សមាគមសម្ព័ន្ធអ្នកសារព័ត៌មានកម្ពុជា

លោក ហ៊ុន ម៉ាណែត ថាសេរីភាពសារព័ត៌មាននៅកម្ពុជាដំណើរការល្អ និងរស់រវើក

លោក ហ៊ុន ម៉ាណែត កូនប្រុសច្បងរបស់លោកនាយករដ្ឋមន្ត្រីហ៊ុន សែន ថ្លែងក្នុងទិវាសេរីភាពសារព័ត៌មានពិភពលោករៀបចំនៅរាជធានីភ្នំពេញ នៅថ្ងៃអង្គារ ទី៣ ខែឧសភា ឆ្នាំ២០២២។ រូបភាពពីហ្វេសប៊ុក លោក ហ៊ុន ម៉ាណែត
លោក ហ៊ុន ម៉ាណែត កូនប្រុសច្បងរបស់លោកនាយករដ្ឋមន្ត្រីហ៊ុន សែន ថ្លែងក្នុងទិវាសេរីភាពសារព័ត៌មានពិភពលោករៀបចំនៅរាជធានីភ្នំពេញ នៅថ្ងៃអង្គារ ទី៣ ខែឧសភា ឆ្នាំ២០២២។ រូបភាពពីហ្វេសប៊ុក លោក ហ៊ុន ម៉ាណែត

លោក ហ៊ុន ម៉ាណែត ដែលជាបេក្ខភាពនាយក​រដ្ឋ​មន្ត្រី​នៅ​ថ្ងៃ​អនាគតរបស់គណបក្សប្រជាជនកម្ពុជា បានលើកឡើងពីភាពល្អប្រសើរនៃ​​សេរីភាព​សារព័ត៌មាន​នៅ​កម្ពុជា ​ប៉ុន្តែផ្ទុយពី​អង្គការសង្គម​ស៊ីវិលដែល​ថា​សេរីភាពនេះកំពុង​រង​ការ​រឹតត្បិត ហើយ​លំហ​សេរីភាព​ជនស៊ីវិល​ក៏​កំពុង​រួម​តូច​ផង​ដែរ​។​

លោក ហ៊ុន ម៉ាណែត កូន​ប្រុស​ច្បង​របស់​លោក​នាយក​រដ្ឋ​មន្ត្រី ហ៊ុន សែន បាន​ចូល​រួម​កម្មវិធី​អបអរ​ទិវាសេរីភាព​សារព័ត៌មាន​ពិភព​លោក នៅ​ក្នុង​រាជធានីភ្នំពេញ ដែល​នេះជា​លើក​ទីមួយ​សម្រាប់​វត្តមាន​របស់​លោក​។​ លោក បាន​ចូល​រួម​កម្មវិធី​នេះ​តំណាង​ឲ្យ​ឪពុក​របស់​លោក ជាមួយ​នឹង​អ្នកសារព័ត៌មាន​ជាង​ ១០០​នាក់​។​ វត្ត​មាន​របស់​លោកកើត​មាន​ស្រប​ពេល​ដែល​លោក​ព្យាយាម​បង្ហាញ​ខ្លួន​ជា​សាធារណៈ​កាន់​តែច្រើន បន្ទាប់​ពី​គណបក្ស​ប្រ​ជា​ជន​កម្ពុជាកាលពី​ខែធ្នូ កន្លង​ទៅ​បាន​គាំទ្រ​លោក​ជា​បេក្ខជន​នាយក​រដ្ឋ​មន្ត្រី​។​

លោក មាន​ប្រ​សាសន៍ថា៖ «ច្បាប់​បង្កើត​ឡើង​ដើម្បី​ការពារ​លំហនៃសិទ្ធិសេរីភាព​ទាំង​អស់​គ្នា ហើយ​ការ​អនុវត្ត​សិទ្ធិ​របស់​ពល​រដ្ឋ​ម្នាក់ៗ​មិន​ត្រូវ​ឲ្យ​ប៉ះពាល់​ដល់​សិទ្ធិ​អ្នក​ដទៃ»។​

លោកបានបន្ត​ថា ច្បាប់​ទាក់​ទឹង​នឹង​សិទ្ធិ​បញ្ចេញ​មតិ​បាន​អនុវត្ត​ដោយ​ស្មើ​ភាព​គ្នា​ក្នុង​សង្គម​។ លោក​ក៏​បាន​កត់​សម្គាល់​ដែរ​ថា ស្ថាប័ន​ប្រព័ន្ធ​ផ្សព្វ​ផ្សាយ​មាន​ចំនួន​ជាង​ ២ ០០០ បាន​ចុះ​បញ្ជី​នៅ​ក្រ​សួង​ព័ត៌មាន និង​មាន​អ្នក​សារព័ត៌មាន​ប្រហែល​ ៥ ០០០​នាក់​កំពុង​អនុវត្ត​តួនាទី​របស់​ខ្លួន​ក្នុង​ប្រទេស​កម្ពុជា​។​

លោកបានបន្ថែម​ថា៖ «​បើ​យើង​និយាយ​ពី​អ្នក​សារព័ត៌មានសម័យ​ឌីជីថលនេះ ​មាន​ប្រហែល​ចូលជាងពាក់​កណ្ដាល​ប្រទេសហើយ បានន័យថាអ្នក​មាន​លទ្ធភាព​ទិញ​ទូរសព្ទ​ទំនើប ប្រើ​ហ្វេសប៊ុក និង​ដែលសេរី​ភាព​របស់​ពួកគាត់​បាន​បញ្ចេញ​រាល់​ថ្ងៃ»។​

យ៉ាងណា​ខាង​អង្គការ​សង្គម​ស៊ីវិល​វិញ យល់​ឃើញ​ថា​លំហសេរីភាព​សារព័ត៌មាន​កាន់​តែ​រួម​តូច ខណៈ​មាន​អ្នក​សារព័ត៌មាន​ខ្លះ​បាន​រង​ការ​គំរាម​កំហែង និង​រង​សម្ពាធ​ផ្លូវ​ច្បាប់ និង​ក៏​មាន​អ្នក​ខ្លះ​ត្រូវ​ឃុំ​ខ្លួន​ដោយសារ​តែការ​បំពេញ​ការងារ​ផង​ដែរ​។ ក្នុង​កម្មវិធី​នេះ សង្គម​ស៊ីវិល​ក៏​បាន​លើក​ឡើង​ពី​រឿងអ្នក​សារព័ត៌មាន វីអូឌី (VOD) លោក ម៉ិច ដារ៉ា ដែល​ត្រូវ​ឃុំ​ខ្លួន​រយៈពេល​ខ្លី​ដោយ​នគរបាល​អន្តោប្រវេសន៍​នៅ​ខេត្ត​ព្រះ​សីហនុ​ផង​ដែរ។ លោក ម៉ិច ដារ៉ា ឲ្យ​ដឹង​ថា​នគរបាល​បាន​ឃុំ​ខ្លួន​រូប​លោក​អស់​ប្រហែល​ពីរ​ម៉ោង មុន​នឹង​ដោះ​លែង​លោក​វិញ ក្រោយ​ពី​លោក​បាន​បដិសេធ​លុប​រូប​ដែល​លោក​បាន​ថត​នៅ​ទី​តាំង​សមត្ថកិច្ច​កំពុង​ធ្វើ​ប្រតិបត្តិការ​នៅ​កន្លែង​មួយ​​ដែល​សង្ស័យ​ថា​មាន​ប្រើ​កម្លាំង​ពល​កម្ម​ដោយ​បង្ខំ។​

អ្នក​ស្រី ឆន សុគន្ធា នាយិការ​អភិវឌ្ឍ​ផ្នែក​ប្រព័ន្ធ​ផ្សព្វ​ផ្សាយ​របស់​មជ្ឈមណ្ឌល​កម្ពុជា​សម្រាប់​ប្រព័ន្ធ​ផ្សព្វ​ផ្សាយ​ឯករាជ្រ លើក​ឡើង​ថា ប្រសាសន៍​របស់​លោក ហ៊ុន ម៉ាណែត មិនបាន​លើក​ពី​បញ្ហា​ដែល​អ្នក​សារព័ត៌មាន​បាន​ជួប​ប្រទះ​នោះទេ​។ អ្នក​ស្រី​ បាន​លើក​ពី​ចំណុច​មួយ​ដែល​លោក​ ហ៊ុន​ ម៉ាណែត មាន​ប្រសានស៍​ទាក់​ទង​នឹង​ប្រ​ជាពល​រដ្ឋ​ប្រើ​ប្រាស់​បណ្ដាញ​សង្គម​ដែរ។ អ្នកស្រីបង្ហាញ​ជា​កង្វល់​ទាក់​ទង​នឹង​ការ​យល់​ដឹង​ផ្នែក​ឌីជីថល​របស់​ប្រ​ជា​ជន​កម្ពុជា ដោយ​ថា​អ្នក​ទាំង​នោះ​អាច​នឹង​ជួប​បញ្ហា​នៅ​ពេល​ប្រើ​បណ្ដាញ​សង្គម​ចែក​រំលែក​ព័ត៌មាន​បន្ត​ដោយ​មិន​មាន​ចំណេះដឹង​គ្រប់​គ្រាន់​។​

អ្នក​ស្រីបានបន្ត​ថា៖ «​មាន​មនុស្ស​ជា​ច្រើន​រងគ្រោះ​ដោយសារ​តែ​រឿង​នេះ»។ អ្នក​ស្រី​លើក​ត្រង់​ចំណុច​នេះ ដោយ​សម្ដៅ​ថា​អ្នកប្រើ​ទូរសព្ទ​ទំនើប​ទាំង​អស់​មិនមែន​សុទ្ធតែ​ជាអ្នក​សារព័ត៌មាន​នោះ​ទេ។​

លោក​ ហ៊ុន​ ម៉ាណែត (ស្ដាំ) និង​រដ្ឋមន្ត្រី​ក្រ​សួង​ព័ត៌មាន លោក ខៀវ កាញារីទ្ធ ចូល​រួម​ក្នុង​ទិវា​សេរីភាព​សារព័ត៌មាន​ពិភព​លោក ក្នុង​រាជធានី​ភ្នំពេញ នៅ​ថ្ងៃអង្គារ ទី​៣ ខែឧសភា ឆ្នាំ​២០២២។ រូបភាពពី ហ្វេស​ប៊ុក​ លោក ហ៊ុន ម៉ាណែត

រដ្ឋមន្ត្រីក្រ​សួង​ព័ត៌មាន លោក ខៀវ កាញារីទ្ធ សម្ដែង​ការ​សោក​ស្តាយ​ដែល​សមាគម​អ្នក​សារព័ត៌មាន​ខ្លះ​បាន​រាយការណ៍​ថា​ក្រសួង​បាន​ដក​អាជ្ញាបណ្ណ​ពីស្ថាប័ន​របស់​ពួកគេ​។

លោកមាន​ប្រ​សាសន៍​ថា៖ «​យើង​មិន​បាន​ដក​អាជ្ញាបណ្ណ​ប្រព័ន្ធ​ផ្សព្វ​ផ្សាយរបស់​អ្នក​ទាំងនោះ​​ទេ យើង​គ្រាន់​តែ​ផ្អាក​បណ្ដោះ​អាសន្ន»។ លោក​បន្តថា ការ​ផ្អាក​អាជ្ញាបណ្ណនេះ​ទាក់ទង​នឹង «ការជម្រិតទារ​ប្រាក់» ពី​ក្រុម​ហ៊ុន​ដឹក​ជញ្ជូន​ខ្សាច់​មួយ​។​

