យោងតាមអង្គការសេចក្តីសង្ឃឹមពិភពលោកអន្តរជាតិប្រចាំនៅកម្ពុជា បានឱ្យដឹងថា យុវជនចំនួន៣០ភាគរយ ក្នុងចំណោមយុវជនសរុប១៤៧នាក់ ដែលបានចូលរួមក្នុងការស្ទង់មតិមួយស្តីពីហានិភ័យដែលកុមារ និងយុវជនត្រូវប្រឈមនោះ ត្រូវបានរកឃើញថា ធ្លាប់រងការកេងប្រវ័ញ្ចផ្លូវភេទតាមប្រព័ន្ធអនឡាញ ខណៈ ៥២ភាគរយ អះអាងថា ពួកគេធ្លាប់ជួបប្រទះករណីឆបោកតាមប្រព័ន្ធអនឡាញ។
កាលពីព្រឹកថ្ងៃទី២៨ ខែតុលា អង្គការនេះ បានរៀបចំសិក្ខាសាលាពិគ្រោះយោបល់មួយស្តីពី ការរំលោភបំពាន និងការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ (OCSEA) និងការឆបោកតាមប្រព័ន្ធអនឡាញ។ នៅក្នុងសិក្ខាសាលាពិព្រោះយោបល់នេះមានការចូលរួមពីភាគីពាក់ព័ន្ធចំនួន១២០នាក់ ដើម្បីធ្វើបទបង្ហាញអំពីលទ្ធផល នៃការស្រាវជ្រាវ ប្រមូលមតិត្រឡប់ និងរៀបចំផែនការសកម្មភាព ដោយផ្អែកលើការស្រាវជ្រាវដែលដឹកនាំដោយយុវជន។
សិក្ខាសាលានេះក៏មានគោលបំណងពង្រឹងបណ្តាញរវាងមេដឹកនាំយុវជន និងអង្គការយុវជននានាទូទាំងប្រទេសកម្ពុជា ព្រមទាំងលើកទឹកចិត្តយុវជនឱ្យជំរុញឥរិយាបថវិជ្ជមាននៅតាមអនឡាញ និងការពារកុមារនៅក្នុងសហគមន៍របស់ពួកគេ។
ការសិក្សាមួយនៅឆ្នាំ២០២៦នេះ ដែលដឹកនាំដោយយុវជន មានចំណងជើងថា សំឡេងយុវជន ដើម្បីទប់ស្កាត់ការរំលោភបំពាន និងការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ (OCSEA) និងការឆបោកតាមអនឡាញនៅកម្ពុជា និងសម្របសម្រួលដោយអង្គការសេចក្តីសង្ឃឹមពិភពលោកអន្តរជាតិប្រចាំកម្ពុជា បានលើកឡើងពីហានិភ័យនានា ដែលកុមារ និងយុវជនកំពុងប្រឈម។
លទ្ធផល នៃការសិក្សានេះ បានបង្ហាញថា ការរំលោភបំពាន និងការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ (OCSEA) និងការឆបោកតាមអនឡាញ នៅតែជាកង្វល់ធ្ងន់ធ្ងរ និងកំពុងកើនឡើងនៅក្នុងប្រទេសកម្ពុជា។ កុមារ និងយុវជនប្រឈមមុខនឹងហានិភ័យកាន់តែខ្លាំងឡើង ដោយសារកង្វះចំណេះដឹងអំពីសុវត្ថិភាពឌីជីថល ការជឿទុកចិត្តខ្លាំងពេកលើទំនាក់ទំនងតាមអនឡាញ ការខ្វះការត្រួតពិនិត្យពីឪពុកម្តាយ ភាពងាយរងគ្រោះផ្នែកផ្លូវចិត្ត និងសម្ពាធផ្នែកសេដ្ឋកិច្ច។
ហានិភ័យទាំងនេះ ត្រូវបានរាយការណ៍ថា កើតមាននៅរាជធានីភ្នំពេញ តំបន់ប្រជុំជនក្រុងផ្សេងទៀត និងសហគមន៍នៅតាមបណ្តាខេត្ត។ ភាគីពាក់ព័ន្ធក៏បានរាយការណ៍ផងដែរថា កុមារ ដែលមានអាយុពី៣ឆ្នាំ ដល់១៣ឆ្នាំ ធ្លាប់ជួបប្រទះសម្ភារៈរំលោភបំពានផ្លូវភេទកុមារ (CSAM) ខណៈយុវជនដែលមានអាយុពី១៥ ដល់ ៣០ឆ្នាំ ងាយរងគ្រោះជាពិសេសចំពោះការគំរាមទារប្រាក់តាមអនឡាញ ដោយប្រើប្រាស់រឿងអាស្រូវផ្លូវភេទ។
យោងតាមការស្រាវជ្រាវដដែលនេះ ជនឆបោកតាមអនឡាញប្រើប្រាស់ល្បិចកលផ្សេងៗគ្នា រួមមាន ការប្រើតំណភ្ជាប់ក្លែងក្លាយ ការលួចទិន្នន័យ ការផ្តល់ជូនការងារក្លែងក្លាយ ការឆបោកដោយសន្យាផ្តល់រង្វាន់ និងការកេងប្រវ័ញ្ចតាមរយៈកម្មវិធីស្វែងរកដៃគូស្នេហាជាដើម។
របាយការណ៍ស្រាវជ្រាវនេះ បានលើកឡើងថា៖ «ការយល់ដឹងអំពីការរំលោភបំពាន និងការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ (OCSEA) និងការឆបោកតាមអនឡាញ ក្នុងចំណោមកុមារ និងយុវជន នៅមានកម្រិតនៅឡើយ ដែលនេះបង្ហាញពីតម្រូវការបន្ទាន់ក្នុងការពង្រឹងការលើកកម្ពស់ការយល់ដឹង ការបង្ការ និងការផ្តល់ការគាំទ្រដោយមានការសម្របសម្រួលរវាងភាគីពាក់ព័ន្ធនានា ទាំងនៅថ្នាក់ជាតិ និងថ្នាក់ក្រោមជាតិ»។
ការអំពាវនាវឱ្យពង្រឹងវិធានការបង្ការ
ផូ ម៉ារីហ្សា ជាតំណាងយុវជនម្នាក់ដែលបានចូលរួមក្នុងការស្រាវជ្រាវនេះ បានប្រាប់ខេមបូចាព័ត៌មានថា ការសិក្សានេះ គ្របដណ្តប់លើរាជធានីភ្នំពេញ និងខេត្តមណ្ឌលគិរី ដោយបានធ្វើការស្ទង់មតិលើមនុស្សប្រហែល ៥២០នាក់។
ផូ ម៉ារីហ្សា បាននិយាយថា ក្នុងចំណោមអ្នក ដែលត្រូវបានស្ទង់មតិមាន ២១៩នាក់បានរាយការណ៍ថា ពួកគេបានជួបប្រទះនឹងការកេងប្រវ័ញ្ចផ្លូវភេទតាមអនឡាញ។ អ្នកចូលរួមស្ទង់មតិប្រហែល ៣០០នាក់បានជួបប្រទះនឹងការឆបោកតាមអនឡាញ ហើយ៦០% នៃក្រុមដដែលនេះ មិនដឹងថា ត្រូវស្វែងរកជំនួយនៅឯណាឡើយ។
ម៉ារីហ្សា បានព្រមានថា ប្រសិនបើគ្មានការឆ្លើយតបជាប្រព័ន្ធនិងមានការសម្របសម្រួលទេនោះ កុមារ និងយុវជននឹងបន្តប្រឈមនឹងផលវិបាក នៃការកេងប្រវ័ញ្ច និងការឆបោកតាមអនឡាញ ខណៈការយល់ដឹង ការស្វែងរកជំនួយ និងការឆ្លើយតបចំពោះបញ្ហាទាំងនេះ នៅមានកម្រិត។
យុវតីរូបនេះបាននិយាយថា៖ «យើងគួរតែបង្កើនការយល់ដឹងជាសាធារណៈ ជាពិសេសតាមរយៈក្រសួងពាក់ព័ន្ធ រួមទាំងការផ្តល់ការបណ្តុះបណ្តាលនៅតាមសាលារៀន និងការប្រើប្រាស់ប្រព័ន្ធផ្សព្វផ្សាយ ដើម្បីជួយឱ្យកុមារ និងយុវជនយល់ដឹងអំពីហានិភ័យនានា និងចេះការពារខ្លួន»។
ម៉ារីហ្សា សង្ឃឹមថា ភាគីពាក់ព័ន្ធនឹងប្រើប្រាស់លទ្ធផល នៃការស្រាវជ្រាវនេះ ដើម្បីឆ្លើយតប និងទប់ស្កាត់ការកេងប្រវ័ញ្ចផ្លូវភេទតាមអនឡាញ ព្រមទាំងការឆបោក ដែលផ្តោតគោលដៅលើកុមារ និងយុវជននៅក្នុងប្រទេសកម្ពុជា។
