សមាគមសម្ព័ន្ធអ្នកសារព័ត៌មានកម្ពុជា

ប្រជាពលរដ្ឋរាប់រយគ្រួសាររស់នៅស្រុកបន្ទាយស្រី​ផ្ទុះការតវ៉ាដោយបដិសេធក្នុងការផ្លាស់ប្ដូរទីលំនៅ

ប្រជាពលរដ្ឋនៅឃុំព្រះដាក់ ស្រុកបន្ទាយស្រី ខេត្តសៀមរាប បានទៅតវ៉ានៅមុខសាលាឃុំ បន្ទាប់ពីមន្ត្រីក្រសួងដែនដីដើរប្រាប់ពីការដោះដូរទីលំនៅទៅតំបន់ផ្សេង។ រូបថតនៅថ្ងៃទី៥ ខែតុលា ឆ្នាំ២០២២។ ខេមបូចា/ បញ្ញា ឆព័ណ្ណ
ប្រជាពលរដ្ឋនៅឃុំព្រះដាក់ ស្រុកបន្ទាយស្រី ខេត្តសៀមរាប បានទៅតវ៉ានៅមុខសាលាឃុំ បន្ទាប់ពីមន្ត្រីក្រសួងដែនដីដើរប្រាប់ពីការដោះដូរទីលំនៅទៅតំបន់ផ្សេង។ រូបថតនៅថ្ងៃទី៥ ខែតុលា ឆ្នាំ២០២២។ ខេមបូចា/ បញ្ញា ឆព័ណ្ណ

នៅព្រឹកថ្ងៃពុធនេះ ប្រជាពលរដ្ឋរាប់រយគ្រួសាររស់នៅឃុំព្រះដាក់ ស្រុកបន្ទាយស្រី ដែល​ប្រឈមនឹងការផ្លាស់ប្ដូរលំនៅឋានចេញពីតំបន់បេតិកភណ្ឌ​អង្គរបានផ្ទុះការ​តវ៉ានៅ​ខាង​មុខ​សាលាឃុំ ដោយបដិសេធចំពោះសំណើរដោះដូរទីលំនៅ។

បើតាមប្រជាពលរដ្ឋឱ្យដឹងថា កាលពីព្រឹកមិញនេះ មានអាជ្ញាធរចុះមកសួរនាំ អ្នកភូមិ និងឱ្យ ផ្ដិតមេដៃសម្រាប់អ្នកចង់ផ្លាស់ប្ដូរទីលំនៅទៅកាន់ទីតាំងថ្មី។ ការណ៍នេះនាំឱ្យពួកគេមានការ ភ្ញាក់ផ្អើលនិងធ្វើការតវ៉ាព្រោះពុំធ្លាប់ដឹងរឿងនេះពីមុនមក។

យ៉ាងណាមន្ត្រីមូលដ្ឋានថា ប្រជាពលរដ្ឋរស់នៅឃុំព្រះដាក់នេះ គឺពិតជាត្រូវចាកចេញពី​តំបន់​អង្គរ ក្រោមគោលនយោបាយដោះស្រាយដោយរដ្ឋាភិបាល។ ប្រភពដដែលបន្តថា នៅចុង​សប្ដាហ៍​នេះ អាជ្ញាធរនឹងជួបប្រជាពលរដ្ឋដើម្បីពន្យល់លម្អិតជុំវិញការផ្លាស់ប្ដូរលំនៅឋាន។

ប្រជាពលរដ្ឋដែលចូលរួមតវ៉ាព្រឹកមិញនេះ លោក ជា វិរៈ វ័យ៤៣ឆ្នាំ រស់នៅភូមិថ្នាល់ទទឹង ឃុំព្រះដាក់ តាំងពីកើតមក និយាយថា លោកពុំព្រមចាកចេញពីលំនៅឋានសព្វថ្ងៃឡើយ ដោយសារមានមុខរបរនិងដីស្រែចំការនៅទីនោះ ព្រមទាំងសេវាសាធារណៈក្បែរផ្ទះ។

លោក​ វិរៈ ប្រាប់ថា៖ «ភូមិ[រុនតាឯក]វានៅឆ្ងាយពីការរកស៊ីរបស់ខ្ញុំ កន្លែងរស់នៅអត់មាន​កន្លែង​មួយដែរអាចរកចំណូលបាន ឆ្ងាយពីទីផ្សារ ប្រជាពលរដ្ឋអត់ដឹងរកស៊ីអី ព្រោះ​តំបន់​នោះវានៅក្នុងព្រៃ»។ 

