សមាគមសម្ព័ន្ធអ្នកសារព័ត៌មានកម្ពុជា

រដ្ឋាភិបាលហាមក្រុមប្រឹក្សាភិបាលត្រួតពិនិត្យរបស់ក្រុមហ៊ុន Meta ចូលប្រទេសកម្ពុជា បន្ទាប់ពីពួកគេស្នើឱ្យព្យួរហ្វេសប៊ុករបស់លោកនាយករដ្ឋមន្ត្រី

គណនីហ្វេសប៊ុកដែលត្រូវបានលុបចោលរបស់លោកនាយករដ្ឋមន្ត្រី ហ៊ុន សែន (រូបភាព Fresh News)
គណនីហ្វេសប៊ុកដែលត្រូវបានលុបចោលរបស់លោកនាយករដ្ឋមន្ត្រី ហ៊ុន សែន (រូបភាព Fresh News)

រដ្ឋាភិបាល​កម្ពុជា​បាន​ហាមឃាត់​សមាជិក​ក្រុមប្រឹក្សាភិបាល​ត្រួតពិនិត្យ​រ​បស់​ក្រុមហ៊ុន Meta ​ចំនួន​២២​រូប ​មិន​ឱ្យ​ចូលឬមាន​វត្តមាន​នៅ​ក្នុង​​ប្រទេស​កម្ពុជា​ នេះបើយោង​តាម​​សេចក្តី​ថ្លែងការណ៍​មួយ​ ដែល​ចេញ​ផ្សាយ​ដោយ​ក្រសួងការបរទេស ​កាលពី​ថ្ងៃ​អង្គារ។ 

រដ្ឋាភិបាល​បាន​ប្រកាស​ថា អនុសាសន៍​របស់​ក្រុម​ប្រឹក្សា​ភិបាលត្រួត​ពិនិត្យរបស់​ក្រុមហ៊ុន Meta ​ឲ្យ​​ផ្អាក​ជា​បណ្តោះអាសន្ន​ចំពោះ​គណនីហ្វេសប៊ុករបស់​លោក​នាយក​រដ្ឋមន្ត្រី ហ៊ុន សែន គឺ​​មាន​លក្ខណៈ​នយោបាយ។ 

សមាជិកក្រុមប្រឹក្សាភិបាលត្រួតពិនិត្យនេះ​ត្រូវបានគេចាត់ទុកថា៖ «បុគ្គលដែលមិនអាចទទួល​យក​បាន» និង «ត្រូវបានហាមឃាត់មិនឱ្យចូល ឬមានវត្តមាននៅក្នុងព្រះរាជាណាចក្រកម្ពុជា»។ 

សមាជិកក្រុមប្រឹក្សាភិបាលត្រួតពិនិត្យ ទាំងនេះទំនងជាគ្មាន​នរណាម្នាក់ក្នុងចំណោម​ពួកគេកំពុង​​ស្ថិត​នៅក្នុងប្រទេសកម្ពុជាឡើយ ដែលក្នុងនោះរួមមាន​ដូចជាប្រធានផ្នែក​សេរីភាពនៃការបញ្ចេញមតិរបស់​អង្គការយូណេស្កូ ​ជ័យលាភី​ណូបែលសន្តិភាពពីប្រទេសយេម៉ែន និងអតីតនាយករដ្ឋមន្ត្រីនៃប្រទេសដាណឺម៉ាក។

កាល​ថ្ងៃទី២៩ ខែមិថុនា ក្រុមប្រឹក្សាភិបាលត្រួតពិនិត្យបានបញ្ជាឱ្យក្រុមហ៊ុន Meta ដកសុន្ទរកថាផ្សាយបន្តផ្ទាល់កាលពី​ខែមករាចេញ​ពី​ទំព័រហ្វេសប៊ុករបស់លោក ហ៊ុន សែន ដែលក្នុង​នោះ លោកបានគំរាមទៅកាន់អ្នកនយោបាយបក្សប្រឆាំងប្រយ័ត្នត្រូវនឹងដំបង។ ក្រុមប្រឹក្សាភិបាល​ត្រួតពិនិត្យ​ក៏បាន​ណែនាំ​ឱ្យ​ផ្អាក​គណនី​ហ្វេ​ស​ប៊ុ​ក​របស់​លោក ហ៊ុន សែន រយៈពេល​ប្រាំមួយ​ខែ​ផងដែរ​។

នៅ​យប់​ថ្ងៃ​ដដែល​នោះ លោក ហ៊ុន សែន បាន​ប្រកាស​ថា លោក​នឹង​លុប​គណនី ហ្វេសប៊ុករបស់​លោក​ចោល។ លោក​បាន​គំរាម​បិទបណ្តាញ​​សង្គមមួយ​នេះទាំង​ស្រុង​​នៅ​ក្នុង​ប្រ​ទេស​កម្ពុជា ប៉ុន្តែ​បន្តិចក្រោយមក​​​ក៏​សម្រេច​ចិត្តមិនបិទវិញ។

នៅ​ថ្ងៃ​បន្ទាប់ ក្រសួង​ប្រៃសណីយ៍ និង​ទូរគមនាគមន៍​បាន​ចេញ​លិខិត​មួយ​ដោយ​បញ្ជាក់​ថា រដ្ឋាភិបាល​កម្ពុជា​នឹង​កាត់​ផ្តាច់​ទំនាក់​ទំនង​ជាមួយហ្វេសប៊ុក​ បណ្តេញ​តំណាង​របស់​ក្រុមហ៊ុន និង​បញ្ចប់​កិច្ចសហការ​ដៃគូក្នុង​​វិស័យ​ឯកជន​ជាមួយ​ក្រុមហ៊ុននេះ​។ ទោះ​ជា​យ៉ាង​ណា រដ្ឋាភិបាល​បាន​បញ្ជាក់​ក្រោយ​មក​ថា ​ហ្វេសប៊ុក​នឹង​មិន​មានការបញ្ចប់​កិច្ចសហការ​ដៃគូក្នុងវិស័យ​ឯកជនទេ។

លោក Stefania Di Stefano មន្ត្រីគម្រោងនៃវេទិកាសិទ្ធិមនុស្សទីក្រុងហ្សឺណែវបានមានប្រសាសន៍ថា៖ «ប្រសិនបើវេទិការបស់ Meta កំពុងត្រូវបាន​គេប្រើជា​ប្រ​យោជន៍ ដើម្បីបង្កើនការគំរាមកំហែង និងការបំភិតបំភ័យ Meta មានទំនួលខុសត្រូវក្នុងការចាត់វិធានការ និងទប់ស្កាត់បញ្ហានេះ» ។

ចាប់តាំងពីពេលនោះមក លោក ហ៊ុន សែន បានប្តូរមកប្រើ Telegram ដើម្បីចេញសេចក្តីថ្លែងការណ៍។ 

លោក ផៃ ស៊ីផាន អ្នកនាំពាក្យរដ្ឋាភិបាលបដិសេធមិនធ្វើអត្ថាធិប្បាយទេ ដោយមាន​ប្រសាសន៍​ថា លោកនៅខេត្ត ហើយមិនទាន់បានឃើញសេចក្តី​ថ្លែងការណ៍នេះនៅឡើយទេ។

លោក អាន សុខឃឿន អ្នក​នាំ​ពាក្យ​ក្រសួង​ការ​បរទេសមិន​អាច​ទាក់​ទង​បាន​ទេ។

Meta ហ្វេសប៊ុក និងក្រុមប្រឹក្សាភិបាលត្រួតពិនិត្យមិនទាន់ឆ្លើយតបទៅនឹងសំណើសុំការអត្ថាធិប្បាយនៅឡើយទេ៕

ប្រែសម្រួលពីអត្ថបទភាសាអង់គ្លេស៖​ Gov’t Bans Meta’s Oversight Board From Country After It Recommended Suspending PM’s Facebook

238 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម