ផ្លូវលំមួយខ្សែដែលជាមធ្យោបាយតែមួយគត់សម្រាប់សិស្សានុសិស្ស និងគ្រូ ធ្វើដំណើរទៅវិទ្យាល័យ ណាំតៅ ស្ថិតឃុំណាំតៅ ស្រុកភ្នំស្រុក ខេត្តបន្ទាយមានជ័យ កំពុងបង្កការលំបាកដល់ការធ្វើដំណើរ ដោយសារតែស្ថានភាពដីរអិល ខណៈក្រុមហ៊ុនដែលដេញថ្លៃគម្រោងសាងសង់ផ្លូវនេះ មិនទាន់បញ្ចប់ការសាងសង់។
យោងតាមវីដេអូមួយដែលបង្ហោះនៅលើទំព័រហ្វេសប៊ុក របស់គ្រូបង្រៀនមួយរូបដែលមានរយៈពេលជាង៤នាទី កាលពីថ្ងៃទី២៨ ខែកក្កដា បានឱ្យដឹងថា សិស្សានុសិស្សដែលធ្វើដំណើរតាមគោយន្តដើម្បីមករៀន បានរអិលគោយន្តហើយបង្កឱ្យមានរបួសដល់សិស្ស៣នាក់។ គ្រូបង្រៀនរូបនេះ បានលើកឡើងទៀតថា អ្វីដែលលោកបារម្ភនោះ គឺសុវត្ថិភាពសិស្ស ដែលធ្វើដំណើរមកសាលា ខណៈរអិលខ្លាំង ភ្លៀងធ្លាក់រាល់ថ្ងៃ បង្កការលំបាកដល់អ្នកធ្វើដំណើរទាំងឡាយ។
លោក មឿន កម្សត់ លើកឡើងថា៖ «ឥឡូវសូមឱ្យអាជ្ញាធរមើលនេះ មើលអ្វីដែលជាភាពជាក់ស្ដែង អ្វីដែលខ្ញុំបារម្ភ គឺរឿងហ្នឹងឯង ខ្ញុំបារម្ភប៉ុន្មានថ្ងៃហើយរឿងខ្លាចធ្លាក់គោយន្តដោយសារតែផ្លូវរអិល»។
លោក កម្សត់ បន្តថា ក្រុមហ៊ុនដែលទទួលម៉ៅការសាង់សង់ផ្លូវ និងអាជ្ញាធរពាក់ព័ន្ធ គប្បីពន្លឿនការសាង់សង់ ដើម្បីបញ្ចៀសនូវបញ្ហាដល់អ្នកធ្វើដំណើរ ពិសេស សិស្សដែលទៅរៀននៅវិទ្យាល័យ ណាំតៅ។
លោក កម្សត់ បញ្ជាក់ថា៖ «ក្មេងៗគាត់បើកគោយន្តមករៀន ដោយហេតុតែចង់មករៀន ឥឡូវគ្រោះថា្នក់។ ចឹងលោកអ្នកម៉ៅការ និងអាជ្ញាធរពាក់ព័ន្ធជួយដោះស្រាយបញ្ហានេះឱ្យបានលឿនបំផុត»។
លោក កម្សត់ ឱ្យដឹងថា ជានិច្ចជាកាលសិស្សដែលធ្វើដំណើរមករៀនតែងតែដួលរបួសតិច ឬច្រើនតែងតែមានរាល់ថ្ងៃ ដែលបញ្ហានេះជាអ្វីដែលោកបារម្ភចំពោះកូនសិស្សតូចៗ ហើយខាតបង់ទាំងពេលវេលាបង្រៀនសិស្ស ហើយសិស្សក៏រៀនមិនបានទៀងទាត់ និងគ្រប់ម៉ោង។
លោកបានបន្តទៀតថា៖ «គ្រោះថ្នាក់កើតរាល់ថ្ងៃរបកដៃរបកជើង ហើយវាខាតពេលវេលាទាំងគ្រូទាំងសិស្ស ប៉ះពាល់ដល់ការសិក្សាខ្លាំង អស់អារម្មណ៍រៀន និងបង្រៀន ខូចខាតម៉ូតូជាដើម»។
លោកក៏បានសាទរដែលអាជ្ញាធរស្ថាបនាផ្លូវថ្មីជូនពលរដ្ឋ ប៉ុន្តែគប្បីពន្លឿនការសាង់សង់ ពុំគួរធ្វើពាក់កណ្ដាលទីហើយទុកចោលដូច្នេះទេ។
លោក កម្សត់ បានបន្ថែមថា៖ «អាជ្ញាធរជួយសម្រួលធ្វើផ្លូវឱ្យលឿនជាងហ្នឹង។ បញ្ហាទាំងអស់ហ្នឹង គឺដោយសារផ្លូវហ្នឹងហើយ បើពីមុនផ្លូវហ្នឹងជាគ្រួសក្រហម អត់ដែលមានបញ្ហាអី អត់មានគ្រោះថ្នាក់កើតឡើងទេ»។
គ្រូបង្រៀនមួយរូបទៀត សុំមិនបញ្ចេញឈ្មោះដោយព្រួយបារម្ភពីសុវត្ថិភាពផ្ទាល់ខ្លួន បានថ្លែងប្រាប់ ខេមបូចា ថា ផ្លូវលំមួយខ្សែនោះត្រូវបានប្រគល់សិទ្ធិឱ្យក្រុមហ៊ុនមួយមកសាងសង់មួយឆ្នាំមកហើយ មកទល់ពេលនេះមិនទាន់បញ្ចប់ការសាងសង់នៅឡើយទេ។ គ្រូបង្រៀនរូបនោះបន្ថែមថា នៅរដូវវស្សាភ្លៀងធ្លាក់ជាប់ៗគ្នាធ្វើឱ្យការធ្វើដំណើររបស់សិស្សមានឧបសគ្គ ត្បិតផ្លូវមានស្ថានភាពរអិលខ្លាំង សូម្បីតែរូបលោកជាគ្រូបង្រៀនក៏ជិះគោយន្តមកបង្រៀនសិស្សដែរ។ លោកស្នើសុំឱ្យអាជ្ញាធរពន្លឿនការសាង់សង់ផ្លូវនេះឱ្យបានឆាប់រហ័ស ដើម្បីជាប្រយោជន៍ដល់សិស្សានុសិស្សអាចធ្វើដំណើរទៅរៀនដោយសុវត្ថិភាព។
គ្រូបង្រៀនរូបនោះថ្លែងថា៖ «ពេលមេឃភ្លៀងមិនអាចជិះកង់ ឬម៉ូតូមករៀនបានទេ សិស្សត្រូវបង្ខំចិត្តបើកគោយន្តតាមភូមិមករៀនប្រមាណ៨គីឡូ។ ខ្ញុំចង់ឱ្យគាត់ពន្លឿនការសាង់ងសង់ ពីមុនបោះឆ្នោតរហូតដល់ឥឡូវអត់ឃើញមានដំណើរការសាងសង់ទេ»។
លោកបន្តថា ដើម្បីសម្រួលការធ្វើដំណើរ អាជ្ញាធរអាចចាក់គ្រួសក្រហមបណ្ដោះអាសន្ន ដើម្បីឱ្យសិស្សអាចធ្វើដំណើរទៅដោយមិនចាំបាច់ប្រើគោយន្តដែលអាចរអិលបណ្ដាលឱ្យគ្រោះថ្នាក់ដល់ជីវិតបាន។
លោកបានបញ្ជាក់ថា៖ «ខ្ញុំគិតថាបានជាគ្រោះក្រហមបណ្ដោះអាសន្នសិនល្អ ម្យ៉ាងក្រុមហ៊ុនហ្នឹងអត់ធ្វើអីទេ មុនបោះឆ្នោតចាក់ដីម្ដងហើយ ក្រោយបោះឆ្នោតហើយមិនដឹងក្រុមហ៊ុននៅឯណាឯណីទេ»។
បច្ចុប្បន្ននេះ វិទ្យាល័យ ណាំតៅ មានសិស្សកំពុងសិក្សាប្រមាណ៤០០នាក់ ដោយសារតែសាលានេះមានការខ្វះខាត និងស្ថិតក្នុងតំបន់ដាច់ស្រយាលផងដែរ។ ប៉ុន្តែអ្វីដែលគ្រូបង្រៀននៅទីនោះចង់បាន គឺផ្លូវធ្វើដំណើរស្អាត និងមានគុណភាពសម្រាប់ប្រជាពលរដ្ឋ និងសិស្សានុសិស្ស។
នាយកវិទ្យាល័យ ណាំតៅ លោក ហេង សុឡា ប្រាប់ឱ្យដឹងថា ផ្លូវលំមួយខ្សែនេះមានប្រវែងប្រមាណ៣គីឡូម៉ែត្រ បច្ចុប្បន្នបាននឹងកំពុងសាងសង់ហើយ ប៉ុន្តែលោកស្នើសុំឱ្យក្រុមហ៊ុនដែលម៉ៅការការសាងសង់នោះ បញ្ចប់ឱ្យបានលឿន ដើម្បីឱ្យសិស្សានុសិស្ស លោកគ្រូអ្នកគ្រូបានធ្វើដំណើរ ដោយសុវត្ថិភាព។
លោក សុឡា លើកឡើងថា៖ «រឿងផ្លូវហ្នឹងត្រូវការចាំបាច់ ដល់ខែនេះរដូវភ្លៀង ក្រុមហ៊ុនគាត់ចាក់ដីឥដ្ឋចោល ភ្លៀងមកបែកវល់ បើដើរៗមិនរួចផង ដួលពេញហ្នឹង»។
យ៉ាងណាមិញបញ្ហាលំបាកក្នុងការធ្វើដំណើរនេះ លោក សុឡា បានជម្រាបទៅកាន់អាជ្ញាធរពាក់ព័ន្ធផងដែរ ហើយរំពឹងថានឹងមានចំណាត់ការបន្ទាន់។
អភិបាលស្រុកភ្នំស្រុក លោក ជូ បុត្រ ស្នើឱ្យប្រជាពលរដ្ឋមានការអត់ធ្មត់ ខណៈក្រុមហ៊ុនដែលម៉ៅការកំពុងសាងសង់ជាដំណាក់កាល ហើយនៅអាទិត្យក្រោយក្រុមការងារនឹងមកចាក់គ្រួសនៅលើផ្លូវដែលបានចាក់គ្រឹះរួច។
លោក ជូ បុត្រ បន្ថែមថា៖ «ផ្លូវហ្នឹងគេកំពុងតែធ្វើ អាទិត្យក្រោយគេនឹងចាក់គ្រួស ការធ្វើគេមានបែបបទត្រឹមត្រូវពីមួយជំហានទៅមួយជំហាន»។
មន្រ្តីសម្របសម្រួលនៃអង្គការលីកាដូ ប្រចាំខេត្តបន្ទាយមានជ័យ លោក ផុន ឈិន លើកឡើងថា នៅតាមរដ្ឋបាលថ្នាក់ក្រោមជាតិតែងទទួលបានថវិកាអភិវឌ្ឍន៍ឃុំសង្កាត់នៅតាមគម្រោង និងកញ្ចប់ថវិកាប្រចាំឆ្នាំ ដូច្នេះ អាជ្ញាធរគប្បីប្រើប្រាស់លុយទាំងនោះឱ្យមានប្រសិទ្ធភាព ហើយបើខ្វះខាតគួរកៀរគរឱ្យមានការចូលរួមពីប្រជាពលរដ្ឋនៅតាមមូលដ្ឋានខ្លះ។
លោកបានបញ្ជាក់ថា៖ «មួយឆ្នាំៗយើងតែងឃើញក្រសួងមហាផ្ទៃ ឬថ្នាក់ជាតិទម្លាក់ថវិកាឱ្យថ្នាក់ក្រោមជាតិ ពិសេស រដ្ឋបាលឃុំសង្កាត់គាត់មានកញ្ចប់ថវិកា សាងសង់ហេដ្ឋារចនាសម្ព័ន្ធផ្សេងៗ។ ក្នុងករណីការប្រើប្រាស់ថវិកាមិនគ្រប់គ្រាន់ អាជ្ញាធរគួរកៀរគរពីសំណាក់ប្រជាពលរដ្ឋនៅមូលដ្ឋាន»៕
