ជាងដេគ័រ៤នាក់ត្រូវបានកម្លាំងនគរបាលខណ្ឌទួលគោកឃាត់ខ្លួននៅថ្ងៃទី២ ខែកក្កដា ដោយសង្ស័យបានធ្វេសប្រហែសបង្កឱ្យមានភ្លើងឆេះខារ៉ាអូខេ និងសណ្ឋាគារ ៦៩៦៩ ឃីស អ៊ីនធើធេនមេន ស្ថិតនៅសង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ ដែលបណ្តាលឱ្យមនុស្សចំនួន៨បានស្លាប់កាលថ្ងៃទី១ ខែកក្កដា ឆ្នាំ២០២៣ យោងតាមសមត្ថកិច្ចប៉ូលិស។
ស៊ឹម ពិសិដ្ឋ អធិការនរគបាលខណ្ឌទួលគោក បានឱ្យដឹងនៅព្រឹកថ្ងៃទី៤ ខែកក្កដា ថា ជនសង្ស័យបួននាក់ កំពុងសាកសួរនៅអធិការខណ្ឌទួលគោក ពេលសាកសួរ សមត្ថកិច្ចនឹងបញ្ជូនបន្តទៅតុលាការហើយ។ ប៉ុន្តែលោកអធិការបដិសេធឆ្លើយលម្អិតលើរឿងនេះ។
នគរបាលខណ្ឌទួលគោក បានឃាត់ខ្លួនជាងដេគ័រទាំង៤នាក់នៅថ្ងៃទី២ ខែកក្កដា នៅពេលដែលសមត្ថកិច្ចប៉ូលិសបានស្រាវជ្រាវឃើញ បន្ទាប់ខារ៉ាអូខេ និងសណ្ឋាគារ ៦៩៦៩ ឃីស អ៊ីនធើធេនមេន ត្រូវបានភ្លើងឆេះកាលពីថ្ងៃទី១ ខែកក្កដា។ អ្នកទាំង៨នាក់ដែលស្លាប់ក្នុងនោះរួមមានជនជាតិចិន៦នាក់ (ប្រុស៥នាក់ និងស្រី១នាក់) និងជនជាតិវៀតណាម២នាក់(ប្រុសកែភេទជាស្រី)។
ជាងដេគ័រទាំងបួននាក់មានឈ្មោះ ទី១ ខុម សុផល សុផល ភេទប្រុស អាយុ៣០ឆ្នាំ មុខរបរ ជាងដេគ័រ។ ទី២ ឈ្មោះ សយ សាន្ត ភេទប្រុស អាយុ៣៤ឆ្នាំ ជនជាតិខ្មែរ មុខរបរ កម្មករដេគ័រ។ ទី៣ ឈ្មោះ ឡាក់ លីន ភេទប្រុស អាយុ២៦ឆ្នាំ ជនជាតិខ្មែរ មុខរបរ កម្មករដេគ័រ។ ទី៤ ឈ្មោះ ខុន តាក់ ភេទប្រុស អាយុ៣៣ឆ្នាំ ជនជាតិខ្មែរ មុខរបរ កម្មករដេគ័រ។ អ្នកទាំងបួនស្នាក់នៅបន្ទប់ជួលពុំចាំលេខ ផ្លូវជាតិលេខ៤ សង្កាត់កន្ទោក ខណ្ឌកំបូល ។ យោងតាមការបង្ហោះលើទំព័រហ្វេសប៊ុក អធិការដ្ឋាននគរបាលខណ្ឌ ទួលគោក។
របាយការណ៍ប៉ូលិស បានឱ្យដឹងថា ជាងដេគ័រម្នាក់ឈ្មោះ ខុម សុផល បានសារភាពប្រាប់អធិការដ្ឋាននគរបាលខណ្ឌទួលគោកថា ពួកខ្លួន៨នាក់ជាងផ្នែកដេគ័រ ៣នាក់ធ្វើការជាន់ផ្ទាល់ដី ចំណែក៥នាក់ធ្វើការគាស់ពិដានដំបូលជាន់ទី៥ ដើម្បីជួសជុលបន្ទប់អាគារឡើងវិញ។ «ពួកខ្លួនកំពុងតែគាស់ពិដានក៏ស្រាប់តែមានផ្សែងហុយចេញពីផ្នែកខាងលើពិដានក្ដារកុងប្លាកេសាឡីកែវនៅលើពិដានបង្កជាអណ្ដាតភ្លើងឡើង ពេលនោះខ្លួនឃើញខ្សែភ្លើងប្រហែលប៉ុនមេដៃបង្គប់នៅនឹងឆ្អឹងដែកពិដានដាច់ចេញពីគ្នាគងនៅលើឆ្អឹងដែកចាប់ពិដានឆេះ ភ្លាមនោះរូបខ្លួននិងកម្មករផ្សេងទៀតបាននាំគ្នាយកបំពង់ពន្លត់អគ្គីភ័យមកបាញ់ពន្លត់ប៉ុន្តែមិនរលត់រឹតតែឆេះយ៉ាងសន្ធោរសន្ធៅឡើង»។
របាយការណ័បន្តថា ក្រោយមកក៏មានកម្លាំងអគ្គីភ័យរបស់ស្នងការដ្ឋាននគរបាលរាជធានីភ្នំពេញ ចុះមកអន្តរាគមន៍ជួយបាញ់ពន្លត់ រលត់ជាស្ថាពរនៅវេលាម៉ោង២០:៣០នាទី នាថ្ងៃដដែល។
តាមការបញ្ជាក់នៅលើទំព័រអធិការដ្ឋាននគរបាលខណ្ឌទួលគោកដដែលថា ជនសង្ស័យទាំង៤នាក់ កំពុងឃាត់ខ្លួនជាបណ្ដោះអាសន្ននៅ អធិការដ្ឋាននគរបាលខណ្ឌទួលគោក ដើម្បីធ្វើការសាកសួរកសាងសំណុំរឿងបញ្ជូនទៅកាន់អយ្យការអមសាលាដំបូងរាជធានីភ្នំពេញដើម្បីអនុវត្តនីតិវិធី ។
យ៉ាងហោចណាស់ មានមនុស្សចំនួន៨នាក់បានស្លាប់ ក្នុងនោះមានជនជាតិចិន៦នាក់ និងជនជាតិវៀតណាម២នាក់ដោយសារតែករណីអគ្គីភ័យឆេះខារ៉ាអូខេ និងសណ្ឋាគារ ៦៩៦៩ ឃីស អ៊ីនធើធេនមេន ស្ថិតនៅសង្កាត់ផ្សារដេប៉ូទី១ ខណ្ឌទួលគោក រាជធានីភ្នំពេញ។
លោក អ៊ុំ ប៊ុនធឿន អនុប្រធានប៉ូលិសពន្លត់អគ្គីភ័យរាជធានីភ្នំពេញបានថ្លែងប្រាប់អ្នកសារព័ត៌មានខេមបូចា នៅព្រឹកថ្ងៃទី៣ ខែកក្កដា នេះថា មកដល់ពេលនេះតួរលេខ ចំនួនអ្នកស្លាប់ ក្នុងហេតុការណ៍ មាន៨នាក់ និងមិនមានអ្នករងរបួសឡើយ។ លោកបន្តថា ករណីអគ្គីភ័យនេះគឺឆេះតែខាងក្នុងបរិវេណខារ៉ាអូខេ និងសណ្ឋាគារប៉ុណ្ណោះមិនមានការឆេះរាលដាលធ្វើឱ្យប៉ះពាល់ដល់ប្រជាពលរដ្ឋដែលរស់នៅក្បែរនោះឡើយ។
លោក អ៊ុំ ប៊ុនធឿន បានឱ្យដឹងថា៖ «ប្រជាពលរដ្ឋជុំវិញហ្នឹង លំនៅឋានប្រជាពលរដ្ឋអត់មានទេ អត់មានប៉ះពាល់ទេ ហើយឡានទឹករបស់យើងក៏មានលទ្ធភាពនៅជុំវិញតែម្តង ចឹងការឆេះរាលដាលមកខាងក្រៅគឺយើងអាចទប់ស្កាត់បានទាំងអស់»។
លោក គង់ ថូ នាយរងការិយាល័យផ្នែករដ្ឋបាល បានផ្តល់បទសម្ភាសន៍ថា មកដល់ពេលនេះលោកមិនទាន់ទទួលបានព័ត៌មានថាម្ចាស់ ខារ៉ាអូខេ និងសណ្ឋាគារ 6969 ឃីស អ៊ីនធើធេនមេន ជារបស់អ្នកណានៅឡើយទេ ព្រោះកំពុងស្រាវជ្រាវ។
លោកបញ្ជាក់ថា៖ «គេអត់ចូលមកជួប មានតែពួកខ្ញុំមកពិនិត្យតែទីតាំងហើយពិនិត្យតែសាកសពហើយយកចេញ វាអត់ដឹងថា អ្នកណាជាម្ចាស់ក្លឹប អ្នកណាជាម្ចាស់ដីក៏យើងវាអត់ដឹង»។
លោក ថូ បន្តថា មូលហេតុនៃការឆេះនេះគឺបណ្តាលមកពីការដាច់ខ្សែភ្លើងហើយនៅលើសំឡីកែវដែលបណ្តាលឱ្យឆេះដូចផ្ទុះសេខ្សែភ្លើង ដែលការផ្ទុះសេនេះគឺនៅលើពិដានដែលគេបិទកុំឱ្យមានសំឡេងចេញមកខាងក្រៅ។
លោកប្រាប់ថា៖ «ខ្សែភ្លើងវាដាច់ចេញពីគ្នា វាគងនៅលើសំឡីកែវ ព្រោះនៅលើអគារហ្នឹងគេប្រើសំឡីកែវ វាជារឿងដូចថាផ្ទុះសេខ្សែភ្លើងចឹង ជាងគេទៅធ្វើពិដាន គ្នា[ជាងធ្វើពិដាន]ទាញពិដានទម្លាក់តាមបន្ទប់មកដើម្បីប្តូរពិដាន ដល់ចឹងវាឆេះសំឡីកែវលើពិដានហ្នឹង»។
លោក គង់ ថូ បានបន្ថែមថា សាកសពដែលស្លាប់ក្នុងហេតុការណ៍ត្រូវបានគ្រួសារមកយកខ្លះ និងសាកសពផ្សេងទៀតបានរក្សាទុកនៅវត្តស្ទឹងមានជ័យ និងវត្តទឹកថ្លា។
អ្នកសារព័ត៌មានខេមបូចា មិនអាចសុំសម្ភាសន៍លោក ជា ពិសី ជាអភិបាលខណ្ឌទួលគោកបានទេដោយលោកជាប់រវល់ប្រជុំ។
ចំណែកលោក ព្រំ យ៉ន ប្រធានការិល័យនគរបាលពន្លត់អគ្គិភ័យរាជធានីភ្នំពេញ ក៏មិនអាចសុំផ្តល់ព័ត៌មានបានដែរ ដោយទូរសព្ទទៅលោកមិនលើកទូរសព្ទ។
យ៉ាងហោចណាស់ មនុស្ស២៧នាក់បានស្លាប់នៅក្នុងគ្រោះអគ្គិភ័យនៅសណ្ឋាគារ និងកាស៊ីណូហ្គ្រែនដាយមិនស៊ីធីនៅខេត្តបន្ទាយមានជ័យក្បែរព្រំដែនថៃកាលពីថ្ងៃទី២៨ ខែធ្នូឆ្នាំមុន៕