លោក វិរៈ មានមុខរបរជាអ្នកធ្វើស្រែចំការនិងជាងធ្វើតុទូនៅខាងមុខផ្ទះ ដែល​អាចធ្វើ​ឱ្យ​គាត់រកប្រាក់ចំណូលជាង១០ម៉ឺនរៀលក្នុងមួយថ្ងៃ បានអះអាងថា អាជ្ញាធរ​បានផ្ដល់ដី​លំនៅឋាន​ឱ្យពលរដ្ឋមួយគ្រួសារទទឹង២០ម៉ែត្រនិងបណ្ដោយ៣០ម៉ែត្រ ដោយពុំបញ្ជាក់ពី​ការផ្លាស់ប្ដូរដីស្រែចំការ។ យ៉ាងណាទំហំនេះ បើប្រៀបធៀបជាមួយដីលំនៅឋាន​លោកសព្វថ្ងៃ​ជិត១ហិកតានិងដីស្រែជាង១ហិកតាហាក់តិចជាងឆ្ងាយ​។

លោក វិរៈ និយាយថា៖ «ដំណោះស្រាយពួកខ្ញុំគឺអត់ចាកចេញជាដាច់ខាត។ ចង់រស់នៅតែ​ភូមិចាស់​(ភូមិថ្នាល់ទទឹង)ដដែលអត់ចង់ផ្លាស់ប្ដូរទេ»

អ្នកស្រី ពៅ គុណ វ័យ៣៩ឆ្នាំ រស់នៅភូមិអូរទទឹង ឃុំព្រះដាក់ តាំងពីដូនតា ថ្លែងថា អ្នកស្រី ពុំយល់ព្រមតាមសំណើររបស់អាជ្ញាធរឱ្យផ្លាស់ប្ដូរលំនៅឋានទៅភូមិរុនតាឯក ព្រមទាំង​បដិសេធ​រាល់ដំណោះស្រាយទាំងឡាយពីអាជ្ញាធរ។

អ្នកស្រី គុណ និយាយថា៖ «នៅភូមិខ្ញុំមានវត្តព្រះដាក់ ខ្ញុំនៅជិតមណ្ឌលសុខភាពព្រះដាក់ នៅជិតសាលារៀន។ រុនតា​ឯកមិនដឹងនៅណាទេ ឮថាអ្នកទៅមុនពួក[ក្បែរ]អង្គរ គេថាទឹកលិច រកកន្លែងដេកគ្នាន»

អ្នកស្រី គង់ ចាន់ថា ជំទប់ទី២ ឃុំព្រះដាក់ និយាយថា​ ពលរដ្ឋ ២២១១គ្រួសារ រស់នៅ​ភូមិ​ទាំង៦ នៃឃុំព្រះដាក់ ត្រូវរងការផ្លាស់ប្ដូរលំនៅឋានទៅកាន់ ភូមិរុនតាឯក នៅស្រុកបន្ទាយស្រី និងភូមិពាក់ស្នែង នៅស្រុកអង្គរធំ លើកលែងតែភូមិតាកុះមួយប៉ុណ្ណោះ​ដែលអ្នកភូមិ​ប៉ះ​ពាល់​ត្រឹមពាក់កណ្ដាល។

 អ្នកស្រី បន្ថែមថា៖ «អាជ្ញាធរអប្សរាឱ្យប្រជាជនយើងរុះរើផ្ទះចាស់ លើដីចាស់ទៅនៅដីថ្មី ចេញពីតំបន់អប្សរា ប៉ុន្តែពួកគាត់អត់យល់ព្រមក៏មកតវ៉ានៅនេះ»។

លោក ភន់ សុខុម អភិបាលស្ដីទី ស្រុកបន្ទាយស្រី មានប្រសាសន៍ថា ព្រឹកមិញនេះ​មន្រ្តី​ក្រសួងដែនដីចុះទៅសួរនាំប្រជាពលរដ្ឋជុំវិញការផ្លាស់ប្ដូរទីលំនៅ ទាំងអាជ្ញាធរមូលដ្ឋាន​ពុំទាន់​ធ្វើការផ្សព្វផ្សាយពីគោលនយោបាយរបស់រដ្ឋាភិបាលនៅឡើយ ទើបបណ្ដាលឱ្យ​មានការតវ៉ាកើតឡើង។

