មួយសប្តាហ៍បន្ទាប់ពីលោកនាយករដ្ឋមន្រ្តី ហ៊ុន សែន បានស្នើឲ្យមានការបើកសាលារៀនដោយផ្នែក ឥឡូវនេះសាលារៀនខ្លះបានបើកទ្វារឡើងវិញ ខណៈមួយចំនួនទៀតគ្រោងនឹងធ្វើដូចគ្នា។
យ៉ាងណាក្តី អ្នកនាំពាក្យក្រសួងអប់រំ បានថ្លែងប្រាប់ ខេមបូចា ថាលោកមិនមានព័ត៌មានថ្មីពាក់ព័ន្ធនឹងការបើកដំណើរការសាលារៀនឡើងវិញនៅតាមបណ្ដាខេត្តនៅឡើយទេ ប៉ុន្តែអាជ្ញាធរមូលដ្ឋាននិងខេត្តមួយចំនួនបានលើកឡើងអំពីផែនការរៀបចំបើកសាលារៀនឡើងវិញនៅខែកញ្ញានេះ។ ទោះបីជាមន្រ្តីជំនាញបានជ្រើសយកកាលកំណត់បើកដំណើរការសាលារៀនខុសៗគ្នាក៏ដោយ សាលារៀនទាំងនោះត្រូវប្រកាន់ខ្ជាប់វិធានការសុខាភិបាល និងមានការកំណត់ជាទីតាំងផ្សេងៗ ដែលមិនមានការឆ្លងជំងឺកូវីដ១៩ ដូចសេចក្តីថ្លែងរបស់លោកនាយករដ្ឋមន្រ្តី។
លោក ឡាយ បូរ៉ា ប្រធានមន្ទីរអប់រំខេត្តក្រចេះ បាននិយាយថាស្ថាប័នអប់រំមួយចំនួនចាប់ពីសាកលវិទ្យាល័យរហូតដល់បឋមសិក្សាអាចដំណើរការឡើងវិញ ប៉ុន្តែកំពុងរង់ចាំសេចក្តីសម្រេចចុងក្រោយពីក្រសួងអប់រំ។
សាលារៀននានានៅក្នុងខេត្តនេះដែលត្រូវបានកំណត់យកនៅក្នុងកិច្ចប្រជុំថ្នាក់ដឹកនាំមន្ទីរនិងរដ្ឋបាលខេត្តកាលពីថ្ងៃទី៤ ខែកញ្ញា រួមមាន សាកលវិទ្យាល័យខេត្តក្រចេះ អនុវិទ្យាល័យចំនួន១២ និងវិទ្យាល័យមួយចំនួនទៀត និងសាលាបឋមសិក្សាចំនួន ២៥២ សរុបទាំងអស់ចំនួន ២៨៦។
លោកបូរ៉ា បានបន្ថែមថា ខណៈគ្រឹះស្ថានអប់រំភាគច្រើនកំពុងរង់ចាំការអនុញ្ញាតពីក្រសួងអប់រំ សាលារៀនខ្លះនៅតំបន់ក្រីក្រ ដែលមិនមានការឆ្លងជំងឺកូវីដ១៩ ត្រូវបានអនុញ្ញាតឲ្យដំណើរការឡើងវិញ ប៉ុន្តែត្រូវគោរពតាមវិធានការសុខាភិបាលនិងសុវត្ថិភាព រួមមាន ការបន្ថយចំនួនសិស្សតាមថ្នាក់រៀនជាដើម។
លោកបានថ្លែងថា៖ «ឥឡូវនេះយើងកំពុងផ្តោតលើការសម្អាតបរិស្ថានសាលារៀនជាបណ្ដើរៗ ដើម្បីយើងអាចត្រៀមខ្លួនរួចរាល់ នៅពេលក្រសួងអនុញ្ញាតឲ្យបើកថ្នាក់រៀនឡើងវិញ»។
អាជ្ញាធរខេត្តព្រះសីហនុកំពុងចាត់ចំណាត់ការដូចគ្នានេះដែរ ដើម្បីបើកសាលារៀនឡើងវិញ។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បានថ្លែងប្រាប់ ខេមបូចា ថានៅថ្ងៃទី៦ ខែកញ្ញា មន្ត្រីខេត្តបានបើកកិច្ចប្រជុំពិភាក្សា ស្ដីពីការរៀន និងបង្រៀនតាមបណ្ដុំសម្រាប់គ្រឹះស្ថានសិក្សាសាធារណៈ និងឯកជន ក្នុងភូមិសាស្ត្រដែលមានហានិភ័យទាប។ នៅដំណាក់កាលដំបូងនេះសាលារៀនរដ្ឋចំនួន៥ នៅតាមក្រុងនិងស្រុកចំនួន៥ នឹងត្រូវអនុញ្ញាតឱ្យដំណើរការសាកល្បងចាប់ពីថ្ងៃទី១៣ ខែកញ្ញាខាងមុខនេះ។
