លោកនាយករដ្ឋមន្ត្រី ហ៊ុន ម៉ាណែត ចាត់ទុកអគារទីស្តីការក្រសួងមហាផ្ទៃថ្មីជាឆ្អឹងខ្នង និងសេនាធិការ ដ៏សំខាន់របស់រាជរដ្ឋាភិបាលក្នុងការអនុវត្តគោលនយោបាយ និងផ្ដល់សេវារដ្ឋបាលដល់ប្រជាពលរដ្ឋ។ លោកបានថ្លែងក្នុងឱកាសសម្ពោធដាក់ឱ្យប្រើប្រាស់ជាផ្លូវការអគារថ្មីនៃទីស្តីការក្រសួងមហាផ្ទៃ នាព្រឹកថ្ងៃទី៦ ខែវិច្ឆិកា ឆ្នាំ២០២៣។
ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារថ្មីនៃទីស្តីការក្រសួងមហាផ្ទៃ នាព្រឹកថ្ងៃទី៦ ខែវិច្ឆិកា ឆ្នាំ២០២៣ លោក ហ៊ុន ម៉ាណែត បានចាត់ទុកអគារទីស្តីការក្រសួងមហាផ្ទៃដ៏ធំស្កឹមស្កៃនេះ ជាសក្ខីភាពឆ្លុះបញ្ចាំងអំពីសារៈសំខាន់នៃតួនាទី និងភារកិច្ចរបស់ក្រសួងមហាផ្ទៃ នៅក្នុងរាជរដ្ឋាភិបាល ដែលជាឆ្អឹងខ្នង និងជាសេនាធិការដ៏សំខាន់របស់រាជរដ្ឋាភិបាល នៅក្នុងការអនុវត្តគោលនយោបាយរបស់រាជរដ្ឋាភិបាល ជាពិសេសការផ្ដល់សេវារដ្ឋបាល និងការគាំពារសន្តិសុខសាធារណៈជូនដល់ប្រជាពលរដ្ឋ។
ដោយឡែកលោកបានបង្ហាញក្ដីរំពឹងទុក និងក្រើនរំលឹកដល់មន្ដ្រីរាជការក្រសួងមហាផ្ទៃ ទាំងក្របខ័ណ្ឌមន្ដ្រីនគរបាលជាតិ និងស៊ីវិលគ្រប់ជាន់ថ្នាក់ទាំងអស់ ត្រូវខិតខំប្រឹងប្រែងបម្រើប្រជាពលរដ្ឋប្រកបដោយមនសិការទទួលខុសត្រូវ ដោយមិនគិតអំពីឧបសគ្គ និងការនឿយហត់ឡើយ។
លោក ហ៊ុន ម៉ាណែត ថ្លែងថា៖ «ខ្ញុំសូមក្រើនរំលឹក និងបំផុសស្មារតីថ្នាក់ដឹកនាំ និងមន្ដ្រីរបស់ក្រសួងមហាផ្ទៃផងដែរថា ជាមួយនឹងតួនាទីដ៏សំខាន់របស់ក្រសួង រាជរដ្ឋាភិបាលក៏មានក្ដីរំពឹងខ្ពស់លើក្រសួងមហាផ្ទៃ ហើយក្ដីរំពឹងនេះទាមទារនូវភាពជាអ្នកដឹកនាំដ៏ឈ្លៀសវៃ មានមន្ដ្រីដ៏សកម្ម និងជាពិសេសមាននូវមនសិកាបម្រើជាតិ និងប្រជាជន ដោយមិនគិតអំពីឧបសគ្គ និងការនឿយហត់ណាមួយឡើយ»។
ជាមួយគ្នានេះ លោក ហ៊ុន ម៉ាណែត អះអាងថា អគារដែលមានក្បូរក្បាច់រស់រវើក ស្រស់ស្អាតមួយនេះ ជាមរតកដ៏ថ្លៃថ្លារបស់រាជរដ្ឋាភិបាលនីតិកាលទី៦ ដែលផ្តួចផ្តើមសាងសង់ដោយ លោក ស ខេង អតីតឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងក្រោមការគាំទ្រពីសំណាក់ លោក ហ៊ុន សែន អតីតនាយករដ្ឋមន្ត្រីនៃកម្ពុជា។ ដោយឡែកសំណង់ស្ថាបត្យកម្ម ហេដ្ឋារចនាសម្ពន្ធ សមិទ្ធផលដ៏ច្រើន សន្ធឹកសន្ធាប់ រួមទាំងការពង្រឹងវិស័យសន្តិសុខជាតិ និងសេវាសាធារណៈគ្រប់ច្រកល្ហក គឺជាមូលដ្ឋានសម្រាប់រាជរដ្ឋាភិបាលនីតិកាលទី៧ ដើម្បីបន្តអនុវត្ត បន្តការពារ និងពង្រីកការកសាងបន្តទៅមុខទៀត ក្នុងការបម្រើជូនប្រជាពលរដ្ឋជាម្ចាស់ប្រទេស។
លោកបន្ថែមថា៖ «ខណៈដែលយើងកំពុងសម្ពោធដាក់ឱ្យប្រើប្រាស់អគារទីស្ដីការក្រសួងមហាផ្ទៃនេះ យើងក៏មិនអាចបំភ្លេចបានផងដែរនូវសមិទ្ធផល ស្នាដៃ និងមរតកដ៏វិសេសវិសាលរបស់រាជរដ្ឋាភិបាលនីតិកាលទី៦»។
ទន្ទឹងនឹងនេះលោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឡើងថ្លែងសុទ្ធរកថាមុនការថ្លែងរបស់លោក ហ៊ុន ម៉ាណែត ថា អគារស្ថាប័នរដ្ឋដ៏ធំរបស់ក្រសួងមហាផ្ទៃថ្មីនេះ ដែលជាសំណង់អគារមានទំហំ១៥៣ម៉ែត្រ គុណ ៨៣ម៉ែត្រ មានកម្ពស់៩ជាន់ មិនរាប់បញ្ចូលជាន់ផ្ទាល់ដី និងជាន់សម្រាប់ចំណតរថយន្ត (អាចចតរថយន្តក្នុងអគារបានសរុបចំនួន៣៦០គ្រឿង)។ អគារនេះដែរ គឺមានរាងជាចតុកោណព្នាយកែងស្មើជ្រុង និងមានសួនច្បារនៅកណ្តាល និងមានរចនាបទក្បាច់ចំនួន៣គឺ ក្បាច់ភ្ញីទេស ភ្ញីអង្គរ និងភ្ញីភ្លើង។ សម្រាប់ផ្នែកខាងមុខនៃអគារនេះ គឺបែរទៅទិសខាងកើតស្របតាមមហាវិថីព្រះនរោត្តម និងបែរមុខចំទន្លេរធំៗទាំងបួន ដែលហៅថាទន្លេចតុមុខ។
លើសពីនេះទៀត ប្លង់ស្ថាបត្យកម្មនៃទីស្តីការក្រសួងមហាផ្ទៃថ្មី ជាប្រភេទស្ថាបត្យកម្មក្លាសិក (សម័យទំនើបកម្ម) រចនាបទខ្មែរដំបូលប្រក់ក្បឿងស្រកាលិញ មានបុស្បបុកចំនួនប្រាំ លំនាំតាមប្រាសាទអង្គវត្តកំពូលប្រាំ។ ជាមួយគ្នានេះ អគារថ្មីនេះមានសមត្ថភាពអាចផ្ទុកមនុស្សសរុបរហូតដល់ ៨ ៥០០នាក់ ដែលមានចំនួនការិយាល័យ៣៩២ សាលប្រជុំតូចធំចំនួន១៦ ហើយមានមុខងារប្រើប្រាស់ជាអគាររដ្ឋបាលប្រមូលផ្តុំ ដែលមានថ្នាក់ដឹកនាំក្រសួង ថ្នាក់ដឹកនាំអគ្គនាយកដ្ឋាន មន្ត្រីរាជការស៊ីវិល មន្ត្រីនគរបាលជាតិ មន្ត្រីពន្ធនាគារផងដែរ។
លោកថ្លែងបន្តថា៖ «កម្មវិធីនេះមានអត្ថន័យជាប្រវត្តិសាស្ត្រ ដែលជាការផ្តល់កិត្តិយស និងការលើកទឹកចិត្តប្រកបដោយថាមពលសម្រាប់យើងទាំងអស់គ្នា ដើម្បីបន្តបំពេញបន្ថែមបេសកកម្មរបស់ក្រសួងមហាផ្ទៃ ដោយមិនខ្លាចនឿយហត់ ដើម្បីឧត្តមប្រយោជន៍ជាតិ និងប្រជាជនជាទីស្រឡាញ់ននៃយើង»។
អគារទីស្តីការថ្មីនេះ សាងសង់ឡើងលើទីតាំងចាស់ ស្ថិតក្នុងបរិវេណក្រសួងមហាផ្ទៃ តាមបណ្ដោយវិថីព្រះនរោត្តម សង្កាត់ទន្លេបាសាក់ ខណ្ឌចំការមន ដោយចំណាយអស់ប្រមាណ៦០លានដុល្លារអាមេរិក។ អគារនេះ បានបញ្ចុះបឋមសិលាបើកការដ្ឋានសាងសង់នៅព្រឹកថ្ងៃទី១១ ខែវិច្ឆិកា ឆ្នាំ២០២១ ដែលមានផ្ទៃដីសរុបទំហំ ៥,៧ហិកតា ដែលដំណើរការសាងសង់អស់ចំនួន២០ខែ។
លោក ទូច សុឃៈ អ្នកនាំពាក្យក្រសួងមហាផ្ទៃ ប្រាប់ព័ត៌មានខេមបូចា(CamboJA) នៅថ្ងៃអង្គារនេះថា អគារថ្មីនេះ ឆ្លុះបញ្ចាំងអំពីការអភិវឌ្ឍរបស់រដ្ឋាភិបាលក្នុងការដឹកនាំប្រទេសជាតិ វាបង្ហាញអំពីការប្តេជ្ញាចិត្តរបស់មន្ត្រីនៃក្រសួងមហាផ្ទៃ ដែលមកអង្គុយនៅក្នុងអគារថ្មីនេះក្នុងការបម្រើសេវាសាធារណៈជូនប្រជាពលរដ្ឋទូទៅ ហើយក្រសួងមានទស្សនៈវិស័យច្បាស់លាស់ពីមួយឆ្នាំទៅមួយឆ្នាំ ពីមួយអាណត្តិទៅមួយអាណត្តិ ដើម្បីលុបបំបាត់ភាពអវិជ្ជមាន ភាពអសកម្ម ហើយព្យាយាមកែទម្រង់ដើម្បីបង្កភាពងាយស្រួលដល់ប្រជាពលរដ្ឋ ស្របតាមសម័យបច្ចេកវិទ្យាឌីជីថល។
លោកអះអាងបន្តថា ចំពោះបច្ចុប្បន្នសេវាសាធារណៈកម្ពុជាបានល្អប្រសើរ និងផ្តល់ភាពងាយស្រួលជាងមុន តាមរយៈផែនការកែទម្រង់របស់ក្រសួងមហាផ្ទៃ ហើយទៅមុខទៀតនឹងកាន់តែល្អប្រសើរ។
លោកបញ្ជាក់ថា៖ «ការបម្រើសេវាសាធារណៈជូនមហាជនគ្រប់មជ្ឈដ្ឋាន គ្រប់និន្នាការនយោបាយ វាគឺជាតួនាទី ភារកិច្ចរបស់ក្រសួងមហាផ្ទៃ វាមិនមែនផ្អែកទៅលើការិយាល័យ ឬអគារទេ។ តែធាតុពិតអំពីការបំពេញភារកិច្ចផ្តល់សេវាសាធារណៈជូនមហាជនទាំងនោះ វាសំខាន់ទៅលើការរៀបចំគោលនយោបាយ ការអនុវត្តគោលនយោបាយរបស់មន្ត្រីទាំងថ្នាក់ជាតិ និងថ្នាក់ក្រោមជាតិទាំងអស់»។
