សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋរងផលប៉ះពាល់ពីគម្រោងអភិវឌ្ឍន៍​អាង​កន្សែងក្នុងខេត្តបន្ទាយមានជ័យ ទាម​ទារ​ឱ្យអាជ្ញាធរដោះស្រាយសំណង

ទំនប់អាងកន្សែងកំពុងអភិវឌ្ឈស្ថិតនៅភូមិកណ្តាល ឃុំសឹង្ហ ស្រុកអូជ្រៅ ខេត្តបន្ទាយមានជ័យ។ រូបថតថ្ងៃទី២ ខែកម្ភះ ឆ្នាំ២០២៤។ (ខេមបូចា/ សុខសាវី)
ទំនប់អាងកន្សែងកំពុងអភិវឌ្ឈស្ថិតនៅភូមិកណ្តាល ឃុំសឹង្ហ ស្រុកអូជ្រៅ ខេត្តបន្ទាយមានជ័យ។ រូបថតថ្ងៃទី២ ខែកម្ភះ ឆ្នាំ២០២៤។ (ខេមបូចា/ សុខសាវី)

កំឡុងពេលក្រុមហ៊ុនកំពុងតែមមាញឹកក្នុងការអភិវឌ្ឍប្រព័ន្ធធារាសាស្រ្ត និងកាត់បន្ថយ​ទឹក​ជំនន់​​​ខេត្តបន្ទាយមានជ័យ ក្រុមប្រជាពលរដ្ឋដែលរងផលប៉ះពាល់ពីគម្រោងនេះ​នៅ​ចំណុច​អាង​កន្សែង ដែលខ្លះមិនទទួលបានសំណង និងខ្លះបានអះអាងថាផ្តិតមេដៃទទួលសំណង​​ដោយ​​បង្ខំ​ចិត្ត ពួកគាត់នៅបន្តទាមទាឱ្យអាជ្ញាធរ​ជួយ​ដោះស្រាយសំណងសមរម្យ។

ប្រជាពលរដ្ឋបានអះអាងថា គម្រោងខាងលើនេះបានប៉ះពាល់ដីស្រែពួកគាត់ប្រមាណជាង​៩០០ហិកតាលើ២៥០គ្រួសារ នៅចំណុចអាងកន្សែងស្ថិតនៅភូមិកណ្ដាល ឃុំសឹង្ហ ស្រុក​អូរជ្រៅ​ ខេត្តបន្ទាយមានជ័យ។ ក្នុងនោះពួកគាត់ថា ប្រជាពលរដ្ឋ៦៤គ្រួសារដែលមានផ្ទៃដី​១៤៤​ហិកតា​ជាងដែលធ្វើស្រែតជំនាន់មកហើយមិនត្រូវបានទទួលសំណង និងក្រៅពីនោះ​អាជ្ញាធរដោះស្រាយផលប៉ះពាល់ជូន។

ប្រជាពលរដ្ឋលោក ស្រឿង ហឿន អាយុ៦៧ឆ្នាំដែលមានដីស្រែជាងបីហិកតា​ក្នុងចំណោម​បងប្អូន​របស់ លោក៤គ្រួសារដែលមានដីស្រែសរុប២០ហិកតានៅបាតអាងកន្សែង​បាន​អះ​អាងថា ពួកគាត់បានធ្វើស្រែនេះតជំនាន់មកហើយតាំងពីមុនឆ្នាំ១៩៧៥ និងបានបន្ត​អាស្រ័យ​ផល​ចាប់តាំងពីឆ្នាំ១៩៧៩មកមិនដែលខកខាន។

ក្នុងសំឡេងរដឺនលោកហឿនបានបន្តឱ្យដឹងថា ពួកគាត់បន្តធ្វើស្រែរហូតឆ្នាំ២០១៧អាជ្ញាធរ​បានបិទទំបន់អាងនេះធ្វើឱ្យទឹកលិចប៉ះពាល់ប្រជាពលរដ្ឋ៦៤គ្រួសារដែលមានដីស្រែជាង១៤៤ហិកតាលែងបានធ្វើស្រែបន្តទៀត។ចាប់ពីពេលនោះមកបានធ្វើឱ្យជីវភាពរបស់ពួកគាត់លំបាកយ៉ាងខ្លាំងគ្រួសារខ្លះចំណាកស្រុក ទៅរក ការងារធ្វើនៅថៃខ្លះដើរស៊ីឈ្នួលគេ​ដើម្បីចិញ្ចឹម​ជីវិត​និងសងបំណុលគេ។

លោក ស្រឿង ហឿន បន្តថា៖ «ខ្ញុំកើតពីកូនង៉ាមកឃើញដីស្រែហ្នឹង ហើយធ្វើតជំនាន់មក ហើយ និងបន្តធ្វើតាំងពី៧៩មកទៀតពីមុនគ្មានអាងធំដុំអីទេ ខ្ញុំធ្វើស្រែមករហូតដល់ឆ្នាំ២០១៧ អាជ្ញាធរបិទទំនប់ទឹកលិចស្រែអស់លែងបានធ្វើស្រែលិចអស់រលីងមានអីហូប កូនចៅទៅរក ការងារធ្វើនៅថៃអស់»

លោកបានបញ្ជាក់ថា ពួកគាត់ទាំង៦៤គ្រួសារអាជ្ញាធរចោទថាធ្វើលើដីរដ្ឋមិនមាន​ដោះ​ស្រាយ​សំណងជូននោះទេ បើទោះជាពួកគាត់បានធ្វើការតវ៉ាជាបន្តបន្ទាប់ដល់អាជ្ញាធរគ្រប់​លំដាប់​ថ្នាក់​​យ៉ាងណាក៏ដោយ។ លោកថាវាអយុត្តិធម៌សម្រាប់ពួកគាត់​ណាស់ដែលកាន់កាប់​ដី​ស្រែ​ត​ជំនាន់មកបែជារដ្ឋដកហូតដោយមិនបានទទួលសំណងមួយរៀលដូច្នេះ។

លោកបន្តថា៖« គេចោទថាយើងធ្វើលើដីរដ្ឋគេមិនដោះស្រាយឱ្យទេខ្ញុំតវ៉ា​ដល់ស្រុកដល់ខេត្ត​ដល់​ក្រសួងក៏គេមិនដោះស្រាយឱ្យខ្ញុំដែរ គេចុះមកធ្វើជាងកន្លះឆ្នាំនេះហើយ​​​ខាងជើងអាង​គេ​ដោះស្រាយឱ្យ តែពួកខ្ញុំ អត់ដោះស្រាយឱ្យ ត្រូវដោះស្រាយឱ្យពួកខ្ញុំខ្លះមក!»។

ប្រជាពលរដ្ឋម្នាក់ទៀតលោកព្រំ ភិត ​អាយុ៦៧ឆ្នាំ ដែលមានដីស្រែជាង៤ហិកតានៅលើ​អាង​កន្សែង​បាន និយាយថាអាជ្ញាធរបានដោះស្រាយសំណងឱ្យគាត់តម្លៃ១ការ៉េ​តម្លៃ0,៥ដុល្លារ​ពោល​ គឺក្នុងមួយហិកតា៥ពាន់ដុល្លារតម្លៃនេះលោកមិនព្រមទទួលនោះ​ទេបើបាន៥ទៅ៦​ដុល្លារ​អីទើបព្រម ព្រោះមិនអាចយកទៅទិញ ដីស្រែធ្វើផ្សេងទៀតបាននោះទេក្នុងតំបន់នោះ។

