ក្រសួងធនធានទឹក និងឧតុនិយមបានបញ្ជាក់ថា ចាប់ពីខែកុម្ភៈដល់ដើមខែឧសភា សីតុណ្ហភាពរំពឹងថា នឹងកើនឡើងដល់ ៤១អង្សាសេ ដោយបានអំពាវនាវដល់សាធារណជន ជាពិសេសប្រជាពលរដ្ឋនៅតាមជនបទ ប្រើប្រាស់ទឹកដោយសន្សំសំចៃ។
ក្រសួងក៏បានឱ្យដឹងផងដែរថា រដូវប្រាំងនឹងចាប់ផ្តើមពីខែធ្នូ ឆ្នាំ២០២៣ ដល់ដើមខែឧសភាឆ្នាំក្រោយ ដោយកត់សំគាល់ថា នឹងមានភ្លៀងធ្លាក់តិចជាងមុន ប៉ុន្តែមានផ្គរនិងរន្ទះកើនឡើង ជាមួយនឹងខ្យល់បក់ខ្លាំងនៅក្នុងខែមេសា និងខែឧសភា បើធៀបនឹងឆ្នាំ២០២៣។
ឆ្លើយតបនឹងសំណួរស្តីពីអាកាសធាតុ លោក ឃឹម ហ្វីណង់ អ្នកនាំពាក្យក្រសួងកសិកម្ម មានប្រសាសន៍ថា អាជ្ញាធរនឹងអន្តរាគមន៍ក្នុងករណីមានគ្រោះធម្មជាតិ។ ទោះបីជាយ៉ាងណាក៏ដោយ ក្រសួងមិនអាចឆ្លើយតបបានពេញលេញចំពោះហានិភ័យអាកាសធាតុទេ ដូច្នេះហើយបានជាក្រសួងអំពាវនាវឱ្យកសិករចាប់ផ្តើមដាំដំណាំណា ដែលធន់នឹងអាកាសធាតុ។
លោកមានប្រសាសន៍ថា៖ «ប្រសិនបើយើងខ្វះទឹក វាប្រហែលជាគ្មានជម្រើសច្រើនទេ។ យើងតែងតែលើកទឹកចិត្តកសិករឱ្យប្តូរទៅដាំដំណាំ ដែលអាចធន់នឹងស្ថានភាពទឹក [ខ្វះខាត] ប្រើប្រាស់ពូជ ដែលអាចសម្របទៅនឹងបម្រែបម្រួល និងប្តូរពីការធ្វើស្រែទៅធ្វើចម្ការ ឬដាំដំណាំណា ដែលប្រមូលផលមុនពេលមានការខ្វះខាតទឹក ឬទឹកជំនន់ [កើតឡើង]» ។
លោកបន្តថា ក្រសួងតែងតែត្រៀមខ្លួនជាមុន ជាពិសេសនៅដើមរដូវប្រាំងនីមួយៗ ទៅតាមបរិមាណទឹកដែលគួរត្រូវបានស្តុកទុក អំឡុងពេលដាំដុះនៅរដូវប្រាំង។
ដើម្បីទប់ស្កាត់ការខូចខាតដំណាំ ក្រសួងតាមដានកម្រិតទឹកជារៀងរាល់ឆ្នាំ ជូនដំណឹងដល់កសិករ និងផ្តល់ការណែនាំបច្ចេកទេស ប៉ុន្តែកសិករអាចជួបប្រទះបញ្ហាប្រឈម ប្រសិនបើពួកគាត់បន្តដាំដំណាំដែលមិនធន់នឹងអាកាសធាតុ។
លោកមានប្រសាសន៍ថា៖ «ជារឿយៗ យើងមិនលើកទឹកចិត្ត [កសិករ] ឲ្យដាំដុះ [ដំណាំ] លើសពីបរិមាណទឹក ដែលយើងអាចផ្គត់ផ្គង់បាននោះទេ។ ប្រសិនបើយើងនៅតែធ្វើបែបនេះ យើងនឹងមានបញ្ហានៅពេលស្រូវឈានដល់ដំណាក់កាលចេញផ្កា ព្រោះយើងនឹងមិនមានទឹក [គ្រប់គ្រាន់] សម្រាប់ផ្គត់ផ្គង់។ យើងនឹងជួបការលំបាក»។
