សមាគមសម្ព័ន្ធអ្នកសារព័ត៌មានកម្ពុជា

សាលារៀនប្រមាណ៥៥០ ដែលផ្តល់សេវាអប់រំឥតគិតថ្លៃដោយអង្គការJRfC-WAfCចាប់ផ្តើមបិទទ្វារនៅសប្តាហ៍នេះ

សិស្សនៅសាលាគិរីវ័ន្តក្នុងខេត្តព្រះសីហនុអានសៀវភៅដែលផ្តល់ឲ្យតាមរយៈអង្គការ JRfC-WAfC។ រូបថតផ្តល់ឲ្យ
សិស្សនៅសាលាគិរីវ័ន្តក្នុងខេត្តព្រះសីហនុអានសៀវភៅដែលផ្តល់ឲ្យតាមរយៈអង្គការ JRfC-WAfC។ រូបថតផ្តល់ឲ្យ

កម្មវិធីបង្រៀនភាសាអង់គ្លេស និងកុំព្យូទ័រដោយមិនគិតថ្លៃដែលផ្តល់ដោយអង្គការក្រៅរដ្ឋាភិបាលនៅតាមសាលាបឋមសិក្សា និង​អនុវិទ្យាល័យ​ជាង៥៥០សាលា ចាប់​ផ្តើម​បិទទ្វារ​កាល​ពី​ថ្ងៃ​អង្គារ បន្ទាប់​ពី​មាន​ការ​បញ្ជា​ពី​ក្រសួង​អប់រំ។

សាលារៀន​ដែល​ត្រូវ​បាន​សាងសង់​ក្រោម​អង្គការ​ដែល​ជា​ដៃគូ​សហការ​នឹង​គ្នាជាមួយ​ Japan Relief for Cambodia and World Assistance for Cambodia (JRfC-WAfC) គឺ​ជា សាលារៀន​​មិនមែន​ស្វែងរក​ប្រាក់​ចំណេញ។ អង្គការ​នេះ​បាន​លើកឡើង​នៅ​លើ​វេបសាយ​ពី​ចំនួន​សាលារៀន​ដែល​ខ្លួន​មាន ដោយ​បកស្រាយ​ថា សាលារៀនទាំងនោះ​ផ្តល់​ការ​បង្រៀន​ភាសាអង់គ្លេស និង​ជំនាញ​កុំព្យូទ័រ ទៅ​កាន់​សិស្ស​ក្រីក្រ​នៅ​តំបន់​ជនបទ។ ​

​​លិខិត​មួយ​ពី​រដ្ឋមន្រ្តី​ក្រសួង​អប់រំ​លោក ហង់ជួន ណារ៉ុន ចេញ​កាល​ពី​ថ្ងៃ​ទី២ ខែ​កុម្ភៈ ដែល​​ខេមបូចា ​បាន​ឃើញ​កាល​ពី​ថ្ងៃ​ចន្ទ បាន​បញ្ចប់​កិច្ចព្រមព្រៀង​របស់​រដ្ឋាភិបាល​ជាមួយ​អង្គការ JRfC-WAfC ដោយ​តម្រូវ​ឲ្យ​អង្គការ​នេះ​បញ្ឈប់​រាល់សកម្មភាពនានាពាក់ព័ន្ធវិស័យអប់រំ​របស់​ខ្លួន​នៅ​កម្ពុជា។ លិខិត​ ដែល​ត្រូវ​បាន​បង្ហោះ​នៅ​លើ​បណ្តាញ​សង្គម​ហ្វេសប៊ុក​ដោយ​គ្រូ​បង្រៀន​ ដែល​ធ្វើ​ការ​នៅ​សាលារៀន​របស់​អង្គការ​នេះ មិនមាន​បញ្ជាក់​ហេតុផល​ច្បាស់លាស់​ណាមួយ​នៅ​ក្នុង​ការ​បញ្ចប់​កិច្ចព្រមព្រៀង​នោះ​ទេ។ ​

​កាល​ពី​ថ្ងៃ​ចន្ទ គ្រូបង្រៀន​មួយ​ចំនួន​ខាង​លើ​ក៏​បាន​បង្ហោះ​សារ​តាម​បណ្តាញ​សង្គម​ហ្វេសប៊ុក​ដោយ​បង្ហាញ​នូវ​​រូបថត​បុគ្គលិក សិស្ស និង​អគារ​សាលា ដោយ​បង្ហាញ​ការ​សោកស្តាយ​ចំពោះ​ការ​​បិទថ្នាក់បង្រៀន។

​សារ​បង្ហោះ​មួយ​របស់​លោក ប៊ុន សុខា ដែល​ជា​គ្រូបង្រៀន​ម្នាក់​នៅ​សាលារៀន​មួយ​​របស់​អង្គការ​ខាង​លើ​នៅ​ខេត្ត​ប៉ៃលិន​សរសេរ​ថា៖ «បែកទាំងអាល័យ [ហើយ]បន្ទប់រៀននេះលែងមានគ្រូនឹងសិស្សទៀតហើយ។ ១៩ឆ្នាំដើរលើវិថីនេះត្រូវបានបញ្ចប់ដោយគ្មានន័យ»។

លោក Bernard Krisher ដែល​ជា​​អ្នក​លើកស្ទួយ​វិស័យព័ត៌មាន​ជាយូរ​មក​ហើយ​ បាន​បង្កើត​អង្គការ JRfC កាល​ពី​ឆ្នាំ១៩៩៣ ដើម្បី​គៀងគរ​​ជំនួយ​​ស្តារ​វិស័យអប់រំនៅកម្ពុជា​ ដែល​កាល​ពី​គ្រា​នោះ​បាន​រងការ​បំផ្លិចបំផ្លាញ​ដោយ​សង្រ្គាម​ស៊ីវិល​រយៈពេល២០​ឆ្នាំ។ លោក Krisher គឺ​ត្រូវ​បាន​គេ​ស្គាល់​ជា​ស្ថាបនិក​កាសែត​ Cambodia Daily ដែល​ត្រូវ​បាន​បង្ខំ​ឲ្យ​បិទ​ទ្វារ បន្ទាប់​ពី​បដិសេធ​មិន​បង់​ពន្ធ​ អំឡុងពេល​ការ​បង្រ្កាប​ដោយ​រដ្ឋាភិបាល​ កាល​ពី​ឆ្នាំ ២០១៧ មក​លើ​ស្ថាប័ន​សារព័ត៌មាន ស្ថាប័នពាក់ព័ន្ធ​នឹង​នយោបាយ និង​សង្គមស៊ីវិល។ លោក​ Krisher បាន​ទទួល​មរណភាព​កាល​ពី​ឆ្នាំ ២០១៩ ហើយ​នា​ពេល​បច្ចុប្បន្ន​កូនស្រី​របស់​លោក អ្នកស្រី Deborah Krisher-Steele ​ជា​អ្នក​មើល​ការ​ខុសត្រូវ​លើ​អង្គការ​ក្រៅ​រដ្ឋាភិបាល​ខាង​លើ​នេះ។

នៅ​ពេល​ទាក់ទង​តាម​សារ​អេឡិចត្រូនិច អ្នកស្រី Krisher-Steele មិនបានធ្វើអត្ថាធិប្បាយអំពីបញ្ហាបិទសាលារៀនទាំងអស់នេះទេ។

សិស្ស​សាលា​ពីរ​នាក់​​កំពុង​រៀន​កុំព្យូទ័រដែល​ផ្តល់​ឲ្យ​ដោយ​ម្ចាស់ជំនួយ​នៅ​សាលាបឋម​សិក្សា​មួយ​ក្នុង​នៅកម្ពុជា។ រូបថត​ពី​វេបសាយ​អង្គការ JRfC-WAfC
សិស្ស​សាលា​ពីរ​នាក់​​កំពុង​រៀន​កុំព្យូទ័រដែល​ផ្តល់​ឲ្យ​ដោយ​ម្ចាស់ជំនួយ​នៅ​សាលាបឋម​សិក្សា​មួយ​ក្នុង​នៅកម្ពុជា។ រូបថត​ពី​វេបសាយ​អង្គការ JRfC-WAfC

លោក ខៀវ តុលា អាយុ ៤០​ឆ្នាំ​ ដែល​ជា​គ្រូ​បង្រៀន​ម្នាក់​នៅ​សាលារៀន​មួយ​របស់​អង្គការ JRfC ក្នុង​ស្រុក​ឱរ៉ាល់​ ខេត្ត​កំពង់ស្ពឺ បាន​និយាយ​ថា លោក​អស់សង្ឃឹម​ នៅ​ពេល​ដែល​ថ្នាក់រៀន​ត្រូវ​បាន​បិទទ្វារ​ដោយ​មិនមាន​ហេតុផល​ច្បាស់លាស់។ លោក​បាន​បន្ត​ថា សិស្ស​​បាន​មក​រៀន​នៅ​សាលា​នេះ​ដោយ​ឥតគិត​ថ្លៃ នៅ​ក្រៅ​ម៉ោង​សិក្សា​សាលារដ្ឋ។ ​

លោក​បាន​ថ្លែង​ថា៖ «បន្ទាប់​ពី​សាលារៀន​បាន​បិទទ្វារ ខ្ញុំ​ឃើញ​ផលប៉ះពាល់​មក​លើ​អារម្មណ៍​របស់​សិស្ស​ដែល​រៀន​ជាមួយ [យើង]» ដោយ​បន្ថែម​ថា សាលារៀន​អង្គការមួយ​នេះ​បាន​ផ្តល់​ការ​បង្រៀន​ភាសា​អង់គ្លេស​ដល់​សិស្ស ដែល​ប្រហែល​មិនមាន​លទ្ធភាព​អាច​រៀន​បាន។ លោក​បាន​បន្ត​ថា៖ «ខ្ញុំ​បាន​បង្រៀន​នៅ​ទីនេះ​ ២៣​ឆ្នាំ​ហើយ​មក​ទល់​ពេល​នេះ ហើយ​ខ្ញុំ​សោកស្តាយ​យ៉ាងខ្លាំង ពីព្រោះ​ខ្ញុំ​បាន​ប្រឹង​អស់​ពី​កម្លាំង​កាយ​ចិត្ត​ដើម្បី​ជួយ​សិស្ស​ក្រីក្រ»

លោក​តុលា​បាន​បន្ថែម​ថា លោក​បាន​បង្រៀន​នៅ​សាលារៀន​ថ្នាក់​អនុវិទ្យាល័យ​របស់​អង្គការ​ JRfC នៅ​ឃុំ​តាសាល​ ដែល​មាន​​អគារ​ប្រាំ​បន្ទប់​ ផ្ទុក​ដោយ​កុំព្យូទ័រ ម៉ាស៊ីន​ព្រីន និង​បណ្ណាល័យ។

លោក​ ព្រំ គីមថុន​ ប្រធាន​ការិយាល័យ​អប់រំ​ស្រុក​ឱរ៉ាល់ និយាយ​ថា លោក​មិន​បាន​ទទួល​ព័ត៌មាន​ណា​មួយ​ពី​ការ​បិទទ្វារ​សាលារៀន​នោះ​ទេ។​ លោក​សុំ​បង្វែរ​សំណួរ​ទៅ​កាន់​មន្រ្តី​មន្ទីរ​អប់រំ​ខេត្ត​ តែ​មន្រ្តី​នោះ​មិន​អាច​ទាក់ទង​បាន​នោះ​ទេ។​