លោក​បន្តថា៖ «​ខ្ញុំ​គិត​ថា​សេរីភាព​នៅ​កម្ពុជា​ល្អ​ប្រសើរ​ជា​នៅ​បណ្ដា​ប្រទេស​អ៊ឺរ៉ុប»។​

លោក ក៏​បាន​ណែនាំ​ដល់​សមាគមនដែល​ការពារ​​អ្នក​សារព័ត៌មាន​​ឲ្យ​តាម​ដាន​បាន​ស៊ីជម្រៅ​មុន​នឹង​បញ្ចេញ​របាយការណ៍​របស់​ខ្លួន​។​

បើ​តាមរបាយការណ៍​ប្រចាំ​ត្រីមាស​របស់​ខេមបូចា គិត​ពី​ខែ​មករា ដល់​ខែ​មីនា មាន​ករណី​ប្រឆាំង​នឹង​អ្នក​សារព័ត៌មាន​ចំនួន​ ១៣​ករណី លើ​អ្នក​សារព័ត៌មាន​ ២៣​រូប​។ អ្នក​សារព័ត៌មាន​ចំនួន​ប្រាំ​រូប​ត្រូវ​បាន​ដាក់​ពន្ធនាគារ បួន​រូប​ផ្សេង​ទៀត​កំពុង​ប្រឈម​មុខ​នឹង​ផ្លូវ​ច្បាប់ និង​ ១១​នាក់​ផ្សេង​ទៀត​បាន​រង​នូវ​អំពើ​ហិង្សា និង​ការគំរាម​កំហែង ហើយ​ក៏​មាន​ស្ថាប័ន​ប្រព័ន្ធ​ផ្សព្វ​ផ្សាយ​ចំនួន​បី​ត្រូវ​បាន​ដក​អាជ្ញាបណ្ណ​ផង​ដែរ​។​​​

លោក ណុប វី នាយក​ប្រតិបត្តិ​សមាគមសម្ព័ន្ធអ្នកសារព័ត៌មានកម្ពុជា (ខេមបូចា) អំពាវ​នាវ​ឲ្យ​ក្រ​សួង​ព័ត៌មាន​ផ្ដល់​អាជ្ញាបណ្ណ​ដល់​ស្ថាប័ន​ទាំង​នោះ​ជាថ្មី​​។

លោកបន្ត​ថា៖ «​តាម​គំនិត​របស់​ខ្ញុំ ខ្ញុំ​រីក​រាយ​ដែល​ក្រ​សួង​ព័ត៌មាន​អាច​បន្ត​ចេញ​អាជ្ញាបណ្ណថ្មី​ដល់​ស្ថាប័ន​ទាំង​នោះ ពីព្រោះ​វាមានផលលំបាក​ច្រើនពេល​អាជ្ញាបណ្ណ​ត្រូវ​បាន​ដក​»។​

 លោកបានបន្ថែម​ថា៖ «​ទី​មួយ ​ពួក​គាត់​មិន​អាច​ផ្ដល់​ព័ត៌មាន​ដល់​ប្រ​ជាពល​រដ្ឋ​បាន…​ទីពីរ​គឺថា​ មាន​ការ​គំរាម​កំហែង​ដល់​សេរីភាពសារព័ត៌មាន ដែល​អ្នក​សារព័ត៌មាន​អាច​ផ្សាយនូវ​អ្វី​ដែលពួក​គេ​ចង់»

ប្រែសម្រួលពីអត្ថបទភាសាអង់គ្លេស៖ Hun Manet says press freedom is alive and well in Cambodia

85 views

ព័ត៌មានថ្មី

អត្ថបទពេញនិយម