ក្រៅពីការព្រួយបារម្ភក្នុងវិស័យកសិកម្ម បញ្ហាសុខភាពក៏ជាកង្វល់ធំដែរ។
លោក លី សុវណ្ណ អ្នកនាំពាក្យក្រសួងសុខាភិបាល ឆ្លើយតបមកខេមបូចាដោយចែករំលែកឯកសារមួយចំនួន ដែលលើកឡើងពីបញ្ហាសុខភាពមួយចំនួន ដែលកើតមានក្នុងរដូវប្រាំង ដូចជា ខ្យល់គរ ការអស់កម្លាំងល្ហិតល្ហៃ និងវិលមុខជាដើម។
យោងតាមឯកសារទាំងនេះ អ្នកដែលងាយរងគ្រោះជាងគេ គឺកុមារអាយុក្រោម ៥ឆ្នាំ មនុស្សអាយុលើសពី ៦៥ឆ្នាំ ស្ត្រីមានផ្ទៃពោះ និងអ្នកដែលមានជំងឺរ៉ាំរ៉ៃ។
ដើម្បីការពារសុខភាពរបស់ពួកគាត់ អំឡុងពេលមានសីតុណ្ហភាពខ្ពស់ ក្រសួងសុខាភិបាលបានស្នើឱ្យប្រជាពលរដ្ឋស្នាក់នៅកន្លែងត្រជាក់ និងជៀសវាងការប្រើកង្ហារ រក្សាជាតិទឹកក្នុងខ្លួន និងតាមដានព័ត៌មានអំពីអាកាសធាតុ និងសុខភាព។
លោក សឿង សារឿន នាយកប្រតិបត្តិវេទិកា នៃអង្គការមិនមែនរដ្ឋាភិបាលបានប្រាប់ខេមបូចាថា សីតុណ្ហភាពខ្ពស់នៅឆ្នាំ២០២៤ នឹងប៉ះពាល់ដល់សុខភាព និងការរស់នៅរបស់ប្រជាពលរដ្ឋ និងវិស័យកសិកម្ម។
លោក សារឿន មានប្រសាសន៍ថា៖ «យើងមានការព្រួយបារម្ភអំពីការកើនឡើងនៃសីតុណ្ហភាពនៅឆ្នាំ២០២៤ ដែលបណ្តាលមកពីបាតុភូតអ៊ែលនីណូ និងអែនសូ»។
បាតុភូតអ៊ែលនីណូនឹងបន្តរហូតដល់ខែមករា ជាមួយនឹងឱកាស៩០ភាគរយ នៃការអូសបន្លាយដល់ខែកុម្ភៈ និង១០ភាគរយ នៃបាតុភូតអែនសូ ដោយផ្អែកលើការព្យាករណ៍សីតុណ្ហភាពដែលកំពុងវិវត្តនៅមហាសមុទ្រប៉ាស៊ីហ្វិក។
យោងតាមក្រសួងធនធានទឹកដែលបានចេញផ្សាយការព្យាករណ៍នេះបានឲ្យដឹងថា ប្រហែល៧០ភាគរយ នៃបាតុភូតអ៊ែលនីណូ និង៣០ភាគរយនៃបាតុភូតអែនសូអាចនឹងកើតឡើងនៅក្នុងខែមីនា ខណៈនៅខែមេសា នឹងមានបាតុភូតអ៊ែលនីណូ ៥០ភាគរយនិងបាតុភូតអែនសូ ៥០ភាគរយ។
លោក សារឿន មានប្រសាសន៍ថា រដ្ឋាភិបាល អង្គការក្រៅរដ្ឋាភិបាល និងអ្នកពាក់ព័ន្ធត្រូវបង្កើតការយល់ដឹងអំពីផលប៉ះពាល់ នៃអាកាសធាតុក្តៅជាងមុន ដើម្បីត្រៀម និងការពារខ្លួន ហើយជូនដំណឹងដល់សាធារណជនឲ្យមានសម្ភារចាំបាច់បន្ទាន់នៅនឹងដៃជានិច្ច ដូចជាធុងទឹកជាដើម៕
ប្រែសម្រួលពីអត្ថបទភាសាអង់គ្លេស៖ Hot Weather, Dry Season Looms As Agriculture Ministry Calls For More Climate-resilient Crops
