ពលរដ្ឋខេត្តកំពង់ស្ពឺចោទក្រុមហ៊ុន «គ្មានឈ្មោះ»មួយថាបានបំពុលទឹកអូររបស់ពួកគាត់

លោក ឡាយ រដ្ឋា អ្នកខេត្តកំពង់ស្ពឺ ចង្អុលទៅកាន់អូរប្រុង និងបាននិយាយថាពេលនេះកខ្វក់អស់ហើយ និងមិនអាចផឹកបានទៀតទេ បន្ទាប់ពីរោងចក្របើកដំណើរការមក។ ស៊ន សារ៉ាត
លោក ឡាយ រដ្ឋា អ្នកខេត្តកំពង់ស្ពឺ ចង្អុលទៅកាន់អូរប្រុង និងបាននិយាយថាពេលនេះកខ្វក់អស់ហើយ និងមិនអាចផឹកបានទៀតទេ បន្ទាប់ពីរោងចក្របើកដំណើរការមក។ ស៊ន សារ៉ាត
Share on facebook
Share on twitter
Share on linkedin
Share on telegram
Share on whatsapp

អូរ​ប្រុង ស្ថិត​នៅ​ចំព្រំប្រទល់​ស្រុក​សំរោងទង និង​ស្រុក​ឱរ៉ាល់ ដែលមានចម្ងាយប្រមាណ៣០គីឡូម៉ែត្រ ពីទីរួមខេត្ត​កំពង់​ស្ពឺ។ នៅ​ម្ខាងនៃ​អូរនេះ​គឺ​ជាភូមិ​តាំងស្នោ ហើយ​អូរ​មួយ​​នេះ​ក៏​ហូរ​កាត់​ភូមិ​មនោរម្យ​ផង​ដែរ​។​

អ្នក​ភូមិទាំង​ពីរ​​ បាន​ប្រើ​ប្រាស់​ទឹក​អូរនេះ​សម្រាប់​ជា​ប្រព័ន្ធធារាស្រ្ត​ស្រោច​ស្រប់​ដំណាំ ​ប្រើ​ប្រាស់​ប្រចាំថ្ងៃ និង​សម្រាប់​រក​ត្រី​ផង​ដែរ​។ អូរ​មួយ​ខ្សែ​នេះ​បាន​ជួយ​ទ្រ​ទ្រង់​ជីវភាព​រស់​នៅ​ប្រ​ចាំ​ថ្ងៃ​ដល់​គ្រួសារ​ជា​ច្រើន​​​ក្នុង​សហគមន៍​ជនបទ​មួយ​នេះ​។​​

ក្នុង​ឆ្នាំ​២០១៩ អ្នក​ភូមិ បាន​កត់​សម្គាល់​ឃើញ​ថា​ទឹក​មិន​អាច​ប្រើប្រាស់​បាន​ទៀត​ទេ ហើយផ្នែក​ខ្លះ​នៃ​ទឹក​ក្នុង​អូរ​មាន​ប្រែ​​ពណ៌ទៅជាពណ៌​ខ្មៅ និង​ឡើងពពុះ​។ ទឹក​ក្នុង​អូរ​ក៏​បញ្ចេញក្លិនមិនល្អដែលមានចម្ងាយរហូតដល់ ២០០ ម៉ែត្រ​ពី​អូរ​ផង​ដែរ​។

​អ្នកភូមិតាំងស្នោ លោក ឡាយ រដ្ឋា និយាយថា៖ «ពេល​រោង​ចក្រ​ចាប់​ផ្ដើម​ដំណើរ​ការ​ក្នុង​ឆ្នាំ​២០១៩ ទឹក​ប្រឡាយ​ទាំង​មូល​ប្រែជា​ពណ៌ខ្មៅ និង​មាន​ពពុះ ធ្វើ​ឲ្យត្រី​ងាប់ ហើយ​ឥឡូវ​យើង​លែង​មាន​ត្រីពីប្រឡាយ​ហូប​ទៀត​ហើយ»

​រោង​ចក្រ​ស្ថិត​នៅ​ក្នុង​ស្រុក​ឱរ៉ាល់ ​ផ្នែក​ម្ខាង​នៃប្រឡាយទឹក។ រោង​ចក្រ​មិ​ន​បាន​ដាក់​ស្លាក​ឈ្មោះ​នៅ​ខាង​ក្រៅ​ទេ ហើយ​អ្នក​ភូមិ​គិតថា​រោងចក្រនេះគ្រប់គ្រង​ដោយ​ជនជាតិ​ចិន​។​

​លោក ចាន់ សុភណ្ឌ ធ្វើការនៅ​រោង​ចក្រមួយ​នេះ តែ​លោក​មិន​ដឹង​ថា​រោង​ចក្រ​ឈ្មោះអ្វីទេ ដោយ​ថា​លោក​មិន​ចេះទាំងអង់គ្លេស ឬ​ចិន​។​​

លោក​ឲ្យ​ដឹង​ថា៖ «​ខ្ញុំ​មិនចេះអានទេ ព្រោះ​ទំនិញ​ទាំងអស់​សរសេរជា​ភាសា​ចិន និង​អង់គ្លេស»។​

លោក​បន្ថែម​ថា​រោង​ចក្រ​ផលិត​ដំណាប់​ស្វាយ បារី និង​ទឹក​ត្រី ហើយ​ពេល​នេះ​រោង​ចក្រ​បាន​ផ្អាក​ដំណើរ​ការ រង់ចាំរដូវ​ប្រមូល​ផល​ស្វាយ​។

សន្ដិសុខ​ម្នាក់យាម​នៅ​ខាង​មុខ​រោង​ចក្រ​ ក៏​មិន​ដឹ​ងថា​រោង​ចក្រ​នេះ​ឈ្មោះ​អ្វីដែរ។ លោកគ្រាន់​តែ​ចង្អុល​ទៅ​អក្សរ​ដែលមាន​សរសេរ​លើ​មួក​ថា​ «CSAS»។ CSAC គឺ​ជា​ក្រុម​ហ៊ុន​សន្តិសុខ​មាន​មូល​ដ្ឋាន​នៅទីក្រុង​ភ្នំពេញ និង​បាន​ធ្វើ​អាជីវកម្ម​ផ្ដល់​បុគ្គលិក​សន្តិសុខ។ នេះ​បើតា​ម​ព័ត៌មាន​លើ​ហ្វេស​ប៊ុក​របស់​ក្រុម​ហ៊ុន​។

អ្នក​ភូមិ​​រស់​នៅ​តាម​បណ្ដោយ​ដង​អូរនេះបានអះអាងថា​ការ​បាត់​បង់​គុណភាព​ទឹក​ដោយ​មិន​ដឹង​មូល​ហេតុ​នេះ មាន​ទាក់ទងទៅនឹង​ក្រុម​ហ៊ុន​មិនស្គាល់​ឈ្មោះខាងលើ។ អ្នក​សារព័ត៌មាន​ CambJA បាន​ទៅ​ដល់ទីតាំង​ក្រុម​ហ៊ុន និង​បា​នឃើញថា​ក្រុម​ហ៊ុន​បាន​ឈប់ដំណើរ​ការ ហើយ​ក៏​មិន​មាន​ដាក់​ស្លាក​ឈ្មោះ​នៅ​កន្លែងណាមួយ​តាម​របង​នោះដែរ​។​​

សម្រាប់​ប៉ុន្មាន​ឆ្នាំ​កន្លង​មកនេះ​​ អ្នក​ភូមិ​បាន​ប្រើប្រាស់​ស្រះ​ទឹក​ក្នុង​វត្ត​អូរ​ប្រុង​ សម្រាប់​តម្រូវ​ការ​ប្រចាំថ្ងៃ។ ប៉ុន្តែ​អ្នក​ភូមិ​ភាគ​ច្រើន​ចំណាយ​ប្រាក់​ដើម្បីទិញ​ទឹកសម្រាប់​​បរិភោគ​។​

លោក រដ្ឋា ជា​ប្រជា​ការពារ​ភូមិ​តាំង​ស្នោផង​ដែរ​នោះ និយាយ​ថា​គ្រួសារ​ជា​ច្រើន​បាន​ចំណាយ​ប្រាក់​ប្រហែល​ប្រាំបួន​ដុល្លារ​អាមរិក​ពេល​ទិញ​ទឹក​ម្ដងៗ ហើយ​ថា​លោក​ចំណាយ​ប្រហែល​៣៥​ដុល្លារ​​កាលពី​ខែ​មុន​។ បើ​តាម​លោក រដ្ឋា ពលរដ្ឋ​ផ្សេង​ទៀត​មាន​បំណង​ជីក​អណ្ដូង​ជំនូស​វិញ​។​

លោក​ឲ្យ​ដឹង​ដែរថា​៖ «​ពួក​យើង​បាន​តវ៉ា​ជា​ច្រើន​ដង​មក​ហើយ និង​ស្នើ​ឲ្យ​អាជ្ញាធរ​ជួយ​រក​ដំណោះស្រាយ ប៉ុន្តែគ្មាន​លទ្ធផល​មក​ទល់ពេលនេះ»។​

រដ្ឋា មិន​សប្បាយ​ចិត្ត​នឹង​ក្រុម​ហ៊ុននេះទេ ដោយ​ថា​ដំណើរការ​តែ​ក្នុង​រដូវ​ប្រមូល​ផល​ស្វាយ មិន​បាន​ជួយ​ផ្ដល់ការងារ​យូរអង្វែង​ដល់​អ្នក​ភូមិ​នោះទេ តែ​​ផ្ទុយ​មក​វិញ​បាន​បំពុល​ប្រ​ភព​ទឹក​របស់​អ្នក​ភូមិ​។

ភ្លាមៗ​​បន្ទាប់​ពី​មាន​បណ្ដឹង​របស់អ្នក​ភូមិ​ទាក់ទង​នឹងការ​ធ្វើ​ឲ្យអូរ​កខ្វក់​ មន្ត្រី​មូល​ដ្ឋាន​បាន​ចុះ​មក​ពិនិត្យ​គុណភាព​ទឹក​អូរនេះ ប៉ុន្តែ​មិន​ទាន់​បាន​ផ្ដល់​លទ្ធផល​ថាយ៉ាង​ម៉េច​ឲ្យ​អ្នក​ភូមិ​ដឹង​នោះទេ​។​ ​

លោក ទ្រី រ៉ុន ជាកសិករ​ម្នាក់​រស់​នៅ​ក្នុង​ភូមិ​មនោរម្យ។ ​ទឹកអូរនេះ​មាន​សារសំខាន់​ណាស់​សម្រាប់​ដំណាំ​របស់​លោក។ លោក​រំឭក​ថា កាលពីឆ្នាំ​កន្លងទៅ​ទឹក​ក្នុង​អូរ​ «ថ្លាដូចកញ្ចក់» អ៊ីចឹង។ បន្ទាប់​ពី​ទឹក​មាន​បញ្ហា លោក​មិន​បាន​ប្រើ​ប្រាស់ទឹកក្នុង​អូរ​​​នេះ​​មួយ​រយៈ​កន្លង​មក​ហើយ​។​

លោកឲ្យ​ដឹងថា៖ «វា​ធ្វើ​ឲ្យ​រមាស់​ស្បែក ទោះបីជា​យើង​ដុស​សាប៊ូជម្រះ​ក៏​ដោយ យើង​មិន​ដឹង​ថា​មាន​អ្វី​នៅ​ក្នុងទឹក ហើយ​ក្នុង​រដូវ​ភ្លៀង​ទឹក​មាន​ក្លិន​ស្អុយ​អាក្រក់​កាន់​តែ​ខ្លាំង»។​

អ្នកភូមិ​និយាយថា ពី​រឆ្នាំ​បន្ទាប់ពី​មាន​បញ្ហានេះ​កើតឡើង មន្ត្រី​មូល​ដ្ឋាន​មិន​បានធ្វើ​​អ្វី​ ដើម្បី​ដោះស្រាយ​បញ្ហានេះទេ។ មន្ត្រី​មូល​ដ្ឋាន​អះអាង​ថា​មិន​ដឹង​អ្វី​ពីរោង​ចក្រ​នេះ និង​មូល​ហេតុ​នាំឲ្យ​មាន​ការ​បំពុល​នេះ​ដូច​គ្នា​។​. 

លោក ឆាយ សឿង មេឃុំ​ ក្នុង​ស្រុក​សំរោង​ទង មាន​ប្រ​សាសន៍ថា​អ្នក​ភូមិ៦៨​គ្រួសារ​ក្នុង​ភូមិ​តាំងស្នោ និង​អ្នក​ភូមិ​នៅ​ផ្នែក​ខាង​ក្រោម​ប្រឡាយ​៥៧គ្រួសារ​ទៀត បាន​ប្ដឹង​ពី​រឿង​ក្លិន​ស្អុយ និង​ទឹក​ឡើង​ពពុះ​​នេះ។

លោក​បន្ថែមថា៖ «អ្នក​រស់​នៅទី​នេះ ធ្លាប់​មក​ប្ដឹង​អាជ្ញាធរឃុំពីរឿង​នេះ ប៉ុន្តែតាំងពី​រោង​ចក្រ​ផ្អាក​ដំណើរ​ការ​មក មិនមាន​ក្លិន​ស្អុយ​ទៀតទេ ពល​រដ្ឋក៏​នៅ​ស្ងៀម​ឥឡូវនេះ គ្មាន​សំណូម​ពរ​អ្វីទៀត​ដែរនៅពេល​នេះ»។​ យ៉ាងណា លោក មេឃុំ រូប​នេះមិន​បាន​ដឹង​ទេ​រោង​ចក្រនេះ​មាន​ឈ្មោះអ្វី និង​ផលិត​អ្វី​នោះ។

អ្នកភូមិចោទប្រកាន់រោងចក្រ «គ្មានឈ្មោះ» ថាបានបំពុលប្រឡាយទឹកដែលពួកគាត់ធ្លាប់ប្រើប្រាស់ប្រចាំថ្ងៃ និងស្រោចស្រប់ដំណាំ។ ស៊ន សារ៉ាត

លោក​ ឯម សុគន្ធ ប្រធាន​មន្ទីរ​បរិស្ថាន​ខេត្ត​កំពង់ស្ពឺ មិនអាច​ទាក់ទង​សុំ​ការ​ឆ្លើយ​តប​ពី​បញ្ហានេះ​បានទេ​។​

អភិបាល​ខេត្ត​កំពង់​ស្ពឺ លោក វ៉ី សំណាង មានប្រសាសន៍​ថា​ លោក​មិន​បាន​ដឹងពី​បញ្ហានេះទេ និងថា​លោក​នឹង​បញ្ជូន​មន្ត្រី​មន្ទីរ​បរិស្ថាន​ឲ្យ​ទៅ​ពិនិត្យ​បញ្ហា​បំពុល​ទឹកអូរនេះ​។​

លោក ហាក់​មិន​សប្បាយ​ចិត្ត​ទៅ​នឹង​សំណួរ​ទាក់ទង​នឹង​អត្តសញ្ញាណ​របស់​ក្រុម​ហ៊ុន និង​ថា​តើ​ក្រុម​ហ៊ុននេះ​បាន​ចុះ​បញ្ជីត្រឹម​ត្រូវ​ឬ​យ៉ាងណា ដោយ​មិន​បាន​ដាក់​ស្លាក​ឈ្មោះ ឬ​ក៏​ព័​ត៌មាន​ពី​ក្រុម​ហ៊ុន​។​

លោក​មាន​ប្រ​សាសន៍ថា៖ «​ឲ្យ​ខ្ញុំ​ដឹង​យ៉ាងម៉េច ថា​ក្រុម​ហ៊ុន​មួយ​ណា ពីព្រោះ​មាន​ក្រុមហ៊ុន​រាប់​រយ​នៅ​ក្នុង​ខេត្ត​កំពង់​ស្ពឺ? ឲ្យពេល​ខ្ញុំ​ពិនិត្យ​លើ​រឿង​នេះ ហើយ​អរគុណ​ដែល​បាន​ផ្ដល់​ព័ត៌មាន​នេះ»។​

លោក​ រ័ត្ន ថាវី មន្រ្តី​សម្រប​សម្រួល​សមាគម​សិទ្ធិ​មនុស្ស​អាដហុក​ប្រចាំ​ខេត្ត​កំពង់ស្ពឺ មាន​ប្រសាសន៍ថាវា​ជា​រឿង​មិនប្រក្រតី ហើយទំនងជា​ខុស​ច្បាប់ ចំពោះ​ក្រុម​ហ៊ុន​ដែល​មិន​បាន​ដាក់​ឈ្មោះ និង​បង្ហាញ​ពី​សកម្មភាព​របស់​ខ្លួន។ លោក​បន្តថា វាក៏​ជា​រឿង​គួរ​ឲ្យ​ឆ្ងល់ដែរ ដែល​ថា​មន្ត្រី​មូល​ដ្ឋាន​មិន​បាន​ស្គាល់​ក្រុម​ហ៊ុន​មាន​ក្នុង​មូលដ្ឋាន​របស់​ខ្លួន។

លោក​ថា៖ «​វាមិន​មែនជា​រឿង​សម្ងាត់អីទេ»

លោកចោទជាសំណួរថា៖ «រដ្ឋាភិបាល ក៏​ដូច​ជា​មន្ត្រី​ខេត្ត​សុទ្ធតែមាន​បណ្ដាញ​នៅ​ថ្នាក់​ក្រោម ដូចនេះហេតុ​អ្វី​បានជា​ពួកគេ​មិន​ដឹង​រឿង​នេះ?» ​

អ្នកស្រី ឡាយ ជីវ័ន្ត កំពុង​អង្គុយ​នៅ​ក្រៅផ្ទះ​ធ្វើទ្រង់ចាប។ ស្រ្តី​វ័យ​៣៥​ឆ្នាំ​រូប​នេះ​រស់​នៅ​ក្នុង​ភូមិ​តាំងស្នោនេះដែរ និង​បាន​និយាយថា​ ជាការ​ពិត​ពេល​នេះ ទឹក​អូរ​លែង​មាន​ក្លិន​ទៀត​ហើយ តែ​អ្នក​ភូមិ​មិន​បាន​ប្រើ​ប្រាស់ទឹក​សម្រាប់បរិភោគ ឬ​ស្រោចស្រប់ដំណាំដូច​មុនទេ។

អ្នកស្រី​ យល់ឃើញ​ថា មន្ត្រី​ខ្លះអាច​បាន​លុយ​បាន​កាក់ពី​ក្រុម​ហ៊ុន ដើម្បី​មិន​ចាត់​ការ​លើ​ក្រុម​ហ៊ុន។​

អ្នកស្រី​បន្ថែមថា៖ «​ពួកគេ​បាន​លុយ ហើយ​ទុក​រឿង​ហ្នឹង​ចោល ដូច​លោក​បានដឹង​ហើយ​ ពេល​ដែលពួកគេ​បាន​លុយ ពួកគេ​ទុក​ចោល មិន​ស្វែង​រក​ដំណោះស្រាយ​ជូន​ប្រ​ជាជនទេ»។

ប្រែសម្រួលពីអត្ថបទភាសាអង់គ្លេស៖ Kampong Speu villagers allege “nameless” factory behind “black and bubbly” stream​

553 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »