សហគមន៍ចំនួនពីរក្នុងក្រុងភ្នំពេញត្រូវបានបិទខ្ទប់ ខណៈវីរុសកូវីដ១៩ បំប្លែងថ្មីដែលតារាតត្បាតពាសពេញប្រទេស

បុគ្គលិកសុខាភិបាលធ្វើតេស្តជំងឺកូវីដ១៩លើពលរដ្ឋក្នុងភូមិផ្សារតូច សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ ដែលគេបានរកឃើញការឆ្លងវីរុសបំប្លែងថ្មីដែលតា ថ្ងៃទី០២ ខែសីហា ឆ្នាំ២០២១។ ខេមបូចា/ បញ្ញា ឆព័ណ្ណ
បុគ្គលិកសុខាភិបាលធ្វើតេស្តជំងឺកូវីដ១៩លើពលរដ្ឋក្នុងភូមិផ្សារតូច សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ ដែលគេបានរកឃើញការឆ្លងវីរុសបំប្លែងថ្មីដែលតា ថ្ងៃទី០២ ខែសីហា ឆ្នាំ២០២១។ ខេមបូចា/ បញ្ញា ឆព័ណ្ណ

មន្រ្តី​សុខាភិបាល​បាន​និយាយ​ថា វីរុស​កូវីដ១៩ ប្រភេទ​បំប្លែង​ថ្មី​ដែលតា (Delta) ដែល​អាច​ឆ្លង​យ៉ាង​ ឆាប់​រហ័ស​ បាន​ចាប់​ផ្តើម​រាតត្បាត​ក្នុង​រាជធានី​ភ្នំពេញ និង​តាម​បណ្តា​ខេត្ត​ដទៃ​ទៀត បន្ទាប់​ពី​មាន​ ការ​រាតត្បាត​ជា​បន្តបន្ទាប់​ នៅ​តាម​បណ្តា​ខេត្ត​នានា​ជាប់​ព្រំប្រទល់​នឹង​ប្រទេស​ថៃ។

​របាយការណ៍​មួយ​របស់​ក្រសួង​សុខាភិបាល​បង្ហាញ​ថា គិត​មក​ត្រឹម​ថ្ងៃ​ទី០២ ខែ​សីហា កម្ពុជា​បាន​រក​ឃើញ​ករណី​ឆ្លង​វីរុស​បំប្លែង​ថ្មី​ដែលតា​ចំនួន​សរុប ២២៣​ករណី។​ ហើយ​នៅ​ក្នុង​រយៈពេល​ត្រឹម​តែ​ពីរ​ថ្ងៃ ចាប់​ពី​ថ្ងៃ​ទី៣១ ខែ​កក្កដា​ រហូត​ដល់​ថ្ងៃ​ទី០១ ខែ​សីហា ករណី​ឆ្លង​វីរុស​បំប្លែង​ថ្មី​នេះ​ចំនួន ១០៩​ករណី​ត្រូវ​បាន​រក​ឃើញ​នៅ​រាជធានី​ភ្នំពេញ និងខេត្តផ្សេងៗ។

មក​ទល់​ពេល​​នេះ មាន​ករណី​ឆ្លង​វីរុស​បំប្លែង​ថ្មី​ដែលតា​នៅ​សង្កាត់​បឹងសាឡាង​ ​ខណ្ឌ​ទួលគោក និង​សង្កាត់ទួលសង្កែ១​ ​ខណ្ឌ​ឬស្សីកែវ។

​រដ្ឋបាល​រាជធានី​ភ្នំពេញ​បាន​ប្រកាស​បិទ​ខ្ទប់​តំបន់​ជុំវិញ​ភូមិ​ផ្សារ​តូច​ក្នុង​សង្កាត់​ទួលសង្កែ​១ ខណ្ឌ​ ឬស្សីកែវ​រយៈពេល​ប្រាំពីរ​​ថ្ងៃ គិត​ចាប់​ពី​ថ្ងៃ​ទី០៣ ខែ​សីហា​តទៅ ដើម្បី​ស្រាវជ្រាវ​​រក ប្រភព​ចម្លង​ វីរុសបំប្លែង​ថ្មី​នេះ និង​ការពារ​ការ​រាតត្បាត។ កាល​ពី​ថ្ងៃ​ចន្ទ មន្រ្តី​សុខាភិបាល​បាន​ ចាប់​ផ្តើមធ្វើតេស្ត​ ពលរដ្ឋ​គ្រប់គ្នា​នៅ​ក្នុង​សហគមន៍​នោះ។