លោកបានមានប្រសាសន៍ថា៖ «សាលារៀនជាច្រើនទៀតនឹងអាចបើកដំណើរការវិញ ប្រសិនបើមិនមានករណីធ្ងន់ធ្ងរណាមួយកើតឡើង។ គោលដៅចម្បងនៅក្នុងការបើកសាលារៀនឡើងវិញនាពេលបច្ចុប្បន្នគឺដើម្បីជួយសម្រួលសិស្សថ្នាក់ទី៩ និងថ្នាក់ទី១២ ដែលនឹងប្រឡងថ្នាក់ជាតិនាពេលឆាប់ៗនេះ»។
លោកភារម្យបានបន្តថា សាលារៀនដែលត្រូវកំណត់ជ្រើសយកឲ្យដំណើរការឡើង ត្រូវគោរពតាមវិធានការសុខាភិបាលតឹងរ៉ឹង ដែលរួមមានការធ្វើតេស្តជំងឺកូវីដ១៩ជាប្រចាំ។ ការចាក់វ៉ាក់សាំងបង្ការជំងឺកូវីដ១៩ ពេញលេញនឹងជាតម្រូវការចាំបាច់សម្រាប់ទាំងគ្រូបង្រៀននិងសិស្ស ដើម្បីអាចអនុញ្ញាតឲ្យចូលក្នុងសាលារៀនបាន។
កម្ពុជាបានផ្អាកដំណើរការគ្រប់គ្រឹះស្ថានអប់រំទាំងរដ្ឋ និងឯកជនទូទាំងប្រទេសលើកដំបូងនៅខែមីនា ឆ្នាំ២០២០ បន្ទាប់ពីមានការរាតត្បាតជំងឺកូវីដ១៩ រហូតដល់ខែវិច្ឆិកាក្នុងឆ្នាំដដែល។ បន្ទាប់មកសាលារៀនបានបើកទ្វារឡើងវិញបានពីរទៅបីខែ ប៉ុន្តែបានបិទទ្វារសាជាថ្មី បន្ទាប់ពីមានការផ្ទុះឆ្លងក្នុងសហគមន៍ក្នុងព្រឹត្តិការណ៍ ២០ កុម្ភៈ ដែលបានបង្កការរាតត្បាតជាបន្តបន្ទាប់មកទល់ពេលនេះ។
ការជំរុញឲ្យបើកសាលារៀនឡើងវិញបានធ្វើឡើង បន្ទាប់ពីមានសារសំឡេងពី លោកនាយករដ្ឋមន្រ្តី ហ៊ុន សែន កាលពីថ្ងៃទី៣១ ខែសីហា ដោយបញ្ជាឲ្យរដ្ឋមន្រ្តីក្រសួងអប់រំ លោក ហង់ ជួនណារ៉ុន សហការជាមួយនឹងអាជ្ញាធរក្រុងនិងខេត្ត ពិនិត្យវាយតម្លៃលើលទ្ធភាពក្នុងការបើកសាលារៀនឡើងវិញនៅតាមតំបន់ដែលមិនមានហានិភ័យឆ្លងជំងឺកូវីដ១៩។
គ្រូបង្រៀន និងសិស្សដែលឆ្លើយតបមកកាន់ ខេមបូចា និយាយថា ពួកគេសម្លឹងទៅការបើកដំណើរការសាលារៀនឡើងវិញ។
លោក ងៀម ស៊ីដារ៉ា នាយកវិទ្យាល័យវាលរេញនៅស្រុកព្រៃនប់ ខេត្តព្រះសីហនុ បានរៀបរាប់ថា ការបើកសាលារៀនឡើងវិញនឹងមានផលវិជ្ជមានយ៉ាងខ្លាំងចំពោះការសិក្សារបស់សិស្ស។ លោកមិនបានបង្ហាញមន្ទិលថា ការរៀនតាមប្រព័ន្ធអនឡាញមិនបានដើរតួសំខាន់ក្នុងការជួយជ្រោមជ្រែងវិស័យអប់រំអំឡុងពេលការរាតត្បាតជំងឺកូវីដ១៩នោះទេ ប៉ុន្តែលោកបានលើកឡើងថា សិស្សមិនអាចផ្តោតបានពេញលេញលើការរៀនពីចម្ងាយនៅក្នុងរយៈពេលយូរ។ លោកបានបន្ថែមថា ការមិនអាចវិលត្រឡប់មកសិក្សានៅក្នុងថ្នាក់រៀនបានធ្វើឲ្យសិស្សស្មុគស្មាញអារម្មណ៍។
លោកបានថ្លែងថា៖ «ការបើកសាលារៀនឡើងវិញ គឺជាពេលវេលាល្អសម្រាប់ទាំងសិស្សនិងគ្រូ ដើម្បីពង្រឹងអ្វីដែលពួកគេបានរៀនពីមុនមក ដោយសារតែសិស្សមិនអាចចាប់បាន ១០០ភាគរយពីអ្វីដែលត្រូវបានយកមកបង្រៀនតាមប្រព័ន្ធអនឡាញនោះទេ»។
យុវតី ង៉ោ ពេជ្រមរកត សិស្សថ្នាក់ទី១២បាននិយាយថា នាងមានក្តីសប្បាយរីករាយដែលសាលារៀនអាចបើកទ្វារឡើងវិញក្នុងពេលឆាប់ៗនេះ ដោយលើកឡើងថា កញ្ញាបានជួបការលំបាកទាំងផ្លូវកាយនិងអារម្មណ៍អំឡុងពេលរៀនតាមប្រព័ន្ធអនឡាញ។
យុវតី ពេជ្រមរកត បាននិយាយថា៖ «ចំពោះខ្ញុំ ការរៀនតាមប្រព័ន្ធអនឡាញពិតជាធុញទ្រាន់ខ្លាំងណាស់ ដោយសារមិនអាចនិយាយទាក់ទងគ្នាដោយផ្ទាល់ដូចក្នុងថ្នាក់រៀន។ ហើយនៅពេលមានចម្ងល់ណាមួយពាក់ព័ន្ធនឹងមេរៀន ខ្ញុំមិនអាចសុំការបំភ្លឺបាននោះទេ។ នេះជាបញ្ហាទូទៅសម្រាប់យើងទាំងអស់គ្នា»។ ដោយបន្ថែមថា៖ «ហើយការចំណាយពេលច្រើនរៀនតាមអនឡាញពេលខ្លះធ្វើឲ្យខ្ញុំស្រ្តេស ដែលអាចនាំឲ្យមានបញ្ហាគេងមិនលក់ ឬឈឺក្បាល»។
ប៉ុន្តែ មិនមែនគ្រប់គ្នាពេញចិត្តនឹងដំណឹងពីការបើកសាលារៀនឡើងវិញក្នុងពេលខាងមុខនោះទេ លោកស្រី អ៊ុក ឆាយាវី ប្រធានសមាគមគ្រូបង្រៀនឯករាជ្យ បាននិយាយថា លោកស្រីមិនសូវគាំទ្រផែនការបើកសាលារៀនឡើងវិញនាពេលនេះទេ ដោយសារតែមិនទាន់មានការបញ្ជាក់ច្បាស់ពីក្រសួងសុខាភិបាលថា នេះជាពេលវេលាត្រឹមត្រូវអាចបើកដំណើរការសាលារៀនវិញបាន។ លោកស្រីបាននិយាយថា នាពេលនេះ មិនទាន់មានការធានាថា ទីតាំងណាមានហានិភ័យនៃការឆ្លងជំងឺកូវីដ១៩ទាប ដែលអាចធ្វើដំណើរឆ្លងកាត់ពីកន្លែងមួយទៅកន្លែងមួយទៀត ដោយស្រួលនៅក្នុងប្រទេសនៅឡើយ។
លោកស្រីបានថ្លែងថា៖ «ការរៀនតាមប្រព័ន្ធអនឡាញមិនអាចផ្តល់លទ្ធផលដូចការរៀននៅក្នុងថ្នាក់ក៏ពិតមែន ប៉ុន្តែសម្រាប់ពេលនេះ សុខភាពសាធារណៈគួរតែត្រូវចាត់ទុកជាអាទិភាព»។
កាលពីថ្ងៃអង្ការ ក្រសួងសុខាភិបាលបានរាយការណ៍ពីករណីឆ្លងជំងឺកូវីដ១៩ថ្មីចំនួន ៥១១ និងការស្លាប់ចំនួន ១១ ដោយធ្វើឲ្យករណីឆ្លងសរុបកើនដល់ ៩៦.៣៣៩ ដែលក្នុងនោះ ១៥.៩៨១ករណីជាករណីនាំចូល ចាប់តាំងពីមានការរាតត្បាតជំងឺកូវីដ១៩ កន្លងមក៕
ប្រែសម្រួលពីអត្ថបទភាសាអង់គ្លេស៖ Some schools resume class, but most wait for approval
