌មានកម្ពុជា

ហ្វេសប៊ុកលោកនាយករដ្ឋមន្ត្រី ហ៊ុន សែន ត្រូវបានផ្អាកឱ្យដំណើរការដោយពាក់ព័ន្ធនឹងការប្រើពាក្យជេរប្រមាថ ហើយលោកងាកទៅប្រើប្រាស់តេឡេក្រាមវិញ

លោកនាយករដ្ឋមន្ត្រី ហ៊ុន សែន មើលទូរសព្ទរបស់លោកកំឡុងពេលជួបសំណេះសំណាលជាមួយកម្មកររោងចក្រកាត់ដេរនៅរាជធានីភ្នំពេញ កាលពីថ្ងៃទី១៣ ខែមិថុនា ឆ្នាំ២០២៣។ (ហ្វេសប៊ុករបស់លោក ហ៊ុន សែន)
លោកនាយករដ្ឋមន្ត្រី ហ៊ុន សែន មើលទូរសព្ទរបស់លោកកំឡុងពេលជួបសំណេះសំណាលជាមួយកម្មកររោងចក្រកាត់ដេរនៅរាជធានីភ្នំពេញ កាលពីថ្ងៃទី១៣ ខែមិថុនា ឆ្នាំ២០២៣។ (ហ្វេសប៊ុករបស់លោក ហ៊ុន សែន)

ក្រុមប្រឹក្សាត្រួតពិនិត្យរបស់ក្រុមហ៊ុន Meta ដែលគ្រប់គ្រងប្រព័ន្ធសង្គមមួយចំនួនដូចជា ហ្វេសប៊ុក និងអ៊ីនស្តាក្រាម បានស្នើ​ឱ្យផ្អាកគណនីហ្វេសប៊ុក​ដែលមានអ្នកចូល​រួមជាង​១៤លាននាក់ ​និងអ៊ីនស្តាក្រាម​របស់​លោក​នាយករដ្ឋ​មន្ត្រី ហ៊ុន សែន រយៈពេល​ប្រាំ​មួយខែ​ ដោយ​សារតែ​លោក​បាន​បង្ហោះ​សុន្ទរកថា​បែប​ហិង្សា​​កាលពីដើមឆ្នាំនេះ ដោយគំរាម​ប្រើ «ដំបង» លើ​គូប្រជែង​បក្ស​ប្រឆាំង​។

ការ​សម្រេច​ចិត្ត​នេះ​ទំនង​ជា​ត្រូវ​បាន​បង្ការ​ជាមុន​ដោយ​​លោក​នាយក​រដ្ឋមន្ត្រី​ដែល​បាន​ប្រកាស​កាល​ពី​យប់​ថ្ងៃ​ពុធ​ថា លោក​នឹង​ប្រើតេឡេក្រាម​ជា​ចម្បង ​ដើម្បី​ទំនាក់​ទំនង​ជាមួយ​ប្រជាពលរដ្ឋ​​កម្ពុជា និង​ឈប់​​បង្ហោះ​តាមហ្វេសប៊ុក។

លោក ហ៊ុន សែន បានថ្លែងក្នុងតេឡេក្រាមរបស់គាត់កាលពីយប់ថ្ងៃទី២៩ ខែមិថុនា​ ថា លោកបានប្រកាសបញ្ឈប់ការប្រើប្រាស់ហ្វេសប៊ុក ដោយលើកហេតុផលថា ដោយសារ​រយៈពេលកន្លងមកមានការ​ក្លែងបន្លំគណនី​ហ្វេកប៊ុក(Facebook)របស់គាត់ជាង២០ដែលធ្វើឱ្យ​មានការភ័នច្រឡំ​​ពី​អ្នក​ប្រើប្រាស់Facebook ដូចគ្នា។ ម្យ៉ាងទៀត ​គាត់បានរកឃើញ​បណ្តាញ​ទំនាក់ទំនងដែលមានប្រសិទ្ធភាពជាងគឺបណ្តាញ​តេឡេក្រាម​(Telegram) ដែលមិនបារម្ភ​ពីការចូលលួចដូចFacebook។