លោកបានបន្តថា អាជ្ញាធរមិនបានចុះសួរនាំចចារតម្លៃជាមួយប្រជាពលរដ្ឋមុននឹងសម្រេច​ធ្វើ​ការ​អភិវឌ្ឍនោះទេ ដោយកំណត់ឱ្យប្រជាពលរដ្ឋខ្លះបានតម្លៃមួយការ៉េ0,៥ដុល្លារភាគច្រើន ខ្លះ​បាន​១ដុល្លារ ១ដុល្លារជាង និងខ្លះជាង២ដុល្លារជាដើមទៅតាមជាប់ផ្លូវ រឺឆ្ងាយពីផ្លូវ។

លោក ព្រំ ភិត លើកឡើងថា៖ «បងប្អូនមិនជំទាស់នឹងការអភិវឌ្ឍទេ តែដោះស្រាយឱ្យគេ​សមរម្យ​គេយកហើយ អាជ្ញាធរមិនដែលសួរនាំចរចាតម្លៃអីទេ គេកំណត់ប៉ុន្មានប៉ុណ្ណឹង​ហើយ! បើយើងតវ៉ាគេហៅមកព្រមាន បើមិនឱ្យតវ៉ាយ៉ាងម៉េចបើមិនទទួលសំណងសមរម្យផង គេយកគ្រឿងចក្រមកកាយលើដីស្រែយើង»។

លោកបន្តថា៖ «មេឃុំ មេភូមិក៏គេមិនជួយយើងដែរ គេថាមិនពាក់ព័ន្ធជាមួយ​យើងទេ​ប្រជាជន​តវ៉ាតែឯងទៅ យើងដូចអត់ម៉ែ អត់ឪចឹងសព្វថ្ងៃ»។

ចំណែកប្រជាពលរដ្ឋម្នាក់ទៀតលោក លន់ ថុង បានឱ្យដឹងថាដីស្រែរបស់គាត់ជាង​ពីរហិកតា​ត្រូវបាន អាជ្ញាធរដោះស្រាយសំណងឱ្យតម្លៃពីរផ្សេងគ្នា គឺមួយការ៉េ១,៨ដុល្លារនិងឆ្ងាយ​ពីគ្នា​១០០ម៉ែត្រ មួយការ៉េ១,១កាក់តម្លៃនេះលោកអះអាងថា លោកព្រមយកទាំងបង្ខំចិត្ត​ដោយសារ​តែអាជ្ញាធរបានឈូសឆាយដីស្រែរបស់គាត់រួចអស់ទៅហើយ។

លោក លន់ ថុង បន្តថា៖ «តាមទឹកចិត្តខ្ញុំអត់យកទេធ្វើម៉េចដីខ្ញុំហាមឃាត់គេពីរបីដង​ហើយ​ គេ​នៅ​តែ​ធ្វើ គេឈូសដីខ្ញុំអស់រលីងទៅជាថ្នល់ហើយ ខ្ញុំត្រូវតែយកទាំងបង្ខំយកទាំងអន់ចិត្ត​ទាំង​ទឹក​ភ្នែក ព្រោះយកទៅទិញដីស្រែទៅវិញអត់បានបើទទួលគំនាបទាំងអស់ហើយ ខ្ញុំតវ៉ា​ពីរបី​ដង​មិន​បានគេថា​ក្រសួងកំណត់មកចឹង វាអយុត្តិធម៌ណាស់»

លោកបញ្ជាក់ថា គាត់មានដីស្រែមួយកន្លែងទៀតចំនួន៥ហិកតាអាជ្ញាធរ​ឱ្យតម្លៃ​មួយការ៉េ​០,៥កាក់​ទៅ០,៦កាក់ប៉ុណ្តោះ ប៉ុន្តែតម្លៃនេះលោកមិនយល់ព្រមទទួលនោះទេ​ដោយទាមទារ​ចង់​បាន​សំណង​ឱ្យសមរម្យ ជាងនេះយ៉ាងហោចណាស់បានជាង២ដុល្លារមួយការ៉េដែរ។

លោកបន្តថា ពីមុនមានប្រជាពលរដ្ឋខ្លះព្រមទទួលយកសំណងប៉ុន្តែមិនដឹងប៉ុន្មាននាក់​នោះទេ និងមួយខែក្រោយនេះមានប្រជាពលរដ្ឋប្រហែល១០០គ្រួសារបានផ្តិតមេដៃទទួលយក​សំណង​ដែរប៉ុន្តែមិនទាន់បានទទួលលុយនោះទេរួមទាំងលោកផងដែរ។

គម្រោងអភិវឌ្ឍន៍ប្រព័ន្ធធារាសាស្រ្ត និងកាត់បន្ថយទឹកជំនន់(IDFMP)ខេត្តបន្ទាយមានជ័យ ខាង​លើនេះទទួលបានហិរញ្ញប្បទានសម្បទានពីធនាគារកូរ៉េ Eximbankនៃសាធារណរដ្ឋកូរ៉េ។

បើតាមក្រសួងធនធានទឹក និងឧត្តុនិយមបញ្ជាក់ថាគម្រោងអភិវឌ្ឍន៍ខាងលើនេះសម្រាប់​ទទួល​ប្រភពទឹកមកពីតាមបណ្តាអូរ ស្ទឹងនៅតាមបណ្តោយព្រំដែនកម្ពុជា-ថៃ ដែលមាន​ហេដ្ឋារចនាសម្ព័ន្ធសំខាន់ៗដូចជាប្រឡាយស្រោចស្រព និងរំដោះទឹកខ្នាតធំចំនួន៥ខ្សែ មាន​ប្រវែងសរុប៨៧,៦គីឡូម៉ែត្រ សំណង់សិល្បការសរុបចំនួន១៨៧កន្លែង ស្តារអាងទឹក​ចំនួន​៣​កន្លែង​(អាងពង្រ អាងវាំងហែង និងអាងកន្សែង)និងជួសជុលអាងទឹកអូរខៃដន។

លោក កែវ តារារស្មី អភិបាលស្រុកអូរជ្រៅ បានឱ្យដឹងថា ដីដែលរងផលប៉ះពាល់ពីគម្រោង​ខាង លើនេះគឺជាដីគម្របព្រៃឈើរបស់រដ្ឋមិនមែនជាដីរបស់ប្រជាពលរដ្ឋនោះទេ ប៉ុន្តែ​ដោយ​សារការយោគយល់ពីរាជរដ្ឋាភិបាល និងពាក់ព័ន្ធស្ថានភាពសេដកិច្ចផង​ក៏សម្រេចជូនសំណង​ដល់ប្រជាពលរដ្ឋដែលអាស្រ័យផលលើដីហ្នឹង មិនមែនជាការផ្តល់តម្លៃជាដីកម្មសិទ្ធិទេ​បើជា​ផ្លូវ​ការមិនសងទេ។

លោកអភិបាលស្រុកថ្លែងថា៖ «បើលោកទៅសួរមើល ដីគាត់នៅត្រង់ណា? ដីគាត់មានទំហំ​ប៉ុន្មាន? ហើយមានឯកសារទេ? គឺពួកគាត់មិនមានឯកសារទេ»។ លោកបន្តថា៖ «ការអភិវឌ្ឍន៍​ប្រទេសតែងតែមានប៉ះពាល់ខ្លះហើយ គាត់ទាតម្លៃទីផ្សារ​សួរថាតម្លៃដីតំបន់ហ្នឹង​បាន​ទេ​២រឺ៣​ដុល្លារ​មិនបានទេ»

ទំនប់អាងកន្សែងកំពុងអភិវឌ្ឈស្ថិតនៅភូមិកណ្តាល ឃុំសឹង្ហ ស្រុកអូជ្រៅ ខេត្តបន្ទាយមានជ័យ។ រូបថតថ្ងៃទី២ ខែកម្ភះ ឆ្នាំ២០២៤។ (ខេមបូចា/ សុខសាវី)

