សមាគមសម្ព័ន្ធអ្នកសារព័ត៌មានកម្ពុជា

រដ្ឋាភិបាលជ្រើសរើសមន្ត្រីកសិកម្មលើកដំបូងដើម្បី​ជួយកសិករនៅតាមមូលដ្ឋាន

ក្មេងប្រុសម្នាក់ដើរច្រូតស្មៅនៅក្បែរវាលស្រែដែលមានស្រូវជិតប្រមូលផល ក្នុងស្រុកកណ្ដាលស្ទឹង ខេត្តកណ្ដាល។ រូបថតថ្ងៃទី២ ខែវិច្ឆិការ ឆ្នាំ២០២៣។ (ខេមបូចា/ ព្រីង សំរាំង)
ក្មេងប្រុសម្នាក់ដើរច្រូតស្មៅនៅក្បែរវាលស្រែដែលមានស្រូវជិតប្រមូលផល ក្នុងស្រុកកណ្ដាលស្ទឹង ខេត្តកណ្ដាល។ រូបថតថ្ងៃទី២ ខែវិច្ឆិការ ឆ្នាំ២០២៣។ (ខេមបូចា/ ព្រីង សំរាំង)

រដ្ឋាភិបាលប្រកាសជ្រើសរើសមន្ត្រី២៥០នាក់ជាការជ្រើសរើសលើកដំបូងដើម្បីដាក់ឱ្យជួយកសិករផ្នែកបច្ចេកទេស និងរកទីផ្សារកសិផលនៅតាមឃុំសង្កាត់តាមបណ្តាខេត្តនានា។

សេចក្តីជូនដំណឹងរបស់ក្រសួងមុខងារសាធារណៈចុះថ្ងៃទី៣១ខែតុលាឆ្នាំ២០២៣ បានប្រកាស ពីការប្រឡងជ្រើសរើសមន្ត្រីកសិកម្មចំនួន២៥០នាក់ សម្រាប់ខេត្តគោលដៅចំនួន១៧។ ក្រសួង បានកំណត់ក្នុងចំណោមខេត្តគោលដៅទាំង១៧នោះគឺមន្ត្រីម្នាក់កាន់ការងារ២ឃុំ។

សេចក្តីប្រកាសឱ្យដឹងទៀតថា បេក្ខជនអាចទាញយកទម្រង់ពាក្យតាមអនឡាញ ហើយដាក់ពីថ្ងៃទី ១ដល់ថ្ងៃទី៣០ ខែវិច្ឆិកា ឆ្នាំ២០២៣។

អ្នកនាំពាក្យក្រសួងកសិកម្មរុក្ខាប្រមាញ់ និងនេសាទ លោក ឃឹម ហ្វីណង់ ឱ្យដឹងថា ក្នុងចំណោម ឃុំសង្កាត់១៦៥២ទូទាំងប្រទេសគឺក្រសួងកំណត់យកឃុំ និងសង្កាត់ចំនួន១ ៦៦០ ជាឃុំ-សង្កាត់មានរបរកសិកម្មសម្រាប់ដាក់ពង្រាយមន្ត្រី។

លោក ឃឹម ហ្វីណង់ឱ្យដឹងទៀតថា ការជ្រើសរើសមន្ត្រីជំហានដំបូង២៥០នាក់នៅឆ្នាំ២០២៣នេះ នឹងដាក់ឱ្យម្នាក់កាន់ការងារជួយកសិករចំនួន២ឃុំ។​

លោក ឃឹម ហ្វីណង់ ថ្លែងថា៖«គោលដៅម្នាក់១ឃុំ ប៉ុន្តែក្នុងពេលបច្ចុប្បន្ន នៅពេលដែលយើងមិន​ទាន់​​មាន​មន្ត្រី​គ្រប់នៅឡើយ យើងពឹងឱ្យគាត់ជួយមើលឃុំដែលជាប់ហ្នឹងសិន»

តាមសេចក្តីប្រកាសរបស់ក្រសួងមុខងារសាធារណៈបេក្ខជនដែលប្រឡងជាប់ជាមន្ត្រីកសិកកម្មនៅតាមឃុំទាំងនេះ ទទួលបានក្រមខណ្ឌដូចមន្ត្រីទូទៅហើយទទួលបានប្រាក់បៀវត្សរ៍ប្រចាំខែពី១​លាន​៤សែនរៀល(១ ៤០០ ០០០ រៀល)ទៅ១លាន៦សែបរៀស(១ ៦០០ ០០០រៀល)។

ការដាក់មន្ត្រីកសិកម្មនៅតាមឃុំសង្កាត់នេះគឺជាចំណុច១ក្នុងចំណោមចំណុចទាំង៦នៃយុទ្ធសាស្ត្រ

បញ្ចកោណរបស់រដ្ឋាភិបាលអាណត្តិទី៧ដឹកនាំដោយលោកនាយករដ្ឋមន្ត្រី ហ៊ុន ម៉ាណែត។ នៅក្នុង​ផែនការនេះ បញ្ជាក់ពីការធ្វើឱ្យកសិកម្មមានភាពប្រសើរឡើង និងជួយឱ្យជីវភាពកសិករ នៅតាម​ជនបទ​បានធូរធា។

ទោះយ៉ាងណាកសិករនៅតាមបណ្តាខេត្តនានា ហាក់នៅមិនទាន់មានក្តីសង្ឃឹមច្រើនពីការផែនការ ដាក់ពង្រាយមន្ត្រីកសិកម្មនៅតាមឃុំ សង្កាត់ទាំងនេះនៅឡើយទេ។

កសិករនៅខេត្តព្រះវិហារ លោក សួន ឆែម ថ្លែងថា លោកមិនបានដឹងពីផែនការដាក់ពង្រាយ មន្ត្រី កសិកម្មនៅតាមឃុំនោះទេ។ លោកបន្តថា ក្តីបារម្ភធំរបស់លោក និងកសិករផ្សេងទៀតនៅក្នុង​ខេត្ត​នេះគឺ ផលិតចំណាយដើមទុនច្រើន ប៉ុន្តែបានផលមកវិញលក់ក្នុងតម្លៃទាប។

លោក សួន ឆែម៖«បច្ចេកទេសយើងជាកសិករធ្វើទៅដល់ពេលបានដូចជាស្រូវ ជាដំឡូង ដល់ពេល​តម្លៃអ៊ីចឹងទៅ វាបញ្ហាកន្លែងហ្នឹង។ នៅពេលបានហើយក៏ដូចជាជីដូចជាអីថ្លៃ ដល់ពេលដំណាំ​យើង​ចេញ​វិញអត់បានថ្លៃ បញ្ហាកន្លែងហ្នឹង»

វាលស្រូវរបស់ពលរដ្ឋដែលជិតដល់ពេលច្រូត ក្នុងស្រុកកណ្ដាលស្ទឹង ខេត្តកណ្ដាល។ រូបថតថ្ងៃទី២ ខែវិច្ឆិការ ឆ្នាំ២០២៣។ (ខេមបូចា/ ព្រីង សំរាំង)

កសិករនៅខេត្តកំពង់ចាម លោក ថៃ ថេន ឱ្យដឹងថា លោកពិបាកចិត្តដោយសារតែ កសិផល លក់ បានតម្លៃទាបធ្វើឱ្យសាច់ ញាតិរបស់លោកខាតបង់ហើយធ្វើចំណាកស្រុកបន្តបន្ទាប់។ លោកបន្តថា អ្វីដែលលោកត្រូវការពេលនេះគឺសូមឱ្យស្រូវមានតម្លៃ១ពាន់ ៣រយរៀលទៅ១ពាន់ ៤រយរៀល ទើបកសិករអាចរស់បាន។

លោកថៃ ថេន៖«បាទ! វាអត់សូវបានថ្លៃដូចជាស្រូវអង្ករសព្វថ្ងៃមកពីអត់បានថ្លៃ បើសិនជាស្រូវអង្ករ ស្រូវសើមបានត្រឹម១គីឡូ១៣០០ ១៤០០[រៀល]កសិករប្រហែលជាអាចរស់បាន បើ១គីឡូនៅតែ​៨០០​[រៀល]អីនេះ រស់អត់ចង់កើតទេ។ ជី គាត់គិតមើលមើល៍ សព្វថ្ងៃនេះ១បេ ១៧ម៉ឺនរៀល ២០ម៉ឺន​១បេ។ បាទ! ដីក្នុង១ហាត់[ហិកតា] យើងបាច ក្នុង៧បេ ៨បេ ទៅ៩បេ តាមទឹកដីល្អ ដីមិនសូវល្អ​អ៊ីចឹង។ ដីល្អបាចត្រឹម៧បេ ដីមិនសូវល្អបាចដល់៨បេទៅ ដីអន់ខ្លះបាចដល់៩ទៀតក្នុង១ហិកតា»

ចំណែកសិករម្នាក់ទៀតនៅខេត្តបាត់ដំបងលោក ហ៊ុន យ៉ាន់ ឱ្យដឹងថា លោកឮការប្រកាសរបស់​រដ្ឋាភិបាល​បន្តបន្ទាប់ថា ជួយកសិករប៉ុន្តែជាក់ស្តែងមិនទាន់ឃើញលទ្ធផល ទើបលោក​មិនទាន់​ហ៊ាន សង្ឃឹមលើផែនការដាក់ពង្រាយមន្ត្រីកសិកម្មនេះទេ។ លោក ហ៊ុន យ៉ាន់ ក៏មានបញ្ហាដូចកសិករ ទូទៅ​​ដែរ។ លោកបន្តថា ថ្លៃដើមខ្ពស់ហួសហេតុពេកទើបធ្វើឱ្យកសិករវេទនា។

លោក ហ៊ុន យ៉ាន់ បន្ថែមថា៖«បាទ! សូមឱ្យទម្លាក់ដូចថាជី និងសាំង ម៉ាស៊ូតអីហ្នឹងសូមទម្លាក់[ថ្លៃ] អ៊ីចឹង​​​បានឱ្យខាងកសិករយើងឱ្យបានងើប។ ប៉ុន្តែនិយាយទៅកសិករហ្នឹង​វាមិនដែល​បានងើប​ប៉ុន្មាន​ទេ នៅតែគេឱ្យតម្លៃ [ហើយ]គេដើរចេញទៅ វានៅតែដដែល។ ប៉ុន្តែឥឡូវជៀសតែថាយើង​សូម​ហើយ​​​ជាងពីយើងមិនសូម សូមឱ្យទម្លាក់ប្រេងសាំង ប្រេងម៉ាស៊ូត ហើយនឹងជីហ្នឹងទម្លាក់ចុះក្រោម​មកឱ្យកសិករគ្នារីកចម្រើន»

ប្រធានសមាគមសម្ព័ន្ធសហគមន៍កសិករកម្ពុជា(CCFC)លោក ថេង សាវឿន មានប្រសាសន៍ថា ការដាក់មន្ត្រីម្នាក់កាន់ការងារ២ឃុំអាចមានប្រសិទ្ធិភាពទាបព្រោះទំហំការងារធំ។ សម្រាប់លោក ថេង សាវឿន បញ្ហាបច្ចេកទេសនៅពេលច្ចុប្បន្នមិនមែនជាបញ្ហាទេលោកថា ចំណុចបញ្ហាធំ​សម្រាប់​កសិករ នៅពេលនេះគឺរៀបចំយន្តការផ្តល់ព័ត៌មានឱ្យបានគ្រប់គ្រាន់ដល់កសិករ។

លោក ថេង សាវឿន ថ្លែងថា៖«តម្រូវការកសិករក្នុងវិស័យកសិកម្ម កត្តាបច្ចេកទេសមិនមែនជាបញ្ហា​ចោទទេ សម្រាប់ប្រជាពលរដ្ឋយើង ក៏ប៉ុន្តែយន្តការនៃការផ្តល់ព័ត៌មាន យន្តការនៃការផ្តល់នូវ​លំហូរ​ព័ត៌មាន​អំពីយុទ្ធសាស្ត្រ វិធីសាស្ត្រ និងនិន្នាការតម្រូវការរបស់ពិភពលោក ក៏ដូចជាក្រុមហ៊ុន​វិស័យ​ឯកជន​ក្នុងប្រទេសកម្ពុជា ឬក៏ពិភពលោកនៃការនាំចេញលើតម្រូវការវិស័យកសិកម្ម គឺជាយន្តការ​មួយ​ដែលត្រូវតែផ្សព្វផ្សាយ ហើយនឹងត្រូវការមនុស្សដើម្បីចូលរួមចំណែកទៅលើវិស័យនេះ»

តាមសេចក្តីប្រកាសរបស់ក្រសួង គឺជ្រើសរើសមន្ត្រីនៅឆ្នាំ២០២៣សម្រាប់ខេត្តអាទិភាព​ទាំង១៧ ​រួម​មាន ខេត្តតាកែវ កំពង់ស្ពឺ កំពង់ធំ សៀមរាប បន្ទាយមានជ័យ កំពង់ចាម កំពង់ឆ្នាំង បាត់ដំបង កំពត ពោធិ៍សាត់ ព្រៃវែង ព្រះវិហារ ត្បូងឃ្មុំ ស្វាយរៀង ឧត្តរមានជ័យ កណ្តាល និង​ខេត្តមណ្ឌលគិរី​។ សម្រាប់​​ឆ្នាំ២០២៤ ក្រសួងនឹងមានការជ្រើសរើសមន្រ្តីកសិកម្មឃុំ-សង្កាត់ចំនួន៨០០នាក់ និង​ក្នុង​ឆ្នាំ២០២៥ ជ្រើសរើសបន្ថែមចំនួន៥៥០នាក់។

ជុំវិញការដាក់ពង្រាយមន្ត្រីបច្ចេកទេសកសិកម្មនៅគ្រប់ឃុំ សង្កាត់ ដែលមានសកម្មភាពកសិកម្ម​នៅ​ទូទាំងប្រទេស ដើម្បីជំរុញការលើកកម្ពស់ផលិតភាពកសិកម្ម និងជួយដល់គ្រួសារកសិករក្នុង​ការ​លើក​ស្ទួយផលិតផលកសិកម្មរបស់ខ្លួន និងរៀបចំឱ្យមានសមាគមកសិកម្មនៅតាមទីជនបទ​រដ្ឋាភិបាល​​បានគ្រោងចំណាយថវិការហូតដល់ទី១៦,៩ ប៊ីលានរៀល ដែលស្មើនឹងប្រមាណ៤លាន​ដុល្លារ​អាម៉េរិក។ នេះបើតាមរយៈខ្លឹមសារសង្ខេបប្រតិបត្តិស្តីពីសេចក្តីព្រាងច្បាប់ស្តី​ពីហិរញ្ញវត្ថុ​សម្រាប់​​ការគ្រប់គ្រងឆ្នាំ២០២៤ របស់ក្រសួងសេដ្ឋកិច្ច និងហិរញ្ញវត្ថុដែលបានចេញ​ផ្សាយកន្លង​ទៅ៕

297 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម