ក្រសួងសុខាភិបាលអំពាវនាវឲ្យវិស័យឯកជនធ្វើតេស្តរហ័សរកកូវីដ១៩ ឲ្យបានញឹកញាប់

ក្រុមគ្រូពេទ្យប្រើឧបករណ៍តេស្តរហ័សធ្វើតេស្តកូវីដ១៩ លើប្រជាពលរដ្ឋក្នុងរាជធានីភ្នំពេញ ថ្ងៃទី១១ ខែសីហា ឆ្នាំ២០២១។ ខេមបូចា/ បញ្ញា ឆព័ណ្ណ
ក្រុមគ្រូពេទ្យប្រើឧបករណ៍តេស្តរហ័សធ្វើតេស្តកូវីដ១៩ លើប្រជាពលរដ្ឋក្នុងរាជធានីភ្នំពេញ ថ្ងៃទី១១ ខែសីហា ឆ្នាំ២០២១។ ខេមបូចា/ បញ្ញា ឆព័ណ្ណ

ក្រ​សួង​សុខាភិបាលកម្ពុជា​បាន​ណែ​នាំ​ដល់​ស្ថាប័ន​រដ្ឋ ក្រុម​ហ៊ុន​ឯកជន សហគ្រាស រោងចក្រ និង​អង្គការ​ផ្សេងៗ​ទៀត ឲ្យ​ធ្វើ​តេស្ត​​ជា​ប្រចាំ​លើ​បុគ្គលិក​របស់​ខ្លួន ខណៈ​ករណីឆ្លងនៅ​តែបន្ត​កើនឡើង​រាបរយករណី​ក្នុង​មួយ​ថ្ងៃៗ​។

បើ​តាម​សារាចរ​ណែនាំ​របស់​ក្រ​សួង​សុខាភិបាល ឧបករណ៍​តេស្ត​រហ័ស​នឹង​ត្រូវ​ផ្គត់​ផ្គង់​ដោយ​ក្រ​សួង​ប្រៃ​សណីយ៍ និង​ទូរគមនាគមន៍ ក្នុង​​តម្លៃ​ដើម​​។ 

ក្រ​សួង​នឹង​បន្ត​លក់​ឧបករណ៍​តេស្ត​នេះ​រយៈពេល​ពីរ​ខែ​ទៀតមុន​នឹង​អនុញ្ញាត​ឲ្យ​ក្រុម​ហ៊ុន​ឯកជន​ជា​អ្នក​ចែក​ចាយ​បន្ត​។ ក្រ​សួង​ក៏​បាន​ជំរុញ​ឲ្យ​​មន្ទីរ​ពេទ្យ​យក​ថ្លៃ​ធ្វើតេស្ត​រហ័ស​ក្នុង​តម្លៃទាប​ផង​ដែរ​។​

សារាចរ​ណែនាំថ្មី​នេះ ក៏​បាន​បញ្ជា​ទៅ​អាជ្ញាធរ​ឲ្យ​រៀប​ចំកន្លែង​ធ្វើ​តេស្ត​នៅ​តាម​ឃុំ និង​ស្រុក ដើម្បី​ផ្ដល់​ការ​ធ្វើ​តេស្តរហ័ស​ដល់​ប្រ​ជា​ពល​រដ្ឋ​ដែល​គ្មាន​លទ្ធ​ភាព​ទិញ​ឧករណ៍​តេស្តរហ័ស​។ សម្រាប់​តំបន់​ត្រូវ​បិទ​ខ្ទប់​ ដោយសារតែ​មាន​ការ​ផ្ទុះ​រាល​ដាល​ការ​ឆ្លងជំងឺកូវីដ១៩ វិញ​ត្រូវ​ធ្វើតេស្ត​ដោយ​ប្រើម៉ាស៊ីន​ធំ PCR ដោយ​បុគ្គលិកសុខាភិបាល​។​

អ្នក​នាំពាក្យ​ក្រ​សួងសុខាភិបាល លោក​ស្រី​ ឱ វណ្ណឌីន មិន​អាច​ទាក់​ទង​សុំ​ការ​អត្ថាធិប្បាយ​បានទេ ថាតើ​សារាចរណែនាំ​នេះ គឺជា​កាតព្វកិច្ច​ច្បាប់​ឬ​យ៉ាងណា​។​

លោក​ស្រី យ៉ាង សោភ័ណ្ឌ ប្រធាន​សហព័ន្ធ​សហជីព​កម្ពុជា​ (CATU) បាន​ស្វាគមន៍ចំពោះសារាចរណែនាំ​របស់​ក្រ​សួង ប៉ុន្តែ​លោក​ស្រី​ថា វា​អាច​មាន​ការពិបាក​សម្រាប់​ម្ចាស់​រោង​ចក្រ​ដែល​ត្រូវ​ទិញ​ឧបករណ៍​តេស្ត​រហ័ស​សម្រាប់​កម្មករ​រាប់​រយ​ ឬ​ដល់​ពាន់​នាក់​។​

លោក​ស្រី​និយាយថា៖ «​វាជា​ការ​ល្អ​សម្រាប់​កម្មករ​ដែល​បាន​ធ្វើ​តេស្ត​រហ័ស ប៉ុន្តែ​វា​អាចមិន​ងាយ​ស្រួល​ទេ ពីព្រោះយើង​មិន​ទាន់​ដឹង​ទេថា​ខាង​ក្រុម​ហ៊ុន​នឹង​រ៉ាប់​រង​លើ​ការ​ចំណាយ​ឬអត់…​ពីព្រោះ​ថា​មាន​កម្មករ​ច្រើន​ក្នុង​រោងចក្រ​មួយៗ»។​

លោក​ស្រី បាន​បង្ហាញ​ក្ដី​កង្វល់​ ​ថា​​ឧបករណ៍តេស្ត​រហ័ស​នេះ​អាច​នឹង​មិន​ផ្ដល់​លទ្ធ​ផល​ត្រឹម​ត្រូវ​​បាន​ពេញ​លេញ​។​

លោក​ស្រី​ឲ្យ​ដឹង​ទៀតថា​៖ «​កន្លង​មក​កម្មករ​បាន​បង្ហាញ​ក្ដីបារម្ភ​អំពីតេស្ត​នេះ ពួកគាត់​បារម្ភ​ថា​ការ​ធ្វើតេស្ត​រហ័សអាច​​បាន​លទ្ធផល​មិន​ច្បាស់​​លាស់»។ អ្នក​ស្រី​បន្ថែម​ថា៖ «​ពួកគាត់​បារម្ភ​ថា ពេល​ពួកគាត់​មាន​ជំងឺ​ផ្ដាសាយ​ធម្មតា តេស្ត​នឹង​បង្ហាញ​លទ្ធ​ផល​វិជ្ជមានកូវីដ១៩ ដូច​នេះ​ពួកគាត់បារម្ភ​ថា​ត្រូវ​គេ​ដាក់​ឲ្យ​ធ្វើ​ចត្តាឡីស័ក​១៤​ថ្ងៃ ដែលអាច​ប៉ះពាល់​ដល់​គ្រួសារ​ទាំង​មូល»។​

ក្រ​សួង និង​ស្ថាប័ន​ឯកជន​មួយ​ចំនួន​ផ្សេង​ទៀត​បាន​អនុវត្ត​ការ​ធ្វើ​តេស្ត​រហ័ស​លើ​បុគ្គលិក​ខ្លួន​រួច​ទៅ​ហើយ​ដែរ​។​

លោក ហេង សេងលី នាយកគ្រប់​គ្រង​ហាង​ផាកកាហ្វេ (Park Café)មាន​ប្រ​សាសន៍​ថា​ក្រុម​ហ៊ុន​បាន​ចាប់​ផ្ដើម​ធ្វើ​តេស្ត​រហ័សលើ​បុគ្គលិក​ការិយាល័យ​របស់​ខ្លួន​​រៀង​រាល់​សប្ដាហ៍ ហើយ​ថា​នឹង​មាន​ការ​ធ្វើ​ដូច​គ្នា​នេះ​លើ​បុគ្គលិក​នៅ​តាម​ភោជនីយដ្ឋាននៅ​ភ្នំពេញ និង​តាម​បណ្ដាខេត្ត​។​

លោក​ឲ្យ​ដឹង​ទៀត​ថា៖ «វា​អាច​ជាការ​ចំណាយ​បន្ថែម​ទៀត​របស់​ក្រុម​ហ៊ុន​លើ​ការ​ទិញ​ឧបករណ៍​តេស្ត ប៉ុន្តែ​យើង​ត្រូវ​តែ​ចូលរួម​ជាមួយ​រដ្ឋាភិបាល​សម្រាប់ចក្ខុវិស័យ​វែង​ឆ្ងាយ ពីព្រោះ​ថា​វិស័យ​ឯកជន​ជា​ដៃគូរបស់​រដ្ឋាភិបាល​ក្នុង​ការ​បញ្ឈប់​ការ​ឆ្លង​ជំងឺ​កូវីដ១៩»។​

លោក សេងលី បន្ថែម​ថា​សម្រាប់​បុគ្គលិក​ទើប​ចូល​ធ្វើ​ការ​ថ្មី ក្រុម​ហ៊ុន​ទាម​ទារ​ឲ្យ​មាន​ការ​ចាក់​វ៉ាក់សាំង​បាន​គ្រប់​ដូស​ជា​ដាច់​ខាត​។​​

សារាចរ​របស់​ក្រ​សួង ​តម្រូវ​ឲ្យ​អនុវត្ត​គ្រប់​រាជធានី-ខេត្ត​ទាំង​អស់​ក្នុង​ប្រទេស​។​

អភិបាល​ខេត្ត​កំពង់​ស្ពឺ លោក វ៉ី សំណាង​ មាន​ប្រសាសន៍​ថា លោក​ដឹង​ថា​សារាចរ​នេះ​មិន​មែន​តម្រូវ​ដោយ​ច្បាប់ទេ ហើយ​អាជ្ញាធរ​ខេត្ត​ក៏​នឹង​មិន​បង្ខំ​ដល់​វិស័យ​ឯកជន​ដែរ​។​

លោកនិយាយ​ថា៖ «​យ៉ាងណា យើង​នឹង​ជូន​ដំណឹង​​ទៅពួកគេពី​វិធានការ​ការពារ​ និង​ទប់​ស្កាត់​កូវីដ១៩»។  ដោយលោកបន្ថែម​ថា៖ «​យើង​ក៏​បាន​ណែនាំ​ដល់​គ្លីនិក និង​មន្ទីរពេទ្យ​ឯកជន​ឲ្យ​ចូល​រួម​តាមការណែនាំ​របស់​រដ្ឋាភិបាល ដើម្បី​ប្រឆាំង​នឹងកូវីដ១៩ ពីព្រោះ​ថា​បើ​តម្លៃ​ថ្លៃពេក ប្រ​ជា​ពល​រដ្ឋនឹង​មិន​ចូល​ទេ ពីព្រោះ​ពួកគេ​មិន​មាន​ប្រាក់គ្រប់គ្រាន់​ដើម្បី​ចំណាយ»។​

​មន្ត្រី​ក្រ​សួង​សុខាភិបាល​បាន​ឲ្យ​ដឹង​ថាវីរុស​កូវីដ១៩ បំប្លែង​ថ្មីដែលតា (​Delta) ឆ្លង​លឿន បាន​ចាប់​ផ្ដើម​ឆ្លង​រាល​ដាល​យ៉ាង​រហ័ស​នៅ​ក្នុង​ប្រទេស បន្ទាប់ពី​មាន​ការ​ផ្ទុះ​រាល​ដាល​ជាបន្ត​បន្ទាប់​នៅ​តាមខេត្ត​ជាប់​ព្រំ​ដែន​ថៃ​ ដែល​នាំ​ឲ្យ​រដ្ឋាភិបាល​សម្រេច​បិទ​ខ្ទប់​ខេត្ត​ចំនួន​ប្រាំបី​នៅ​តាម​ព្រំដែនថៃ ដើម្បី​បញ្ឈប់​ការ​ឆ្លង​រាល​ដាល​វីរុស​នេះ​។ នៅ​ថ្ងៃទី​១១ ខែសី​ហា ក្រ​សួង​បាន​ប្រកាស​ថា​មាន​ករណី​ឆ្លង​វីរុស​បំប្លែង​ថ្មី​ដែលតាចំនួន​៤៤​ករណី នៅ​ក្នុង​ខេត្ត​ចំនួន​ប្រាំបួន នាំ​ឲ្យ​ចំនួន​អ្នក​ឆ្លង​វីរុស​នេះ​ឡើង​ដល់​៤២៩​ករណី​។​

​នៅ​ថ្ងៃ​ពុធ​ ក្រ​សួង​ក៏បាន​ប្រកាស​ពី​ចាក់​វ៉ាក់សាំង​បង្ការ​កូវីដ១៩ ដូសទី​៣ ជាដូស «ជំរុញ» ប្រភេទ AstraZeneca ដល់​មន្ត្រីរាជការ​​ថ្នាក់​ជាតិ និង​ថ្នាក់​ក្រោម​ជាតិ ព្រម​ទាំង​អ្នក​សារព័ត៌មាន ដែល​បាន​ចាក់​វ៉ាក់សាំង​ចិន ​Sinovac និង​Sinopharm ចំនួនពីរ​ដូស​កន្លងមក​។​​

លោក កុច យុទ្ធ​ កម្មករ​រោង​ចក្រ​ម្នាក់​នៅ​ភ្នំពេញ បាន​និយាយ​ថា​រោង​ចក្រ​របស់​លោក​ធ្វើ​តេស្ត​រហ័ស​តែ​លើ​កម្មករ​ទើប​ចូល​ធ្វើ​ការ​ថ្មី​តែ​ប៉ុណ្ណោះ​។​

លោក​បន្ថែម​ថា តាំង​ពី​រោង​ចក្រ​បើក​ដំណើរ​ការឡើង​វិញ បន្ទាប់ពី​បាន​បិទ​អំឡុង​ខែមេសា និង​ឧសភា លោក និង​កម្មករ​ផ្សេង​ទៀត​មិន​ដែល​បាន​ធ្វើ​តេស្ត​នោះទេ​។​

លោក​បន្ត​ថា៖ «​ខ្ញុំ​រស់​នៅ​បន្ទប់​ជួល​មុខ​រោង​ចក្រ ខ្ញុំបាន​ចាក់​វ៉ាក់សាំង​រួច​រាល់​ហើយ ខ្ញុំ​មិន​ចេញ​ដើរ​ទៅ​ណា​ទេ»។ លោក​បន្ថែម​ទៀតថា៖ «​ខ្ញុំ​គិត​ថា​វា​ជាការល្អ​​បើសិន​ជា​រោង​ចក្រ​អាច​ធ្វើ​តេស្ត​រហ័ស​នេះ​បាន ពីព្រោះ​ថាមាន​កម្មករ​ជាច្រើន​ជិះ​រថយន្ត​រួម​គ្នា ហើយ​យើង​មិន​ដឹង​ថាអ្នកណាមាន ឬគ្មានកូវីដ១៩ ផង»។​

កម្ពុជា​បានចាក់វ៉ាក់សាំង​បង្ការ​កូវីដ១៩ ដល់ប្រជា​ពល​រដ្ឋ​ជាង​៨​លាន​នាក់​ហើយ ក្នុង​នោះ​យ៉ាង​ហោចណាស់​បាន​ចាក់​ដូស​ទី​១ និង​ពេល​នេះ​កំពុង​បន្ត​ចាក់​វ៉ាក់សាំង​ដល់​ក្មេង​អាយុ​ចន្លោះ​១២​ឆ្នាំ ដល់​ ១៧​ឆ្នាំ​។​

គិតត្រឹម​​ថ្ងៃ​ពុធ​​ ក្រសួង​បាន​រាយការណ៍​ថា​មាន​ករណី​ឆ្លង​កូវីដ១៩ ចំនួន ​៤៨៦​ករណីថ្មី ក្នុង​នោះ​មាន​ ១១៩ ជា​ករណី​នាំចូល និង​មាន ​១២​នាក់​បាន​ស្លាប់​ ដែលធ្វើ​ឲ្យ​ចំនួន​អ្នក​ឆ្លង​សរុប​ឡើង​ដល់​ ៨៣ ៣៨៤ករណី និង​អ្នក​ស្លាប់​ឡើង​ដល់​ ១ ៦១៤​នាក់​។ ក្រ​សួង​ក៏​បាន​បញ្ជាក់​ដែរថា ចំនួន​អ្នក​ជា​សះស្បើយ​សរុប​ក៏​បាន​ឡើង​ដល់ ​៧៧ ៧៥៤​នាក់​ហើយ​ដែរ​៕​

ប្រែសម្រួលពីអត្ថបទភាសាអង់គ្លេស៖ Health ministry calls on private sector to carry out frequent rapid tests

122 views
ព័ត៌មានថ្មីៗ »
អត្ថបទពេញនិយម »