លោកនាយករដ្ឋមន្ត្រី ហ៊ុន ម៉ាណែត បញ្ជាឱ្យលុបចោលគម្រោងរុះរើផ្ទះស្នាក់នៅរបស់គ្រូបង្រៀនសាលាដូងនៅគិរីរម្យ និងប្រាប់ឱ្យអាជ្ញាធរពាក់ព័ន្ធវាស់វែងដីឱ្យសា្ថបនិកសាលានេះខ្ចីដោយឥតកំណត់ពេល ដើម្បីបន្តបណ្តុះបណ្តាលកុមារងាយរងគ្រោះដែលរស់នៅតំបន់នោះ។
ថ្លែងក្នុងពិធីសំណេះសំណាលជាមួយអាចារ្យ អាចារិនី ទូទាំងប្រទេសលើកទី១១ នៅថ្ងៃទី១៩ ខែសីហា លោក ហ៊ុន ម៉ាណែត អះអាងថា លោកបានចេញបទបញ្ជាឱ្យយោធភូមិភាគទី៣ និងតំបន់ប្រតិបត្តិការសឹករងកំពង់ស្ពឺ ផ្អាកការរុះរើសំណង់នៅភ្នំគិរីរម្យ ដោយត្រូវរក្សាស្ថានភាពដដែល និងឱ្យសាលាដូងបន្តដំណើរការទៅមុខ ដើម្បីឱ្យគ្រូអាចបន្តស្នាក់នៅផ្ទះដដែល ដើម្បីបង្រៀនសិស្ស។ បន្ថែមលើនេះ លោកក៏បញ្ជាឱ្យក្រសួងបរិស្ថាន និងរដ្ឋបាលខេត្តកំពង់ស្ពឺ ចុះពិនិត្យកំណត់ព្រំដី ឱ្យស្ថាបនិកសាលានេះខ្ចីដី ដើម្បីដំណើរការសាលារៀននេះដោយចីរភាព។
លោកមានប្រសាសន៍ថា៖ «ខ្ញុំបានតេទូរសព្ទទៅមេបញ្ជាការយោធភូមិភាគទី៣ និងតំបន់ប្រតិបត្តិការសឹករងខេត្តកំពង់ស្ពឺ ថាឱ្យផ្អាកការរុះរើសិន។ កន្លែងផ្ទះគ្រូ ទុកឱ្យគេដំណើររៀនសូត្រ។ បើគ្រូអត់ផ្ទះនៅ បាននរណាបង្រៀន! ទុកសិនទៅ បើអត់ប្រញាប់ទៅណាទេ»។
លោកបន្តថា៖ «អត់មានការរុះរើទៅណាទេ បន្តរៀនធម្មតា។ ក្រសួងបរិស្ថាន ជាមួយនិងខេត្ត នឹងចុះទៅដើម្បីពិនិត្យព្រំឱ្យបានច្បាស់ ដើម្បីសម្រួល ព្រោះឥឡូវគាត់(សាលាដូង)នៅអត់មានប្លង់រឹងទេ មានតែការអនុញ្ញាតក្រៅផ្លូវការរបស់មន្ត្រីបរិស្ថានតាំងពីឆ្នាំ២០១៧ អ៊ីចឹងគាត់នៅស្រៀវឆ្អឹងខ្នង។ អ៊ីចឹងបានថា កុំឱ្យមានទំនាស់ ចុះពិនិត្យមើលដើម្បីយើងដោះស្រាយ ធ្វើម៉េចធានានូវចីរភាព និងនិរត្តរភាពដែលសាលាអាចជួយទៅបាន»។
អ្នកនាំពាក្យក្រសួងបរិស្ថាន លោក ខ្វៃ អាទិត្យា បានបញ្ជាក់ថា អាជ្ញាធរពាក់ព័ន្ធកំពុងចុះពិនិត្យស្របតាមប្រសាសន៍របស់ប្រមុខរាជរដ្ឋាភិបាល។ លោកបន្ថែមថា៖ «សាលាដូងអត់ស្ថិតក្នុងគម្រោងនៃការរុះរើទេ។ ក្រៅពីនេះ បើសិនយើងរកឃើញថាគាត់សង់សំណង់ដែលខុសច្បាប់ អាហ្នឹងបានយើងចាត់វិធានការ។ ឥឡូវខាងអាជ្ញាធរកំពុងតែពិនិត្យមើល»។
លោកនាយករដ្ឋមន្ត្រីមានបទបញ្ជាដូច្នេះ ក្រោយពីការិយាល័យឧទ្យានជាតិគិរីរម្យ តាមរយៈលិខិតចុះថ្ងៃទី១៣ ខែសីហា បានបញ្ជាឱ្យសាលាដូង និងម្ចាស់សំណង់សរុបចំនួន ២៩ទីតាំង នៅភ្នំគិរីរម្យ រុះរើសំណង់ចេញពីដីរដ្ឋក្នុងរយៈពេល ១៤ថ្ងៃ ក្រោមហេតុផលថា ជាការសាងសង់សំណង់អនាធិបតេយ្យខុសច្បាប់ នៅចំណុចជើងភ្នំអាប៉ែត ស្ថិតក្នុងឃុំចំបក់ ស្រុកភ្នំស្រួច ខេត្តកំពង់ស្ពឺ ដែលជាដែនឧទ្យានជាតិព្រះសុរាម្រឹត កុសមៈ-គិរីរម្យ។ ក្នុងនោះរួមមានទាំងផ្ទះស្នាក់នៅរបស់គ្រូបង្រៀននៃសាលាដូងផង ដែលត្រូវបានរាយការណ៍ថាបានសង់បិទផ្លូវសាធារណៈ។
មួយថ្ងៃមុនការចេញបញ្ជារបស់លោកនាយករដ្ឋមន្ត្រី គឺនៅថ្ងៃទី១៨ ខែសីហាមេឃុំចំបក់ លោក ជ័យ ហ៊ីម និងមន្ទីរបរិស្ថានខេត្តកំពង់ស្ពឺ បានចេញលិខិតបកស្រាយរៀងៗខ្លួនថា វិធានការរុះរើសំណង់របស់ការិយាល័យឧទ្យានជាតិគិរីរម្យ គឺដើម្បីថែរក្សាធនធានធម្មជាតិ និងសណ្តាប់ធ្នាប់ ដោយថាមិនប៉ះពាល់ដល់សាលាដូងនោះទេ។ លោកមេឃុំបន្ថែមថា ទោះបីជាផ្ទះរបស់គ្រូបង្រៀនត្រូវបញ្ជាឱ្យរុះរើក៏ដោយ ប៉ុន្តែសាលាដូងស្ថិតនៅឆ្ងាយពីកន្លែងស្នាក់នៅរបស់គ្រូទាំងនោះ។
ក្រៅពីបញ្ជាឱ្យលុបចោលគម្រោងរុះរើ លោក ហ៊ុន ម៉ាណែត ក៏សម្រេចឧបត្ថមថវិកាចំនួន ៥លានរៀល និងអង្ករ ១តោន ជារៀងរាល់ខែដល់សាលាដូង ចាប់ពីខែកញ្ញា ឆ្នាំ២០២៦ នេះតទៅ។ លោកក៏ ជំរុញឱ្យមានការពិនិត្យស្ថានភាពជាក់ស្តែងរបស់សាលាបឋមសិក្សាគីរីរម្យក្បែរនោះ ដែលមានសិស្សសរុប១០០នាក់ ដើម្បីអាចច្របាច់បញ្ចូលគ្នាជាមួយសាលាដូង បណ្តុះបណ្តាលកុមារដែលរស់នៅលើភ្នំ។
ស្ថាបនិកសាលាដូង លោក អ៊ុក វណ្ណដេ បង្ហាញក្តីរំភើប បន្ទាប់ពីទទួលបានដំណោះស្រាយពីប្រមុខរាជរដ្ឋាភិបាល ដោយលោកបញ្ជាក់ថា ផ្ទះស្នាក់នៅរបស់គ្រូបង្រៀនរបស់សាលាដូងមិនត្រឹមតែមិនតម្រូវឱ្យរុះរើទេ ថែមទាំងទទួលបានការការពារផ្លូវច្បាប់ និងសម្រួលឱ្យខ្ចីដីរដ្ឋប្រើប្រាស់សម្រាប់ប្រយោជន៍វែងឆ្ងាយទៀតផង។ លោកបន្ថែមថា ផ្អែកតាមការពិភាក្សារវាងនាយករដ្ឋមន្ត្រី និងអាជ្ញាធរពាក់ព័ន្ធកាលពីថ្ងៃទី១៨ ខែសីហា អាជ្ញាធរនឹងចុះពិនិត្យសំណង់ផ្សេងទៀតនៅតំបន់នោះជាក់ស្តែង។ ក្នុងនោះ ផ្ទះចាស់ៗរបស់ពលរដ្ឋដែលរស់នៅយូរមកហើយអាចនឹងអនុញ្ញាតឱ្យទុក ចំណែកសំណង់ដែលទើបចូលកាន់កាប់ថ្មី នឹងតម្រូវឱ្យរុះរើចេញ។
លោកបញ្ជាក់ថា៖ «ចំពោះសាលាដូង សម្តេចលោកថានឹងឱ្យក្រុមការងារពិសេសចុះទៅវាស់វែង ដើម្បីធ្វើលិខិតកាន់កាប់ខ្ចីដីរដ្ឋប្រើប្រាស់ ក្នុងប្រយោជន៍បម្រើដល់សហគមន៍ទាំងមូល។ [… ] សរុបមកសាលាដូង ផ្ទះលោកគ្រូអ្នកគ្រូ អត់មានការរុះរើទេ ថែមទាំងមានការការពារយ៉ាងប្រសើរជាងមុនទៅទៀត»។
