សមាគមសម្ព័ន្ធអ្នកសារព័ត៌មានកម្ពុជា

លោក ហ៊ុន សែន ព្រមានគណបក្សនយោបាយកុំឲ្យបំប៉ោងបញ្ហាតំបន់អង្គរមុនការបោះឆ្នោតជាតិចូលមកដល់

ប្រជាពលរដ្ឋដែលយល់ព្រមផ្លាស់លំនៅចេញពីតំបន់ប្រាសាទអង្គរក្នុងខេត្តសៀមរាប។ រូបភាពកាលពីថ្ងៃទី២៦ ខែសីហា ឆ្នាំ២០២២។ ខេមបូចា/បញ្ញា ឆព័ណ្ណ
ប្រជាពលរដ្ឋដែលយល់ព្រមផ្លាស់លំនៅចេញពីតំបន់ប្រាសាទអង្គរក្នុងខេត្តសៀមរាប។ រូបភាពកាលពីថ្ងៃទី២៦ ខែសីហា ឆ្នាំ២០២២។ ខេមបូចា/បញ្ញា ឆព័ណ្ណ

លោកនាយក​រដ្ឋមន្ត្រី​ ហ៊ុន សែន កាល​ពី​ថ្ងៃអង្គារ បាន​ព្រមាន​ថា​លោក​នឹង​ចាត់​វិធានការ​ច្បាប់​ប្រឆាំង​គណបក្សនយោបាយ​ណា​ដែល​ប្រើ​ប្រាស់​ការ​ផ្លាស់​ប្ដូរទី​លំនៅ​របស់​ប្រ​ជា​ពល​រដ្ឋ​ចេញ​ពី​តំបន់បេតិកភណ្ឌ​អង្គរ​ ជា​បញ្ហា​សម្រាប់​យុទ្ធនាការឃោសនា​បោះ​ឆ្នោត​ជាតិ ដែល​នឹង​ចូល​មក​ដល់​នៅ​ឆ្នាំខាង​មុខ​។​

លោក​នាយក​រដ្ឋ​មន្ត្រី​មាន​ប្រសាសន៍​ថា ប្រជា​ពល​រដ្ឋ​រាប់​ពាន់​គ្រួសារដែល​កំពុង​រស់​នៅ​តំបន់​ការពារ​នឹង​ត្រូវ​ផ្លាស់​ទី​លំនៅ​ចេញ ដើម្បី​ធានា​ពី​និរន្តរភាព​នៃ​តំបន់​បេតិកភណ្ឌ​ពិភព​លោកមួយ​នេះ​​។ រដ្ឋា​ភិបាល​នឹង​ផ្ដល់​ជា​សំណង​នូវ​ផ្ទៃដីទំហំ​ ៦០០​ម៉ែត្រ​ការ៉េ​សម្រាប់គ្រួសារ​មួយៗ​​នៅ​តំបន់​ផ្សេង​ពី​នេះ​។​

លោកថ្លែងថា៖ «ខ្ញុំសូម​អំពាវនាវដល់បណ្តាបក្សនយោបាយ កុំប្រើប្រាស់នូវអ្វីដែល ហ៊ុន​ សែន​កំពុង​ដោះស្រាយសម្រាប់​តម្រូវការរបស់ជាតិ ធ្វើជាអាវុធដើម្បី​វាយ​ប្រហាស ហ៊ុន សែន យក​សន្លឹកឆ្នោតនៅពេលខាងមុខ»។

លោកបន្តថា៖ «ខ្ញុំយល់ពីពួកអ្នកឯង អ្នក​ឯងតែង​ធ្វើ​រឿងនេះមុនការបោះឆ្នោត​ ប៉ុន្តែអ្នក​ឯងត្រូវ​យល់ នៅពេល​ដែលខ្ញុំប្រើប្រាស់ផ្លូវច្បាប់​ចាត់ការអ្នកឯង អ្នក​កុំចាត់ទុកថារឿងនេះជារឿងនយោបាយ»​។

បើ​តាម​លោក​នាយក​រដ្ឋ​មន្ត្រី​ ហ៊ុន សែន ប្រ​ជា​ពល​រដ្ឋ​ជិត​ ២ ០០០គ្រួសារ​បាន​យល់​ព្រម​ចាក​ចេញ​ពី​តំបន់​ការពាររបស់​អង្គការ​យូណេស្កូ​។​ អ្នក​ទាំង​នេះ​នឹ​ងត្រូវ​ផ្លាស់​ឲ្យ​ទៅ​រស់​នៅ​ក្នុង​ភូមិ​រុនតាឯក ស្រុក​បន្ទាយស្រី​។​

លោក ថាច់ សេដ្ឋា អនុប្រធានគណបក្ស​ភ្លើង​ទៀន មាន​ប្រសាសន៍​ថា រដ្ឋាភិបាលតែងតែ​​បារម្ភពី​បញ្ហា​រសើប។​

លោក​បន្តថា៖ «​អ្វី​ដែល​សំខាន់​គឺ​ស្វែង​រក​ដំណោះ​ស្រាយ​ជូន​ប្រជា​ពល​រដ្ឋឲ្យបានត្រឹមត្រូវ​ ហើយ​វា​ជា​ការ​ទទួល​ខុស​ត្រូវ​របស់​រដ្ឋាភិបាល។ បើ​សិន​ជា​រដ្ឋាភិបាល​ផ្ដល់​ដំណោះ​ស្រាយ​សមស្រប វាគ្មាន​អ្វី​ត្រូវ​ខ្លាច​ទេ»។​

ទោះបី​យ៉ាងណា លោក សេដ្ឋា ថា​ការ​លើក​ឡើង​របស់​លោក​នាយក​រដ្ឋ​មន្ត្រី​នេះ ជា​ការ​គំរាម​កំហែង​នយោបាយ​មួយ​ទៀត​នៅ​មុន​​ការ​បោះ​ឆ្នោត​ជាតិ​ចូល​មក​ដល់​។​