គ្រូ​បង្រៀន​ដទៃ​ទៀត ដែល​ធ្លាប់​ធ្វើការ​នៅ​សាលារៀន​គ្រប់គ្រង​ដោយ​អង្គការ JRfC បាន​បង្ហាញ​ការ​សោកស្តាយ​ស្រដៀង​គ្នា​នេះ​ដូច​លោក​តុលា​​ផង​ដែរ។ អ្នកស្រី​ ទេស សុវណ្ណរេន ដែល​ធ្វើការ​រវាង​​ឆ្នាំ ២០០៨ និង​ ២០២១ នៅ​សាលាបឋម​សិក្សា​មួយ​គាំទ្រ​ដោយ​អង្គការ​ខាង​លើ​នៅ​ស្រុក​រវៀង​ ខេត្ត​ព្រះវិហារ បាន​និយាយ​ថា អ្នកស្រី​មាន​ភាព​សោកសៅ នៅ​ពេល​ដែល​អ្នកស្រី​បាន​ឮ​ថា សាលារៀន​បាន​បិទទ្វារ។

​អ្នកស្រី​​បាន​ថ្លែង​ថា៖ «សាលារៀន​បាន​ជួយ​កុមារ​ជាច្រើន​ ជាមួយ​នឹង​ការ​បង្រៀន​ភាសា​អង់គ្លេស និង​កុំព្យូទ័រ ដោយ​មិនចាំបាច់​បង់​ប្រាក់»

នាយក​សាលា​បឋម​សិក្សា​លោក ទូច គឹមស្រួន​ មក​ពី​ស្រុក​ស្វាយជ្រុំ​ ខេត្ត​ស្វាយរៀង ឲ្យដឹង​ថា ក្រសួង​អប់រំ​បាន​សម្រច​បិទ​កម្មវិធី​សាលារៀន​របស់​អង្គការ​ក្រៅរដ្ឋាភិបាល​មួយ​នេះ ប៉ុន្តែ​លោក​មិនដឹង​ពី​ហេតុផល​នៅ​ពី​ក្រោយ​នោះ​ទេ។

លោក​បាន​ថ្លែង​ថា៖ «ខ្ញុំ​​ទើប​តែ​ដឹង​កាល​ពី​ម្សិលមិញ [ថ្ងៃ​ចន្ទ] បន្ទាប់​ពី​ឃើញ​សេចក្តី​ប្រកាស​របស់​ក្រសួង ប៉ុន្តែ​ខ្ញុំ​មិនទាន់​ទទួល​បាន​ព័ត៌មាន​ណែនាំ​បន្ថែម​ទៀត​នៅ​ឡើយ​ទេ»

​អ្នកនាំពាក្យ​ក្រសួងអប់រំ​លោក​ ឌី ខាំបូលី បាន​ប្រាប់​ ខេំបូចា ថា លោក​មិនទាន់​បាន​ទទួល​បានព័ត៌មាន​អំពី​ការ​បិទ​សាលារៀន​របស់​អង្គការ JRfC ប៉ុន្តែ​និយាយ​ថា «មិនមាន​រឿង​ត្រូវ​ខ្វាយខ្វល់​នោះ​ទេ»។ ​

​លោក​បាន​ថ្លែង​ថា៖ «ខ្ញុំ​សូម​ស្នើ​ថា ប្រសិន​បើ​មិន​សំខាន់ មិនចាំបាច់​បំផុសបំផុល​លើ​រឿង​នោះ​ទេ មាន​រឿង​ច្រើន​ដែល​ត្រូវ​ផ្សាយ។ ហេតុអី​បាន​ចាំបាច់​ផ្សព្វផ្សាយ​រឿង​ធម្មតា​ដូចនេះ

​រដ្ឋមន្រ្តី​ក្រសួង​អប់រំ​លោក ហង់ជួន ណារ៉ុន មិនអាច​ទាក់ទង​សុំ​ការ​អធិប្បាយ​បាន​នោះ​ទេ៕

ប្រែសម្រួលពីអត្ថបទភាសាអង់គ្លេស៖ Non-governmental network of some 550 rural schools to shut down this week

857 views

ព័ត៌មានថ្មីៗ

អត្ថបទពេញនិយម