លោក វណ្ណដេ បន្តថា ប្រមុខរាជរដ្ឋាភិបាលក៏បានណែនាំឱ្យរដ្ឋបាលខេត្តកំពង់ស្ពឺបន្ថែមការយកចិត្តទុកដាក់លើអ្នកដែលរស់នៅលើភ្នំគិរីរម្យផងដែរ។ លោកយល់ថា ដំណោះស្រាយនេះជាថ្នាំប៉ូវកម្លាំងសម្រាប់លោក៖ «ជំនួបថ្ងៃនេះ ខ្ញុំអាចកំណត់បានថា វាគឺជាជំនួបឆ្កឹះនូវក្តីសង្ឃឹមដែលខ្ញុំសង្ឃឹមយូរហើយ […] ខ្ញុំមានអារម្មណ៍ថាបន្ថែមកម្លាំងឱ្យខ្ញុំធ្វើការនៅតំបន់ព្រៃភ្នំ ដោយរីករាយ ដោយក្តីសង្ឃឹម ដោយសប្បាយចិត្តទាំងអស់គ្នា»។
សាលាដូងត្រូវបានបង្កើតឡើងនៅដើមឆ្នាំ២០១៧នៅភ្នំគិរីរម្យ ដើម្បីជួយបណ្តុះបណ្តាលដល់កុមារក្រីក្រ និងកំព្រាដែលរស់នៅតំបន់នោះ។ បច្ចុប្បន្នសាលានេះមានកុមារកំពុងសិក្សាចំនួន ១៦២នាក់ ក្រោមការបង្ហាត់បង្រៀនរបស់គ្រូ ៦នាក់ និងក្រុមការងារបច្ចេកទេសកែច្នៃសំរាមចំនួន ៤នាក់។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង សង្កេតឃើញថា សាលាដូងបានឆ្លងកាត់ការខិតខំ និងលះបង់យ៉ាងច្រើន ទម្រាំអាចបង្កើតឱកាសសិក្សា និងផ្តល់ពន្លឺអនាគតដល់កុមារក្រីក្រ និងកុមារកំព្រារាប់រយនាក់ក្នុងតំបន់នោះ។ លោកគាំទ្រចំពោះការយោគយល់របស់នាយករដ្ឋមន្ត្រី ដោយថាការការពារបរិស្ថានជាកិច្ចការសំខាន់ ប៉ុន្តែអនាគត និងវាសនារបស់កុមារដែលគ្មានទីពឹង រឹតតែខកខានមិនបាន។
លោកមានប្រសាសន៍ថា៖ «ពាក្យថាក្មេងអនាថា ក្មេងក្រីក្រ ក្មេងកំព្រា គឺអត់មានលទ្ធភាពណាទៅឆ្ងាយទេ គឺគ្នាបានតែជិតៗហ្នឹង។ បើសិនជាសម្តេចនាយករដ្ឋមន្ត្រីគាត់មានការយោគយល់បែបហ្នឹងជារឿងល្អ នៅក្នុងការជួយជំរុញ និងលើកកម្ពស់វិស័យមនុស្សធម៌»។
លោកបន្តថា អ្នកធ្វើការងារមនុស្សធម៌ទាំងអស់គួរតែទទួលបានការជ្រោមជ្រែង និងលើកទឹកចិត្តជានិច្ច៖ «បើសិនឧទាហរណ៍ថាយើងដេញគាត់ចេញ ហើយគាត់ចាកចេញ ចុះវាសនារបស់កុមារអនាថា ក្មេងកំព្រា ឬក៏ក្មេងក្រីក្រនៅម្តុំហ្នឹង ថាតើអនាគតទៅជាយ៉ាងណា! គាត់រំពឹងអី»។
ប្រហាក់ប្រហែលគ្នា មន្ត្រីអង្កេតការជាន់ខ្ពស់នៃសមាគមការពារសិទ្ធិមនុស្សអាដហុក (ADHOC) លោក យី សុខសាន្ត លើកឡើងថា ប្រជាពលរដ្ឋដែលមានឆន្ទៈជួយជ្រោមជ្រែងកុមារក្រីក្រ និងគ្មានទីពឹង គួរត្រូវបានលើកទឹកចិត្ត និងជ្រោមជ្រែង ជំនួសឱ្យការបន្ទុចបង្អាក់។ លោកចង់ឃើញអាជ្ញាធរពង្រីកសោភ័ណភាពសាលាដូងឱ្យកាន់តែល្អប្រសើរ ដើម្បីបំប្លែងទៅជាគោលដៅទេសចរណ៍បែបច្នៃប្រឌិត និងរួមចំណែកថែរក្សាបរិស្ថានផង។
លោកថ្លែងថា៖ «[អាជ្ញាធរ] គួរតែពង្រីក ឬរៀបចំធ្វើម៉េចឱ្យមានសោភ័ណភាពនៅក្នុងទីតាំងសាលាដូងហ្នឹងឱ្យវាល្អប្រសើរជាងបច្ចុប្បន្ន ហើយវាជាតំបន់ទេសចរណ៍មួយ ដែលភ្ញៀវទេសចរអាចចូលទៅមើលបាន»៕