លោក​បន្ត​ថា៖ «​វា​បង្ហាញ​ថា​បរិយាកាស​នយោបាយ​សម្រាប់​ការ​បោះ​ឆ្នោត​ខាង​មុខ​នឹង​មិន​សេរី​សម្រាប់​គណបក្ស​នយោបាយ​ផ្សេង​ទេ»។​

អ្នក​លក់​ដូរ​ម្នាក់អង្គុយនៅតូបរបស់ខ្លួន​នៅ​តំបន់​រមណីយដ្ឋាន​អង្គរ ក្នុង​ខេត្ត​សៀម​រាប​ ដែល​ប្រឈមការ​បណ្ដេញ​ចេញ​ ​។ រូបភាព​ថត​កាល​ពី​ថ្ងៃទី​២៦ ខែសីហា ឆ្នាំ​២០២២។ ខេមបូចា/​បញ្ញា ឆព័ណ្ណ

សមាជិក​គណបក្ស​ភ្លើង​ទៀត​​បាន​សន្យា​ជំរុញ​ឲ្យ​មាន​លទ្ធិប្រជាធិបតេយ្យ និង​ទាម​ទារ​យុត្តិ​ធម៌ ក្នុង​ពិធី​សាសនា​មួយ​នៅ​អង្គរវត្ត​ ខេត្ត​សៀម​រាប​ កាល​ពី​សប្ដាហ៍មុន និង​បានដាក់ចេញ​គោល​នយោបាយស្នូល​​​៧ចំនុចសម្រាប់ការ​បោះ​ឆ្នោតឆ្នាំក្រោយ​។​​

ការ​បោះ​ឆ្នោត​ឃុំ-សង្កាត់ កាល​ពីខែ​មិថុនា កន្លង​ទៅ គណបក្ស​ប្រ​ជា​ជន​កម្ពុជា​បាន​ឈ្នះ​មេឃុំ​ចំនួន​ ១ ៦៤៨ ឃុំ លើ​ ១ ៦៥២ ឃុំ​សង្កាត់ ខណៈ​គណបក្ស​ភ្លើង​ទៀត​ឈ្នះ​បាន​តែបួន​ឃុំ​ប៉ុណ្ណោះ​។​​

ជាមួយ​គ្នា​នេះ​ដែរ ក្រុម​ប្រឹក្សា​ឃុំ​របស់​គណបក្ស​ភ្លើង​ទៀន​ជា​ច្រើន​នាក់​កំពុង​ជាប់​បណ្ដឹង​នៅ​តុលាការ រួម​ទាំង​អនុប្រធានគណបក្ស​លោក សុន ឆ័យ ផង​ដែរ ដែល​រង​ការ​ចោទ​ពី​បទ​បរិហារកេរ្តិ៍​ ដែល​ប្ដឹង​ដោយ​គណបក្ស​ប្រជាជន​កម្ពុជា និង​គ.ជ.ប។​

ប្រ​ជា​ពល​រដ្ឋ​ម្នាក់​ដែល​ត្រូវ​ផ្លាស់​ទី​លំនៅ​ លោក លួន ឡង មាន​ប្រសាសន៍​ថា​លោក​ត្រូវ​បោះ​បង់​ចោល​ដី​ទំហំ​បីហិកតា​ដែល​លោក​កាន់​កាប់​នៅ​ភូមិត្រពាំងសេះ ដែលស្ថិតក្នុង​តំបន់​អង្គរ ដោយ​ត្រូវ​មក​យក​ដី​ទំហំ ៦០០​ម៉ែត្រ​ការ៉េ​វិញ​នៅ​ភូមិ រុនតាឯក។

លោក​បន្ត​ថា៖ «​យើង​មិន​ចង់​ចាក​ចេញ​ទេ ប៉ុន្តែ​គេ​ថា​នេះជា​តំបន់​អភិរក្ស ដូច​នេះ​យើង​មិន​អាចជំទាស់​បាន​ទេ»។​

លោក សួស ណារិន មន្ត្រី​ឃ្លាំ​មើល​សិទ្ធិ​មនុស្ស​របស់​អង្គការ​អាដហុក​ប្រចាំ​ខេត្ត​សៀម​រាប មាន​ប្រសាសន៍​ថា ខណៈ​​អាជ្ញាធរ​មិនចេញ​បណ្ណកម្មសិទ្ធដល់​អ្នក​រស់​នៅ​ក្នុង​តំបន់ជំវិញអង្គរ កាលពី​ពេល​កន្លង​​ពួកគេ​នៅតែអាច​ទិញលក់អចលនទ្រព្យទាំងនេះ ពិសេស​នៅពេល​ជិតបោះឆ្នោត ដោយ​ថា​​​បើ​សិនជា​ពួក​គេបោះ​ឆ្នោត​ឲ្យ​គណបក្ស​ប្រជា​ជន​កម្ពុជា ពួកគេ​នឹង​ទទួល​បានការអនុញ្ញាត​ឲ្យ​លក់​ដី​ទាំង​នោះ​។​

លោក​បន្ថែម​ថា៖ «​ពួកគេត្រូវបាន​បំផុសថា បើ​បោះឆ្នោតឲ្យ​គណបក្ស​កាន់អំណាច គេនឹង​​ជួយ​សម្រប​សម្រួលឲ្យ​អាច​ធ្វើការ​ទិញលក់​បាន» ៕

ប្រែសម្រួលពីអត្ថបទភាសាអង់គ្លេស៖ Hun Sen warns political parties not to exaggerate Angkor Wat issue ahead of elections

441 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម