គណបក្សប្រជាជនកម្ពុជា បានដាក់ពាក្យប្ដឹងលោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក ដោយចោទថា បានធ្វើអត្ថាធិប្បាយដែលបង្កចលាចល និងញុះញង់ឲ្យមានការស្អប់ រើសអើងចំពោះគណបក្សប្រជាជនកម្ពុជា និងមានចេតនាធ្វើឲ្យប៉ះពាល់ដល់ការបោះឆ្នោតព្រឹទ្ធសភា នីតិកាលទី៥ ដែលនឹងប្រព្រឹត្តទៅនៅថ្ងៃទី២៥ ខែកុម្ភៈ ឆ្នាំ២០២៤ នេះបើយោងតាមពាក្យបណ្តឹង ដែលចុះផ្សាយដោយសារព័ត៌មាន Fresh News។
ក្នុងបណ្តឹងដដែលនេះ គណបក្សប្រជាជនកម្ពុជា បានស្នើសុំឲ្យតុលាការពិចារណាលើសំណើរបស់ខ្លួនដើម្បីសម្រេចចោទប្រកាន់ និងផ្ដន្ទាទោសលោក ស៊ឹង សែនករុណា តាមច្បាប់។ គណបក្សប្រជាជនកម្ពុជាក៏បានទាមទារសំណងចំនួន២ពាន់លានរៀល (ប្រមាណ៥០ម៉ឺនដុល្លារ) ផងដែរ។
មុនដាក់ពាក្យបណ្តឹងទៅសាលាដំបូងរាជធានីភ្នំពេញកាលពីថ្ងៃចន្ទ ប្រធានគណបក្សប្រជាជនកម្ពុជាបានគំរាមប្ដឹងលោក សឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក ដោយសារការធ្វើអត្ថាធិប្បាយដែលចាត់ទុកថា ជាការប្រមាថចំពោះគណបក្សប្រជាជន។
លោក ហ៊ុន សែន អតីតនាយករដ្ឋមន្ត្រី និងជាប្រធានគណបក្សកាន់អំណាចបានបង្ហោះលើទំព័រហ្វេសប៊ុករបស់លោកកាលពីថ្ងៃអាទិត្យថា គ្មានការយោគយល់ចំពោះអ្នកដែលវាយប្រហារមកលើគណបក្សនោះទេ។
លោកសរសេរថា៖ «ក្នុងការចុះផ្សាយ [ព័ត៌មាន] ក៏មានការនិយាយដោយ ស៊ឹង សែនករុណា។ ខ្ញុំសូមឲ្យមេធាវីរបស់គណបក្សសិក្សាផ្លូវច្បាប់ ដើម្បីប្តឹងម្នាក់នេះទៀត ប្រសិនបើមានមូលដ្ឋានគ្រប់គ្រាន់ខាងផ្លូវច្បាប់»។
លោកបានបន្តថា៖ «យើងសូមបញ្ជាក់ថា គណបក្សប្រជាជនកម្ពុជា មិនផ្តល់ឱកាសសម្រាប់មនុស្សណាក៏ដោយប្រមាថមើលងាយគណបក្សតទៅទៀតទេ។ យើងត្រូវរកយុត្តិធម៌សម្រាប់ខ្លួនយើងតាមផ្លូវតុលាការ»។
កាលពីថ្ងៃទី២ ខែកុម្ភៈ សារព័ត៌មាន ឌឹ ខេមបូឌា ដេលី ខ្មែរ បានចុះផ្សាយអត្ថបទមួយដោយ និយាយថា លោក សុន ឆ័យ អនុប្រធានគណបក្សភ្លើងទៀន មិនមានលទ្ធភាពសងជំងឺចិត្ត១លានដុល្លារទេ។
សារពត៌មានបានដកស្រង់សម្តីរបស់លោក ស៊ឹង សែនករុណា ដែលនិយាយថា វិវាទរបស់អ្នកនយោបាយគួរបញ្ចប់ដោយនយោបាយ មិនគួរប្រើប្រព័ន្ធតុលាការមកដោះស្រាយទេ។
លោក សែនករុណា បាននិយាយថា គណបក្សប្រជាជនកម្ពុជា គឺជា «គណបក្សមួយដែលមានធនធានថវិកាច្រើន» ដូច្នេះគណបក្សនេះគួរ «យោគយល់ដល់លោក សុន ឆ័យ»។
លោកត្រូវបានគេដកស្រង់សម្ដីបន្ថែមទៀតដែលនិយាយថា គណបក្សកាន់អំណាច «តែងតែយកតុលាការមកធ្វើជារបាំង ក្នុងការគាបសង្កត់ដៃគូនយោបាយប្រឆាំងរបស់ខ្លួន»។
លោក សែនករុណា តាមចោទបានអះអាងថា គណបក្សនយោបាយទាំងអស់គួរតែប្រើ «វិធីចាស់ទុំ ដើម្បីធ្វើការប្រកួតប្រជែងគ្នា» និង«គួរបញ្ឈប់នូវវប្បធម៌គំរាមកំហែងដៃគូនយោបាយរបស់ខ្លួន» ដើម្បីទុកជាគំរូសម្រាប់អ្នកនយោបាយជំនាន់ក្រោយ។
លោក ស៊ឹង សែនករុណា មិនអាចទាក់ទងសុំការអត្ថាធិប្បាយបានទេ។
ទោះបីជាយ៉ាងណា លោកបានបង្ហោះសារលើទំព័រហ្វេសប៊ុករបស់លោក ដោយបញ្ជាក់ថា បទសម្ភាសន៍របស់លោក «មិនបម្រើបក្សនយោបាយណាមួយនោះទេ ហើយថា លោកគ្មានចេតនាណាមួយវាយប្រហារបក្សនយោបាយណាមួយឡើយ»។ លោកថា បទសម្ភាសន៍របស់លោកក្នុងបំណងពង្រឹងការគោរពសិទ្ធិមនុស្ស ច្បាប់ យុត្តិធម៌សង្គម និងលទ្ធិប្រជាធិបតេយ្យ។
លោកបានសរសេរថា៖ «រាល់ការសម្រង់សម្តីរបស់ខ្ញុំ ទៅបន្ថែមបន្ថយ បញ្ចេញបញ្ចូលវាយប្រហារចំៗលើឈ្មោះបក្សនយោបាយណាមួយនោះ។ វាមិនមែនជាចេតនា និងគោលបំណងរបស់ខ្ញុំ [ដើម្បីប្រមាថ] នោះទេ។ ដូច្នេះខ្ញុំមិនទទួលស្គាល់ [អត្ថបទនេះ] ឡើយ»។
លោក គី តិច មេធាវីរដ្ឋាភិបាលបដិសេធមិននិយាយលម្អិត ដោយបន្ថែមថា៖ «ខ្ញុំសុំទុកជាការ រក្សាការសម្ងាត់ [ដែលស្ថិតនៅក្នុង] វិជ្ជាជីវៈមេធាវី»។
លោក សុខ ឥសាន អ្នកនាំពាក្យគណបក្សកាន់អំណាចមានប្រសាសន៍ថា មេធាវីរបស់គណបក្សកំពុងធ្វើការលើបញ្ហានេះ ដើម្បីកំណត់ថា តើការលើកឡើងរបស់គាត់ជា «ការប្រមាថចំពោះគណបក្ស ឬអត់»។
លោកបានមានប្រសាសន៍ថា៖ «នេះមិនមែនជាការគំរាមកំហែងដល់សេរីភាពនៃការបញ្ចេញមតិទេ» ដោយលើកឡើងពីមាត្រា៤១នៃរដ្ឋធម្មនុញ្ញ ដែលចែងថា សេរីភាពក្នុងការបញ្ចេញមតិមិនគួររំលោភបំពានលើសិទ្ធិនិងសេចក្តីថ្លៃថ្នូររបស់អ្នកដទៃទេ។
លោក សុខ ឥសាន បានថ្លែងថា៖ «អ្វីដែលគាត់និយាយ និងផ្សាយតាមប្រព័ន្ធផ្សព្វផ្សាយ ឬវិទ្យុបរទេសបានប៉ះពាល់ដល់កិត្តិយស និងសេចក្តីថ្លៃថ្នូររបស់គណបក្សប្រជាជនកម្ពុជា ដែលធ្វើឱ្យគណបក្សចាំបាច់ត្រូវស្វែងរកយុត្តិធម៌»។
លោកបានមានប្រសាសន៍ថា គណបក្សប្រជាជនកម្ពុជាមិនអាចអត់ឱនចំពោះការប្រមាថ និងការវាយប្រហារពីអ្នកដែលរំលោភលើសិទ្ធិសេរីភាពក្នុងការបញ្ចេញមតិ ដែលប៉ះពាល់ដល់សិទ្ធិអ្នកដទៃ។
លោក អំ សំអាត នាយកចាត់ការទូទៅនៃអង្គការសិទ្ធិមនុស្ស លីកាដូ មានប្រសាសន៍ថា សង្គមស៊ីវិលតែងតែគាំទ្រសេរីភាពនៃការបញ្ចេញមតិ និងការរិះគន់ក្នុងន័យស្ថាបនា។
លោកបានថ្លែងថា៖ «យើងមានការសោកស្ដាយដែលពេលខ្លះ ពួកគាត់ [ប្រព័ន្ធផ្សព្វផ្សាយ] ដកស្រង់សម្តីមួយផ្នែកឬកាត់ឱ្យខ្លី ដែលនាំឱ្យមានការភាន់ច្រឡំ»។
លោកបានកត់សម្គាល់ថា ការដកស្រង់សម្តីរបស់ប្រព័ន្ធផ្សព្វផ្សាយមួយចំនួន ដោយសារតែពេលវេលា និងទំហំអត្ថបទកំណត់ការដស្រង់សម្តីខ្លះអាចមានការភាន់ច្រទ្បំ។
លោក សំអាត បន្ថែមថា លោក សែនករុណា ដែលធ្វើការលើសិទ្ធិមនុស្សអស់រយៈពេល២០ឆ្នាំមកទល់ពេលនេះ តែងតែផ្តល់បទសម្ភាសន៍ និងទស្សនៈបែបស្ថាបនាអំពីបញ្ហាសិទ្ធិមនុស្ស បរិស្ថាន ព្រៃឈើ និងដីធ្លី។
កាលពីខែកុម្ភៈ ឆ្នាំមុន តុលាការកំពូលបានតម្កល់សេចក្តីសម្រេចរបស់តុលាការជាន់ទាប ដែលបានរកឃើញលោក សុន ឆ័យ អនុប្រធានគណបក្សភ្លើងទៀនមានពិរុទ្ធភាពពីបទបរិហារកេរ្តិ៍ ដោយសារការបញ្ចេញមតិ ដែលពាក់ព័ន្ធនឹងគណបក្សប្រជាជនកម្ពុជា។ តុលាការបានបង្គាប់ឲ្យលោក សុន ឆ័យ សងជំងឺចិត្តដល់គណបក្សប្រជាជនកម្ពុជាចំនួនបួនពាន់លានរៀល(១លានដុល្លារ)។
លោក សុន ឆ័យ បដិសេធមិនធ្វើអត្ថាធិប្បាយទេ ហើយបានបង្វែរសំណួរទៅលោក ជូង ជូងី ជាមេធាវីរបស់លោក។ លោកមិនទាន់ឃើញដីកាតុលាការឲ្យបង់ប្រាក់ឲ្យគណបក្សប្រជាជនកម្ពុជានៅឡើយទេ។
លោក ជូង ជូងី បានមានប្រសាសន៍ថា៖ «ខ្ញុំសូមអភ័យទោស សេរីភាពនៃការបញ្ចេញមតិមានកម្រិតនៅក្នុងស្រុកខ្មែរយើង ដូច្នេះខ្ញុំមិនអាចនិយាយច្រើនបានទេ»។
លោក នី សុខា ប្រធានសមាគមការពារសិទ្ធិមនុស្សអាដហុកមិនអាចទាក់ទងសុំការការអត្ថាធិប្បាយបានទេ៕
ប្រែសម្រួលពីអត្ថបទភាសាអង់គ្លេស៖ Former PM Hun Sen Threatens Adhoc’s Soeng Senkaruna With Lawsuit Following Comments in Media Report
