នគរបាលក្រុងប៉ោយប៉ែត ឃាត់ខ្លួនមន្ត្រីសង្គមស៊ីវិលម្នាក់ និងកោះហៅមនុស្ស២នាក់ផ្សេងទៀតទៅបំភ្លឺក្នុងករណីស្រង់ទិន្ន័យសមាជិកអ្នកប្រកបរបរក្រៅប្រព័ន្ធ ដែលខ្វះខាតស្បៀងអាហារអំឡុងពេលផ្ទុះជំងឺកូវីដ១៩។
តំណាងសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ប្រចាំខេត្តបន្ទាយមានជ័យ លោក កង ណាខន ត្រូវឃាត់ខ្លួននៅ ថ្ងៃទី១១ខែឧសភា។ ចំណែកឯ សមាជិកពីរនាក់ទៀត ឈ្មោះ វន វ័ន្ត និងឈ្មោះ សុត សុខ ត្រូវអធិការនរគរបាលក្រុងប៉ោយប៉ែត កោះហៅសួរចម្លើយនៅព្រឹកថ្ងៃទី១២ខែឧសភា នឹងឱ្យត្រឡប់មកផ្ទះវិញនៅវេលាថ្ងៃត្រង់ថ្ងៃដដែល។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) លោក វន់ ពៅ ឱ្យដឹងថា សហការីរបស់លោកត្រូវបានឃាត់ខ្លួន និងហៅសាកសួរ បន្ទាប់ពីពួកគេស្រង់បញ្ជីឈ្មោះសមាជិកដទៃទៀតដែលកំពុងខ្វះខាតស្បៀងអាហារអំឡុងពេលបិទខ្ទប់ក្រុងប៉ោយប៉ែត។ លោកថា ការឃាត់ខ្លួននេះជាការគំរាមកំហែងដល់សិទ្ធិសេរីភាពរបស់សមាជិកសង្គមស៊ីវិល។
លោក វន់ ពៅ និយាយថា៖«ខ្ញុំគិតថាជាការគំរាមកំហែងប្រធានសាខារបស់ខ្ញុំ គ្រាន់តែគាត់ស្រង់ឈ្មោះតាមទូរសព្ទប៉ុណ្ណោះ គាត់មិនហ៊ានបំពានបម្រាមរបស់ក្រសួងសុខាភិបាលបែរជាឃាត់ខ្លួនគាត់»។
លោក វន់ ពៅ បន្តថា កាលពីឆ្នាំមុនសមាជិកសមាគមIDEAចំនួន១២០០នាក់ បានទទួលជំនួយសង្គ្រោះជាទឹកប្រាក់ចំនួន៣០ដុល្លារក្នុងម្នាក់ៗពីអង្គការដៃគូ តាមរយៈគម្រោងជួយពលរដ្ឋរងគ្រោះដោយសារកូវីដ១៩ ។ លោកអះអាងថា ក្នុងរយៈពេល១សប្ដាហ៍មកនេះ លោក ណាខន ប្រមូលទិន្នន័យពីពលរដ្ឋក្រីក្រនៅប៉ោយប៉ែតចំនួន១៧០នាក់ ដែលមានឈ្មោះ និងលេខទូរសព្ទ យកមកផ្ដល់ជូនស្នាក់ការកណ្ដាល ដើម្បីរៀបចំបញ្ជីឈ្មោះស្នើសុំជំនួយពីអង្គការដៃគូជាថ្មីទៀត ប៉ុន្តែមិនទាន់កំណត់ថ្ងៃចែកជូននៅឡើយ។
លោក វន់ ពៅ ថាការផ្ដល់ជំនួយនោះគឺអង្គការដៃគូ ជាអ្នកផ្ទេរប្រាក់ឱ្យដោយផ្ទាល់ទៅកាន់អ្នកក្រីក្រតែម្ដង ដោយសមាគមគ្រាន់តែជួយសម្រួលរៀបចំបញ្ជីឈ្មោះប៉ុណ្ណោះ។
លោក វន់ ពៅ និយាយថា៖ «ការិយាល័យកណ្ដាលឱ្យគាត់ស្រង់ឈ្មោះសមាជិកអ្នកក្រីក្រសមាជិកនៅប៉ោយប៉ែតហ្នឹងដើម្បីសុំជំនួយពីអង្គការដៃគូក្នុងប្រទេស យកចែកជូនអ្នកខ្វះខាតមិនទាន់បានចែកផងគេចាប់ខ្លួនគាត់បាត់ ។