លោក សុខុម ថ្លែងថា៖ «មិនទាន់មានគោលការណ៍ប្រជុំផ្សព្វផ្សាយហើយគាត់បាននាំគ្នា​ចុះទៅ។ ខាងក្រសួងដែនដី[ដែលចុះ]»

អភិបាលស្រុកបន្ទាយស្រីស្ដីទីរូបនេះ បដិសេធចំពោះសំណួរអ្នកសារព័ត៌មាន ខេមបូចា  ជុំវិញដំណោះស្រាយជូនប្រជាពលរដ្ឋដោយប្រាប់ឱ្យទូរសព្ទសួរក្រសួងដែនដីជំនួសវិញ។

ប្រជាពលរដ្ឋលក់ដូរនៅក្នុងឃុំព្រះដាក់ ស្រុកបន្ទាយស្រី ខេត្តសៀមរាប។ រូបថតនៅថ្ងៃទី១ ខែតុលា ឆ្នាំ២០២២។ ខេមបូចា/ បញ្ញា ឆព័ណ្ណ

លោក ឃឹម ហ្វីណង់ អភិបាលរងខេត្តសៀមរាប និងជាអតីតអភិបាលស្រុកបន្ទាយស្រី និយាយថា លោកពុំទាន់ទទួលព័ត៌មានជុំវិញការតវ៉ារបស់​ប្រជាពលរដ្ឋ​នេះ​នៅឡើយទេ ព្រមទាំងប្រាប់ឱ្យអ្នកសារព័ត៌មានសួរទៅអាជ្ញាធរអប្សរាវិញ។ 

លោក ហ្វីណង់ បញ្ជាក់ថា៖ «ការងារនេះខ្ញុំអត់ទាន់ទទួលបានព័ត៌មានទេ អធ្យាស្រ័យ ចឹងសូមមិនឆ្លើយតបទេ»។

អភិបាលរងនិងជាអ្នកនាំពាក្យរដ្ឋបាលខេត្តសៀមរាប លី សំរិទ្ធ ថ្លែងថា លោកពុំ​មាន​សិទ្ធិ​ក្នុងការឆ្លើយជាមួយអ្នកសារព័ត៌មានជុំវិញករណីពលរដ្ឋនៅតំបន់អង្គរឡើយ ដោយកិច្ចការ​នេះ ​គឺស្ថិតក្នុងដែនសមត្ថកិច្ចក្រសួងដែនដី។

លោក ហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី​ខេត្ត​សៀមរាប ថ្លែងថា រដ្ឋាភិបាលមានយន្តការក្នុងការដោះស្រាយ​ជូនប្រជាពលរដ្ឋ ប៉ុន្តែ​លោកពុំ​ទាន់​ទទួល​បាន​ព័ត៌មានជុំវិញការតវ៉ានេះនៅឡើយទេ។

លោក គ្រាន់ឆ្លើយថា៖ «ខ្ញុំអត់បានទៅស្ដាប់អត់បានទទួលសំណូមពរពីគាត់ថាម៉េចទេ ដូច្នេះខ្ញុំមិនអាចនិយាយបានទេ»។

ប្រធានមន្ទីរដែនដីរូបនេះ បង្វែរសំណួរអ្នកសារព័ត៌មានថាតើមានពលរដ្ឋប៉ុន្មានគ្រួសារ​ដែលត្រូវផ្លាស់ប្ដូរទីលំនៅចេញពីតំបន់អង្គរ ដោយប្រាប់ឱ្យសួរទៅកាន់អាជ្ញាធរជាតិអប្សរា​ជំនួសវិញ។ 

លោក ឡុង កុសល អ្នកនាំពាក្យអាជ្ញាធរជាតិអប្សរា ប្រាប់ឱ្យអ្នកសារព័ត៌មានសួរទៅ​កាន់​ក្រសួងដែនដីវិញ។

លោក កុសល ថ្លែងថា៖ «ព្រោះកិច្ចការងារនេះស្ថិតក្នុងក្របខណ្ឌនៃក្រុមការងារតម្រង់ទិស គាត់[ក្រសួងដែនដី]តែមួយគត់ ជាអ្នកផ្ដល់ព័ត៌មានពាក់ព័ន្ធបញ្ហាហ្នឹង»  

លោក បេងហុង សុជាតិខេមរូ អគ្គនាយកនៃអគ្គនាយកដ្ឋានលំនៅដ្ឋាន នៃក្រសួង​ដែនដី ប្រាប់ឱ្យ​អ្នកសារព័ត៌មាន ខេមបូចា សួរទៅអ្នកនាំពាក្យក្រសួងដែនដីជំនួស។ សារព័ត៌មាន ខេមបូចា ពុំអាចសុំការអត្ថាធិប្បាយពីលោក សេង ឡូត អ្នកនាំពាក្យក្រសួងដែនដីបានទេ ដោយខលទូរសព្ទទៅពុំមានអ្នកលើក។

លោក សួស ណារិន មន្ត្រី​ឃ្លាំ​មើល​សិទ្ធិ​មនុស្ស​របស់​អង្គការ ​អាដហុក​ ប្រចាំ​ខេត្ត​សៀម​រាប អំពាវនាវកុំឱ្យមានការប្រើអំពើហិង្សាណាមួយប្រសិនបើពលរដ្ឋពុំព្រមចាកចេញតាមការណែនាំពីអាជ្ញាធរ។

លោក ណារិន ថ្លែងថា៖ «យើងសង្គមស៊ីវិលទទូចថាធ្វើម៉េចកុំឱ្យប្រើហិង្សានៅពេល​ពួកគាត់​អត់ចាកចេញ។ វិធីសាស្រ្តអីត្រជាក់ៗដើម្បីឱ្យពួកគាត់អាចទទួលយកបាន»

លោក ណារិន អះអាងថា ពលរដ្ឋនៅឃុំព្រះដាក់នេះ គឺរស់នៅរយៈពេលយូរណាស់មកហើយ ដោយខុសពីប្រជាពលរដ្ឋមួយចំនួនរស់នៅក្បែរប្រសាទអង្គរ។  

លោក ណារិន បន្ថែមថា៖«ទោះបីពួកគាត់[ពលរដ្ឋរស់នៅក្បែរប្រាសាទអង្គរ]ថារស់នៅពីយូរ ប៉ុន្តែពួកគាត់បានទទួលសំណងម្ដងហើយ។ ទៅនៅអង្គរបានទទួលសំណងម្ដងទៀត ខ្លះរស់​នៅលើដីផ្លូវសោះ បានដីទទឹង២០ម៉ែត្រ បណ្ដោយ៣០ម៉ែត្រហ្នឹងគេដែរ ហើយទៅទះដៃ​អបអរ។ សម្រាប់អ្នកនៅភូមិចាស់[រស់នៅតាំងពីកំណើត] វាមិនស្រប នៅតាំងពីដូនតាមក​ក៏បានដូចគ្នា»

នៅដើមខែតុលានេះ ក្នុងពិធីប្រគល់សញ្ញាបត្រដល់និស្សិតវិទ្យាស្ថានវ៉ាន់ដា លោកនាយករដ្ឋ​មន្រ្តី ហ៊ុន សែន ថ្លែងថា ការផ្លាស់ប្ដូរលំនៅឋានពលរដ្ឋចេញពីតំបន់អង្គរនេះ ក្រោមសម្ពាធពី​អង្គការយូណេស្កូ ជុំវិញការការពារតំបន់រមណីយដ្ឋានអង្គរ។ លោក ហ៊ុន សែន សង្កត់ធ្ងន់ថា ករណីប្រជាពលរដ្ឋពុំព្រមចាកចេញ ពួកគេនឹងត្រូវបណ្ដេញចេញទាំងពុំមានសំណងឡើយ ដោយលោកបារម្ភពីការដកប្រសាទអង្គរចេញពីបេតិកភណ្ឌ​ពិភព​លោក។

លោក ហ៊ុន សែន និយាយថា៖ «ពេលនេះជាពេលដែលរដ្ឋាភិបាលធ្វើការថ្នាក់ថ្នម អង្វរករបងប្អូនឱ្យចាកចេញ ប៉ុន្តែនៅពេលវេលាមកដល់១សេនក៏អត់ឱ្យ ហើយបញ្ជូនចេញពីតំបន់ហ្នឹងតែម្ដង»

លោកនាយករដ្ឋមន្រ្តី ហ៊ុន សែន កន្លងមកក៏ធ្លាប់ព្រមាន​ចាត់​វិធានការ​ច្បាប់​ប្រឆាំង​គណបក្ស​នយោបាយ​ណាយកករណីនេះ សម្រាប់យុទ្ធនាការឃោសនា​បោះ​ឆ្នោត​ជាតិ ដែល​នឹង​ចូល​មក​ដល់​នៅ​ឆ្នាំខាង​មុខ​ផងដែរ។

177 views

ព័ត៌មានថ្មីៗ

អត្ថបទពេញនិយម