ម៉ារីហ្សា បាននិយាយថា៖ «ខ្ញុំចង់ឃើញកុមារ និងយុវជនមានសុវត្ថិភាពនៅលើប្រព័ន្ធអនឡាញ ព្រមទាំងមានលទ្ធភាពចូលរួមក្នុងការទប់ស្កាត់បញ្ហាទាំងនេះ»។
ការឆ្លើយតបដែលមានការសម្របសម្រួល
លោកស្រី ញ៉េប សុភាព រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា បានមានប្រសាសន៍ថា ការរំលោភបំពាន និងការកេងប្រវ័ញ្ចលើកុមារ និងយុវជនតាមប្រព័ន្ធអនឡាញ គឺជាបញ្ហាសកលមួយ ដែលកំពុងប៉ះពាល់ដល់ប្រទេសកម្ពុជាផងដែរ។
លោកស្រីបានអំពាវនាវដល់ភាគីពាក់ព័ន្ធនានា រួមទាំងឪពុកម្តាយ និងអាណាព្យាបាល អង្គការសង្គមស៊ីវិល ស្ថាប័នអនុវត្តច្បាប់ និងក្រុមហ៊ុនបច្ចេកវិទ្យារួមគ្នាទប់ស្កាត់ការរំលោភបំពាន ប្រយុទ្ធប្រឆាំងនឹងការកេងប្រវ័ញ្ច និងការពារកុមារ។
ស្របពេលដែលលទ្ធភាពទទួលបានសេវ៉ាអ៊ីនធឺណិតកាន់តែទូលំទូលាយនៅក្នុងប្រទេសកម្ពុជា កុមារ និងយុវជនប្រើប្រាស់អ៊ីនធឺណិតកាន់តែច្រើនឡើង។ លោកស្រីបានលើកឡើងថា ការសិក្សាសកលនាពេលថ្មីៗនេះ ស្តីពីការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញនៅកម្ពុជា បានរកឃើញថា ជាង៨០ភាគរយ នៃកុមារ ដែលមានអាយុពី១២ ដល់១៧ឆ្នាំ បានប្រើប្រាស់អ៊ីនធឺណិត និងភ្ជាប់ទំនាក់ទំនងតាមអនឡាញញឹកញាប់ជាងមនុស្សពេញវ័យ។
កម្រិតនៃគ្រោះថ្នាក់ដែលកុមារ និងយុវជនបានជួបប្រទះ បានបញ្ជាក់ឱ្យឃើញពីភាពចាំបាច់នៃការស្តារនីតិសម្បទាទាំងផ្នែករាងកាយ និងផ្លូវចិត្ត ដោយមានការគាំទ្រពីឪពុកម្តាយ និងអាណាព្យាបាល អ្នកឯកទេស និងសហគមន៍។
លោកស្រី សុភាព បានមានប្រសាសន៍ថា ក្រុមប្រឹក្សាជាតិកម្ពុជា ដើម្បីកុមារ បានរៀបចំផែនការសកម្មភាពឆ្នាំ២០២១-២០២៥ ដើម្បីទប់ស្កាត់ និងឆ្លើយតបទៅនឹងការរំលោភបំពាននិងការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ។
ក្រសួងរបស់លោកស្រីក៏បានអនុវត្តយុទ្ធនាការសម្រាប់គ្រួសារផងដែរ ដើម្បីលើកកម្ពស់ការយល់ដឹង ទប់ស្កាត់អំពើហិង្សា ជៀសវាងការបំបែកកុមារចេញពីគ្រួសារដោយមិនចាំបាច់ និងប្រយុទ្ធប្រឆាំងនឹងការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ។
លោកស្រី សុភាព បានថ្លែងថា៖ «យើងកំពុងរៀបចំសេចក្តីព្រាងច្បាប់ស្តីពីការការពារកុមារ ដែលនឹងរាប់បញ្ចូលការការពារកុមារពីការរំលោភបំពាន និងការកេងប្រវ័ញ្ច រួមទាំងការរំលោភបំពាន ដែលប្រព្រឹត្តឡើងតាមប្រព័ន្ធអនឡាញផងដែរ»។
លោកស្រីបានបង្ហាញក្តីសង្ឃឹមថា ភាពជាដៃគូក្នុងចំណោមភាគីពាក់ព័ន្ធនានានឹងអាចដោះស្រាយបញ្ហាផ្សេងៗ ព្រមទាំងកសាងអនាគតឌីជីថល ដែលមានសុវត្ថិភាពជាងមុន សម្រាប់កុមារ និងយុវជនកម្ពុជា។
លោកស្រីបន្តទៀតថា៖ «ខ្ញុំសង្ឃឹមថា តាមរយៈភាពជាដៃគូរបស់យើង យើងអាចដោះស្រាយបញ្ហាទាំងនេះ និងបោះជំហានទៅរកអនាគតមួយប្រកបដោយក្តីសង្ឃឹម និងសុវត្ថិភាព សម្រាប់កុមារ និងយុវជននៅក្នុងប្រទេសកម្ពុជា។ សូមឱ្យយើងទាំងអស់គ្នាធ្វើការរួមគ្នា ដើម្បីសុវត្ថិភាពឌីជីថល»។
កិច្ចសហប្រតិបត្តិការកាន់តែទូលំទូលាយ
យោងតាមអង្គការយូនីសេហ្វ (UNICEF) ប្រចាំនៅកម្ពុជាបានឱ្យដឹងថា កុមារជាង១៦០ ០០០ នាក់នៅក្នុងប្រទេសនេះ ធ្លាប់បានជួបប្រទះការរំលោភបំពាន និងការកេងប្រវ័ញ្ចផ្លូវភេទតាមប្រព័ន្ធអនឡាញ។
របាយការណ៍មួយរបស់អង្គការយូនីសេហ្វ បានប៉ាន់ប្រមាណថា កុមារប្រហែល ២០លាននាក់ ដែលមានអាយុពី១២ ទៅ១៧ឆ្នាំ នៅក្នុងប្រទេសចំនួន២១ ឬស្មើនឹង ១នាក់ក្នុងចំណោម៥ នាក់ បានរងគ្រោះដោយសារការកេងប្រវ័ញ្ច និងការរំលោភបំពានផ្លូវភេទតាមរយៈប្រព័ន្ធបច្ចេកវិទ្យា ក្នុងរយៈពេលតែមួយឆ្នាំប៉ុណ្ណោះ។
របាយការណ៍ ដែលមានចំណងជើងថា៖ «តាមរយៈក្រសែភ្នែករបស់កុមារ៖ របៀបដែលបច្ចេកវិទ្យាឌីជីថលអាចបង្កឱ្យមានការរំលោភបំពានផ្លូវភេទលើកុមារ» ដែលបានចេញផ្សាយនៅថ្ងៃទី៣ ខែកញ្ញា គឺផ្អែកលើការស្ទង់មតិ ដែលតំណាងឱ្យកម្រិតទូទាំងប្រទេស ទៅលើកុមារប្រមាណ ២១ ០០០នាក់ ដែលប្រើប្រាស់អ៊ីនធឺណិត ព្រមទាំងការរៀបរាប់ពីបទពិសោធន៍ផ្ទាល់ នៃការរំលោភបំពាន ដែលពួកគេបានជួបប្រទះ។
កម្ពុជា គឺជាប្រទេសមួយក្នុងចំណោមប្រទេសទាំង១២ ដែលត្រូវបានរួមបញ្ចូលនៅក្នុងការស្រាវជ្រាវជុំទីមួយ ដែលបានធ្វើឡើងក្នុងឆ្នាំ២០២០ និង២០២១ ក្រោមគម្រោង «ការបញ្ឆប់គ្រោះថ្នាក់នៅកម្ពុជា» ដែលទទួលបានមូលនិធិពីអង្គការ Safe Online។
លោកស្រី អ៊ីម៉េលីតា សាន់តូស ហ្គដដាដ (Emelita Santos Goddard) នាយិកាប្រចាំប្រទេសនៃអង្គការសេចក្តីសង្ឃឹមពិភពលោកអន្តរជាតិ (World Hope International) បានប្រាប់សារព័ត៌មានខេមបូចាថា ការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ និងការឆបោកតាមអនឡាញ កំពុងក្លាយជាក្ដីបារម្ភកាន់តែខ្លាំងឡើង ដោយការសិក្សាស្រាវជ្រាវបានបង្ហាញថា យុវជនកាន់តែងាយរងគ្រោះដោយសារការកេងប្រវ័ញ្ចទាំងនេះ។
លោកស្រីបានលើកឡើងថា លទ្ធផលទាំងនេះ គឺផ្អែកលើការសិក្សារយៈពេល ៣សប្តាហ៍ ដែលមានយុវជនជាង ៥២០នាក់ចូលរួម នៅក្នុងរាជធានីភ្នំពេញ និងខេត្តមណ្ឌលគិរី។ អ្នកចូលរួមប្រមាណ ៧០ភាគរយ បានបង្ហាញឆន្ទៈក្នុងការចាត់វិធានការដោះស្រាយបញ្ហាទាំងនោះ ដែលលោកស្រីបានចាត់ទុកថា ជាបញ្ហាប្រឈមផង និងជាឱកាសផង។
លោកស្រី ហ្គដដាដ បានមានប្រសាសន៍ថា៖ «វាជារឿងគួរឱ្យព្រួយបារម្ភ ដែលយុវជនខ្លួនឯងក្លាយជាជនរងគ្រោះ ឬរងការកេងប្រវ័ញ្ច ប៉ុន្តែក៏ជារឿងគួរឱ្យរីករាយផងដែរ ដែលយុវជនទាំងនោះ មានឱកាសក្នុងការចាត់វិធានការដោយខ្លួនឯង»។
លោកស្រីបានមានប្រសាសន៍ថា អង្គការរសេចក្តីសង្ឃឹមពិភពលោកអន្តរជាតិ គ្រោងនឹងផ្តោតលើរាជធានីភ្នំពេញ និងខេត្តមណ្ឌលគិរី ដោយសហការជាមួយអង្គការសង្គមស៊ីវិល និងស្ថាប័នរដ្ឋាភិបាល ដើម្បីពង្រីកវិសាលភាពការងាររបស់ខ្លួន។
លោកស្រី ហ្គដដាដ បានអះអាងថា ការបង្កើតឧបករណ៍អនឡាញ ដែលងាយស្រួលចូលប្រើប្រាស់ អាចជួយកុមារ និងយុវជនការពារខ្លួនឯងបាន ដោយបន្ថែមថា ការកេងប្រវ័ញ្ចតាមអនឡាញ គឺជាបញ្ហាមួយ ដែលមិនមែនកើតឡើងតែនៅក្នុងប្រទេសកម្ពុជាប៉ុណ្ណោះទេ ប៉ុន្តែបានរាលដាលហួសពីព្រំដែនកម្ពុជាទៅទៀត។
លោកស្រីក៏បានអំពាវនាវឱ្យមានការសម្របសម្រួលកាន់តែរឹងមាំពីសំណាក់រដ្ឋាភិបាល នៅក្នុងការរៀបចំផែនការ និងការរៀបចំថវិកា ដើម្បីធានាថា ជនរងគ្រោះពីការរំលោភបំពាន និងការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ ព្រមទាំងជនរងគ្រោះពីការឆបោកតាមអនឡាញ អាចទទួលបានការគាំទ្រ។
លោកស្រីបានលើកឡើងថា អាជ្ញាធរមូលដ្ឋាន ជាពិសេសនៅថ្នាក់ឃុំ និងភូមិ ចាំបាច់ត្រូវមានសមត្ថភាពកាន់តែខ្លាំង និងការចូលរួមបន្ថែមទៀតនៅក្នុងកិច្ចខិតខំប្រឹងប្រែងទាំងនេះ។
ដោយសំដៅទៅលើមន្ត្រីថ្នាក់មូលដ្ឋាន លោកស្រី ហ្គដដាដ បានមានប្រសាសន៍ថា៖ «ប្រសិនបើយើងផ្តល់អំណាចដល់ពួកគេ និងពង្រឹងសមត្ថភាពពួកគេ នោះពួកគេនឹងបង្កើតឱ្យមានការផ្លាស់ប្តូរដ៏ធំមួយ»។
ការស្រាវជ្រាវដោយអង្គការបេសកកម្មយុត្តិធម៌អន្តរជាតិ (International Justice Mission) និងទិន្នន័យពីមជ្ឈមណ្ឌលជាតិសហរដ្ឋអាមេរិកសម្រាប់កុមារបាត់ខ្លួន និងកុមាររងការកេងប្រវ័ញ្ច (U.S. National Center for Missing and Exploited Children) បានភ្ជាប់ករណី នៃការគំរាមទារប្រាក់និងការកេងប្រវ័ញ្ចផ្លូវភេទលើកុមារនៅទូទាំងពិភពលោកទៅនឹងទីតាំងឆបោកតាមប្រព័ន្ធបច្ចេកវិទ្យា និងប្រតិបត្តិការជួញដូរមនុស្សនៅក្នុងប្រទេសកម្ពុជា មីយ៉ាន់ម៉ា និងឡាវ៕
ប្រែសម្រួលពីអត្ថបទភាសាអង់គ្លេស៖ Survey Shows Cambodian Youth Face Online Sexual Exploitation, Scams