កូនរបស់លោក កង ណាខន គឺយុវជន ប៊ុនធឿន រៀបរាប់ថា ប៉ូលីសបានឃាត់ខ្លួនឪពុករបស់គាត់ក្នុងពេលចូលបំភ្លឺ ករណីស្រង់ឈ្មោះអ្នកខ្វះស្បៀងនៅក្នុងបរិវេណអធិការក្រុងប៉ោយប៉ែត។ លោកបន្តថា ឪពុករបស់គាត់ ធ្វើការតែតាមទូរសព្ទនៅក្នុងផ្ទះប៉ុណ្ណោះ និងមិនធ្លាប់បានចូលទៅក្នុងតំបន់ហាមឃាត់ ដែលអាជ្ញាធរដាក់បម្រាមនោះទេ ។
យុវជន ប៊ុនធឿន ៖ «ប៉ូលីសគេតាមរកប៉ាខ្ញុំ ទើបព្រឹកម្ស៉ិលម៉ិញប៉ាគាត់ទៅបំភ្លឺនៅប៉ុស្តិ៍បំភ្លឺរួចគេឱ្យគាត់មកវិញ ដល់រសៀលខាងអធិការក្រុងគេហៅទៅម្ដងហើយឃាត់ខ្លួនហ្មងទៅ។ប៉ុន្មានថ្ងៃនេះប៉ាអត់ដែលទៅណាទេ គាត់នៅតែផ្ទះនិងទៅត្រឹមផ្សារជិតផ្ទះនេះទេ។
យុវជនប៊ុនធឿន បន្ថែមថា កូនៗបារម្ភពីសុខភាពរបស់ឪពុកដែលមានជំងឺប្រចាំកាយនិងស្នើសុំឱ្យអាជ្ញាធរដោះលែងឪពុកឱ្យមានសេរីភាពឡើងវិញ។
អធិការរងក្រុងប៉ោយប៉ែត ទទួលបន្ទុកផ្នែកព្រហ្មទណ្ឌ លោក ចាន់ សុភី មានប្រសាសន៍ថានគរបាលក្រុងប៉ោយប៉ែតកោះហៅ ពលរដ្ឋ មកសាកសួរក្រោយទទួលដំណឹងថា លោកបានចុះស្រង់ឈ្មោះពលរដ្ឋក្នុងក្រុង។ ក្រោយពីសាកសួរ លោក ណាខន ត្រូវបានបញ្ជូនទៅធ្វើចត្តាឡីស័ក និងមិនទាន់សម្រេចចោទប្រកាន់ក្នុងបទចោទណាមួយនៅឡើយទេ។
លោក ចាន់ សុភី មានប្រសាសន៍ថា៖«គាត់(កងណាខន) ប្រមែប្រមូលប្រជាពលរដ្ឋមកចែកអំណោយអីចឹង គាត់ផ្សព្វផ្សាយថាគាត់មានអំណោយមានអីចឹងយើងក៏អញ្ចើញគាត់មក សួរនាំក្រែងមានប៉ះពាល់ដល់អ្នកដែលឆ្លងជំងឺ ។ខាងថ្នាក់លើក៏បញ្ជាមកថាឱ្យយកគាត់ធ្វើចត្តាឡីស័កនៅវិទ្យាល័យនិមិត្ត យើងអត់ទាន់មានចោទអីនៅឡើយទេ»។
លោក សុត សុខ អាយុ៥៩ឆ្នាំ ជាប្រជាពលរដ្ឋរស់នៅសង្កាត់ផ្សារកណ្ដាលក្រុងប៉ោយប៉ែត ឱ្យដឹងថា រូបលោកនិងអ្នកជិតខាងម្នាក់ទៀតជាអ្នកធ្វើការងារជាមួយលោក ណាខន ត្រូវសមត្ថកិច្ចនគរបាលនាំខ្លួនទៅសួរចម្លើយនិងបង្ខំឱ្យធ្វើកិច្ចសន្យាថាឈប់ធ្វើការឱ្យIDEAតទៅទៀត ។
លោក សុត សុខ ៖ «នគរបាល២នាក់មកនាំខ្លួនខ្ញុំពីផ្ទះទៅអធិការតែម្ដង។ គេសួរចម្លើយអស់ចិត្តរួចឱ្យខ្ញុំធ្វើកិច្ចសន្យា ថាបើហ៊ានធ្វើគេចាត់វិធានការតាមច្បាប់ តែខ្ញុំអត់បានធ្វើអីខុសច្បាប់ទេនេះជាការគំរាមទាំងស្រុង។ ខ្ញុំគ្រាន់តែចង់ជួយបងប្អូនអ្នកស្រុកដែលអត់ឃ្លានប៉ុណ្ណោះ អាជ្ញាធរមិនគួរចង្អៀតចង្អល់បែបនេះឡើយ» ។
ខេមបូចាមិនអាចទាក់ទង ស្នងការនគរបាលខេត្តបន្ទាយមានជ័យ លោក សិទ្ធ ឡោះ ដើម្បី អត្ថាធិប្បាយបន្ថែមករណីឃាត់ខ្លួន និងកោះសាកសួរមនុស្សទាំងបីនាក់ នៅថ្ងៃពុធនេះ។
អភិបាលក្រុងប៉ោយប៉ែត លោក គៀត ហ៊ុល មានប្រសាសន៍ថា លោកកំពុងចែកជំនួយជូនពលរដ្ឋដែលខ្វះខាត ដោយលោកមិនទាន់មានពេលឆ្លើយតបសំណួរជុំវិញករណីនេះឡើយ។
លោក គាត ហ៊ុល៖« ថ្ងៃនេះពូរវល់ណាស់អត់ទាន់អាចនិយាយបំភ្លឺអីបានទេណាសូមអធ្យាស្រ័យ»។
នាយករងអង្គការលីកាដូ លោក អំ សំអាត មានប្រសាសន៍ថា ករណីឃាត់ខ្លួននេះជាការគំរាមកំហែងនិងបំភិតបំភ័យទៅលើសមាជិកអង្គការសង្គមស៊ីវិល។
លោក អំ សំអាត មានប្រសាសន៍ថា៖«បើគាត់គ្រាន់តែកត់ឈ្មោះតាមទួរសព្ទដើម្បីសុំជំនួយឬស្វែងរកជំនួយមកជូនពលរដ្ឋ តែបែរជាអាជ្ញាធរឃាត់ខ្លួននោះជាការគំរាមកំហែងនិងបំភិតបំភ័យ ព្រោះការកត់ឈ្មោះមនុស្សចែកអំណោយមិនមែនជារឿងខុសច្បាប់អ្វីឡើយ»។
អ្នកនាំពាក្យសមាគមអាដហុក លោក ស៊ឹង សែនករុណា មានប្រសាសន៍ថា អាជ្ញាធរចាំបាច់ត្រូវបើកចំហរសេរីភាពឱ្យសង្គមស៊ីវិលដើម្បីចូលរួមចំណែកដោះស្រាយបញ្ហាប្រឈមដែលបណ្ដាលមកពីជំងឺកូវីដ១៩ ដោយមិនត្រូវធ្វើទុក្ខបុកម្នេញលើពួកគេឡើយ។
លោក ស៊ឹង សែនករុណា មានប្រសាសន៍ថា៖ «យើងបារម្ភថាពេលចប់ចត្តាឡីស័កអាជ្ញាធរអាចនឹងរករឿងគាត់ឬចោទប្រកាន់គាត់ ដោយប្រការណាមួយ។ដូច្នេះយើងស្នើឱ្យអាជ្ញាធរដោះលែងពួកគាត់ឱ្យមានសេរីភាពឡើងវិញ»។
ក្រុងប៉ោយប៉ែត មានឆ្លងជំងឺកូវីដ១៩ ជិត១ពាន់នាក់។ អាជ្ញាធរខេត្តបន្ទាយមានជ័យបានបិទខ្ទប់ការចេញចូលក្នុងក្រុងប៉ោយប៉ែត ចាប់តាំងពីព្រឹកថ្ងៃទី២៤ខែមេសា បន្ទាប់ពីមានអ្នកឆ្លងជំងឺកូវីដ១៩ កាន់តែច្រើន។ ទោះជាយ៉ាងណា អាជ្ញាធរក្រុងប៉ោយប៉ែត នៅថ្ងៃទី១២ខែឧសភា បានសម្រេចបើកតំបន់មួយចំនួនឱ្យពលរដ្ឋធ្វើដំណើរឆ្លងកាត់។រដ្ឋបាលក្រុងប៉ោយប៉ែតក៏បានជូនដំណឹងឱ្យអ្នកដែលចេញចូលក្រុង ត្រូវផ្ដល់អត្តសញ្ញាណនៅកាន់អាជ្ញាធរ។
យោងតាមរបាយការណ៍ពីមន្ទីរសុខាភិបាលខេត្តបន្ទាយមានជ័យ ឲ្យដឹងថាអាជ្ញាធរបានរកឃើញអ្នកឆ្លងជំងឺកូវីដ១៩ចំនួន ១០១២នាក់ ជាសះស្បើយ៩០នាក់ គិតចាប់តាំងពីការផ្ទុះការឆ្លងជាសហគមន៍ពីខែមេសាដល់ថ្ងៃទី១២ ខែឧសភា៕