លោក​ ហ៊ុន សែន លើកឡើងថា អាស្រ័យហេតុនេះ «ខ្ញុំ​សម្រេច​បញ្ឈប់ជា​ស្ថាពរពីការប្រើ​ប្រាស់Facebook ដែលមានអ្នកចូលរួមជាង១៤លាននាក់»។ លោកបន្តថា៖ «ខ្ញុំសូម​ស្នើឱ្យ​ជំនួយការខ្ញុំលុបចោលគណនីFacebook របស់ខ្ញុំភ្លាម និងប្រាប់ទៅក្រុមហ៊ុន​Facebook ឱ្យលុបឈ្មោះខ្ញុំចេញពីបញ្ជីFacebook»

លោកនាយករដ្ឋមន្ត្រីក៏បានប្រសាសន៍ព្រមានថា លោកនឹងឱ្យបិទការប្រើប្រាស់ហ្វេសប៊ុក បើសិនជាអ្នកប្រឆាំងនៅខាងក្រៅនៅតែព្រហើន ខណៈលោកជួបសំណេះសំណាល​ជាមួយ​កម្មកររោងចក្រនៅខេត្តពោធិ៍សាត់នៅព្រឹកថ្ងៃទី៣០ ខែមិថុនា​។

លោក ហ៊ុន សែន បានលើកឡើងថា៖ «បើខ្ញុំចេញបញ្ជាឱ្យបិទហ្វេសប៊ុកនៅស្រុកខ្មែរ លោកឯង​ដាច់ផ្ងារ ខ្ញុំគ្រាន់តែប្រាប់លោកឯង»។​ លោកបន្តថា៖ «ខ្ញុំគ្រាន់តែប្រដៅ​អ្នកប្រឆាំង​ដែលកំពង់សប្បាយ…..ខ្ញុំនឹងផ្តាច់ជើងអ្នកឯងប្រសិនអ្នកឯងព្រហើន ខ្ញុំនឹងឱ្យបិទហ្វេសប៊ុក​មិនឱ្យប្រើប្រាស់មួយរយៈខ្លី ឬជាស្ថាពរ»។  

ក្រុមប្រឹក្សាត្រួតពិនិត្យរបស់ក្រុម​ហ៊ុន​ Meta បានសម្រេចកាលពីថ្ងៃព្រហស្បតិ៍ថា សុន្ទរកថា​របស់លោក ហ៊ុន សែន កាលពីថ្ងៃទី៨ ខែមករា ដែលធ្វើឡើងនៅខេត្តកំពង់ចាម បានបំពាន​លើបទដ្ឋាន​សហគមន៍របស់ហ្វេសប៊ុក​ ដោយគំរាម​ប្រើអំពើ​ហិង្សាលើគូប្រជែងនយោបាយ។

លោក ហ៊ុន សែន មាន​ប្រសាសន៍​​កាល​ពី​ខែ​មករា​ថា៖​ «មាន​ជម្រើស​ពីរ៖ ទីមួយ​​គឺ​ត្រូវ​ប្រើ​វិធានការ​ផ្លូវ​ច្បាប់។ ទីពីរគឺ ប្រើដំបង។ មាន​ន័យ​ថា ខ្ញុំ​នឹង​ប្រមូល​អ្នក​គាំទ្រ​គណបក្ស​ប្រជាជន​ទាំង​អស់​ធ្វើ​បាតុកម្ម ហើយ​វាយ​អ្នក​ឯង។ តើលោកឯងចង់​បាន​មួយណា?»

ក្រុមប្រឹក្សាត្រួតពិនិត្យមិនយល់ស្របនឹងការសម្រេចរបស់ក្រុមហ៊ុន​ Meta ក្នុងការ​​រក្សាទុក​វីដេអូ​នៅលើវេទិកាសម្រាប់ជាតម្លៃនៃព័ត៌មាន ដោយនិយាយថា វិសាលភាព​​​ដែល​​លោក ហ៊ុន សែន អាចធ្វើបាន​នៅលើបណ្តាញ​សង្គមបាន​ធ្វើ​ឱ្យការគំរាមកំហែងនេះ រីករាលដាលកាន់​តែ​ទូលំទូលាយ។

សេចក្តីសម្រេចបានសរសេរថា៖ «ក្រុមប្រឹក្សាក៏មានការព្រួយបារម្ភផងដែរថា យុទ្ធនាការ​យាយី​ និងការបំភិតបំភ័យជាបន្តបន្ទាប់របស់មេដឹកនាំ​នយោបាយប្រឆាំងនឹង​ប្រព័ន្ធផ្សព្វផ្សាយ​ឯករាជ្យ និងអ្នកនយោបាយ​ប្រឆាំងអាចក្លាយជាកត្តាមួយក្នុងការវាយតម្លៃអំពី​គុណតម្លៃ​នៃ​ព័ត៌មាន ដែលធ្វើ​ឱ្យការ​បំពាន​ខ្លឹមសារ​មិនត្រូវ​បានដកចេញ ហើយ​គណនី​ចៀសផុត​ពី​ទណ្ឌកម្ម​» សេចក្តីសម្រេចបានបន្តថា៖ «អាកប្បកិរិយាបែបនេះមិនគួរត្រូវបាន​លើក​ទឹកចិត្ត​នោះទេ»

សម្រេចចិត្តរបស់ក្រុមប្រឹក្សាត្រួតពិនិត្យ​ក្នុងការរក្សា ឬកែប្រែសេចក្តី​សម្រេច​លើខ្លឹមសារ​របស់ហ្វេសប៊ុក ​គឺ​ជា​កាតព្វកិច្ច ហើយហ្វេសប៊ុក​ត្រូវតែអនុវត្តតាមការសម្រេចនេះ​ លុះត្រាតែ​ការធ្វើបែបនេះគឺជា​ការ​រំលោភ​ច្បាប់។

ក្រៅ​ពី​ណែនាំ​ឱ្យ​ផ្អាក​គណនីហ្វេសប៊ុក ​និងអ៊ីនស្តាក្រាម​របស់​លោក ហ៊ុន សែន ក្រុមប្រឹក្សា​ត្រួតពិនិត្យ​ក៏​បាន​ណែនាំ​ឱ្យ​ក្រុម​ហ៊ុន​ Meta ពិនិត្យ​មើល​គោលនយោបា​យ​ស្តីពីទំហំ​នៃព័ត៌មាន​ ដើម្បី​បំបាត់​ចោល​​ការ​អំពាវនាវ​ឱ្យ​មាន​អំពើ​ហិង្សា។

កាលពី​ខែមីនា ក្រុមប្រឹក្សាត្រួតពិនិត្យ ដែលជាក្រុមអ្នកជំនាញឯករាជ្យ​ដែលអាច​បដិសេធ​សេចក្តី​​សម្រេច​លើខ្លឹមសាររបស់ក្រុម​ហ៊ុន​ Meta បានប្រកាសថា ខ្លួននឹង​ពិចារណាការស្នើសុំ​ឱ្យលុបវីដេអូនេះ។

មិន​ដល់​២៤​ម៉ោង​ផង មុន​ការ​សម្រេច​របស់​ក្រុមប្រឹក្សាត្រួតពិនិត្យ​​ត្រូវ​បាន​ផ្សព្វ​ផ្សាយ​​ជា​សាធារណៈ លោក ហ៊ុន សែន បាន​ប្រកាស​ថា លោក​នឹង​លែង​បង្ហោះ​តាម​ហ្វេសប៊ុក​ទៀត​ហើយ។