ទោះបីយ៉ាងណា លោក ឯម សុវណ្ណារ៉ា អ្នកវិភាគ និងជាសាស្ត្រាចារ្យផ្នែកវិទ្យាសាស្ត្រនយោបាយ បានអបអរសាទរចំពោះសមិទ្ធផលដ៏ថ្មីស្រឡាងនៃក្រសួងមហាផ្ទៃ ដែលជាកន្លែងផ្តល់ភាពងាយស្រួលសម្រាប់មន្ត្រីធ្វើការងារ ដើម្បីឆ្លើយតបនឹងតម្រូវការរបស់ប្រជាពលរដ្ឋ។ ព្រោះជាទូទៅនៅកន្លែងណាក៏ដោយ ធនធានសម្ភារៈជាកិច្ចការចាំបាច់ និងសំខាន់សម្រាប់ស្ថាប័ន ឬរដ្ឋាភិបាល តែយ៉ាងណាលោកក៏នៅបារម្ភ និងរង់ចាំមើលចំពោះប្រសិទ្ធភាពការងារ ការផ្តល់សេវាជូនប្រជាពលរដ្ឋ និងរបៀបរបបធ្វើការងាររបស់មន្ត្រី តើមានការល្អប្រសើរជាងមុនឬយ៉ាងណាទន្ទឹមនឹងមានអគារថ្មីនេះ?។
ដោយឡែកលោក ឯម សុវណ្ណារ៉ា ចង់ឃើញសកម្មភាព ឬក៏ការអនុវត្តផ្ទាល់របស់រដ្ឋាភិបាល និងមន្ត្រីក្រោមឱវាទ ដែលបង្កភាពងាយស្រួលជូនប្រជាពលរដ្ឋតាមរយៈសេវាសាធារណៈ ជាជាងបង្ហាញគោលនយោបាយ ឬអគារធំៗដ៏ស្កឹមស្កៃនេះ។
លោកបន្តថា៖ «ទំនាក់ទំនងរវាងពលរដ្ឋ និងអាជ្ញាធរហាក់ដូចជាឃ្លាតគ្នាឆ្ងាយ ដោយសារពលរដ្ឋខ្លាចអាជ្ញាធរទាមទារនូវបែបបទរដ្ឋបាលមួយចំនួនដែលគាត់អត់យល់។ ទាល់តែគាត់(អាជ្ញាធរ)ផ្សារភ្ជាប់ខ្លួនគាត់ ឬក៏ដាក់ខ្លួនគាត់ឱ្យជិតប្រជាពលរដ្ឋ ឆ្លើយតប ហើយមានបំណងពិតប្រាកដក្នុងការបំពេញសេវាសាធារណៈជូនប្រជាពលរដ្ឋពិតប្រាកដ ទើបគាត់(អាជ្ញាធរ)អាចដោះស្រាយបាន»។
គួរបញ្ជាក់ថា ចាប់តាំងពីឆ្នាំ២០២១មក អគារស្ថាប័នរដ្ឋដ៏ស្កឹមស្កៃជាច្រើន ត្រូវបានសាងសង់ថ្មី និងសម្ពោធដាក់ឱ្យប្រើប្រាស់ តួយ៉ាងដូចជា អគារក្រសួងសាធារណការ និងដឹកជញ្ជូន បានសម្ពោធកាលពីថ្ងៃទី២២ ខែមករា ឆ្នាំ ២០២១។ អគារទីស្តីការក្រសួងរៀបចំដែនដី នគរូបនីយកម្ម និងសំណង់ បានសម្ពោធកាលពីថ្ងៃទី៨ ខែវិច្ឆិកា ឆ្នាំ២០២១។ អគារក្រសួងការពារជាតិថ្មី បានសម្ពោធកាលពីថ្ងៃទី២៩ ខែធ្នូ ឆ្នាំ២០២១៕