សេចក្តីប្រកាស​របស់​រដ្ឋបាល​រាជធានី​​ភ្នំពេញ​ក៏​បាន​ព្រមាន​ថា ចំណាត់ការ​ផ្លូវ​ច្បាប់​ រួម​មាន​ការ​ផាកពិន័យ និង​ការ​ឃុំខ្លួន នឹង​ត្រូវ​ធ្វើ​ឡើង​ចំពោះ​ជន​បំពាន​បម្រាម​ ស្រប​ទៅ​តាម​ ច្បាប់​ស្តី​ពី​វិធានការ​ការពារ​ការ​រាតត្បាត​ជំងឺ​កូវីដ១៩ និង​ជំងឺ​ឆ្លង​ផ្សេងៗ។

​អភិបាល​រង​រាជធានី​ភ្នំពេញ​លោក​ កើត ឆែ​ បាន​និយាយ​ថា អាជ្ញាធរ​កំពុង​ ធ្វើការ​ស្រាវ ជ្រាវ​ រក​ ប្រភព ​ចម្លង​នៅ​ក្នុង​សហគមន៍​ទាំងពីរ​ ដែល​គេ​បាន​រក​ឃើញ​មាន​វីរុសបំប្លែង​ថ្មី​ដែលតា។  

លោក​បាន​ថ្លែង​ថា៖ «យើង​កំពុង​ចាត់វិធានការ​បន្ថែម​ដើម្បី​ការពារ​ការ​ឆ្លង​វីរុសបំប្លែង​ថ្មី​ដែលតា ហើយ​យើង​អំពាវនាវ​ឲ្យ​មនុស្ស​គ្រប់គ្នា​មាន​ការ​ប្រុងប្រយ័ត្ន។ ទោះបីជា​មាន​កិច្ចប្រឹងប្រែង ​ពី​រដ្ឋាភិបាល​និង​ក្រសួង​សុខាភិបាល​ក៏ដោយ យើង​ជំរុញ​ឲ្យ​ប្រជាពលរដ្ឋ​រួម​គ្នា​ដើម្បី​បញ្ឈប់​វីរុស​បំប្លែង​ថ្មី​ដែលតា​នេះ»។

អភិបាល​ខណ្ឌ​ទួលគោក​លោក​ ឯក ឃុន​ឌឿន​ បាន​និយាយ​ថា មនុស្ស​ជាង ៣០០​នាក់​ក្នុង​ភូមិ៥​ សង្កាត់​បឹង​សាឡាង ខណ្ឌ​ទួលគោក ត្រូវ​បាន​ធ្វើ​តេស្ត​កាល​ពី​យប់​ថ្ងៃ​អាទិត្យ។

លោក​និយាយ​ថា៖ «មនុស្ស​ប្រាំនាក់​ត្រូវ​បាន​ធ្វើ​តេស្ត​រក​ឃើញ​វិជ្ជមាន ប៉ុន្តែ​ខ្ញុំ​មិនដឹង​ថា​តើ​ជា​វីរុស ​ប្រភេទ​ថ្មី​ឬទេ ហើយ​ [យើង] កំពុង​រង់ចាំ​ការ​បញ្ជាក់​ពី​ក្រុម​អ្នក​ជំនាញ។ ឥឡូវ​នេះ​ ភូមិ​ទាំងមូល​ត្រូវ​បាន​បិទខ្ទប់ ហើយ​អាជ្ញាធរ​បាន​ជូន​ព័ត៌មាន​ដល់​ប្រជាពលរដ្ឋ»។

លោកស្រី​ ឱ វណ្ឌឌីន អ្នកនាំពាក្យ​ក្រសួង​សុខាភិបាល​ បាន​សរសេរ​សារ​បង្ហោះ​តាម​បណ្តាញ​សង្គម​ Twitter ថា រដ្ឋាភិបាល​កំពុង​តែ​ចាប់ផ្តើម​យុទ្ធនាការ​អប់រំ​ផ្នែក​សុខាភិបាល​ «យ៉ាង​លឿន​បំផុត​តាម​តែ​អាច​ធ្វើ​បាន» ខណៈ​ពេល​មាន​ការ​រាតត្បាត​វីរុសបំប្លែង​ថ្មី​ដែលតា។

លោក​ស្រី​បាន​សរសេរ​ថា៖ «យើង​ត្រូវ​ធ្វើសកម្មភាព​ដោយ​មាន​ការ​ទទួលខុសត្រូវ​រួម​គ្នា ប្រសិន​បើ​យើង​ មិន​ចង់​ឆ្លងកាត់​គ្រោះ​មហន្តរាយ​ផ្នែក​សុខាភិបាល​នា​ពេល​ខាង​មុខ​នោះ​ទេ»។

បុគ្គលិកសុខាភិបាលធ្វើតេស្តជំងឺកូវីដ១៩លើពលរដ្ឋក្នុងភូមិផ្សារតូច សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ ដែលគេបានរកឃើញការឆ្លងវីរុសបំប្លែងថ្មីដែលតា ថ្ងៃទី០២ ខែសីហា ឆ្នាំ២០២១។ ខេមបូចា/ បញ្ញា ឆព័ណ្ណ
បុគ្គលិកសុខាភិបាលធ្វើតេស្តជំងឺកូវីដ១៩លើពលរដ្ឋក្នុងភូមិផ្សារតូច សង្កាត់ទួលសង្កែ១ ខណ្ឌឬស្សីកែវ រាជធានីភ្នំពេញ ដែលគេបានរកឃើញការឆ្លងវីរុសបំប្លែងថ្មីដែលតា ថ្ងៃទី០២ ខែសីហា ឆ្នាំ២០២១។ ខេមបូចា/ បញ្ញា ឆព័ណ្ណ

ភាគច្រើន​នៃ​ករណី​ឆ្លង​វីរុស​បំប្លែងថ្មី​ដែល​តា ដែល​អាច​ឆ្លង​បាន​លឿន​ជាង​វីរុស​កូវីដ១៩ ប្រភេទ​ដើម ត្រូវ​បាន​រកឃើញ​នៅ​ក្នុង​ចំណោម​ពលករ​ខ្មែរ​វិល​ត្រឡប់​មក​ពី​ប្រទេស​ថៃ។

រដ្ឋាភិបាល​កម្ពុជា​បាន​បិទខ្ទប់​ខេត្ត​ចំនួន​ប្រាំបី​តាម​បណ្តោយ​ព្រំដែន​ជាប់​ប្រទេស​ថៃ​ដើម្បី​ទប់ទល់​​នឹង​ការ​ឆ្លង​វីរុសបំប្លែង​ប្រភេទ​ថ្មី​នេះ និង​បាន​ដាក់​ចេញ​ជា​ការ​រឹតត្បិត​ផ្សេងៗ​ទូទាំង​ប្រទេស រួម​មាន​បម្រាម​គោចរ​ផង​ដែរ។

លោក លី សំរិទ្ធ អភិបាលរង​ និង​អ្នកនាំពាក្យ​ខេត្ត​សៀមរាប បាន​ថ្លែង​ប្រាប់​ ខេមបូចា ថា​ខេត្ត​សៀមរាប​បាន​រកឃើញ​ករណី​ឆ្លង​ថ្មី​នៃ​វីរុស​បំប្លែង​ថ្មី​ដែលតា ភាគ​ច្រើន​នៅ​ក្នុង​ចំណោម​ពលករ​ពី​ប្រទេស​ថៃ ប៉ុន្តែ​​ករណី​មួយ​ចំនួន​ត្រូវ​បាន​រក​ឃើញ​នៅ​ក្នុង​សហគមន៍។

លោក​បាន​ថ្លែង​ថា៖ «មូលហេតុ​នៃ​ការ​ឆ្លង​ក្នុង​សហគមន៍​គឺ​ថា ពលករ​មួយ​ចំនួន​ដែល​បាន​ដាក់​ឲ្យ​ធ្វើ​ចត្តាឡីស័ក១៤​ថ្ងៃ បន្ទាប់​ពី​វិលត្រឡប់​ពី​ប្រទេស​ថៃ មិនបាន​បង្ហាញ​រោគសញ្ញា​នោះ​ទេ ដូច្នេះ​អាជ្ញាធរ​បាន​អនុញ្ញាត​ឲ្យ​ពួកគេ​​ទៅ​សហគមន៍ពួកគេ ប៉ុន្តែ​មួយ​សប្តាហ៍​បន្ទាប់​មក​ ពួកគេ​ត្រូវ​បាន​រក​ឃើញ​ថា មាន​ផ្ទុក​វីរុសបំប្លែង​ថ្មី​ដែលតា»។

ប៉ុន្តែ​លោក​បាន​បន្ត​​ថា នា​ពេល​បច្ចុប្បន្ន​ មាន​ពលករ​ចំណាកស្រុក​វិលត្រឡប់​ពី​ថៃ​តិចតួច​ប៉ុណ្ណោះ ដោយសារ​តែ​ព្រំប្រទល់​រវាង​ខេត្ត​សៀមរាប និង​ឧត្តរមានជ័យ​ ត្រូវ​បាន​បិទ។ ​

​​លោក​សំរិទ្ធ​បាន​បន្ថែមថា ខេត្ត​សៀមរាប​បាន​រឹតត្បិត​ការ​ធ្វើ​ដំណើរ​ដោយ​ផ្នែក និង​បាន​ដាក់​មណ្ឌល​ចត្តាឡីស័ក​ដោយឡែក​សម្រាប់​ពលករ​មក​ពី​ថៃ។

លោក ​គង់ សោភ័ណ្ឌ អភិបាល​ខេត្ត​កណ្តាល បាន​លើកឡើង​កាល​ពី​ថ្ងៃ​ចន្ទ​ថា ករណី​ឆ្លង​វីរុសបំប្លែង​ថ្មី​ដែល​តា​ចំនួន​ពីរ​ករណី​ត្រូវ​បាន​រកឃើញ​នៅ​ស្រុក​ល្វាឯម និង​ស្រុក​កោះធំ​កាល​ពី​ថ្ងៃ​អាទិត្យ។​

​​លោក​បាន​ថ្លែង​ថា បុគ្គល​ដែល​បាន​ឆ្លង​វីរុស​នេះ​នៅ​ស្រុក​ល្វាឯម​ «តែងតែ​ធ្វើ​ដំណើរ​ទៅ​​​ មក​ដើម្បី​ ប្រកប​របរ​នៅ​ក្រុង​ភ្នំពេញ​ ហើយ​យើង​កំពុង​ស្វែងរក​បុគ្គល​ដទៃ​ទៀត​ដែល​បាន​ប៉ះពាល់​ជាមួយ​គាត់។​ ប៉ុន្តែ​គ្រួសារ​របស់​គាត់​ធ្វើតេស្ត​ឃើញ​អវិជ្ជមាន ហើយ​យើង​បាន​ធ្វើ​តេស្ត​មនុស្ស​ជាង​ ៦០​នាក់​នៅ​ក្នុង​ភូមិ»។

​​​មក​ទល់​ពេល​នេះ កម្ពុជា​បាន​ចាក់វ៉ាក់សាំង​​យ៉ាង​ហោច​ណាស់​ ចំនួន​មួយ​ដូស​លើ​ពលរដ្ឋ​​ជាង ​៧,៤លាន​នាក់។

​​​កាល​ពី​ថ្ងៃ​អាទិត្យ រដ្ឋាភិបាល​បាន​ចាប់ផ្តើម​យុទ្ធនាការ​ចាក់វ៉ាក់សាំង​លើ​កុមារ​អាយុ​រវាង ១២​ដល់​១៧​ឆ្នាំ ដោយ​ផ្តើម​ពី​រាជធានី​ភ្នំពេញ។ លោក​នាយករដ្ឋមន្រ្តី​ ហ៊ុន សែន បាន​ប្រកាស​ថា រដ្ឋាភិបាល​គ្រោង​ផ្តល់​ដូស​ទីបី ជា​វ៉ាក់សាំង​ប្រភេទ AstraZeneca ដល់​អ្នក​ដែល​បាន​ចាក់វ៉ាក់សាំង​ Sinopharm ឬ​ Sinovac បាន​ពេញលេញ​រួច​ហើយ។ ​​​កាល​ពី​ថ្ងៃ​ចន្ទ រដ្ឋាភិបាល​បាន​រកឃើញ​ករណី​ឆ្លង​ជំងឺ​កូវីដ១៩​ថ្មី​ចំនួន ៥៦០​ករណី ដែល​ក្នុង​នោះ​ករណីនាំចូល​មាន​ចំនួន​១៦៩ និង​ករណី​ស្លាប់​ចំនួន​២២ ដោយ​ធ្វើ​ឲ្យ​ចំនួន​ករណី​ឆ្លង​សរុប​កើន​ដល់​ ៧៨.៤៧៤​ និង​ការ​ស្លាប់​ចំនួន ១.៤៤២។ ក្រសួង​ក៏​បាន​បង្ហាញ​ថា ករណី​ជា​សះស្បើយ​មាន​ចំនួន ៧១.៥១៧​ផង​ដែរ៕

ប្រែសម្រួលពីអត្ថបទភាសាអង់គ្លេស៖ Two communities in Phnom Penh locked down as Delta variant spreads across Cambodia

223 views
ព័ត៌មានថ្មីៗ »
អត្ថបទពេញនិយម »