លោក ហ៊ុន សែន បាន​អះអាងតាម​បណ្តាញ​តេឡេក្រាម​សាធារណៈរបស់​លោក​កាល​ពី​ល្ងាច​ថ្ងៃពុធ​ថា៖«បណ្តាញ​ Telegram មានប្រសិទ្ធភាពខ្ពស់​ជាងបើបៀប​ធៀប​ជាមួយ​ហ្វេសប៊ុក​។ ដូចនេះ ចាប់ពីពេលនេះទៅ ខ្ញុំផ្សាយចេញ​នូវ​ព័ត៌មាន រាប់​ទាំងការផ្សាយផ្ទាល់ តែតាម​បណ្តាញ​ Telegram ​ប៉ុណ្ណោះដែល​ពេល​នេះ​ មាន​ជាង ៨៥ ០០០នាក់បាន​ភ្ជាប់​រួច​ហើយ​»

លោក​នាយករដ្ឋមន្ត្រីបានបញ្ជាក់​ឡើងវិញពីគោលបំណង​របស់លោក​នៅក្នុងសុន្ទរកថា​នៅព្រឹក​ថ្ងៃព្រហស្បតិ៍ ដោយបន្ថែមថា ការប្រើប្រាស់តេឡេក្រាម​នឹងធ្វើ​​​ឱ្យលោកងាយ​ស្រួល​​ទំនាក់ទំនងជាមួយប្រជាពលរដ្ឋ​នៅពេល​លោក​ធ្វើ​ដំណើរ​ទៅ​ប្រទេសមួយចំនួន​ដែលមិន​អនុញ្ញាត​ឱ្យ​ប្រើហ្វេសប៊ុក​ ដែល​ទំនងជា​សំ​ដៅដល់​ប្រទេសចិន។

លោក​មាន​ប្រសាសន៍ថា៖ចាប់ពីពេលនេះទៅខ្ញុំនឹងមិនប្រើFacebookទៀតទេ ពិតមែនតែខ្ញុំទុកFacebook ប៉ុន្តែខ្ញុំមិនបង្ហោះឬផ្តល់ព័ត៌មានតាមFacebookទេ។

ក្រោយ​ការ​ថ្លែង​របស់​លោក លោក ហ៊ុន សែន បាន​បង្ហោះ​លើ​ហ្វេសប៊ុក​ចំនួន​ពីរ​លើក​​គិត​ត្រឹម​ថ្ងៃ​ព្រហស្បតិ៍​នៅ​ម៉ោង៦ល្ងាច។

លោកនាយក​រដ្ឋមន្ត្រី​ គឺជា​អ្នក​ប្រើ​ហ្វេ​ស​ប៊ុ​ក​ច្រើន​ ហើយ​បាន​ផ្សព្វផ្សាយ​​មួយ​ផ្នែក​ធំ​នៃ​ព័ត៌មាន​​របស់​រដ្ឋាភិបាល​តាម​បណ្តាញ​សង្គម​​នេះ​។ ជារឿយៗ លោក​ឆ្លើយតបនឹងសំណួរ ឬបណ្តឹង​របស់​ប្រជាពលរដ្ឋតាមរយៈការ​ផ្តល់​មតិយោបល់​តា​មហ្វេសប៊ុក​របស់លោក​ និងលើកទឹកចិត្ត​ឱ្យប្រជា​ពលរដ្ឋ​បង្ហាញ​ពី​ទុក្ខលំបាក​របស់ពួកគេតាមបណ្តាញ​សង្គម​នេះ​។