ខេមបូចា មិនអាចទំនាក់ទំនងបញ្ជាក់ពី លោក អ៊ុំ រាត្រី អភិបាលខេត្តបន្ទាយមានជ័យបាន​នោះ​ទេដោយ លោកថាជាប់រវល់ប្រជុំកាលពីរសៀលថ្ងៃទី០៦ ខែកុម្ភៈ ឆ្នាំ២០២៤ ។

ទោះបីយ៉ាងណាលោក ង៉ោ ម៉េងជ្រួន អភិបាលរងខេត្តបន្ទាយមានជ័យបានឱ្យដឹងថា គម្រោង​អភិវឌ្ឍន៍ខាងលើនេះ គឺមានក្រុមបច្ចេកទេសជាតិ និងអន្តរជាតិចុះមកសិក្សាគ្រប់​ជ្រុងជ្រោយ រយៈពេលជាង៤ឆ្នាំទំរាំរាជរដ្ឋាភិបាលសម្រេចអនុវត្ត។ ដោយបានសិក្សា​ពីផលប៉ះពាល់ និង​ធ្វើ​បច្ចុប្បន្នភាពដីកម្មសិទ្ធិ និងដីរបស់រដ្ឋដែលជាអតីតអាងកន្សែង។

លោកបន្ថែមថា ក្រោយពីធ្វើការសិក្សាហើយគណៈកម្មការអន្តរក្រសួង​បានសម្រេចសុំ​គោលការណ៍​​ដល់រាជរដ្ឋាភិបាលដោះស្រាយផលប៉ះពាល់ដល់ប្រជាពលរដ្ឋដែលមាន កម្មសិទ្ធិស្របច្បាប់។ ចំពោះដី១៤៤ហិកតារបស់ប្រជាជន៦៤គ្រួសារ​បានចុះ​បញ្ជីសារពើភ័ណ្ឌ​របស់រដ្ឋ រួចហើយជាផ្ទៃអាងតាមច្បាប់រដ្ឋធម្មនុញ្ញដីរបស់រដ្ឋ​មិនដោះស្រាយសំណង​ឱ្យនោះទេ ប៉ុន្តែអាជ្ញាធរនឹងរកវិធីដើម្បីសម្របសម្រួលនិងដោះស្រាយផ្សេងៗ។

លោកអភិបាលរងខេត្តបន្ថែមថា៖ «ទាក់ទងទៅនឹងដីរដ្ឋយើងដោះស្រាយផលប៉ះពាល់​ជូន​ចំពោះ​​ផលដំណាំ រឺផ្ទះសម្បែងដែល​សាង​សង់លើដីរបស់រដ្ឋ អន្តរក្រសួងគេធ្វើសិក្សាហើយ​កត់ត្រា​នៅពេលចុះសិក្សានោះ កំណត់ផលប៉ះពាល់ជូនប្រជាពលរដ្ឋ»។ លោកបន្តថា៖ «ក្នុង​ករណីបងប្អូនបានសាងសង់រឺបង្កបង្កើនផលក្រោយពីអន្តរក្រសួងបានកំណត់នោះគឺអត់មាន​ក្នុងបញ្ជីសម្រាប់ដោះស្រាយជូនទេ»

លោកបន្ថែមថា ក្រុមការងារដោះស្រាយផលប៉ះពាល់បានអនុវត្តគ្រប់ជ្រុងជ្រោយ និងភាព​ទន់ភ្លន់ ព្យាយាមដោះស្រាយជូនផង សម្របសម្រួលផង និងដំណើរការសាងសង់តែក្នុង​ទីតាំង​ដីបានដោះស្រាយផលប៉ះពាល់ជូនប្រជាពលរដ្ឋ១០០ភាគរយហើយប៉ុណ្ណោះ និង​បន្ត​ដោះស្រាយផលប៉ះពាល់ជូនប្រជាពលរដ្ឋដែលមិនទាន់បានទទួលសំណងបន្តបន្ទាប់ទៀត។

នៅពេលដែលខេមបូចាសួរសំនួរពីទំហំនៃផលប៉ះពាល់ដល់ប្រជាពលរដ្ឋ និងការដោះស្រាយ​បានប៉ុន្មានគ្រួសារហើយ លោកអភិបាលរងខេត្តបានរុញឱ្យទៅសួរគណៈកម្មាការអន្តរក្រសួង និងសួរទៅរដ្ឋមន្រ្តីក្រសួង ធនធានទឹក និងឧត្តុនិយមវិញដោយលោកគ្រាន់ជាក្រុមការងារ​សម្របសម្រួលប៉ុណ្ណោះ។

ទាក់ទងបញ្ហាខាងលើនេះលោក ចាន់ យុត្ថា អ្នកនាំពាក្យក្រសួងធនធានទឹក និងឧត្តុនិយម បដិសេធមិនធ្វើអត្ថាធិប្បាយដោយលោក​រុញទៅសួរលោក ប៉ុញ សុច្ចៈ នាយកគម្រោងផ្ទាល់បកស្រាយជំនួស។

លោក ប៉ុញ សុច្ចៈ នាយកគម្រោងអភិវឌ្ឍន៍ប្រព័ន្ធធារាសាស្រ្ត និងកាត់បន្ថយទឹកជំនន់​នៃ​ក្រសួងធនធាន ទឹក និងឧត្តុនិយម បានបញ្ជាក់ដូចគ្នានឹងអាជ្ញាធរខេត្តដែរលើដី១៤៤ហិកតា​របស់ពលរដ្ឋខាងលើនោះ គឺជាអាងដីរបស់រដ្ឋដែលអាជ្ញាធរដែនដីកំណត់តាំងពីឆ្នាំ២០១៧មក ផ្អែកលើគោលការណ៍ដីរដ្ឋ គឺមិនមាន សំណងទេហើយខាងខេត្តក៏បានផ្សព្វផ្សាយដែរ។​លោក​បន្តថា ក្រៅពីនោះខាងនាយកដ្ឋានដោះស្រាយផលប៉ះពាល់នៃអគ្គនាយក ដ្ឋានផលប៉ះពាល់របស់ក្រសួងសេដ្ឋកិច្ច និងហិរញ្ញវត្ថុដោះស្រាយជូន។

លោកបានបន្ថែមថា៖ «ខាងខ្ញុំរង់ចាំតែគេដោះស្រាយហើយគេចង្អុលបង្ហាញឱ្យធ្វើត្រង់ណា​ខ្ញុំចុះ​ទៅ អនុវត្តន៍គម្រោងត្រង់នោះ»។ លោកបន្តថា៖ «ចំពោះការដោះស្រាយសំណង​យ៉ាង​ណាខ្ញុំអត់ដឹងច្បាស់ទេវាជាគោលនយោបាយខាងដោះស្រាយផលប៉ះពាល់គេអត់ឱ្យព័ត៌មានមកយើងផង យើងគូរប្លង់ហើយត្រូវ ការធ្វើប្រព័ន្ធប្រឡាយ ទំហំដីត្រូវសាងសង់ប៉ុណ្ណា ទៅឱ្យ​ខាង​គេជាអ្នកប្រជុំដោះស្រាយចាត់ចែង»

ទោះបីយ៉ាងណាលោកបញ្ជាក់បន្ថែមថា គម្រោងអភិវឌ្ឍន៍ប្រព័ន្ធធារាសាស្រ្តនិងកាត់បន្ថយ​ទឹកជំនន់​ខេត្តបន្ទាយមានជ័យ គឺស្តារប្រឡាយខ្នាតធំចំនួន៤ខ្សែជិត១០០គីឡូម៉ែត្រ​មាន​អាង​ស្តារថ្មីចំនួន៣កន្លែងនិងជួសជុលអាងទឹកអូរខៃដន ដែលអាចស្តុកទឹកសរុបបានជាង​២០លាន​ម៉ែត្រគូប។

លោកបន្តថា គម្រោងនេះអភិវឌ្ឍន៍ដើម្បីកាត់បន្ថយទឹកជំនន់ដែលឆ្លង​ពីប្រទេសថៃមកហូរ​ចូល​អាងទឹកមួយ ចំនួន ហូរតាមប្រឡាយចូលស្ទឹងសេរីសោភ័ណ្ឌ និងស្ទឹងមង្គលបូរី ហូរបន្ត​ទៅតំបន់បីឆ្ពោះទៅទន្លេសាប ។ លោកបញ្ជាក់ទៀតថា នៅខែប្រាំងទឹកមានស្តុកតាម​ប្រឡាយ​ផង និងអាងទឹកផងអាចស្រោចស្រពធ្វើស្រែប្រាំងបានច្រើនហិកតា។

លោកបន្ថែមថា៖ «តាមផែនការគម្រោងនេះបញ្ចប់នូវឆ្នាំ២០២៦បច្ចុប្បន្ន​ផែនការថ្មីអភិវឌ្ឍន៍​បាន​២៥ភាគរយទៅ២៦ភាគរយ លើផែនការគ្រោងទុក១៥ទៅ១៦ភាគរយ យើងនឹងសម្រុក​មួយប្រាំងនេះ ធ្វើឱ្យបានជាង៥០ភាគរយ»

ខេមបូចាមិនអាចទំនាក់ទំនងលោក យឹម យុត្ថារ័ត្ន ប្រធានក្រុមការងារគណៈកម្មការអន្តរ​ក្រសួង​តាមទូរស័ព្ទ បាននោះទេដោយទូរស័ព្ទហៅចូលហើយត្រូវបានចុចផ្តាច់ទៅវិញ​កាល​ពី​ល្ងាចថ្ងៃទី០៦ ខែកុម្ភៈ ឆ្នាំ២០២៤។

ចំណែកលោក​ យ៉េន សោភ័ណ្ឌ អគ្គនាយករងនៃអគ្គនាយកដ្ឋានដោះស្រាយផលប៉ះពាល់​នៃ​ក្រសួងសេដ្ឋកិច្ច ហិរញ្ញវត្ថុ ទូរស័ព្ទហៅចូលហើយលោកថាស្តាប់មិនលឺ ក្រោយមក ខេមបូចា ព្យាយាមទាក់ទងបន្ថែមទៀត ប៉ុន្តែទាក់ទងមិនបាន។

លោក អ៊ិន គង់ជិត មន្រ្តីសម្របសម្រួលអង្គការសិទ្ធិមនុស្សលីកាដូរប្រចាំខេត្តបាត់ដំបង និងបន្ទាយមានជ័យ បានឱ្យដឹងថា លោកមិនជំទាស់នឹងគម្រោងអភិវឌ្ឍន៍ខាងលើនោះទេ ប៉ុន្តែលោកសោកស្តាយដោយសារអាជ្ញាធរ​ពាក់ព័ន្ធមិនបានធ្វើកិច្ចពិគ្រោះ​យោបល់​ជាមួយ​សហគមន៍មុន។

លោកបញ្ជាក់ថា ប្រជាពលរដ្ឋទាំង៦៤គ្រួសារបានធ្វើស្រែចំនួន១៤៤ហិកតាជាង ដែល​សុទ្ធតែ​ជាដីកេរ្តិ៍ពីដូនតារបស់គាត់ដែលអាស្រ័យផលរហូតមកតែពេលនេះគាត់បានបាត់បង់ទាំង​ស្រុង​ដោយសារការដកហូតពីអាជ្ញាធរដោយគ្មានសំណង។ លោកបានស្នើសុំអាជ្ញាធរពាក់ព័ន្ធ​គួរដោះស្រាយ​ផលប៉ះពាល់ជូនពួកគាត់ក្នុងតម្លៃសមរម្យណាមួយដើម្បី​អាចឱ្យ​ពួកគាត់អាច​យក​​ទៅទិញដីស្រែដើម្បីបង្កបង្កើនផលចិញ្ចឹមជីវិតឡើងវិញ។

លោក គង់ជិត បន្ថែមថា៖ «ប្រជាពលរដ្ឋកាន់កាប់អាស្រ័យផលតាំងពីឆ្នាំ១៩៧៩ តមរតក​ដី​គាត់​តាំងពីសម័យ១៩៧៥មុនសម័យប៉ុលពតមក ចឹងយើងមើលឥរិយាបទ​កាន់កាប់របស់​គាត់​មើល គឺកាន់កាប់ស្របតាមច្បាប់ភូមិបាលទាំងស្រុង គាត់ជាភោគៈស្របច្បាប់ត្រូវតែ​ទទួល​បាន​សំណង»។ លោកបន្តថា៖ «ហើយសំណងគួរទទួលបានសមរម្យសម្រាប់ពួកគាត់ ព្រោះ​គាត់​ត្រូវទៅទិញដីស្រែថ្មីទៀត ដើម្បីបង្កបង្កើនផលបើមិនឱ្យលុយគាត់ស្មើនឹងផ្តាច់ជីវិត​គាត់»

សូមជម្រាបថា បើតាមក្រសួងធនធានទឹក និងឧត្តុនិយមគម្រោងអភិវឌ្ឍន៍ប្រព័ន្ធធារាសាស្ត្រ និង​កាត់បន្ថយទឹកជំនន់(IDFMP) ខេត្តបន្ទាយមានជ័យនេះមានលទ្ធភាពស្រោចស្រព​ផ្ទៃដី​បង្ក​បង្កើន​ផលសរុបប្រមាណជិត ២០ ០០០ហិកតា ប្រជាកសិករទទួលផលមានចំនួន ៤២ ២១៣​គ្រួសារ​ស្ថិតក្នុងឃុំចំនួន១៧ នៃក្រុងប៉ោយប៉ែត ស្រុកម៉ាឡៃ ស្រុកអូរជ្រៅ និងក្រុង​សិរីសោភ័ណ។ តាមរយៈកិច្ចសហប្រតិបត្តិការរវាងព្រះរាជាណាចក្រកម្ពុជា និងសាធារណរដ្ឋកូរ៉េ ក្រោម​ហិរញ្ញប្បទានសម្បទាន​ពីធនាគារកូរ៉េ Eximbank និងដោយមានការគាំទ្រសហការ​យ៉ាង​ជិត​ស្និទ្ធពីក្រសួងសេដ្ឋកិច្ច និងហិរញ្ញវត្ថុកម្ពុជា ក្រសួងធនធានទឹក និងឧតុនិយម បាននិងកំពុង​អនុវត្ត​គម្រោង​ចំនួនបីគឺ៖ ទី១)គម្រោងពហុបំណងទំនប់ដូនទ្រី ស្ទឹងមោងឫស្សី ខេត្តបាត់ដំបង កំពុងដំណើរការសាងសង់ដែលគ្រោងបញ្ចប់នៅឆ្នាំ២០២៥ ទី២)គម្រោងអភិវឌ្ឍន៍​ប្រព័ន្ធ​ធារាសាស្ត្រ និងកាត់បន្ថយទឹកជំនន់ខេត្តបន្ទាយមានជ័យ កំពុងដំណើរការសាងសង់​ដែល​គ្រោង​​នឹងបញ្ចប់នៅឆ្នាំ២០២៦ និងទី៣)គម្រោងកាត់បន្ថយទឹកជំនន់ និង អភិវឌ្ឍន៍ប្រព័ន្ធ​ធារាសាស្ត្រ​បវេល​ខេត្តបាត់ដំបង៕

491 views

ព័ត៌មានថ្មីៗ

អត្ថបទពេញនិយម