ក្រៅពីការងារផ្លូវការ លោក ហ៊ុន សែន ក៏ប្រើប្រាស់ហ្វេសប៊ុក ដើម្បីបង្ហោះរូបថតផ្ទាល់ខ្លួន​របស់​លោកដូចជា​វាយកូនហ្គលហ្វ៍ ឬហែលទឹកនៅខេត្តព្រះសីហនុ និងកម្មវិធី​ផ្សាយផ្ទាល់តាម​​ទូរទស្សន៍ ឬ «ចម្រៀងសន្តិភាព»

ទោះបីជា​យ៉ាង​ណា​ ការ​និយម​ប្រើ​ប្រាស់​​ហ្វេសប៊ុក​របស់​លោក​ បានកើត​មានជាមួយ​នឹង​​ការ​ចែក​រំលែកនូវ​ភាព​​ចម្រូងចម្រាសផងដែរ​។ រដ្ឋាភិបាល​ត្រូវ​បាន​គេ​ចោទ​ប្រកាន់​ថា​ បាន​ប្រើ​បណ្តាញ​សង្គម​នេះ​ ​ដើម្បី​តាមដាន​​ប្រជាជន​កម្ពុជា ដោយ​អ្នក​ប្រឆាំង​តែងតែ​ប្រឈម​នឹង​ការ​ចោទ​ប្រកាន់​ពី​តុលាការ​ចំពោះ​ការ​បង្ហោះ​លើ​បណ្តាញសង្គមនេះ។ ប្រព័ន្ធ​​វិភាគ​តាម​បណ្តាញ​សង្គម​ក៏​បាន​បង្ហាញ​ដែរ​ថា ហ្វេសប៊ុក​របស់​លោក ហ៊ុន សែន មាន​ចំនួន​អ្នក​តាមដាន​មិន​សមាមាត្រ​មក​ពី​ប្រទេស​ដូចជា​ឥណ្ឌា និង​ហ្វីលីពីន​។

លោកនាយករដ្ឋមន្ត្រីក៏បានមាន​ប្រសាសន៍​កាលពីថ្ងៃព្រហស្បតិ៍ថា លោកពេញ​ចិត្ត​បណ្តាញ​សង្គមមួយទៀតគឺ TikTok ដើម្បីឱ្យលោកអាចទំនាក់ទំនងជាមួយយុវជនកាន់តែច្រើន។ វីដេអូ​ដំបូងនៅលើគណនី គេឃើញ​លោក​ឆែក​កាបូបរបស់​ស្ត្រីម្នាក់ ហើយបន្ទាប់មកដាក់​ស្រោម​សំបុត្រ​ចូល​ ហើយ​វីដេអូ​នេះ ត្រូវបានបង្ហោះកាលពីថ្ងៃពុធ។ គណនីនេះមានអ្នកតាមដាន​ជាង​១៨ ០០០នាក់​ គិតត្រឹមល្ងាចថ្ងៃព្រហស្បតិ៍នេះ​។

បន្ទាប់​ពី​បង្កើតគណនីថ្មី ជំនួយការលោកនាយករដ្ឋមន្ត្រីបានបង្ហោះនៅលើហ្វេសប៊ុក​ស្នើ​ឱ្យម្ចាស់គណនីឈ្មោះ Hun Sen-themed TikTok ដែលមានអ្នកតាមដានជាង ៣០០ ០០០នាក់ ទាក់ទងទៅ​លោក ដើម្បីមានឱកាសទទួល​បាន​ការងារជាជំនួយការរបស់លោក ហ៊ុន សែន។

លោក ដួង តារា ជំនួយការ​របស់​លោក ហ៊ុន សែន ដែល​ធ្វើ​ការងារ​​ជា​មួយ​​ក្រុម​ប្រព័ន្ធ​ផ្សព្វផ្សាយ​​សង្គម​បាន​មាន​ប្រសាសន៍​​ថា លោក​នឹង​មិន​ធ្វើ​អត្ថាធិប្បាយ​លើ​សេចក្តី​សម្រេច​របស់​ក្រុម​ប្រឹក្សា​ត្រួត​ពិនិត្យ​នោះ​ទេ។

លោក តារា​ បាន​មាន​ប្រសាសន៍​​កាលពី​ល្ងាច​ថ្ងៃ​ព្រហស្បតិ៍​ថា៖​ «រឿងអីដែលខ្ញុំមិនដឹង ខ្ញុំមិនអាចបកស្រាយបាន ​»

ទោះជាយ៉ាងណាក៏ដោយ លោក​ តារា ហាក់ដូចជា​ចង់​ផ្តល់ព័ត៌មាន​ច្រើន​នៅពេល​ដែល​ខេមបូចា បានជជែក​ជាមួយលោក​មុនពេលមាន​ការសម្រេចរបស់ក្រុមប្រឹក្សាត្រួតពិនិត្យ​។ លោក តារា​ បាន​មាន​ប្រសាសន៍​​ថា លោក​នាយក​រដ្ឋមន្ត្រី​ចង់​ឈប់​ប្រើ​ហ្វេសប៊ុក ​ម៉្យាង​​ដោយ​សារ​តែ​រដ្ឋាភិបាល​មិន​សប្បាយ​ចិត្ត​នឹង​គោលការណ៍​របស់ Facebook ដែល​តឹងរឹង​ពេក។

លោកមាន​ប្រសាសន៍ថា៖«ស្តង់ដារសហគមន៍ [ស្តង់ដារសហគមន៍ហ្វេសប៊ុក​] គឺតឹងរឹង។ សូម្បីតែការ​ផ្សាយពាណិជ្ជកម្មក៏តឹងតែងដែរ» ដោយលោកបាន​បន្ថែម​ថា ហ្វេសប៊ុក​​នឹងមិនអនុញ្ញាត​ឱ្យ​មាន​រូបភាព​ឈាមនៅលើវេទិការបស់ខ្លួនឡើយ។

សេចក្តី​​សម្រេច​នេះ​ធ្វើ​ឡើងរយៈ​ពេល​៣៦​ម៉ោង​មុន​ពេល​លោក ហ៊ុន សែន ដឹក​នាំ​​គណបក្ស​ប្រជាជន​ចូល​រួម​យុទ្ធនា​ការ​ឃោសនា​បោះ​ឆ្នោត ដែល​គណបក្ស​របស់​លោក​ទំនង​ជា​ឈ្នះ​។

លោក សុខ ឥសាន អ្នក​នាំពាក្យ​គណបក្ស​ប្រជាជន​កម្ពុជា មិន​ប្រាកដ​ថា ​ហេតុ​អ្វី​បាន​ជា​ហ្វេសប៊ុក​បារម្ភ​អំពី​ការ​ថ្លែង​ជាសាធារណៈ​របស់​លោក ហ៊ុន សែន នោះទេ។

លោក សុខ ឥសាន បាន​មាន​ប្រសាសន៍ថា៖ «ខ្ញុំវាឆ្ងល់ក្រុមហ៊ុនFacebookនឹងគឺថាសម្តេចលោកមានប្រសាសន៍ជាសាធារណៈនៅក្នុងវ៉ូងមហាជនប្រជាជនដែលលោកបានទៅចុះជួបសំណេះសំណាលលោកមានផ្សាយតាមFacebookរបស់គាត់ណាមូលហេតុអ្វីបានគាត់ក្រុមហ៊ុនFacebookឈឺក្បាលវិលមុខអី?»។

លោក ហេង ភក្តី អ្នកគ្រប់គ្រងគោលការណ៍សាធារណៈ Meta Cambodia បានឱ្យ​ដឹងតាម​អ៊ីម៉ែលថា លោកមិនត្រូវបានអនុញ្ញាតឱ្យនិយាយជាមួយអ្នក​សារព័ត៌​មាន​ក្នុងនាម​ក្រុមហ៊ុន​នោះទេ។

លោក ហ្វីល រ៉ូបឺតសិន នាយក​រងប្រចាំតំបន់​អាស៊ី​ នៃ​អង្គការ​ឃ្លាំ​មើល​សិទ្ធិ​មនុស្ស​បាន​ឱ្យ​ដឹងតាម​អ៊ីម៉ែល​ថា៖ «លោក ហ៊ុន សែន នាយក​រដ្ឋមន្ត្រី​កម្ពុជាទីបំផុត​​ត្រូវ​បាន​គេ​រិះគន់​​ដោយ​សារតែ​​ប្រើ​បណ្តាញ​​សង្គម ​ដើម្បី​ញុះញង់​ឲ្យ​មាន​អំ​ពើ​​ហិង្សា​លើ​គូប្រជែង​របស់​លោក​ ហើយ​លោក​ទំនង​ជា​​មិន​ចូល​ចិត្ត​នោះ​ទេ​។ នោះគឺជារឿងពិតអំពីមូលហេតុដែលគាត់គេច​ចេញ​ពីហ្វេសប៊ុក​»

លោក​បាន​មាន​ប្រសាសន៍​ថា៖ «វាពិតជា​គ្រោះថ្នាក់​ណាស់ ​ព្រោះ​​ផលប៉ះពាល់​ពិតប្រាកដ​ចំពោះ​​ពិភព​លោក​ភាគច្រើន​​កើត​ឡើង​នៅ​ពេល​ជន​​ផ្តាច់​ការ​ប្រើបណ្តាញ​​ផ្សព្វផ្សាយ​សង្គម​ ដើម្បី​ញុះញង់​ឲ្យ​មាន​អំពើ​ហិង្សា ដូច​ដែល​យើង​បាន​ឃើញ​ច្រើនលើក​​រួច​មក​ហើយ​នៅ​ក្នុង​ប្រទេស​កម្ពុជា»

គណៈកម្មការអ្នក​ច្បាប់​អន្តរជាតិដែលការព្រួយបារម្ភរបស់​ពួកគេត្រូវ​បាន​ក្រុមប្រឹក្សា​ត្រួត​ពិនិត្យ​​លើកឡើងនៅក្នុងសេចក្តី​សម្រេចរបស់ខ្លួននោះ បាននិយាយថា ខ្លួនស្វាគមន៍​ការ​ប្រកាសនេះ។ នៅក្នុងសេចក្តីថ្លែងការណ៍មួយ ស្ថាប័ននេះ​បាន​លើក​ឡើង​នៅក្នុង​សេចក្តី​ថ្លែង​ការណ៍​មួយ​ថា ខ្លួនសង្កត់ធ្ងន់ថា វេទិកាអនឡាញគួរតែមានសម្រាប់​សេរីភាព​នៃការបញ្ចេញ​មតិ ដោយគ្មានការរឹតត្បិតមិនសមហេតុផល​។

សេចក្តី​ថ្លែង​ការណ៍​នេះ​សរសេរថា៖ «ទោះជាយ៉ាងណាក៏ដោយ ការ​កម្រិត​មួយក្នុងចំណោម​ការ​កម្រិត​មួយចំនួនដែលចាំបាច់ គឺការមិនអនុញ្ញាតឱ្យមានការញុះញង់ឱ្យមានអំពើហិង្សា។ វា​មាន​សារៈសំខាន់ជាពិសេសក្នុងការដាក់កំហិត ទី​ដែលមាន​ហានិភ័យខ្លាំង​ហើយដែល​ពាក្យ​ញុះញង់របស់អ្នក​មានអំណាចដូចជានាយករដ្ឋមន្ត្រី អាចត្រូវយក​ទៅអនុវត្ត​តាម​»

ប្រែសម្រួលពីអត្ថបទភាសាអង់គ្លេស៖ ‘Facebook Prime Minister’ Taken Off Platform For Violent Speech, Hun Sen Moves to Telegram

89 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម